2 Samuel 13:1-39
13 Áádóó náás hodeeshzhiizhgo David biyeʼ Ábsalam éí bideezhí baa dzólní; éí Téímar wolyé, áko David biyeʼ náánáłaʼ Ámnan wolyé; éí ayóóʼábóʼní.
2 Áádóó Ámnan éí Téímar bilah átʼéego tʼáá íiyisí yídin bééʼniitsxaahgo yikʼee doo bá átsʼíid da; jó, chʼikę́ę́h bizháán naagháii nilı̨́, áko Ámnan éí baa nitsídzíkeesgo tʼáá íiyisí há nantłʼago tʼáadoo ájóleʼgigóó tʼóó bídin ájínééh.
3 Áko Ámnan bikʼis łaʼ hólǫ́, éí Jánadab wolyé; éí David bínaaí Shímiya biyeʼ; éí diné tʼáá íiyisí nahagizii nilı̨́įgo
4 Ámnan áyidííniid, Shoo, aláahgo naatʼáanii biyeʼ nílíinii, haʼátʼéegoshąʼ tʼáá ákwíí jı̨́ nídínínídzá nahonílin? Bee shił hólneʼ. Ámnan ádííniid, Shínaaí Ábsalam bideezhí Téímar ayóóʼóshʼní.
5 Jánadab áhodííniid, Nitsáskʼeh bikááʼ sínítı̨́įgo dantsaah áhodílʼı̨́, áko nizhéʼé naa doogáałgo nidínóołʼįįłgo ábididííniił, Nánooshkąąh, hániʼdii shilah Téímar shaa doogáałgo chʼiyáán łaʼ shaʼdoołtsoł índa shinááł hashtʼeiléehgo yideestsééł índa shidiʼyoosı̨́ı̨́ł.
6 Áko Ámnan neeztı̨́įgo daʼáhodiltsaah íʼdiilyaa, áádóó aláahgo naatʼáanii baa níyáago Ámnan éí aláahgo naatʼáanii áyidííniid, Nánooshkąąh, hániʼdii shilah Téímar shaa doogáałgo shinááł łeesʼáán naakigoda íidoolíiłgo éí shiidiyoosı̨́ı̨́ł.
7 Nítʼééʼ David éí Téímar bighangóó kóníigo iʼííłʼaʼ, Nílááh, nilah Ámnan bighangóó dínáahgo chʼiyáán bá ánílééh.
8 Áádóó Téímar éí halah Ámnan bighandi sitı̨́įgo baazhníyá. Akʼáán ákǫ́ǫ́ jiníką́ągo áadi tadzoozniiʼ, áádóó binááł bááh nímazí ájiilaago dzistʼé.
9 Nítʼééʼ binááł bitseeʼí bee bááh sitʼéego háájííką́, nidi doo tʼáá kʼad yiyííyą́ąʼ da. Áádóó Ámnan ádííniid, Diné tʼáá ałtso chʼídookah. Áko tʼáá ałtso tłʼóóʼgóó chʼídahaaskai.
10 Áko Ámnan éí Téímar ííłní, Aadę́ę́ʼ nishtéhí góneʼ chʼiyáán yah anikaahgo shiʼdiʼyíísı̨́ı̨́ł, áádóó Téímar łeesʼáán ájiilaaígíí Ámnan halah bił yah ajííką́.
11 Áko yidooyı̨́ı̨́ł biniyé baazhníką́, nítʼééʼ hasiłgo áháłní, Shił níteesh, shilah.
12 Áádóó ábijiní, Dooda, shilah, tʼáadoo bíshiníłchéhí, háálá Ízrel dineʼé bitahgi ákódaatʼéii doo ádoolníił da nítʼééʼ; díí doo áháyąʼ óólééh lágo.
13 Shíshąʼ, éí bee shaa yáhóósįįdígíí háágóó bił deeshááł? Áádóó ni Ízrelgi tʼáá íiyisí doo áhoosyąądii nílı̨́į doo. Éí bąą kʼad nánooshkąąh, aláahgo naatʼáanii bichʼįʼ handziih, áko éí ahaa diitʼashgi dooda doo didooniił da.
