2 Kings 7:1-20
7 Nidi Iiláísha ání, Bóhólníihii haadzíʼígíí yíísíníłtsʼą́ą́ʼ; Bóhólníihii kóní, Yiską́ągo kóhoodzaago Samériya kin haalʼáii bidáńʼdítı̨́hígi akʼáán ashdladiin dah hidédloʼ bíighahgo tʼááłáʼí shékel* wolyéii bą́ą́h ílı̨́įgo áádóó tłʼoh naadą́ą́ʼ bideeʼí éí neeznádiin dah hidédloʼ bíighahgo tʼááłáʼí shékel wolyéii bą́ą́h ílı̨́įgo nahaniih doo.
2 Áko aláahgo naatʼáanii jílíinii tʼáá hó há naalʼaʼí bigaan jótąʼii éí Diyin God yá naalʼaʼí yichʼįʼ haadzíiʼgo ání, Azhą́ Bóhólníihii éí yáʼąąsh ąą áyiilaa nidi, daʼ éísh ákóhodoonííł? Áádóó Iiláísha ání, Shoo, tʼáá ni yidííłtsééł, nidi doo łaʼ dííyı̨́įł da.
3 Nítʼééʼ diné éí łóód atsʼíís yiyáanii naałdzidii bąąh dahólónígíí yah aʼatiingi naháaztą́, áko ádaʼahidiʼníigo, Haʼátʼíí lá biniyé tʼáá daatsʼí kǫ́ǫ́ dadíníiʼnéełgo nahísíitą́?
4 Kin haalʼáá góneʼ yah adiikah, dadiiʼniid ládą́ą́ʼ, nidi kin haalʼáá góneʼ hodichin, áko tʼáá ákwii dadíníiʼnééł; tʼáá kǫ́ǫ́ naháatą́ągo ałdóʼ dadíníiʼnééł. Éí bąą kʼad, tįʼ, bíniʼdii Síriya dineʼé dah yinéełii bichʼįʼ diikah, yisdádanihiznil ládą́ą́ʼ dahiniiʼnáa doo; nidanihiłtseed ládą́ą́ʼ daneeʼnáa doo.
5 Áádóó hiłiijı̨́įʼgo nidzíiztánídóó dashdiikaigo Síriya dineʼé dah deínéhígóó jíkai, áko Síriya dineʼé dah deínéhíjįʼ jíkaigo, shoo, diné doo łaʼ ákwii naagháa da.
6 Háálá Bóhólníihii éí Síriya dineʼé dah deínéhígíí éí tsindaabąąs bijáád naakiígíí áádóó łı̨́ı̨́ʼ tʼáá éí ayóó átʼéego oonééł yiitsʼaʼígi átʼéego dazdiiztsʼą́ąʼgo áhoolaa, áádóó ádaʼahidooʼniid, Jó, Ízrel dineʼé aláahgo binanitʼaʼí éí Het dineʼé aláahgo bindanitʼaʼí áádóó Ííjip dineʼé aláahgo bindanitʼaʼí nihikʼiidoojah biniyé yichʼįʼ niʼiizlaʼ lá.
7 Éí bąą hiłiijı̨́įʼgo dah dazhdíníichą́ąʼgo yisdázhdookah biniyé haníbaal áádóó dahalı̨́ı̨́ʼ índa dahatélii tʼáá dahooghan nítʼééʼ bikʼi dahizhneezhchą́ą́ʼ.
8 Áko díí diné éí łóód atsʼíís yiyáanii naałdzidii bąąh dahólónígíí dah daʼínééh nítʼééʼ yę́ęgi jíkaigo níbaal łaʼ biyiʼ góneʼ yah ajookaigo daʼjííyą́ą́ʼ áádóó daʼjoodlą́ą́ʼ índa béésh łigaii áádóó óola índa ééʼ dah deidiijaaʼgo nídeideesʼı̨́ı̨́ʼ; áádę́ę́ʼ nínáánákaigo níbaal łaʼ yiih náánáákai áádóó łaʼ chʼínáádeizyı̨́įgo nídeideesʼı̨́ı̨́ʼ.
9 Nítʼééʼ ádaʼahidooʼniid, Doo yáʼátʼééhgóó ádeiitʼı̨́. Díí jı̨́ haneʼ yáʼátʼéehii baa hoolzhiizh; hoosʼįįdjįʼ tʼáadoo baa dahwiilneʼ ládą́ą́ʼ doo yáʼáshóonii nihikʼi hwiidooleeł; éí bąą kʼad, tįʼ, aláahgo naatʼáanii bighandóóígíí łaʼ bił dahodiilnih.
10 Áko kin haalʼáii bichʼįʼ yah aʼaʼtiingi yíkai; ákwii yaa ádahalyánígíí yéego bichʼįʼ ádazhdííniidgo ádajiní, Síriya dineʼé dah deínéehgi niikai nítʼééʼ, shoo, doo nidaagháhí da, doo nidi diné biinééʼ łaʼ diitsʼaʼ da, łı̨́ı̨́ʼ áádóó télii dah dahaastłʼǫ́, níbaal ałdóʼ tʼáá bíniʼ naaznil.
