2 Samuel 11:1-27
11 Áádóó dąąjįʼ chʼíhoolzhiizhgo aláahgo naatʼáanii danilíinii anaaʼ ádeidoolííł yiniyé chʼínááhákáahgo, David éí Jóʼab áádóó bá nidaalʼaʼí tʼáá bił Ízrel dineʼé tʼáá ałtso anaaʼ ádeidoolíiłgo biʼjiisniiʼ, áko Áman dineʼé ádeisdįįdgo Rábah kin haalʼáhígíí yizénáshzhiizh. Nidi David éí tʼáá Jerúsalemdi naagháá nítʼééʼ.
2 Áádóó ákódzaago hííłchʼįʼgo David bitsáskʼehdóó nídiiʼnaʼgo aláahgo naatʼáanii bikin bighą́ąʼdi haayáago áadi tádíghááh nítʼééʼ; áádę́ę́ʼ asdzání łaʼ naabéego yiyiiłtsą́. Éí asdzání ayóó ánóolningo nílʼı̨́.
3 Áádóó David dah adiiłʼaʼgo asdzání yínaʼídééłkid. Nítʼééʼ łaʼ áháłní, Díí Iiláíyam bitsiʼ Bath-shííba átʼı̨́. Het dineʼé nilíinii Yuráíyah yeʼasdzą́ą́ nilı̨́.
4 Áádóó David bá nidaalʼaʼí hachʼįʼ ayííłʼaʼgo hoł nídaaskai áádóó bił yah ajííyáago hoł biiską́. Jó, ąądii bitsʼą́ą́dóó hoʼdíídeeʼ, áádóó haghangóó anídzoodzá.
5 Nítʼééʼ éí asdzání iʼniiltsąądgo David yichʼįʼ haneʼ áyiilaago ání, Iʼniistsąąd.
6 Áádóó David éí Jóʼab yichʼįʼ iʼííłʼaʼ, Het dineʼé Yuráíyah shaa níłʼá. Áko David yichʼįʼ Jóʼab éí Yuráíyah ayííłʼaʼ.
7 Nítʼééʼ Yuráíyah éí David yaa níyáago David nahódééłkidgo ání, Jóʼab haash yitʼéego naaghá áádóó Ízrel dineʼé bił haa hootʼé índa anaaʼdi éí haa dahatʼı̨́?
8 Áádóó David éí Yuráíyah áyidííniid, Nighangóó nídídáahgo nikeeʼ táánígis. Áko Yuráíyah éí aláahgo naatʼáanii bighandóó dah nízdiidzáago, aláahgo naatʼáanii chʼiyáán hainínilígíí hakééʼ eejaaʼ.
9 Nidi Yuráíyah binanitʼaʼí bá nidaalʼaʼí tʼáá ałtso bił aláahgo naatʼáanii bichʼéédą́ąʼgi daʼiiłhaazhgo tʼáadoo bighangóó anáádzáa da.
10 Áko David yił dahoolneʼgo ádaaní, Yuráíyah tʼáadoo bighangóó ninásdzáa da. Áko David éí Yuráíyah áyidííniid, Nízaadę́ę́ʼ néínídzáago haʼátʼéegoshąʼ tʼáadoo nighangóó nídínídzáa da?
11 Nítʼééʼ Yuráíyah éí David áyidííniid, Jó, níbaal biyiʼdi tsitsʼaaʼ dílzinii siʼą́ áádóó Ízrel dineʼé índa Júdah dineʼé níbaal yiiʼ nidaháaztą́, áádóó bóhonishníihii Jóʼab índa shinanitʼaʼí bá nidaalʼaʼí éí tʼáá halgaigi nidahaazná. Ákoósh shí tʼóó shighangóó nídeeshdáałgo áadi tʼóó ashą́ągo áádóó tʼóó ashdlą́ągo sheʼasdzą́ą́ bił shiiłkáah doo? Tsʼídá tʼáá aaníí hiníná áádóó niiʼ sizíinii hiná; shí ałdóʼ tsʼídá tʼáá aaníí doo ákódeeshníił da.*
12 Áádóó David éí Yuráíyah áyidííniid, Díí jı̨́ ałdóʼ tʼáá kǫ́ǫ́ nanináago yiską́ągo nílááhgóó nééʼdeeshnih. Áko Yuráíyah éí Jerúsalem kin haalʼáagi bee iʼííʼą́, náábiiskání ałdóʼ tʼáá ákǫ́ǫ́ bee anááʼootʼą́.
13 Áko David hágo hodííniidgo binááł ajííyą́ą́ʼ áádóó ajoodlą́ą́ʼ, índa hoʼiiłdlą́ągo hoł honiidoi, áádóó bóhojółníihii bá nidaalʼaʼí daneezhjéeʼgi hó ałdóʼ hatsáskʼeh bikááʼ ajiiłhaazh, nidi haghangóó tʼáadoo nízdeesdzáa da.
14 Ákódzaadóó hoosʼįįdgo David éí Jóʼab yichʼįʼ naaltsoos áyiilaago Yuráíyah yeiníłtsoozgo Jóʼab yichʼįʼ yił anáyííłʼaʼ.