14 Tʼáá ákótʼée nidi doo hwíistsʼą́ą́ʼgóó haláahgo bidziilgo tʼáá bizááká hoł neezhtéézh.
15 Ákohgo Ámnan tʼáá íiyisí hojoosłxááʼ; hakʼee deeznihgo hojoosłxáʼígíí éí ayóóʼóʼóʼní yee ayóóʼáhóʼníí nítʼéʼígíí biláahgo ayóó átʼéego doo hoł niʼíłdįįh da. Áádóó áháłní, Akǫ́ǫ́h chʼínílyeed.
16 Áko ábizhdííniid, Doo chʼídeeshwoł da; díí chʼíshininíłchéhígíí tsʼídá agháago doo yáʼáshónígi áshidíílííł; doo yáʼáshónígi áshiinilaaígíí biláahgo ádíínííł. Nidi doo hwíistsʼą́ąʼ da.
17 Áko bá naalʼaʼí tʼáá bí tʼéí bá ninálʼaahígíí hágo yidííniidgo ííłní, Díí asdzání kʼad shitsʼą́ąjįʼ chʼíbíníyííł áádóó bitsʼą́ą́ʼ dáádílkał bił dah asítįįh.
18 Ééʼ tʼáá sahdii átʼéego naashchʼąąʼii yiiʼ sitı̨́, háálá aláahgo naatʼáanii bitsiʼké bízháán nidaakaii ééʼ ákótʼéii yiiʼ naaztı̨́. Ámnan bá naalʼaʼí hoł chʼíníʼáazhgo hachʼą́ą́h dáʼdiʼníłkaal.
19 Nítʼééʼ Téímar éí łeeshchʼiih hatsiiʼ bikʼíjízhjaaʼ áádóó biʼééʼ tʼáá sahdii átʼéego naashchʼąąʼígíí akʼi nidziisdǫ́ǫ́z, índa hatsiitsʼiin bikʼizdéesʼniiʼgo jichago níjoodááł.
20 Áko bínaaí Ábsalam ábíłní, Daʼ nilah Ámnanísh nił neezhtéézh? Ákótʼée nidi tʼáadoo ádíníní diiłheeł, shideezhí, éí nilah átʼé. Tʼáadoo bąąh níniʼí. Áko hánaaí Ábsalam bighandi tʼáá hó tʼéí yínííł jílı̨́įgo dzizdá.
21 Nítʼééʼ David díí áhóótʼįįdígíí yaa hodiiztsʼą́ąʼgo tʼáá íiyisí yikʼee báhóóchįįd.
22 Áádóó Ábsalam bínaaí Ámnan yáʼátʼéehii, doodaiiʼ doo yáʼátʼéehii tʼáadoo yichʼįʼ yee haadzíiʼ da; jó, Ábsalam éí Ámnan yijoosłxááʼ, háálá bilah Téímar tʼáá bizááká bił jineezhtéézh lá.
Ábsalam kʼééhodiidlaago yóóʼeelwod
23 Ákódzaago naaki nááhaidóó bikʼijįʼ Ábsalam éí diné bá tádadiʼdoogishígíí Béíyal-héízar kin shijaaʼgi áłah áyiilaa, éí Íífreiyim kin haalʼá bíighahgi áhoolyé; éí aláahgo naatʼáanii biyeʼké hágo yidííniid.
24 Nítʼééʼ Ábsalam éí aláahgo naatʼáanii yaa níyáago ííłní, Shoo, ná naalʼaʼí nishłíinii shá tádadiʼdoogishígíí áłah íishłaa; bíniʼdii, nánooshkąąh, aláahgo naatʼáanii áádóó bá nidaalʼaʼí éí ná naalʼaʼí nishłı̨́įgo shaa hidookah.
25 Áádóó aláahgo naatʼáanii éí Ábsalam áyidííniid, Dooda, shiyeʼ, doo nidediidląąłígíí biniyé doo tʼáá áníiltso ákǫ́ǫ́ diikah da. Nidi lą́ bizhdidooniiłígíí yaa nisééʼáłdił. Ákótʼée nidi doo tʼáá kʼad ákǫ́ǫ́ deeyáa da, nidi tʼóó hakʼi hozhdoodliiłgo há haadzííʼ.
26 Áko Ábsalam ádííniid, Éí doodago, bíniʼdii, nánooshkąąh, shínaaí Ámnan nihił dookah. Áádóó aláahgo naatʼáanii áhodííniid, Haʼátʼíísh biniyé éí ákǫ́ǫ́ nihił yikah doo?
