2 Samuel 1:1-27
1 Ákódzaago Saul daaztsą́ą́dóó bikʼijįʼ David éí Ámalek dineʼé yiyííghą́ą́ʼdę́ę́ʼ nádzáago áádóó David éí Zíklag kin haalʼáagi naaki biiską́ągo,
2 tááʼ yiłkaah góneʼ, jó, diné léiʼ Saul bisiláo yił dah yinééłdę́ę́ʼ níyáago biʼééʼ ákʼiniyiisdǫ́ǫ́z lá, índa łeezhígíí bitsiitsʼiin yikʼíyiizhjaaʼ lá, áko David yaa níyáago tséʼyaa neeshjoolgo aʼohgo íʼdiilyaa.
3 Áádóó David ábidííniid, Háádę́ę́ʼ yínááł? Áádóó áhodííniid, Ízrel bisiláo yił dah yinéełii yitsʼą́ąjįʼ yisdánííchą́ą́ʼ.
4 Áko David áhodííniid, Haa dahóótʼįįd? Baa nánooshkąąh, shił hólneʼ. Áádóó ání, Anaaʼ bitsʼą́ąjįʼ diné yóóʼadahineezhchą́ą́ʼ; diné ląʼí tídadiidzaago nidabiʼdiztseed, áádóó Saul biʼdiisyı̨́ índa biyeʼ Jánathan ałdóʼ biʼdiisyı̨́.
5 Áádóó David éí dinééh bił halneʼígíí ííłní, Haash yitʼéego nił bééhózingo éí Saul biyeʼ Jánathan bił nabiʼdiztseedgo baa hólneʼ?
6 Áádóó dinééh bił halneʼígíí ání, Haʼátʼíí lá tʼáadoo leʼégi átʼé Dził Gilbówadi yisháałgo, shoo, Saul bitsiidétáán bíyah niiʼáago sizı̨́; tsindaabąąs bijáád naakiígíí índa łı̨́ı̨́ʼ yee nidaabaahii áhánídę́ę́ʼ tʼáá bizááká hakʼijįʼ yinéełgo yiiłtsą́.
7 Áádóó tʼą́ą́ʼ nídéétʼı̨́įʼgo shiiłtsą́ągo shichʼįʼ hadoolghaazh. Áko ábidííniid, Kǫ́ǫ́ sézı̨́.
8 Áshidííniid, Háísh ánítʼı̨́? Áádóó ábidííniid, Ámalek dineʼé áshtʼı̨́.
9 Áádóó ánááshidooʼniid, Shikʼijįʼ yiizįįh, baa nánooshkąąh; shiyíłhé, háálá yéego tiʼhooshníihgo tʼahdii hinishná.
10 Áko hakʼijįʼ yiizįʼgo hoséłhı̨́; jó, haa ákoniizı̨́įʼgo doo náájiiʼnáa leʼ átʼéégóó naaʼajíígoʼ. Áádóó hanaatʼá chʼah hakʼi díʼą́ yę́ę hakʼi dííʼą́ągo índa látsíní hálátsíín sitą́ yę́ę haadiitą́ągo shinanitʼaʼí baa nínil.
11 Áko David biʼééʼ ákʼiniyiisdǫ́ǫ́z; tʼáá ákótʼéego diné yił naakaígíí tʼáá ałtso ákʼindaʼiisdǫ́ǫ́z.
12 Áádóó atínídazhdindleehgo dajíícha índa tʼáadoo daʼjiyání iʼííʼą́; jó, Saul áádóó biyeʼ Jánathan índa Bóhólníihii bidineʼé éí Ízrel dineʼé baa dajicha, háálá diltłish bee ádabiʼdisdįįd.
13 David éí dinééh bił hoolneʼígíí ííłní, Háísh ánítʼı̨́? Áko ání, Łahdę́ę́ʼ dineʼé nilíinii biyeʼ nishłı̨́įgo Ámalek dineʼé nishłı̨́.
14 Áádóó David áhodííniid, Haʼátʼéegoshąʼ doo náníldzidgóó Bóhólníihii akʼah yikʼi yayiiziidgo yiyíísı̨́įʼii bichʼįʼ kʼídíínílchidgo síníłhı̨́?
