2 Kings 5:1-27
5 Kʼad Síriya dineʼé aláahgo binanitʼaʼí bisiláo dah deínéehii binanitʼaʼí Néíyaman éí bóhojíłníihii bichʼįʼgo diné ayóó átʼéii índa diné ílíinii jílı̨́, háálá hó hwee Bóhólníihii éí Síriya dineʼé yisdáyíínil; diné bíiyisii bidziilii ałdóʼ jílı̨́, nidi łóód atsʼíís yiyáanii naałdzidii bee hąąh dah hazʼą́.
2 Síriyadóó siláo dah naazhjaaʼgo chʼídahaazná yę́ędą́ą́ʼ Ízrel dineʼé bikéyahdóó atʼééd yázhí léiʼ deisnáago yił nídaaskaigo éí Néíyaman beʼasdzą́ą́ yá naalʼaʼ.
3 Áko atʼééd éí yá naalʼaʼí ííłní, Dooládóʼ shinanitʼaʼí Samériyadi Diyin God yá halneʼii naagháhígíí yił naaʼaash laanaa nisin! Háálá éí łóód atsʼíís yiyáanii naałdzidii bee hąąh dah hazʼánígíí há néidoołdzih.
4 Nítʼééʼ łaʼ yah ajííyáago honanitʼaʼí bił hojoolneʼgo ábijiní, Ízrel dineʼé bikéyahdę́ę́ʼ atʼééd naagháhígíí kóníigo gaʼ haadzííʼ.
5 Áádóó Síriya dineʼé aláahgo binanitʼaʼí ání, Kʼad ákǫ́ǫ́ dínááh, áko Ízrel dineʼé aláahgo binanitʼaʼí éí bichʼįʼ naaltsoos ádeeshłííł.
Áko neeznáago béésh łigaii tálent* wolyéii, áádóó hastą́ądi mííl óola shékel* wolyéii índa ééʼ neeznáá ałnááhooʼnił bíighahgo nízhdiinilgo ákǫ́ǫ́ dashdiiyá.
6 Áko Ízrel dineʼé aláahgo binanitʼaʼí naaltsoos baazhníłtsoozígíí biiʼdóó kóní, Kʼad díí naaltsoos neíltsoozgo, jó, shá naalʼaʼí Néíyaman éí łóód atsʼíís yiyáanii naałdzidii bee bąąh dahazʼánígíí nídííłdzih biniyé bił naa níłʼaʼ.
7 Nítʼééʼ Ízrel dineʼé aláahgo binanitʼaʼí naaltsoos yiyííłtaʼgo, biʼééʼ ádąąh nayooldláadgo ání, Daʼ shíísh Diyin God nishłı̨́įgo adiyeeshxééł índa iináago áńdeeshdlíiłgo díí diné léiʼ łóód atsʼíís yiyáanii naałdzidii bee bąąh dahazʼáanii hadaałtʼé áńdeeshdlííł biniyé shichʼįʼ ayííłʼaʼ lá? Shoo, baa nitsídaahkees, eii shinídidooltłiłígíí yiniyé shíkaʼiiłhil.
8 Áádóó Diyin God yá naalʼaʼí Iiláísha éí Ízrel dineʼé aláahgo binanitʼaʼí biʼééʼ ákʼiyooldláadgo yaa hodiiztsʼą́ąʼgo aláahgo naatʼáanii yichʼįʼ iʼííłʼaʼgo ání, Haʼátʼíí lá biniyé niʼééʼ ákʼinéíníldláád? Kʼad bíniʼdii shaa yíghááh, áko Ízrel dineʼé bikéyahgi Diyin God yá halneʼii hólǫ́ǫgo hoł bééhodoozįįł.
