2 Kings 6:1-33
6 Áko Diyin God yá dahalneʼii bídahoołʼaahígíí éí Iiláísha ádeiłní, Shoo, díí nił kééhwiitʼínígi tʼáá íiyisí doo nihihóoghah da.
2 Haaʼíyeeʼ, baa nániikąąh, Jórdan toohgóó diikahgo diné tʼááłáʼí nítínígo tsin bikʼeh nítą́ągo ákǫ́ǫ́ deidoojih; éí bee áadi hooghan ádadiilníiłgo ákwii kééhwiitʼı̨́į doo. Áko, Nihílááh dohkááh, bizhdííniid.
3 Nítʼééʼ łaʼ áháłní, Nił tʼáá ákogo ná nidaalʼaʼí bił díkááh, baa nánooshkąąh. Áko hadzoodzíiʼgo ájíní, Deeshááł lą́ą.
4 Áko bił dashdiikaigo Jórdan toohgi jíkaigo ákwii tsin dadzitseeł.
5 Nidi łaʼ tsin kʼíjíłneʼ nítʼééʼ tsénił bitsiitsʼiin hatsʼą́ą́ʼ baa diiltsʼidgo taah yiltsʼid, áko hazhdoolghaazhgo ájíní, Héiʼ, bóhonishníihii, tsénił tʼóó shaʼítʼą́ą́ nítʼééʼ.
6 Áko Diyin God yá naalʼaʼí ání, Háá góyaashąʼ eeltsʼid? Kóyaa eeltsʼid, bijiní. Iiláísha tsintsʼósí łaʼ kʼíinígizhgo ákóyaa ayiyííłhango tsénił táłkááʼ haazʼéél.
7 Nídiiʼaah, hozhdííniidgo bíká azhdoolniiʼgo nízhdiiʼą́.
Iiláísha áádóó Síriya dineʼé
8 Nítʼééʼ Síriya dineʼé aláahgo binanitʼaʼí éí Ízrel dineʼé yichʼįʼ anaaʼ dahasłı̨́ı̨́ʼ, áko bá nidaalʼaʼí yił yaa nídaastʼįįdgo ání, Tsʼídá ákweʼé hazʼą́ą́ léiʼgi nideeshnééł.
9 Áádóó Diyin God yá naalʼaʼí éí Ízrel dineʼé aláahgo binanitʼaʼí yichʼįʼ iʼííłʼaʼgo ání, Tʼááká ákǫ́ǫ́ dóónééł yíilaʼ, háálá Síriya dineʼé ákóyaa deezná.
10 Áko Ízrel dineʼé aláahgo binanitʼaʼí éí Diyin God yá naalʼaʼí éí nahósʼaʼígi yee hoł hoolneʼígóó iʼjííłʼaʼ. Ákótʼéego doo tʼááłáhídi, doodaiiʼ doo naakidi hoł náhóóniʼgo biniitʼaa yisdánídzoodzá, nidi díkwíidi shı̨́ı̨́ yisdájííyá.
11 Díí biniinaa Síriya dineʼé aláahgo binanitʼaʼí tʼáá íiyisí biʼdiiłʼáago bá nidaalʼaʼí hágo yidííniidgo ííłní, Nihitahdóoshąʼ háí Ízrel dineʼé aláahgo binanitʼaʼí yichʼijí nilínígíísh doo bee shił dahołneʼ da?
12 Áko há nidaalʼaʼí łaʼ ání, Ádin, doo łaʼ da, shinanitʼaʼí aláahgo naatʼáanii nílíinii, nidi Ízrel dineʼé bitahgi Diyin God yá halneʼii Iiláísha éí nítéhí góneʼ bee hahídziihígíí Ízrel dineʼé aláahgo binanitʼaʼí yee yił halneʼ.
13 Áádóó ájíní, Nílááh, sidáhígi hadaʼdoohsił, áko ákǫ́ǫ́ adeeshʼaałgo hwiideestsoł. Nítʼééʼ, jó, Dóthan kin haalʼáadi naaghá, daaníigo hoł dahoolneʼ.