11 Áádóó chʼéʼétiin yaa ádahalyánígíí ałchʼįʼ hadadeeshghaazh, áádóó aláahgo naatʼáanii bighan góneʼ yaa dahoolneʼ.
12 Nítʼééʼ aláahgo naatʼáanii tʼáá tłʼééʼ nídiiʼnaʼgo bá nidaalʼaʼí ííłní, Síriya dineʼé bisiláo dah deínéehii nihiniyé hashtʼedadiidzaaígíí bee nihił hashneʼ. Dichin nihiʼniighą́ʼígíí bił béédahózin; éí bąą dah yinéłídóó haníʼąągóó aheezhjéeʼgo nídadeestʼı̨́ı̨́ʼ, áko kin haalʼáádę́ę́ʼ chʼíjiizhjéeʼgo tʼáá dajiináago hoł nidahidiidił danihóʼní áádóó kin haalʼáá góneʼ yah adiijah, daaníigo ádanihiłʼı̨́.
13 Nítʼééʼ bá nidaalʼaʼí łaʼ haadzíiʼgo ání, Jó, Ízrel dineʼé ląʼí ádaasdįįdígi átʼéego kweʼé daadziihígíí ałdóʼ ádadoodįįłgo nihił béédahózin. Áko haaʼíshąʼ diné łaʼ łı̨́ı̨́ʼ daadziihígíí bitahdóó ashdlaʼgo nídeididooniłgo ákǫ́ǫ́ łı̨́ı̨́ʼ yee dadookahgo díí baa haneʼígíí nihił béédahodoozįįł.
14 Aláahgo naatʼáanii éí Síriya dineʼé bisiláo bikééʼ dahodiiłʼaʼgo ání, Nílááh, hádasídóoʼı̨́ı̨́ʼ, áko łı̨́ı̨́ʼ éí tsindaabąąs bijáád naakiígíí naaki tʼáá ałʼąą yoołbąsgo dashdiikai.
15 Áádóó Jórdan toohgóó bikééʼ jíkai; ákǫ́ǫ́ Síriya dineʼé tsı̨́įłgo danéechéehgo ééʼ áádóó ásaaʼ adayiistłʼíidgo adíítąąd lá. Áádę́ę́ʼ haneʼ nídadzizʼą́ągo aláahgo naatʼáanii bił dahojoolneʼ.
16 Nítʼééʼ Ízrel dineʼé chʼéheeskaigo Síriya dineʼé bisiláo dabiníbaal biyiʼdóó bindaalyeʼé nídajiizlááʼ. Áko Bóhólníihii ádííniidígíí bikʼehgo akʼáán ashdladiin dah hidédloʼ bíighahgo tʼááłáʼí shékel wolyéii bą́ą́h ílı̨́įgo áádóó tłʼoh naadą́ą́ʼ bideeʼí éí neeznádiin dah hidédloʼ bíighahgo tʼááłáʼí shékel wolyéii bą́ą́h ílı̨́įgo nahaniih nítʼééʼ.
17 Íídą́ą́ʼ aláahgo naatʼáanii jílíinii tʼáá hó há naalʼaʼí bigaan jótąʼii éí dáńʼdítı̨́hígi yaa áhályą́ą doo biniyé nizhníłtı̨́, áko aláahgo naatʼáanii éí Diyin God yá naalʼaʼí yaa níyáádą́ą́ʼ bá naalʼaʼí bichʼįʼ haʼoodzíiʼii bikʼehgo dáńʼdítı̨́įhgi diné hakʼi naaskaigo dadziztsą́.
18 Háálá, Yiską́ągo kóhoodzaago Samériya kin haalʼáii bidáńʼdítı̨́hígi tłʼoh naadą́ą́ʼ bideeʼí neeznádiin dah hidédloʼgo tʼááłáʼí shékel wolyéii bą́ą́h ílı̨́įgo áádóó akʼáán ashdladiin dah hidédloʼ bíighahgo tʼááłáʼí shékel wolyéii bą́ą́h ílı̨́įgo nahaniih dooleeł, Diyin God yá naalʼaʼí aláahgo naatʼáanii yee yichʼįʼ haadzííʼ yę́ędą́ą́ʼ,
19 áádóó aláahgo naatʼáanii bá naalʼaʼí éí Diyin God yá naalʼaʼí yichʼįʼ haadzíiʼgo ádííniid, Azhą́ Bóhólníihii éí yáʼąąsh ąą áyiilaa nidi, daʼ éísh ákóhodoonííł? Áádóó Iiláísha ádííniid, Shoo, tʼáá ni yidííłtsééł, nidi doo łaʼ dííyı̨́įł da.
20 Ákótʼéego bee há haʼoodzíʼígíí bohoolyaa, háálá dáńʼdítı̨́įhgi diné hakʼi naaskaigo dadziztsą́.
Footnotes
^ Tádiindóó baʼaan naaki béésh łigaii shékel wolyéii éí tʼááłáʼí dah hidiidloh.
