2 Samuel 12:1-31
12 Áádóó Bóhólníihii éí Néíthan wolyéii David yichʼįʼ ayííłʼaʼ. Áko haa níyáago kóhodííniid, Kin haalʼáagi diné naaki naaʼaash, łaʼ éí atʼı̨́, áádóó łaʼígíí éí bahojoobáʼí.
2 Diné atʼínígíí éí bidibé tʼóó ahayóí áádóó bibéégashii dah danéelkaad.
3 Nidi diné bahojoobáʼígíí éí tʼáá ałtsoní bee ádin, nidi dibé yázhí biʼáadii nayiisniiʼígíí tʼéiyá. Éí béhégo yineesą́ągo tʼáá bí áádóó baʼáłchíní yił daneeyą́; bichʼiyąʼ łaʼ yiyiisą́ągo índa yidlánígíí yiyiiłdlą́ągo tʼáá bí bitsiʼ nahalingo ádíyóltąʼ.
4 Nítʼééʼ diné chʼaayigáałii léiʼ diné atʼíinii yaa níyá, áko diné atʼíinii bidibé áádóó bibéégashii bitahdę́ę́ʼ łaʼ bee bá ałkʼee áhojóleʼígi átʼée nidi diné bahojoobáʼígíí bibéhé diné baa níyáhígíí yá yiyiisxı̨́.
5 Áko David díí diné atʼínígíí yaa hodiiztsʼą́ąʼgo tʼáá íiyisí yikʼee báhóóchįįdgo Néíthan ííłní, Tsʼídá tʼáá aaníí Bóhólníihii hiná; ákótʼéego tsʼídá tʼáá aaníí éí diné ákódzaaígíí dadootsaałgo yą́ą́h nilı̨́.
6 Áádóó éí diné béhé aghajíltínígíí bitsáskʼehgi dibé yázhí dı̨́ı̨́ʼ ninázhdoodlééł, háálá díí kójíítʼįįdgo doo aa aʼáhí jiniizı̨́įʼ da.
7 Néíthan éí David áyidííniid, Ni lą́ą diné ákótʼéii nílı̨́ ni. Ízrel dineʼé biBóhólníihii Diyin God kóní, Ízrel dineʼé aláahgo binanitʼaʼí nílı̨́į doogo akʼah nikʼi yaadziidgo níísı̨́ı̨́ʼ áádóó Saul bitsʼą́ąjįʼ yisdánííłtı̨́.
8 Áádóó ninanitʼaʼí yę́ę bikin naa diníʼą́, índa ninanitʼaʼí yę́ę bidaʼasdzą́ą́ nííʼ dooleełgo naa diníʼą́, áádóó Ízrel dineʼé índa Júdah dineʼé naa diníʼą́; éí doo nił sihgóó tʼah biláhígo naa náádiʼyeeshdlééł nítʼééʼ.
9 Haash yitʼéego Bóhólníihii yee haadzíiʼii síníʼįįdgo binááł doo yáʼáshóonii íinilaa? Het dineʼé Yuráíyah diltłish bee síníłhı̨́, áko beʼasdzą́ą́ nítʼéʼígíí neʼasdzą́ą́ íinilaa; jó, Áman dineʼé bidiltłish bee síníłhı̨́.
10 Éí bąą kʼad diltłish éí naʼáłchíní náás ahoolchíiłii doo bitsʼą́ąjįʼ kódoolníił da, sisíníʼįįdígíí bąą áádóó Het dineʼé Yuráíyah beʼasdzą́ą́ nítʼéʼígíí neʼasdzą́ą́ íinilaaígíí bąą.
11 Bóhólníihii kóní, Shoo, nighan hazʼą́ą́dóó doo yáʼáshóonii nikʼijįʼ nichʼįʼ naaldzilgo ádeeshłííł, áko tʼáá ninááł neʼasdzą́ą́ danilíinii nitsʼą́ą́ʼ nídideeshniłgo bił kééhótʼíinii baa deeshnił; éí tʼáá jı̨́įgo yił náníjah doo.
12 Jó, tʼáá nahontʼinee éí baa nisíníyá, nidi shí éí Ízrel dineʼé tʼáá ałtso binááł tʼáá jı̨́įgo ákódeeshłííł.
13 Áádóó David éí Néíthan yichʼįʼ haadzíiʼgo ádííniid, Bóhólníihii bichʼįʼ ádił asésiih. Néíthan éí David áyidííniid, Ádił asínísiihígíí éí Bóhólníihii ná yóóʼiidííʼą́; doo dadíítsaał da.
14 Ákondi kwíínítʼįįdígíí bee Bóhólníihii biʼanaʼí dabódziihii ayóó átʼéego bá ashjaʼiinilaago awééʼ ná yizhchínígíí tʼáá aaníí dadootsaał.
15 Nítʼééʼ Néíthan bighangóó anáádzá.
Áko Bóhólníihii éí awééʼ Yuráíyah beʼasdzą́ą́ nítʼééʼ yę́ę éí David yá yishchínígíí atíyiilaa áádóó tʼáá íiyisí yéego bitah honiigai.
16 Éí bąą David éí Diyin God náyookąąhgo awééʼ yá sodilzin, áko David tʼáadoo ayání yah anádáahgo tłʼééʼ bíighah tʼáá niʼgóó sitı̨́įgo néílkááh.