27 Nidi Ábsalam éí hachʼįʼ yaa nisééʼáłdiłgo Ámnan áádóó aláahgo naatʼáanii biyeʼké tʼáá ałtso bił yikah dooígíí hoł tʼáá ííko.
28 Áko Ábsalam bá nidaalʼaʼí yichʼįʼ haadzíiʼgo ání, Díí kʼad baa ákodadínóohsįįł: Ámnan éí wáin bił honiiłdoigo áádóó, Ámnan atídahohłééh, nihidííniidgo dadiyoołhééł. Daʼ doósh tʼáadoo bikʼee nihił daayéʼí, nihidishníigo nihichʼįʼ bee haasdzíiʼ da? Chánah ídaʼdíínółzin áádóó tʼáadoo ninádahinołyésí.
29 Áádóó Ábsalam bá nidaalʼaʼí tʼáá áyidííniidígi ádaadzaago Ámnan dayiisxı̨́, áko aláahgo naatʼáanii biyeʼké tʼáá ałtso dah diijééʼ áádóó diné tʼááłáʼí nítínígo bidzaanééz yikʼi dah dahiniljı̨́įdgo bił yóóʼaheezhjééʼ.
30 Áko kóhóótʼįįdgo tʼah níjookahgo David haneʼ baa yítʼą́, kóháʼníigo, Ábsalam éí aláahgo naatʼáanii biyeʼké ałtso neistseed, tʼááłáʼí nidi doo łaʼ chʼééyáa da.
31 Áádóó aláahgo naatʼáanii náhidiitahgo biʼééʼ ayííłdláád índa niʼgóó neeztı̨́, áádóó bá nidaalʼaʼí tʼáá ałtso dabiʼééʼ adayiisdláadgo bíighahgóó naazı̨́.
32 Nítʼééʼ David bikʼis Shímiya biyeʼ Jánadab ádííniid, Bóhonishníihii nílíinii, aláahgo naatʼáanii biyeʼké tsíłkéí ałtso naaztseed lá, tʼáadoo níníziní; éíyeeʼ Ámnan tʼéiyá biʼdiisyı̨́; jó, Ábsalam bilah Téímar tʼáá bizááká bił jineezhtézhídóó yee hoołʼaʼgo ákóhodoolíiłgo yinahazʼą́.
33 Éí bąą bóhonishníihii aláahgo naatʼáanii nílíinii, díí aláahgo naatʼáanii biyeʼké ałtso naaztseed, haʼníigo nijeehwiitʼaahígíí tʼáadoo yinídlą́ągo niʼdiiłʼáhí; jó, Ámnan tʼéiyá biʼdiisyı̨́.
34 Nítʼééʼ Ábsalam yóóʼeelwod. Áko dinééh éí kin haalʼáii yikʼi haʼídéesʼı̨́įʼii dééʼı̨́įʼgo, nítʼééʼ, shoo, bineʼjí yílkʼidídę́ę́ʼ diné tʼóó ahayóí deíjeehgo yiyiiłtsą́.
35 Áko Jánadab éí aláahgo naatʼáanii áyidííniid, Shoo, aláahgo naatʼáanii biyeʼké aadę́ę́ʼ náákah tʼáá ná naalʼaʼí ádííniidígi áhoodzaa.
36 Ákódzaago tʼóó niyázhníłtiʼígo aláahgo naatʼáanii biyeʼké yikai. Áádóó chaał adahoyiiníihgo daacha; aláahgo naatʼáanii índa bá nidaalʼaʼí tʼáá ałtso yił ayóó átʼéego daacha.
37 Nidi Ábsalam yóóʼeelwodgo Amáíhad éí Gíísher kéyahgi aláahgo naatʼáanii biyeʼ Tálmai wolyéii yichʼįʼ ííyá, áádóó David tʼáá ákwíí jı̨́ hayeʼ Ámnan baa jicha.
38 Ákohgo Ábsalam yóóʼeelwodgo Gíísher kéyahgóó ííyá; áadi tááʼ binááhai.
39 Nítʼééʼ aláahgo naatʼáanii David biyeʼ Ábsalam tʼáá íiyisí yídin silı̨́įʼgo bichʼįʼ deeshááł nízin, háálá haʼoosʼniidgo bikʼehataʼgo Ámnan daaztsánígíí doo yaa nitsíkees da.
