2 Kings 9:1-37
9 Nítʼééʼ Diyin God yá halneʼii Iiláísha éí Diyin God yá dahalneʼii bídahoołʼaahii łaʼ hágo yidííniidgo ííłní, Niʼééʼ nitsiistʼah náníyishgo díí tóshjeeh yázhí bee akʼah yíʼáałgo Réímath-gíliyadgóó dínááh,
2 áko áadi yíníyáago Nímshai binálí Jiiháshafat biyeʼ Jííhu hádidííʼįįł, áádóó yah adíínáałgo bikʼisóó bitahdóó bił nídidíítʼashgo náʼáneʼé góneʼ bił yah adííʼash,
3 áádóó tóshjeeh yázhí bee akʼah yíníʼánígíí hadííʼáałgo bitsiitʼáagi yeidííził, áko ábididííniił, Bóhólníihii kóní, Ízrel dineʼé aláahgo binanitʼaʼí dííleeł biniyé akʼah nikʼi yaaziidgo niʼdoolzı̨́ı̨́ʼ. Áko dáádílkał ąą didíítı̨́įłgo tʼáadoo naʼahodílziidí dah didíílwoł.
4 Áko dinééh tʼáá éí Diyin God yá halneʼii nilíinii Réímath-gíliyadgóó ííyá.
5 Áádóó áadi jiníyáago siláo dah deínéehii binanitʼaʼí danilíinii naháaztą́; áádóó ání, Siláo binanitʼaʼí nílíinii, haneʼ naa níʼą́. Jííhu ání, Háí lá ábidiní? Áko ábijiní, Ni ándishní, siláo binanitʼaʼí nílíinii.
6 Áádóó nízhdiiʼnaʼgo kin góneʼ bił yah ajííʼáazhgo éí dinééh akʼah bitsiitʼáagi yadziiziid, áko ábijiní, Bóhólníihii Ízrel biDiyin God kóní, Bóhólníihii bidineʼé Ízrel dineʼé aláahgo binanitʼaʼí dííleeł biniyé akʼah nikʼi yaaziidgo niʼdoolzı̨́ı̨́ʼ.
7 Áko asdzání Jézebel éí shá nidaalʼaʼí áádóó shá dahalneʼii neistseedgo bidił dadeeznaʼígíí tʼáá ałtso bá kʼéédideeshnííł biniyé ninanitʼaʼí Éíhab bikʼéí danilíinii tʼáá ałtso nidííłtsxił.
8 Jó, Éíhab bikʼéí náás daʼahílchíihii tʼáá ałtso ádoodįįł; éí diné danilínígíí naalteʼ danilíinii índa doo naalteʼ danilíinii tʼáá ałtso Ízrel kéyahgi dahojílónígíí áhodeeshdįįł:
9 Nííbat biyeʼ Jerobówam náás daʼahílchíihii áádóó Aháíjah biyeʼ Béíyasha náás daʼahílchíihii ádaasdįįdígi átʼéego Éíhab bikʼéí náás daʼahílchíihii ałtso áhodeeshdįįł.
10 Jézriyel kéyahdi Jézebel éí łééchąąʼí dabidoolghałgo doo łaʼ yóóʼahodoolíił da. Áko ąązhdinítą́ągo dashdiilwod.
11 Jííhu hananitʼaʼí bá nidaalʼaʼí bichʼįʼ chʼéédzídzáago łaʼ áháłní, Tʼáásh ałtso yáʼátʼééh? Haʼátʼíísh biniyé díí tʼóó diigisii naa níyá? Áko ábijiní, Díí diné áádóó yáłtiʼígíí bee béédahonohsin.
12 Áádóó ádaaní, Tʼóó ádíní; tʼáá kʼad nihił hólneʼ. Áko Jííhu ání, Jó, kótʼéego shichʼįʼ haadzíiʼgo ání, Bóhólníihii kóní, Ízrel dineʼé aláahgo binanitʼaʼí dííleeł biniyé akʼah nikʼi yaadziidgo níísı̨́ı̨́ʼ.
13 Nítʼééʼ tsı̨́įłgo tʼááłáʼí jinítínígo akáaʼgi dahaʼéʼígíí bikááʼ háádaʼaldáhí góde bá nidadziskaadgo yikááʼdóó niníyá áádóó deenástsʼaaʼ bideeʼ bee íʼdílzoołgo bee ádazhdííniidgo ádajiní, Jííhu éí aláahgo naatʼáanii nilı̨́.