15 Naaltsoos áyiilaaígíí biyiʼ kóníigo bee akʼeʼashchı̨́, Anaaʼdi alą́ąjįʼ tsʼídá yéego daʼahijigą́ąʼjįʼ Yuráíyah biʼdííłnihgo ni éí áádę́ę́ʼ nídíídááł, áko bíniʼdii atíbiʼdilnéehgo dadootsaał.
16 Ákódzaadóó Jóʼab kin haalʼáhígíí hazhóʼó hayíísidgo doo nídanilyéésgóó nidaabaahígíí bitahjįʼ Yuráíyah bizhníłniiʼ.
17 Áko kin haalʼáhídóó siláo chʼíkaigo siláo éí Jóʼab yił nidaabaahígíí yił daʼahoogą́ąʼgo David bá nidaalʼaʼídóó siláo łaʼ dabiʼdoogą́ą́ʼ índa Het dineʼé Yuráíyah ałdóʼ biʼdiisyı̨́.
18 Nítʼééʼ Jóʼab éí David yichʼįʼ iʼííłʼaʼgo anaaʼgi ádahóótʼįįdígíí tʼáá ałtso yee yił hoolneʼ.
19 Áádóó kóníigo haneʼ yideezʼánígíí bichʼįʼ hadzoodzííʼ, Anaaʼgi áhóótʼįįdígíí aláahgo naatʼáanii ałtso bee bił hwíínílneʼgo,
20 éí yikʼee aláahgo naatʼáanii báhóóchįįd ládą́ą́ʼ kóniʼdidoolnííł, Haʼátʼéegoshąʼ kin haalʼáii bitʼááh woojéeʼgo bił daʼahoohgą́ą́ʼ? Daʼ díísh doo nihił béédahózin da? Shą́ą́ʼ, kin haalʼá binaa ahééʼítłʼinígíí bighą́ą́ʼdę́ę́ʼ daʼdiłtʼoh niʼ.
21 Háishąʼ Jeróbesheth biyeʼ Abímelek yiyiisxı̨́? Shą́ą́ʼ, kin haalʼá binaa ahééʼítłʼinígíí bighą́ą́ʼdę́ę́ʼ asdzání léiʼ tsé daashjééʼ hakʼijįʼ hadah ayiyííłhango Thííbez kin haalʼáadi dadziztsą́. Haʼátʼéegoshąʼ kin haalʼá binaa ahééʼítłʼinígíí bitʼááh woojééʼ? Áko ábididííniił, Ná naalʼaʼí Het dineʼé Yuráíyah ałdóʼ daaztsą́.
22 Áko haneʼ yideezʼánígíí dah diiyáago Jóʼab haneʼ yił biníłʼaʼígíí tʼáá átʼé David yee yił hoolneʼ.
23 Áádóó haneʼ yiníʼánígíí David áyidííniid, Tʼáá aaníí diné nihikʼeh dadeesdlı̨́ı̨́ʼ; kin haalʼáádę́ę́ʼ halgaijįʼ nihichʼįʼ chʼídahaazhjééʼ, áádóó kin haalʼá bił yah aʼatiinjįʼ tʼą́ą́ʼ anídaniilkaad.
24 Nítʼééʼ daʼdiłtʼohii kin haalʼá binaa ahééʼítłʼinígíí bighą́ą́ʼdę́ę́ʼ ná nidaalʼaʼí dayółtʼóohgo aláahgo naatʼáanii bá nidaalʼaʼí łaʼ nidabiʼdiztseed. Áádóó índa ná naalʼaʼí Het dineʼé Yuráíyah joolyéhígíí ałdóʼ hoʼdiisyı̨́.
25 Áko David haneʼ yiníʼánígíí áyidííniid, Jóʼab kóbididííniił, Díí áhóótʼįįdígíí tʼáadoo niʼdiiłʼáhí; jó, diltłish bee łaʼ hoʼdiilyééh áádóó náádaałaʼ nidabiʼditsiʼ. Kin haalʼáhígíí bikʼijįʼ hózhǫ́ yéego anaaʼ ádaahłéehgo bikʼeh dadohdleeh. Áádóó Jóʼab chánah ádíílííł.
26 Nítʼééʼ Yuráíyah beʼasdzą́ą́ éí bahastiin Yuráíyah daaztsą́ągo yaa hodiiztsʼą́ąʼgo bahastiin yę́ę yaa atínídindleeh.
27 Áádóó yínííł ałtso hwiih haaldogo David háká iʼííłʼaʼgo bighanjįʼ baa hoʼdeedlóóz, áko beʼasdzą́ą́ dzizlı̨́ı̨́ʼ, áádóó ashkii bá jishchı̨́. Nidi David kójíítʼįįdígíí bee Bóhólníihii doo bił hojííshǫǫd da.
Footnotes
^ Íídą́ą́ʼ anaaʼ hólǫ́ǫgo siláołtsooí éí asdzání yił dabiiłkaahgo doo bee hazʼą́ą da nítʼééʼ.
