2 Samuel 10:1-19
10 Kódahóótʼįįdóó bikʼijįʼ Áman dineʼé aláahgo binanitʼaʼí daaztsą́ągo bitsáskʼehgi biyeʼ Héínan aláahgo naatʼáanii náánásdlı̨́ı̨́ʼ.
2 Nítʼééʼ David ádííniid, Néíhash yę́ę shaa joozbaʼígi átʼéego biyeʼ Héínan baa jiideeshbaał. Áko David éí bá nidaalʼaʼí hadadiʼyoołnih biniyé hazhéʼé ádinígíí hachʼįʼ ayiisʼaʼ. Áádóó David bá nidaalʼaʼí Áman dineʼé bikéyahdi yíkai.
3 Nítʼééʼ Áman dineʼé bindanitʼaʼí danilíinii éí yídahółníihii Héínan ádeidííniid, Daʼ baa nitsíníkeesgo David éí nizhéʼé yę́ę bił nilı̨́įgoósh bá nidaalʼaʼí hadashidiʼyoołnihgo shaa yiisʼaʼ nínízin? Daʼ doósh David bá nidaalʼaʼí nichʼįʼ ayiisʼaʼígíí kin haalʼáii deidínóołʼįįł áádóó hadeidoosiłgo deidoołnééł yiniyé ádaatʼı̨́į da?
4 Éí bąą Héínan éí David bá nidaalʼaʼí yiyiiłtsood áádóó bidághaaʼ ałníiʼgo yitsʼą́ą́ʼ nahjįʼ adeishééʼ índa dabiʼééʼ ałníiʼjįʼ bitłʼaaʼ bíighahdóó nahjįʼ adayiizhgizhgo yééʼníłniiʼ.
5 Nítʼééʼ David hoł hóóneʼgo łaʼ ákǫ́ǫ́ bidááhgóó iʼjííłʼaʼ, háálá díí hastóí tʼáá íiyisí ádaa yádandzin. Áádóó aláahgo naatʼáanii áhodííniid, Tʼáá Jériko kin haalʼáadi nahísóotą́ągo nihidághaaʼ nídadínóoyééł, áko índa nídoohkah.
6 Ákohgo Áman dineʼé éí David doo bíłdin da ádaʼdiilyaago yaa ákódaniizı̨́ı̨́ʼ, áko dah daʼdiiłʼaʼgo Beth-rííhob kin haalʼáádóó Síriya dineʼé bisiláo áádóó Zóba kéyahdóó Síriya dineʼé bisiláo tʼáá niʼ nidaabaahígíí naadiindi míilgo índa aláahgo naatʼáanii Méíyakah bisiláo tʼááłáhídi míilgo índa Íshtab dineʼé bisiláo éí naakitsʼáadahdi míilgo yikʼé nidaʼiizláago yíká adaʼiisʼaʼ.
7 Áko David éí yaa hodiiztsʼą́ąʼgo Jóʼab áádóó diné dahayóii dah deínéhígíí tʼáá ałtso ákǫ́ǫ́ yiʼiisniiʼ.
8 Áádóó Áman dineʼé chʼídahaaznáago anaaʼ dahodoołeeł biniyé kin haalʼáii bił yah aʼatiingi ałkééʼ niʼahíʼnil, áko Síriya dineʼé bisiláo éí Zóba kéyahdóó Rííhob kin haalʼáádóó áádóó Íshtab hazʼánídóó índa aláahgo naatʼáanii Méíyakah bisiláo danilíinii éí atsʼáhoníʼą́ądi honíteeldi ałkééʼ nidaʼahiisʼnil.
9 Nítʼééʼ Jóʼab éí siláo hadáahgi ałkééʼ danítʼiʼgo áádóó hakéédę́ęʼgo haniyé ałkééʼ dadeeztʼiʼgo dziiłtsą́ągo Ízrel dineʼé dabíiyisii tʼáá ałtso bitahdę́ę́ʼ łaʼ nídziizláaʼgo Síriya dineʼé bisiláo yił daʼahidoogą́ą́ł biniyé bichʼįʼ nizhnínil.