17 Nítʼééʼ bighandóó aląąjįʼ naazíinii dah diikaigo nídahodidoodzı̨́ı̨́s biniyé hachʼįʼ niikai, nidi doo íinízin da, áádóó tʼáadoo nidi bił daʼjííyą́ąʼ da.
18 Ákódzaadóó tsostsʼid yiską́ągo awééʼ daaztsą́. Áko David bá nidaalʼaʼí éí awééʼ daaztsánígíí yee hoł dahodoolnihígíí bikʼee bił daayééʼ; jó, ádaaní, Shoo, awééʼ tʼah hiná yę́ędą́ą́ʼ hachʼįʼ yádeiiltiʼgo doo nihijíistsʼą́ąʼ da niʼ. Haadashąʼ ádiʼdoolnííł, awééʼ daaztsánígíí bee bił dahwiilneʼgo?
19 David bá nidaalʼaʼí hazhóʼógo ałchʼįʼ yádaałtiʼgo David yaa ákoniizı̨́įʼgo awééʼ daaztsą́ą́ lá niizı̨́ı̨́ʼ; éí bąą David bá nidaalʼaʼí áyidííniid, Daʼ awééʼésh daaztsą́? Aooʼ, daaztsą́, dahodííniid.
20 Áko David niʼdóó nídiiʼnaʼgo táádeesgis áádóó akʼah yee ádeestłahgo ééʼ łaʼ yiih náádzá. Áádóó índa Bóhólníihii bikin góneʼ yah ííyáago yichʼįʼ nahasá. Áádóó bighangi nádzáago chʼiyáán yiyííkeedgo biyaa niʼíką́ągo ííyą́ą́ʼ.
21 Nítʼééʼ bá nidaalʼaʼí ádabiłní, Díísh haʼátʼíí baa nisíníyá? Tʼáadoo íyání awééʼ baa nicha nítʼééʼ, azhą́ tʼah hináa nidi, áko awééʼ daaztsą́ągo índa nídiniʼnaʼgo ííníyą́ą́ʼ.
22 Áko ádííniid, Awééʼ tʼah hináago tʼáadoo ashání baa yishcha nítʼééʼ; jó, ádíshní, Tʼáadoo leʼígi átʼé Diyin God nilíiniida shaa jiidoobaałgo awééʼ hináa dooleełgo daʼátʼé.
23 Nidi kʼad éí daaztsą́, haʼátʼíísh biniyé doo ashą́ą da doo? Daʼ hináagoósh áńdeeshdlííł? Bichʼįʼ deeshááł, nidi bí éí doo áádę́ę́ʼ shaa nídoodáał da.
24 Áko David beʼasdzą́ą́ Bath-shííba hayiʼiyoosʼniid, áádóó yił yah ííyáago yił biiłkááh, áádóó bikʼijįʼ ashkii yishchı̨́. Nítʼééʼ Sálaman yee yiyíízhiʼ, áko éí Bóhólníihii ayóóʼábóʼní.
25 Índa bá halneʼii Néíthan dah yidiiłʼaʼgo ání, Jedidáíyah joolyée doo; Bóhólníihii biniitʼaa ákóhozhdííniid.*
David éí Rábah kin haalʼáii yisná (1Chr. 20:1-3)
26 Nítʼééʼ Jóʼab éí Áman dineʼé bikin haalʼáii Rábah hoolyéii yichʼįʼ anaaʼ hasłı̨́ı̨́ʼ áádóó aláahgo naatʼáanii bikin haalʼáii yisná.
27 Áádóó Jóʼab éí bá nidaalʼaʼí David yichʼįʼ ayiisʼaʼgo ííłní, Rábah dineʼé bił daʼaheeshgą́ąʼgo tooh nílínígíí bibąąhgi kin haalʼáhígíí séłná.
28 Éí bąą kʼad diné áłah áníléehgo kin haalʼáhígíí binánínéehgo dííłnééł; éí doodaiiʼ shí daatsʼí kin deeshnéełgo shízhiʼ bee hójíi doo.
29 Nítʼééʼ David éí diné áłah áyiilaago Rábahgóó nínáago áadi yił daʼahoogą́ąʼgo deisná.
30 Áádóó Áman dineʼé aláahgo binanitʼaʼí binaatʼá chʼah bitsiiʼ yikʼiidííʼą́; éí óola tálent dah adiidlohígíí bíighahgo tsé ílíinii bee nidaashchʼąąʼ nítʼééʼ lá, áádóó éí David bikʼi dootʼą́. Kin haalʼáhídóó naalyeʼé tʼóó ahayóí nídeizhjaaʼ.
31 Áko kin haalʼáhígi diné nidaakaii nídeizhʼeezhgo bee nidaʼiijíhígíí áádóó béésh nitłʼizii tsénił yee nidaalnishgo áyiilaa, áádóó hashtłʼish yitʼeesgo hazʼánígi nidaalnishgo áyiilaa. Tʼáá ákótʼéego Áman dineʼé bikin hadaasʼáhídóó tʼáá ałtso ákóyiilaa. Áko David áádóó bidineʼé tʼáá ałtso Jerúsalem kin haalʼáágóó anídahaaskai.
Footnotes
^ Jedidáíyah jinínígíí éí Hííbrew kʼehjígo Bóhólníihii ayóóʼábóʼní jiníigo óolyé.