15 Nítʼééʼ David dinééh łaʼ hágo yidííniidgo ííłní, Áháníjįʼ bichʼįʼ dah diilyeedgo síłhé.
16 Áádóó David áhodííniid, Nidił nikʼijįʼ nídoodleeł, háálá tʼáá ni nizaad bee ádaa hwíínílneʼ kódíníigo, Bóhólníihii akʼah yikʼi yayiiziidgo yiyíísı̨́įʼii séłhı̨́.
David éí Saul áádóó Jánathan yaa atínídindleeh
17 Áko David atínídindleehgo díí atínáhodindleeh bee Saul yę́ę áádóó biyeʼ Jánathan yę́ę yá hóótáál:
18 (áádóó ałdóʼ Júdah baʼáłchíní ałtı̨́ı̨́ʼ biyiin bee nidazhnitin doogo yee haadzííʼ; jó, Jásher binaaltsoos biyiʼ bee bikʼeʼashchı̨́:)
19 Ízrel nílíinii, niʼagháhóóʼáadi nahazʼą́ągi nihinanitʼaʼí nabiʼdiztseed;dooládóʼ ayóó ádaatʼéii yę́ę bikééʼ ádahasdįįd da!
20 Gath kin haalʼáagi tʼáadoo baa dahołneʼí;Áshkelan kin haalʼáagi kintaa daʼaztiingóó tʼáadoo bee nidahodołdlaadí,áko Filístiya dineʼé bitsiʼké doo yaa bił nidahoozhǫǫh da doo,áádóó doo bąąh nídahineeshgizhii bitsiʼké akʼeh dadeesdlı̨́įʼgo doo yee dah danéetʼaah da doo.
21 Dził Gilbówa nohłíinii,dahtooʼ nąąh nááhódleʼ lágoínda nikʼi ninááhółtą́ą́ʼ lágo, doodaiiʼ nidádaʼakʼehdóódaneestʼáanii nááhániihii nínááhódleʼ lágo,háálá ákweʼé ayóó átʼéii yę́ę binaageʼ tʼóó baaʼih ályaago yóóʼahoolghan;Saul binaageʼ akʼah doo bąąh ályaa da.
22 Nidabiʼdiztseedii bidił índa ayóó ádaatʼéii yę́ę bikʼah bitsʼą́ą́dóóJánathan beʼełtı̨́ı̨́ʼ yee doo niseedáa da nítʼééʼínda Saul bidiltłish yee akʼidiyaa nilı̨́ı̨́ nítʼééʼ.
23 Saul áádóó Jánathan ayóóʼábidóʼní áádóó baa hózhǫ́ǫgo hináá nítʼééʼ,índa tʼáá ahąąh nabiʼdiztseed;atsá biláahgo doo nidilnaʼ da nítʼééʼ; náshdóítsoh bitsiijįʼ daditłʼooígíí yilááh ábóodziil nítʼééʼ.
24 Ízrel dineʼé bichʼéʼé danohłíinii,Saul baa daohcha;éí ééʼ łichxíiʼgo daʼílíinii yee hadanihidiilaa;óola bee ił dah nátı̨́hí nidaashchʼąąʼgo ályaaii nihąąh dah deiznil.
25 Dooládóʼ ayóó ádaatʼéii yę́ę daʼahijigą́ądi nidaaztseed da!Jánathan, nihiʼagháhóóʼáadi nahazʼą́ągi biʼdiisyı̨́.
26 Shikʼis nílíinii, Jánathan, dooládóʼ nąąh shíniʼ da.Dooládóʼ nizhónígi ánítʼéego shichʼįʼ náʼáhwiinítʼı̨́ʼí da nítʼééʼ;ayóóʼáshííníʼníigo dooládóʼ ayóó ánoolnin da nítʼééʼ;asdzání ayóóʼádaʼóʼníinii biláahgo įįh shííníʼníí nítʼééʼ.
27 Dooládóʼ ayóó ádaatʼéii yę́ę nidaaztseed da;anaʼalʼı̨́ yee danilı̨́ yę́ę biʼdoogą́ąʼ da!