9 Kótʼéego Néíyaman bilı̨́ı̨́ʼ áádóó tsinaabąąs bijáád naakiígíí yee níyáago Iiláísha bighan bichʼéédą́ą́ʼdóó sizı̨́.
10 Áádóó Iiláísha éí haneʼ yił naalʼaʼí hachʼįʼ ayííłʼaʼgo ání, Nílááh, Jórdan tooh biiʼ tsostsʼidi ninádííbeełgo nitsįʼ nąąh náhodoodleełgo doo ánítʼéhí da nídíídleeł.
11 Nidi Néíyaman báhóóchįįdgo dah nídiidzáago ání, Shą́ą́ʼ hanii shichʼįʼ chʼízhdoogáałgo shidááhdóó yizdoozįįłgo Bóhólníihii haDiyin God yízhdóozhiiłgo hálaʼ bee shikááʼ tázhdidoolnihgo shilóód nízhdoołdzih nisin nítʼééʼ.
12 Damáskas kéyahdi Abána áádóó Fárpar tooh nílínígíí éí Ízrel dineʼé bikéyahgi tooh danílígíí tʼáá ałtso biláahdi yáʼátʼééh. Éí biiʼ táʼádísgizgoósh doo nídeesdzih da? Áádóó tʼáá íiyisí báháchįʼgo dah nídiidzá.
13 Nidi há nidaalʼaʼí hwíighahjįʼ niikaigo hachʼįʼ hadaasdzíiʼgo ádaaní, Nihizhéʼé nílíinii, Diyin God yá halneʼii tʼáadoo leʼé ayóó átʼéii ádíílííł niłníigoósh doo ádíílíił da? Táʼádidíígisgo nídíídzih, niłnínígíí yeeʼ doo nantłʼa da.
14 Áádóó ákóyaa dah diiyáago Diyin God yá naalʼaʼí ádííniidígíí bikʼehgo Jórdan tooh biiʼ tsostsʼidi ninázbı̨́ı̨́ʼ, áádóó halóód náádzíiʼgo áłchíní bitsʼísígi átʼéego hatsʼíís náhásdlı̨́ı̨́ʼ índa hoʼdéédeeʼ.
15 Áádóó bił nijikaígíí bił nátʼą́ą́ʼ níjíkaigo Diyin God yá naalʼaʼí baazhníyáago bidááhdę́ę́ʼ dziizįʼgo ájíní, Jó, Ízrel dineʼé bikéyahgi Diyin God hólónígi átʼéego nihokááʼgóó tʼáá átʼéé nítʼééʼ doo łaʼ hólǫ́ǫ dago shił bééhoozin; éí bąą kʼad, ná naalʼaʼí neidooléłígíí nídiilé, baa nánooshkąąh.
16 Nidi Iiláísha ání, Bóhólníihii bidááhdóó sézínígíí tsʼídá tʼáá aaníí hiná; ákótʼéego tsʼídá tʼáá aaníí doo łaʼ nídideeshłéeł da. Nidi nízhdidoolééł biniyé chʼééh yíhoniyodgo doo íiznízin da.
17 Áádóó Néíyaman ání, Éí doodago bíniʼdii dzaanééz naaki hééł yooyééł bíighahgo ná naalʼaʼí bá łeezh hééł ádoolnííł, baa nánooshkąąh? Háálá ná naalʼaʼí kodóó doo diyin dabidiʼníinii yichʼįʼ didlidgo nínáádiʼyoołnih da, nidi Bóhólníihii bichʼįʼgo tʼéiyá.
18 Díí kósdzaaígíí bee Bóhólníihii éí ná naalʼaʼí yaa joobaʼ leʼ, jó, shinanitʼaʼí bidiyin Ríman yichʼįʼ nahodoołaał biniyé bikin góneʼ shigaan yótąʼgo bił yah anáshtʼashgo áádóó Ríman bikin góneʼ yaa ánáshtʼįįhgo díí kósdzaaígíí Bóhólníihii ná naalʼaʼí yá yóóʼanéididooʼááł.