14 Áko siláo dah deínéehii tʼóó ahayóí éí łı̨́ı̨́ʼ áádóó tsindaabąąs bijáád naakiígíí yee yinéełgo ákǫ́ǫ́ ayiisʼaʼ, áádóó tłʼéeʼgo áá nínáago kin haalʼá yináshzhiizh.
15 Diyin God yá naalʼaʼí bá naalʼaʼí tʼah abíínídą́ą́ʼ nídiiʼnaʼgo chʼíníyá, nítʼééʼ, shoo, siláo tʼóó ahayóí áádóó łı̨́ı̨́ʼ índa tsindaabąąs bijáád naakiígíí éí kin haalʼá yinásʼáago yiyiiłtsą́. Áko naalʼaʼí áháłní, Héiiʼ, bóhonishníihii, haashąʼ diiʼnííł?
16 Áádóó hadzoodzííʼ, Tʼáadoo nił yéʼí, háálá nihí nihichʼijí danilínígíí áájí yichʼijí danilínígíí yiláahgo ánéelą́ą́ʼ.
17 Áko Iiláísha sodoolzingo ání, Bóhólníihii, baa nánooshkąąh, díí dinééh iidoołtsééł biniyé binááʼ ąą ánílééh. Nítʼééʼ Bóhólníihii dinééh binááʼ ąą áyiilaago, shoo, dził bąąh łı̨́ı̨́ʼ áádóó tsindaabąąs bijáád naakiígíí daakǫʼgo yílʼáago Iiláísha yinásʼáago yiyiiłtsą́.
18 Áádóó Síriya diné hachʼįʼ hadaakaigo Iiláísha éí Bóhólníihii yichʼįʼ sodoolzingo ání, Díí diné doo daʼooʼı̨́ı̨́góó ádanileʼ baa nánooshkąąh. Áko Iiláísha sodoolzinígíí bikʼehgo diné doo daʼooʼı̨́į da daazlı̨́ı̨́ʼ.
19 Áádóó Iiláísha áháłní, Kojigo dooda, doo nidi kweʼé kin haalʼáhígíí átʼée da; wóshdę́ę́ʼ shikééʼ wohkahgo diné hadanohtáhígíí baa nihideeshʼish. Nidi Samériya kin haalʼáágóoda bił jíkai.
20 Áko Samériya kin haalʼáagi yah ajookaigo Iiláísha ání, Bóhólníihii, díí diné daʼooʼı̨́ áńdandleʼ, áko daʼooʼı̨́į doo. Nítʼééʼ Bóhólníihii éí daʼjooʼı̨́ áńdahoodlaago, shoo, Samériya kin haalʼá ałníiʼgi ádajitʼı̨́ı̨́ lágo baa ákodazniizı̨́ı̨́ʼ.
21 Áádóó Ízrel dineʼé aláahgo binanitʼaʼí éí yiyiiłtsą́ągo Iiláísha ííłní, Shizhéʼé, daʼ díí siláo naastseedísh? Naastseedísh?
22 Áko hadzoodzíiʼgo ájíní, Doo nidííłtsił da. Daʼ nidiltłish áádóó neʼełtı̨́ı̨́ʼ bee yisnááh íinilaaígíísh nidííłtsił? Daʼdooyı̨́ı̨́ł áádóó daʼdoodlı̨́ı̨́ł biniyé bidáahgi tó áádóó bááh niníkaah, áko yídahółníihii yichʼįʼ nídookah.
23 Nítʼééʼ bá ádaʼjíísįįd, áádóó daʼííyą́ą́ʼ índa daʼoodlą́ąʼgo yídahółníihii yichʼįʼ nídookah biniyé aníjiisʼaʼ. Kótʼéego Síriya dineʼé éí Ízrel dineʼé bikéyahgi tʼáadoo náánákai da.