Jííhu éí Jóram yiyiisxı̨́
14 Ákótʼéego Nímshai binálí Jiiháshafat biyeʼ Jííhu éí Jóram yikʼijįʼ hodeezʼą́. (Íídą́ą́ʼ Jóram éí Ízrel dineʼé tʼáá ałtso yił Síriya dineʼé aláahgo binanitʼaʼí Házeiyel biniinaa Réímath-gíliyad kin haalʼáagi hééshjééʼ nítʼééʼ.
15 Nidi aláahgo naatʼáanii Jóram éí Síriya dineʼé aláahgo binanitʼaʼí Házeiyel yikʼijįʼ naabaahgo Síriya dineʼé bisiláo nabiʼdoolkʼęh nídoodzih biniyé Jézriyel kin haalʼáajįʼ tʼą́ą́ʼ nádzá.) Áko Jííhu ání, Kótʼée dooleeł danohsingo Jézriyelgi doo łaʼ hodoolnih da biniyé tʼááká díí kin haalʼáádóó łaʼ chʼóoyaʼ.
16 Nítʼééʼ Jííhu bitsinaabąąs bijáád naakiígíí łaʼ bił yilwołgo Jézriyelgóó ííyá, háálá áadi Jóram sitı̨́. Íídą́ą́ʼ Júdah dineʼé aláahgo binanitʼaʼí Eihazáíyah áadi Jóram yaa níyá.
17 Nítʼééʼ Jézriyelgi haʼídéesʼı̨́įʼii naʼalzídí bikááʼdóó sizı̨́įgo Jííhu yił yikahígíí haideelʼı̨́įʼgo ání, Níléídę́ę́ʼ łaʼ jookah. Jóram ání, Diné łaʼ łı̨́ı̨́ʼ bee bidááhgóó díłʼáago áyididooniił, Kʼéésh biniyé ádaohtʼı̨́?
18 Áko diné łaʼ bidááhgóó łı̨́ı̨́ʼ bił eelwodgo ání, Aláahgo naatʼáanii kóní, Kʼéésh biniyé wohkah? Jííhu ání, Kʼéésh haʼátʼíí bee ádíílííł? Shikéeʼjigo aninááh. Áádóó haʼídéesʼı̨́įʼii yaa chʼééhoníʼą́ągo ání, Yidááh níyáa nidi doo tʼą́ą́ʼ náádáał da.
19 Áko naaki góneʼ łaʼ łı̨́ı̨́ʼ bee anáájííłʼaʼgo yidááh níyáago ání, Aláahgo naatʼáanii kóní, Kʼéésh biniyé wohkah? Jííhu ání, Kʼéésh haʼátʼíí bee ádíílííł? Shikéeʼjigo aninááh.
20 Haʼídéesʼı̨́įʼii yaa chʼéénááhoníʼą́ągo ání, Tʼáá yaa níyáa nidi doo tʼą́ą́ʼ nínáánádáał da; Nímshai biyeʼ Jííhu oołbąsígi átʼéego aadę́ę́ʼ oołbąs; jó, tʼáá bizááká oołbąs.
21 Áádóó Jóram ání, Hashtʼeʼádadołnééh. Áko bitsinaabąąs bijáád naakiígíí bá hashtʼedajiilaa. Nítʼééʼ Ízrel dineʼé aláahgo binanitʼaʼí Jóram áádóó Júdah dineʼé aláahgo binanitʼaʼí Eihazáíyah tʼáá ałʼąą bitsinaabąąs bijáád naakiígíí yee Jííhu yidááh dooʼash biniyé dah diiʼáazhgo Jézriyeldóó diné Néíbath yę́ę bidáʼákʼeh nítʼéʼígi yidááh níʼáázh.
22 Áádóó Jóram éí Jííhu yiyiiłtsą́ągo ání, Kʼéésh biniyé ánítʼı̨́, Jííhu? Haadzíiʼgo ání, Nimá Jézebel beʼajił áádóó álílee kʼehgo yee hoołáałii tʼah náás deítʼéehgo haash yitʼéego kʼé hólǫ́ǫ doo?
23 Áko Jóram éí Eihazáíyah ííłní, Eihazáíyah nílíinii, nihizééʼ deestʼą́ą́ lá, níigo naa náʼásbą́ązgo dah díníichą́ą́ʼ.
24 Áádóó Jííhu tʼáá ábóodziilígi yee beʼełtı̨́ı̨́ʼ niiníłtsʼǫ́ǫdgo Jóram biníighah góneʼ yiskah, áko kʼaaʼ hajéí biníkálnóodgo hatsinaabąąs bijáád naakiígíí biiʼjįʼ nazhnííyęęzh.