19 Iiláísha áháłní, Nichʼįʼ hózhǫ́ǫgo náádáał leʼ.
Nítʼééʼ bitsʼą́ą́ʼ dah nízhdiidzáago tʼáá áhą́díjįʼ nizhníyáago
20 Diyin God yá naalʼaʼí Iiláísha bá naalʼaʼí Giihéízai ání, Shoo, shinanitʼaʼí díí Síriya diné Néíyaman yiníjaaʼígíí tʼáadoo bá nízhdiinilgóó bá baa hą́ą́s niizı̨́įʼgo tʼóó bił béézhníłniiʼ; tsʼídá tʼáá aaníí Bóhólníihii hiná; ákótʼéego tsʼídá tʼáá aaníí éí diné bikééʼ nídideeshwołgo tʼáadoo leʼé sheidoolééł.
21 Áko Giihéízai éí Néíyaman bikééʼ jiníyá. Áádóó Néíyaman bikééʼ joolwołgo hoołtsą́ índa bitsinaabąąs bijáád naakiígíí yiiʼdę́ę́ʼ hadááyáago hadááh níyáago ání, Yáʼádahootʼééhésh?
22 Áádóó ájíní, Aooʼ, yáʼádahootʼééh. Shinanitʼaʼí shííłʼaadgo ání, Jó, áníídíyeeʼ Íífreiyim kéyah daadziłdę́ę́ʼ Diyin God yá dahalneʼii bídahoołʼaahígíí łaʼ dinééh nidiltʼéego shaa níʼáázh; béésh łigaii tálent wolyéii áádóó ééʼ naaki ałnááhooʼnił bíighahgo baa díínił, baa nánooshkąąh, niłní.
23 Áádóó Néíyaman ání, Tálent wolyéii naakigo nídiiníiłgo nił sih leʼ. Áko bízhníyodgo béésh łigaii tálent wolyéii naaki azis bee índa ééʼ naaki ałnááhooʼnił bíighahgo ałchʼįʼ beʼestłʼǫ́ǫgo há naalʼaʼí naakigo éí binéʼézhdéenilgo Giihéízai yilą́ąjįʼ dah yidiiłjid.
24 Nítʼééʼ yílkʼid léiʼgi jíkaigo bílákʼee hajíínilgo kin góneʼ yah ajííjaaʼ, áádóó diné béézhníłniiʼgo dah nídiitʼáázh.
25 Áko yah ajííyáago hananitʼaʼí bidááhdóó nizhníyá. Áádóó Iiláísha áháłní, Giihéízai, háádę́ęʼgo lá yínááł? Áko ájíní, Ná naalʼaʼí doo háájída naayáa da.
26 Nidi ábijiní, Éí diné bitsinaabąąs bijáád naakiígíí yiiʼdę́ę́ʼ hadááyáago nidááh níyáádą́ą́ʼ daʼ doósh shiníłchʼi nił hólǫ́ǫ da nítʼééʼ? Daʼ béeso áádóó ééʼ áádóó áliv yílʼáhígíí áádóó chʼil naʼatłʼoʼii yílʼáhígíí áádóó dibé áádóó béégashiida áádóó diné nidaalʼaʼí índa asdzání nidaalʼaʼí nídidoolyééłísh baa hoolzhiizh?
27 Éí bąą Néíyaman éí łóód atʼíís yiyáanii naałdzidii bee bąąh dah hazʼánígíí nididoolnah kʼad áádóó naʼáłchíní náás ahoolchíiłii ałdóʼ hoolʼáágóó bitah yiłnih doo. Índa yasgi átʼéego łigaigo łóód atsʼíís yiyáanii naałdzidii hodoolnaʼgo Iiláísha bitsʼą́ąjįʼ dashdiiyá.
Footnotes
^ Tálent wolyéii tsostsʼidiindóó baʼaan ashdlaʼ dah hidiidloh bíighahgo óolyé.
^ Tádiindóó baʼaan naaki óola shékel wolyéii éí tʼááłáʼí dah hidiidloh.