Iiláísha áádóó Samériya yináshzhiizhígíí
24 Kódzaadóó bikʼijįʼ Síriya dineʼé aláahgo binanitʼaʼí Ben-héídad éí siláo dah deínéehii tʼáá ałtso áłah áyiilaago Samériya kin haalʼáá góde nínáago yizénáshzhiizh.
25 Áko Samériya biníjíshzhiizhgo tʼáá íiyisí hodichin hazlı̨́įʼgo wónáásdóó télii bitsiitsʼiin éí tseebídiin béésh łigaii shékel wolyéhígíí bą́ą́h ílı̨́įgo áádóó hasbídí bichaan bee adlání naakidi haaką́ bíighahgo éí ashdlaʼ shékel wolyéii bą́ą́h ílı̨́įgo nidajiiłniih.
26 Nítʼééʼ Ízrel dineʼé aláahgo binanitʼaʼí éí tsé ahénátłʼinígíí yikáaʼdi yigáałgo asdzání léiʼ hachʼįʼ hadoolghaazhgo ání, Aláahgo naatʼáanii nílíinii, shinanitʼaʼí, shíká anilyeed.
27 Áko ájíní, Bóhólníihii doo níká iilyeedgóogo, haash yitʼéego níká adeeshwoł? Hadaʼiilʼésídóó daatsʼí, doodaiiʼ chʼil naʼatłʼoʼii yiljizhídóó daatsʼí níká iʼdoolwoł.
28 Áádóó aláahgo naatʼáanii áháłní, Haa lá yinidzaa? Áko asdzání hadzoodzíiʼgo ájíní, Díí asdzání áshidííniid, Díí jı̨́ niyáázh diidı̨́ı̨́ł biniyé ninádiníʼaah, áádóó yiską́ągo shiyáázh diidı̨́ı̨́ł, níí nítʼééʼ.
29 Áko shiyáázh shiiłbéezhgo yiidą́ą́ʼ, áádóó biiskání áhodííniid, Niyáázh diidı̨́ı̨́ł biniyé ninádiníʼaah, nidi biyáázh néideesʼı̨́ı̨́ʼ lá.
30 Nítʼééʼ aláahgo naatʼáanii éí asdzání haadzíʼígíí yidiiztsʼą́ąʼgo akʼinaʼooldláadgo tsé ahénátłʼin bikáaʼdi joogáałgo diné dadéezʼı̨́ı̨́ʼ nítʼééʼ, jó, tłʼoh yishbizh ayaadi biiʼ dziztı̨́.
31 Áko ájíní, Díí jı̨́ Shéífat biyeʼ Iiláísha tʼahdii bitsiitsʼiin hólǫ́ǫ́ ládą́ą́ʼ Bóhólníihii tʼah yówehgo tʼóó tséʼédinda atíshidoolííł.
32 Nítʼééʼ Iiláísha haghan góneʼ hastóí aląąjįʼ naazíinii bił nidzíiztą́; íídą́ą́ʼ aláahgo naatʼáanii halneʼ yił naalʼaʼí hachʼįʼ ayííłʼaʼ, áko naalʼaʼí tʼah doo haa yíghááhgóó hastóí ábijiní, Díí naʼałtseedii biyáázh shitsiitsʼiin nahgóó kʼíidoołniił yiniyé shichʼįʼ yiyííłʼaad lá! Shoo, níyáago bidádiʼdoołkałgo bidáádadínóozı̨́į doo; honanitʼaʼí éí hakéédę́ę́ʼ bikédil diitsʼaʼ.
33 Nítʼééʼ hastóí tʼah bichʼįʼ yájíłtiʼgo aláahgo naatʼáanii haa níyáago ání, Díí doo yáʼáshóonii éí Bóhólníihii bitsʼą́ą́dę́ę́ʼ átʼé. Haʼátʼíísh biniyé Bóhólníihii tʼahdii náásgóó bibaʼ áníshtʼée doo?