10 Áádóó diné dabíiyisii łahjįʼígíí éí hakʼis Abísheiyai bichʼįʼ bizhníłniiʼ; éí Áman dineʼé yił daʼahidoogą́ą́ł biniyé ałkééʼ niidoonił.
11 Áko ázhdííniid, Síriya dineʼé bisiláo shilááh ábóodziil ládą́ą́ʼ, shíká adíílwoł, nidi Áman dineʼé nilááh ábóodziil ládą́ą́ʼ, shí aadi hideeshdáałgo níká adeeshwoł.
12 Chánahgo íʼdíínílzin; haaʼíshąʼ diné daniidlíinii nihidineʼé bá anaʼí bił daʼahidiigą́ą́ł áádóó nihiDiyin God bikin hadaasʼáii bá ákódadiiʼnííł, áko Bóhólníihii tʼáá bí bił yáʼátʼéhígi íidoolííł.
13 Áádóó Jóʼab heedzá índa diné yił naakaígíí bił Síriya dineʼé yichʼįʼ anaaʼ dahodoohłeeł biniyé yitʼáahjįʼ eekaigo hatsʼą́ąjįʼ dadínéezhchą́ą́ʼ.
14 Áádóó Áman dineʼé éí Síriya dineʼé danéechéehgo dayiiłtsą́ągo, bí ałdóʼ Abísheiyai yitsʼą́ąjįʼ dadínéezhchą́ąʼgo, kin haalʼáajįʼ yah anídahaazhjééʼ. Áko Jóʼab éí Áman dineʼé bitsʼą́ą́dóó tʼą́ą́ʼ dah nízhdiikaigo Jerúsalemgi níjíkai.
15 Áko Síriya dineʼé bisiláo éí Ízrel dineʼé bisiláo hakʼeh dadeesdlı̨́įʼgo baa ákodazniizı̨́įʼgo tʼáá łaʼ bizhiʼee tʼááłáhíjįʼ áłah dzizlı̨́ı̨́ʼ.
16 Áádóó Hadadíízer dah adiiłʼaʼgo Síriya dineʼé bisiláo tooh wónaanídi kéédahatʼínígíí áłah áyiilaa, áko áádę́ę́ʼ Híílam hoolyéejįʼ yíkai; Shóbak éí Hadadíízer bisiláo dah deínéehii yinanitʼaʼí nilíinii halą́ąjįʼ yigáałgo jíkai.
17 Áádóó David díí bee hoł hóóneʼgo Ízrel dineʼé bisiláo tʼáá ałtso áłah áyiilaago Jórdan tooh haʼnaa niikaigo Híílam hoolyéejįʼ yíkai, áko Síriya dineʼé bisiláo ałkééʼ niʼahíʼnilgo David yichʼįʼ nídadiibaaʼgo yił daʼahoogą́ą́ʼ.
18 Nítʼééʼ Síriya dineʼé bisiláo éí Ízrel dineʼé bisiláo yikʼee dadínéezhchą́ą́ʼ, áko David éí Síriya bisiláo tsostsʼidi neeznádiin tsindaabąąs bijáád naakiígíí yee nidaabaahii, índa dízdiindi mííl łı̨́ı̨́ʼ yee nidaabaahii nidzistseed, áádóó Shóbak siláo yinanitʼaʼí nilíinii bikʼeh jideesdlı̨́įʼgo ákwii daaztsą́.
19 Áádóó aláahgo naatʼáanii danilíinii tʼáá ałtso Hadadíízer yá nidaalʼaʼ nítʼééʼ yę́ę Ízrel dineʼé bikʼeh dadeesdlı̨́įʼgo bił béédahoozingo, Ízrel dineʼé yił kʼé nídahasłı̨́ı̨́ʼ, áádóó tʼóó yá nidaalʼaʼí daazlı̨́ı̨́ʼ. Áko Síriya dineʼé éí Áman dineʼé yíká anáádoojahígíí yikʼee bił daayééʼ.
