2 Kings 8:1-29
8 Nítʼééʼ Iiláísha éí asdzání biyáázh hináago ánáyiidlaaígíí yichʼįʼ haadzíiʼgo ání, Nídiidáahgo nighandóóígíí bił dah diinéehgo háágóó shı̨́ı̨́ doohnéełgo áadi nihighan doo, háálá Bóhólníihii hodidoochįįłii yee haadzííʼ, áádóó tsostsʼid nááhaijįʼ ákótʼée doo.
2 Áádóó Diyin God yá naalʼaʼí yee haadzíʼígíí bikʼehgo asdzání bighandóóígíí yił dah diináago Filístiya dineʼé bikéyahdi jinínáago áadi tsostsʼid hwéédááhai.
3 Nítʼééʼ tsostsʼid nááhaigo asdzání éí Filístiya dineʼé bikéyahdę́ę́ʼ chʼééjíʼnáago haghan áádóó hakéyah baa níjookąąh doo biniyé aláahgo naatʼáanii baazhníyá.
4 Íídą́ą́ʼ aláahgo naatʼáanii éí Diyin God yá naalʼaʼí Giihéízai yichʼįʼ yáłtiʼgo ání, Iiláísha ayóó átʼéii yaa naayáhígíí bee shił hólneʼ.
5 Nítʼééʼ Iiláísha éí diné daaztsáanii hináago ánáyiidlaaígíí aláahgo naatʼáanii bee bił hojilneʼgo, jó, asdzání biyáázh hinááh ánábiʼdiilyaaígíí bighan áádóó bikéyah éí aláahgo naatʼáanii yaa náyookąąh yiniyé níyá. Áádóó Giihéízai ání, Bóhonishníihii, aláahgo shinanitʼaʼí nílíinii, díí asdzání éí átʼı̨́, áádóó Iiláísha eii hayáázh hináago ánáyiidlaaígíí ájítʼı̨́.
6 Aláahgo naatʼáanii éí asdzání nayízhdééłkidgo hoł hoolneʼ. Áko aláahgo naatʼáanii éí naatʼáanii danilínígíí łaʼ há yikʼi diilniiʼgo ííłní, Hakéyahdóó dashdiiyá yę́ędą́ą́ʼ áádóó díí jı̨́įjįʼ kéyah choozʼįįd áádóó bikááʼ dahazlı̨́įʼii bą́ą́h nidaʼiizlı̨́įʼii bíighahgo tʼáá ałtso haa nídinoohʼaah.
Házeiyel éí Síriya dineʼé aláahgo yinanitʼaʼí silı̨́ı̨́ʼ
7 Iiláísha éí Damáskas kin haalʼáajįʼ níyá, áko Síriya dineʼé aláahgo binanitʼaʼí Ben-héídad daatsaah lá, áko, Diyin God yá naalʼaʼí kweʼé níyá, haʼníigo bił hóóneʼ.
8 Áko aláahgo naatʼáanii éí Házeiyel ííłní, Díí aa doolyéełii shá yíléełgo, nílááh, Diyin God yá naalʼaʼí bidááhgóó dínáahgo Bóhólníihii nayídídóołkił biniyé shá kóbidiní, Díí naałniih daatsʼí shikʼi dooldohgo náádideeshdááł?
9 Kótʼéego Házeiyel éí Damáskasdóó ghą́ą́ʼaskʼidii dízdiingo bee yáʼádaatʼéehii tʼáá ałtso aa doolyéłígíí dayíłjiidgo Iiláísha bidááhgóó jiníyáago bidááhdę́ę́ʼ dziizįʼgo ájíní, Niyeʼ Síriya dineʼé aláahgo binanitʼaʼí Ben-héídad nichʼįʼ shiníłʼaʼgo áníłní, Díí naałniih daatsʼí shikʼi dooldohgo náádideeshdááł?
10 Nítʼééʼ Iiláísha áháłní, Nílááh, nídídáahgo kóhodiní, Díí naałniih nikʼi dooldohgo náádidíídááł, nidi tʼáá dazdootsaałgo Bóhólníihii shichʼįʼ ííshją́ą́ áyiilaa.
11 Áádóó Iiláísha hodiniilgęęzhgo wónáásdóó tʼóó bikʼee hoł ahóóyóí, áko Diyin God yá naalʼaʼí yícha.
12 Áko Házeiyel ání, Shinanitʼaʼí, haʼátʼíí lá baa nicha? Nítʼééʼ bichʼįʼ hadzoodzíiʼgo ájíní, Ízrel dineʼé bichʼįʼ doo yáʼáshóonii baa nidíínaałgo shił bééhoozin, éí biniinaa; yineʼ nidaadziʼígíí biih dahodidíínił índa dabidinééh diltłish bee nidííłtsił áádóó badaʼáłchíní nikídahididííłtsxis índa asdzání daaltsánígíí bibid ąą dahididíízǫ́ǫ́s.
13 Áádóó Házeiyel ání, Haʼátʼíishąʼ ná naashʼaʼíísh łééchąąʼígi áníshtʼéego díí tʼóó ayóigi ádeeshnííł? Áko Iiláísha haadzíiʼgo ání, Síriya dineʼé aláahgo binanitʼaʼí dííleełgo Bóhólníihii shichʼįʼ ííshją́ą́ áyiilaa.
14 Áko Iiláísha bitsʼą́ą́ʼ dah nízhdiidzáago bóhojółníihii baa nídzídzáago áháłní, Iiláísha lá, haʼátʼíí niłní? Áko ábijiní, Tʼáá aaníí náádidíídááł, niłníigo yee shił hoolneʼ.
