2 Peter 3:1-18
3 Ayóóʼánihóshʼníinii, díí bił kʼad naakidi nihichʼįʼ naaltsoos áshłééh. Naaltsoos tʼáá áłah biyiʼ nihintsékees doo bąąh chinii bee nitsídaahkees dooleełgo díí béédanihiyiishnííh.
2 Diyin God yá dahalneʼii dadiyinii neeʼnijįʼ saad yaa dahoolneʼii áádóó daalʼaadii daniidlíinii nihinahjįʼ Bóhólníihii Yisdáʼiiníiłii yee hasʼáanii nihaa deetʼáanii béédanihiyiishnííh.
3 Díidíígíí áłtsé nihił béédahodoozįįł, nihoogháahjįʼ yoołkáałgo á nidahałtʼiʼii tʼáá bí beʼadádahonooniʼ yikʼehgo naaldeehii nidahidookah. Éí nihá nidahałtʼiʼgo
4 kódaaníi doo, Náádeeshdááł, jiníigo nihozhníʼáanii háájíshąʼ ajííyá? Jó, danihizhéʼé yę́ę ałtso dazneeznáádóó wóshdę́ę́ʼ tʼahdii tʼáá ákóhootʼé, hodeeyáádą́ą́ʼ tʼáá ałtsoní ádaalyaadóó wóshdę́ę́ʼ ádaalyaii tʼahdii tʼáá ákódaatʼéego hoolzhish.
5 Díí tʼáá ákódaanéehgo doo tʼáá kʼad yaa ákodaniizı̨́įʼ da; jó, Diyin God bizaad bikʼehgo yótʼááh hiníláii ałkʼidą́ą́ʼ hólǫ́, áádóó niʼ táyiʼdę́ę́ʼ hááʼá áádóó tó bee hashtʼeelyaa
6 áádóó bikʼijįʼ tó yíląądgo nihokááʼ dahólóonii tʼáá ałtso tó bee ábiʼdisdįįd.
7 Áko kʼad Diyin God tʼáá éí saad yee haadzíiʼii bee yótʼááh hiníláii índa nahasdzáán hólónígíí kǫʼ yee íidoołdįįłjįʼ hashtʼeyósingo hoolzhish. Baa hoolzhiizhgo diné doo Diyin God dazdísinígíí Diyin God há nihwiiʼaahgo hoolʼáágóó tiʼdahojooníihgo há nihodiyooʼááł.
8 Nidi, ayóóʼánihóshʼníinii, díí tʼááká baa dayoohnééh yíilaʼ, éí Bóhólníihii łaʼa jı̨́ azlı̨́ʼígíí tʼááłáhídi mííl nááhaígi átʼéego yaa nitsíkees, áádóó tʼááłáhídi mííl nááhaígíí ałdóʼ łaʼa jı̨́ azlı̨́ʼígi átʼéego yaa nitsíkees.
9 Łaʼ ádajiní, Bóhólníihii kóhodoonííł nínę́ę doo hąh yiʼdoolíił da lá. Nidi yee haadzíiʼii tsʼídá yiʼdoolíiłgo yee hasʼą́. Jó, nízaadgóó nihichʼįʼ haʼólní, tsʼídá doo łaʼ ázhdoodįįł da nízingo, nidi tʼáá ádzíłtso łahgo átʼéego tsíńdazdookosgo habąąhági átʼéii bitsʼáhizhdookah hóʼní.
10 Nidi aniʼįįhii tłʼéeʼgo yigháhígi átʼéego Bóhólníihii nádáhígíí beidoołkááł, ákohgo yádiłhił ayóó íitsʼaʼgo bił yóóʼahodoogááł, áádóó kǫʼ bitsʼáhonigahii bee yótʼááh hiníláii biyiʼdi dahólóonii ałtso ádoodįįł, áádóó nahasdzáán índa bikáaʼgi dahólóonii tʼáá ałtso adidookʼą́ą́ł.
11 Áko tʼáá ałtsoní kótʼéego ádooldįįłgo, kʼad haash yitʼéego daʼíínółdįįh? Jó, diyin kʼehgo dahinohnáa doo, áádóó Diyin God dadíínóhsin.
12 Tʼáadoo hodinaʼí Diyin God beidoołkááł lá danohsingo dahinohná. Diyin God beiníłką́ągo yótʼááh hiníláii adidookʼą́ąłgo ałtso ádoodįįł, áádóó yótʼááh hiníláii biyiʼdi dahólóonii ałtso dadidoołhįh.
13 Nidi Diyin God yee nihoníʼáanii bikʼehgo yótʼááh hiníláii ániidíii áádóó nahasdzáán ániidíii bíká dadíníitʼı̨́ı̨́ʼ, éí bikááʼ tʼáá ałtsogóó tsʼídá tʼáá ákogi éʼétʼé hólǫ́ǫ dooleeł.
14 Éí bąą, ayóóʼánihóshʼníinii, díí bíká dadínóhʼı̨́įʼgo Diyin God binááł doo nihąąh daahchinígóó, áádóó tʼáadoo bee nihikʼídahótʼahígóó haleebee ádaahtʼı̨́įgo Diyin God bił kʼé daʼahíínóhʼníi leʼ.
15 Áádóó nihiBóhólníihii nízaadgóó haʼólnínígíí yisdáʼiildééh átʼéego baa nitsídaahkees. Nihikʼis Paul ayóóʼádeíníiʼníinii bee hódzáanii baa deetʼánígíí ałdóʼ tʼáá ákótʼéego yee nihichʼįʼ akʼeʼashchı̨́.
16 Paul binaaltsoos tʼáá ałtso biyiʼdóó díí yee akʼeʼashchı̨́įgo, tʼáá éigi átʼéego yee akʼeʼashchı̨́. Binaaltsoos biyiʼ bee akʼedaʼashchínígíí łaʼ bikʼidiʼdootı̨́łígíí ayóogo nidantłʼago doo bił éédahózinii índa bidaʼoodląʼ doo dabidziilii hazaad nideigiz. Éí Diyin God bizaad biyiʼ łahgóó bee akʼedaʼashchíinii ałdóʼ nideigiz. Éí biniinaa hoolʼáágóó tiʼhooʼníihii yee ákʼijįʼ dahodoolchįįł.
17 Nidi nihí, ayóóʼánihóshʼníinii, díí tʼáá íídą́ą́ʼ nihił béédahózin. Éí bąą ádaa ádahołyą́. Doo ádaa ádahołyą́ą́góó éí diné doo yáʼádaashóonii nidaʼiisíhígíí yóóʼadanihiniiʼáahgo doo danihidziil da dadoohłeeł.
18 Nidi nihiBóhólníihii Yisdánihiiníiłii Jesus Christ bibee ajoobaʼ índa tʼáá bí béédahonohsinígíí bee danóohséeh doo. Éí díí jı̨́ índa hoolʼáágóó baa haʼniih doo! Tʼáá ákótʼée doo.