25 Áko Jííhu éí bisiláo binanitʼaʼí Bídkar ííłní, Nídoołteehgo Jézriyel kin haalʼáádóó diné Néíbath yę́ę bidáʼákʼeh nítʼéʼíjįʼ ahołhan; jó, díí béénílniih: bizhéʼé Éíhab yę́ę éí ni áádóó shí bikééʼ iilbąsgo Bóhólníihii díí atíʼdoolníiłii hakʼijįʼ niidiníʼą́ągo ádííniid,
26 Tʼáá aaníí adą́ą́dą́ą́ʼ Néíbath bidił áádóó biyeʼké bidił yiiłtsą́ągo kweʼé hazʼánígi kʼéédideeshnííł, ní Bóhólníihii. Kʼad Bóhólníihii yee haadzíʼígíí bikʼehgo niʼjįʼ ahołhan.
Jííhu éí Eihazáíyah yiyiisxı̨́ (2Chr. 22:7-9)
27 Áko Júdah dineʼé aláahgo binanitʼaʼí díí dziiłtsą́ągo dáʼákʼeh kin bíighah góneʼ azhnííchą́ą́ʼ. Áádóó Jííhu hakééʼ dah adiiłbą́ązgo ání, Hó ałdóʼ dahooł kah. Áko Ger hazʼą́ą́ góde jookahgo Íbliyam kin shijaaʼígíí bíighahgi tsinaabąąs bijáád naakiígíí yiiʼjįʼ dahaskah. Áádóó Megído kin haalʼáágóó azhnííchą́ąʼgo áadi dadziztsą́.
28 Áádóó há nidaalʼaʼí éí tsinaabąąs bijáád naakiígíí yee Jerúsalem kin haalʼáágóó dah hastı̨́įgo dahazhéʼé yę́ę yóóʼádaalyaaígi éí David yę́ę bikin haalʼáhígi tséníʼootséél góneʼ yóóʼádahojiilaa.
29 Éíhab biyeʼ Jóram nantʼáago łaʼtsʼáadah náhááh góneʼ Eihazáíyah Júdah dineʼé aláahgo yinanitʼaʼí silı̨́ı̨́ʼ.
Jézebel daaztsą́
30 Nítʼééʼ Jííhu Jézriyelgi níyáago Jézebel yaa hodiiztsʼą́ą́ʼ, áko biniiʼ yizhchíiʼgo índa bitsiiʼ neizhchʼąąʼgo tsésǫʼdę́ę́ʼ déezʼı̨́ı̨́ʼ.
31 Jííhu yah aʼatiindę́ę́ʼ yah ííyáago Jézebel ání, Zímrai, kʼéésh bił yíníyá, binanitʼaʼí yiyiisxíinii nílíinii?
32 Áko Jííhu éí tsésǫʼ góde déezʼı̨́įʼgo ání, Háí shichʼijí nilı̨́? Háí? Yúnak* wolyéhígíí naaki, doodaiiʼ táaʼgo áádę́ę́ʼ dadéezʼı̨́ı̨́ʼ.
33 Áádóó ííłní, Bidah adahołhan. Áko bidah adajiisxango bidił éí tsé ahénátłʼinígíí índa łı̨́ı̨́ʼ bikʼéheesdááz, áádóó bikʼi łı̨́ı̨́ʼ hoł naswod.
34 Áko yah ajííyáago ajííyą́ą́ʼ áádóó ajoodlą́ąʼgo ájíní, Nílááh, díí asdzání tʼóó báhádzidgo bá haʼoodzíʼígíí nídadoołteehgo yóóʼádaohłééh, háálá aláahgo naatʼáanii bitsiʼ jílı̨́ı̨́ nítʼééʼ.
35 Nidi yóóʼadazhdoolííł biniyé ákǫ́ǫ́ ajookaigo hatsiitsʼiin áádóó hakeeʼ índa hálaʼ tʼéiyá bikʼíjíkai, áko hatsʼíís yę́ę łahjįʼ tʼáá átʼé ádin.
36 Tʼą́ą́ʼ níjíkaigo Jííhu bił dahojoolneʼ. Áko ání, Díí Bóhólníihii bá naalʼaʼí Iiláíjah Tíshbehdóó diné nilíinii yee haadzíiʼgo kóníi niʼ, Díí Jézriyel hazʼánígi Jézebel bitsįʼ łééchąąʼí deidoolghał,
37 áádóó Jézriyelgi Jézebel bitsʼíís chąąʼ nahalingo dáʼákʼehgóó naniseʼ bichʼiyąʼ nídoodleeł, áko, Díí Jézebel yę́ę átʼı̨́, doo łaʼ bizhdidooniił da.
Footnotes
^ Saad ááhyiłníinii bee bééhózinígi yíníłtaʼ.
