2 Samuel 14:1-33
14 Nítʼééʼ Zerowáíyah biyáázh Jóʼab éí baa ákoznízin dzizlı̨́ʼígíí aláahgo naatʼáanii biyeʼ Ábsalam yídin silı̨́ı̨́ʼ lá.
2 Áádóó Jóʼab éí Tekówa kin haalʼáágóó iʼííłʼaʼgo áádę́ę́ʼ asdzání hóyánígíí shóoztʼeʼgo nádlóóz, áádóó éí áyidííniid, Nánooshkąąh, yínííł nilíinii íʼdílnééh áádóó yínííł ídlı̨́ı̨́jí ééʼ biih díínááł; tʼááká tłah bee ádóóltłah lágo, nidi asdzání éí nízaadgóó yínííł nilı̨́įgo daaztsáanii yąąh bíniʼígi átʼéego íʼdílnééh.
3 Áko aláahgo naatʼáanii bichʼįʼ díínááł, áádóó kótʼéego íʼdíílíłígíí bichʼįʼ bee hadíídzih. Áko Jóʼab éí saad bee hahizdoodzihígíí há hashtʼeyiilaa.
4 Nítʼééʼ Tekówadóó asdzání éí aláahgo naatʼáanii yichʼįʼ haadzíiʼgo niʼjįʼ nitsideelgoʼ áádóó yichʼįʼ yaa ádzaago ání, Aláahgo naatʼáanii nílíinii, shíká adíílwoł.
5 Nítʼééʼ aláahgo naatʼáanii ábidííniid, Haʼátʼíí lá neinítʼı̨́įgo ádíní? Áko ázhdííniid, Shí tʼáá aaníí asdzání bąąh áhásdįįdii nishłı̨́; shahastiin shąąh nástʼįįd.
6 Áádóó asdzání ná naalʼaʼí nishłı̨́įgo shiyáázh naaki. Nítʼééʼ halgaidi ahigą́ągo tʼáadoo ałtsʼábóníłí dago łaʼ bikʼis atíyiilaago yiyiisxı̨́.
7 Áádóó, shoo, shikʼéí tʼáá ałtso asdzání ná naalʼaʼí nishłı̨́įgo shaatįįh yikaigo ádashiłní, Bikʼis atíyiilaaígíí nihaa diníʼaahgo dahodiyiilyééł, háálá hakʼis jiisxı̨́įgo beʼiinaʼ nizhníłtʼiʼ, áko ííʼ jílínígíí ádahodiildįįł. Ákohgo shitsííd łaʼ tʼah diltłiʼígíí deidínóołtsis áádóó shahastiin yę́ę bízhiʼ nahasdzáán bikáaʼgi kʼééʼdeiʼdoołchǫǫł, doodaiiʼ biyeʼ doo łaʼ naagháágóó ádeidoolííł.
8 Áádóó aláahgo naatʼáanii éí asdzání áyidííniid, Nílááh, nighangóó nídídááh, índa biniyé yíníyáhígíí bee hadeesdzihgo níká iʼdoolwoł.
9 Nítʼééʼ Tekówa kin haalʼáádóó asdzání éí aláahgo naatʼáanii ííłní, Bóhonishníihii aláahgo naatʼáanii nílíinii, doo ákwii áhóótʼįįdígíí bá naashtłizh doo, áádóó shizhéʼé baʼáłchíní náás ahoolchíiłii ałdóʼ yá nandeeh doo, nidi aláahgo naatʼáanii áádóó yikááʼdóó nahaʼáii éí doo bee bihodiitʼiʼ da dooleeł.
10 Áko aláahgo naatʼáanii ání, Tʼáá háiida haʼátʼíhída náándooʼniidgo éí shaa hodíílóós, áádóó doo naa nínáázhdóotʼįįł da.
11 Áko asdzání ádííniid, Nánooshkąąh, aláahgo naatʼáanii nílíinii, Bóhólníihii niDiyin God béénílniih leʼ, áko diné bikʼéí bidił biniinaa kʼéédadiʼdoodlíiłii éí diné doo łaʼ néidiyoołhééłgóó ádíílíiłgo ákótʼéego shiyáázh doo deidiyoołhéeł da. Áádóó áhodííniid, Tsʼídá tʼáá aaníí Bóhólníihii hiná; ákótʼéego tsʼídá tʼáá aaníí niyáázh bitsiiʼ tʼááłáʼí nidi doo niʼjįʼ nidoodił da.
12 Áko asdzání ádííniid, Bíniʼdii asdzání ná naalʼaʼí nishłíinii, nánooshkąąh, bóhonishníihii aláahgo naatʼáanii saad bee bichʼįʼ hadeesdzih bee shaʼdiʼníʼaah. Áádóó ádííniid, Hágoshı̨́ı̨́, handziih.
13 Nítʼééʼ asdzání ání, Haʼátʼéegoshąʼ Diyin God bidineʼé nilíinii bikʼijįʼ kótʼéego tsídíníkééz? Kótʼéego aláahgo naatʼáanii díí yee haadzíʼígíí ádihodiitʼiʼiigi laʼ átʼé; jó, aláahgo naatʼáanii éí yóóʼeelwodii doo yił nátʼaash da.
14 Jó, aniné tʼéí nihidadaʼałtłʼin; tó niʼjįʼ yaaką́ągo łeesinootseedii doo áłah ánáolneʼ átʼéegi ádaniitʼé, índa Diyin God éí diné doo łaʼ aʼohgo yaa nitsíkees da, áko bitsʼą́ą́ʼ yóóʼabiʼdoolʼaʼígíí éí doo nahjįʼ niidóʼááł átʼéégóó yaa nitsíkees.