15 Nítʼééʼ biiskání naʼatʼą́hí ditánígíí tó béédzístsoozgo biniiʼ bikʼídzístiʼ, áko daaztsą́, áádóó Házeiyel hatsáskʼehgi aláahgo naatʼáanii silı̨́ı̨́ʼ.
Jiihóram éí Júdah kéyahgi nantʼáá nítʼééʼ (2Chr. 21:1-20)
16 Ízrel dineʼé aláahgo binanitʼaʼí Éíhab biyeʼ Jóram nantʼáago ashdlaʼ náhááh góneʼ Jiiháshafat éí Júdah dineʼé aláahgo yinanitʼaʼí nilı̨́įgo Jiiháshafat biyeʼ Jiihóram aláahgo nantʼá silı̨́ı̨́ʼ.
17 Tádiindóó baʼaan naaki binááhaigo aláahgo naatʼáanii silı̨́ı̨́ʼ, áádóó Jerúsalemgi nantʼáago tseebíí nááhai.
18 Ízrel dineʼé aláahgo binanitʼaʼí danilı̨́ı̨́ nítʼééʼ yę́ę bikʼehgo tʼáá Éíhab baʼáłchíní náás ahoolchíiłii ádaatʼı̨́ı̨́ nítʼééʼ yę́ęgi átʼéego joogááł, háálá Éíhab bitsiʼ éí hweʼasdzą́ą́, áko Bóhólníihii binááł doo yáʼáshóonii baa nijigháá nítʼééʼ.
19 Nidi Bóhólníihii bá naalʼaʼí David yę́ę binahjįʼ bí áádóó baʼáłchíní tʼáá áłahjįʼ bá hoolʼingo yee yá nihoníʼánígíí bikʼehgo Júdah dineʼé náás ahoolchíiłii doo áyółdįįh átʼée da.
20 Jiihóram bíyoołkááł yę́ędą́ą́ʼ Íídam dineʼé éí Júdah dineʼé bee bóhólníihii yichʼįʼ nidaasteeʼgo yitsʼą́ąjįʼ daazlı̨́įʼgo aláahgo naatʼáanii ádá nideistı̨́.
21 Nítʼééʼ Jiihóram éí tsindaabąąs bijáád naakiígíí yee nidaabaahii tʼáá átʼé Zéíyer kin shijaaʼgóó yił dah diikai, áko éí áádóó tsindaabąąs bijáád naakiígíí yee nidaabaahii bindanitʼaʼí tłʼéeʼgo náhizhdiijéeʼgo Íídam dineʼé bisiláo hazénáshzhiizhígíí bikʼi jiijééʼ, áádóó diné dabighan yichʼįʼ anídahineezhchą́ą́ʼ.
22 Áko díí jı̨́įjįʼ Íídam dineʼé éí Júdah dineʼé yichʼįʼ nidaasteeʼ. Líbnah dineʼé ałdóʼ íídą́ą́ʼ hachʼįʼ nidaasteeʼ.
23 Áádóó Jiihóram łahjįʼ áátʼįįdígíí áádóó tʼáá ałtso yaa naayáhígíí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
24 Nítʼééʼ Jiihóram éí bizhéʼé yę́ę daʼiiłhaazhígi átʼéego ajiiłhaazh, áko David yę́ę bikin haalʼáhígi dahazhéʼé yę́ę yóóʼádaalyaaígi yóóʼáhoʼdiilyaa, áádóó hayeʼ Eihazáíyah hatsáskʼehgi aláahgo naatʼáanii náánásdlı̨́ı̨́ʼ.
Eihazáíyah éí Júdah kéyahgi nantʼáá nítʼééʼ (2Chr. 22:1-6)
25 Ízrel dineʼé aláahgo binanitʼaʼí Éíhab biyeʼ Jóram nantʼáago naakitsʼáadah náhááh góneʼ Júdah dineʼé aláahgo binanitʼaʼí Jiihóram biyeʼ Eihazáíyah aláahgo naatʼáanii silı̨́ı̨́ʼ.
26 Eihazáíyah naadiin naaki binááhaigo aláahgo naatʼáanii silı̨́ı̨́ʼ, áádóó Jerúsalemgi nantʼáago tʼááłáʼí nááhai. Bimá éí Athaláíyah wolyéego Ízrel dineʼé aláahgo binanitʼaʼí Ámrii yitsiʼ nilı̨́.
27 Áko Éíhab yaa naayáhígíí yikʼehgo yigáałgo doo yáʼádaashóonii tʼáá Éíhab bighandóó ádaadzaa yę́ęgi átʼéego Bóhólníihii yinááł yaa naagháá nítʼééʼ, háálá Éíhab bighandóó łaʼ yaadaaní nilı̨́ı̨́ nítʼééʼ.
28 Áádóó Eihazáíyah éí Éíhab biyeʼ Jóram yił Síriya dineʼé aláahgo binanitʼaʼí Házeiyel Réímath-gíliyad kin haalʼáagi yikʼijįʼ naabaahgo Síriya dineʼé bisiláo éí Jóram hadayííłkʼęh.
29 Nítʼééʼ aláahgo naatʼáanii Jóram éí Réímah kin haalʼáadi Síriya dineʼé aláahgo binanitʼaʼí Házeiyel yikʼijįʼ naabaah yę́ędą́ą́ʼ habiʼdoolkʼęh yę́ę nídooldzih biniyé Jézriyel kin haalʼáágóó anáádzá. Nítʼééʼ Júdah dineʼé aláahgo binanitʼaʼí Jiihóram biyeʼ Eihazáíyah éí Jézriyeldi Éíhab biyeʼ Jóram daatsaahgo biniinaa ákóyaa yichʼįʼ ííya.