15 Éí bąą kʼad, bóhonishníihii aláahgo naatʼáanii nílíinii, díí bee nichʼįʼ hadeesdzihgo naa níyá, háálá diné shił dahóółyééʼ, áko asdzání ná naalʼaʼí nishłı̨́įgo ádíshní, Kʼad aláahgo naatʼáanii bichʼįʼ hadeesdzih; aláahgo naatʼáanii éí asdzání bá naalʼaʼí bíyókeedígíí tʼáá daatsʼí yiʼdoolííł.
16 Jó, aláahgo naatʼáanii shá yididootsʼı̨́ı̨́ł, áko bá asdzání naalʼaʼí nishłíinii índa shiyáázh bił nihííʼ dooleełii Diyin God nihaidiníʼánígíí bitsʼąą diné ánihiʼniiłdįįdígíí bitsʼąą yisdánihidoonił.
17 Áko asdzání ná naalʼaʼí nishłíinii ádíshní, Bóhonishníihii aláahgo naatʼáanii saad yee haadzíʼígíí bee haʼíídéeshniił, háálá diyingo naalʼaʼí Diyin God bitsʼą́ą́dóó nahalingo bóhonishníihii aláahgo naatʼáanii nilíinii éí yáʼátʼéehii áádóó doo yáʼátʼéehii yaa ákonízin. Éí bąą Bóhólníihii niDiyin God nił hólǫ́ǫ doo.
18 Nítʼééʼ aláahgo naatʼáanii éí asdzání áyidííniid, Tʼáadoo shitsʼąą naníłʼiní; bínandídéeshkiłii bee shił hodíílnihgo, baa nánooshkąąh. Áádóó asdzání ádííniid, Bóhonishníihii aláahgo naatʼáanii nílíinii, kʼad shichʼįʼ handziih.
19 Áko aláahgo naatʼáanii éí asdzání áyidííniid, Daʼ díísh doo tʼáá átʼé Jóʼab ná yinahazʼą́ą da? Áádóó asdzání ádííniid, Tsʼídá tʼáá aaníí hiníná; bóhonishníihii aláahgo naatʼáanii nílíinii, ákótʼéego tsʼídá tʼáá aaníí doo łaʼ nishʼnáajigo, doodaiiʼ nishtłʼajigo bóhonishníihii aláahgo naatʼáanii yee haadzíiʼii bitsʼą́ąjįʼ ázhdooníił da, háálá ná naalʼaʼí Jóʼab díí yichʼįʼ shííłʼaad; saad tʼáá átʼé bee hahideesdzihii shá hashtʼeyiilaa.
20 Ná naalʼaʼí Jóʼab éí díí áhoodzaaígíí łahgo íidoolíłígíí yiniyé átʼı̨́, áádóó bóhonishníihii éí Diyin God bidiyingo naalʼaʼí hóyánígíigi átʼéego hóyą́ągo nihokááʼgóó hólóonii tʼáá ałtso bił bééhózin.
21 Áádóó aláahgo naatʼáanii éí Jóʼab áyidííniid, Shoo, kʼad díí baa niséyá; éí bąą nílááh, dinééh Ábsalam bił nánítʼaash.
22 Nítʼééʼ Jóʼab niʼjįʼ nitsideelgoʼgo tséʼyaa neeztı̨́įgo aláahgo naatʼáanii yichʼįʼ ahééh niizı̨́ı̨́ʼ, áko Jóʼab ádííniid, Díí jı̨́ ná naalʼaʼí nishłíinii díí shił bééhoozin: ajoobaʼ bee shichʼohaʼnéego shąąh tsídíníkééz, bóhonishníihii aláahgo naatʼáanii nílíinii, háálá aláahgo naatʼáanii bá naalʼaʼí bíyókeedígíí yá tʼáá ákótʼéego áyiilaa.
23 Áko Jóʼab dah diiyáago Gíísher kin haalʼáágóó ííyá; áádę́ę́ʼ Jerúsalem kin haalʼáajįʼ Ábsalam yił nátʼáázh.
24 Áádóó aláahgo naatʼáanii ádííniid, Bíniʼdii tʼáá bí bighangóó nídídááh, áko doo bił ahiideestséeł da. Áko Ábsalam éí tʼáá bí bighangóó dah nídiidzá, índa aláahgo naatʼáanii tʼáadoo yił ahiiltsą́ą da.
25 Áko Ízrel dineʼé tʼáá átʼéé nítʼééʼ bitahdóó diné doo łaʼ Ábsalam baa dzólnínígi átʼéego baa haʼniih da. Bikétłʼááhdóó bitsiitʼáajįʼ tʼáá íiyisí hadaałtʼé.
26 Áádóó bitsiiʼ kʼínéígishgo, áko tʼááłáʼí nínáhahgo bitsiiʼ kʼínéígish, háálá bitsiiʼ tʼóó ahayóigo nidaazgo bąą kʼínéígish; aláahgo naatʼáanii bibee dah adiidlohígíí bikʼehgo dah néidiyiidlohgo naakidi neeznádiin shékel bíighahgo bitsiiʼ áníłdáás.*
27 Nítʼééʼ Ábsalam éí ashiiké tááʼ há niheezhchı̨́; bitsiʼ éí tʼááłáʼí: Téímar wolyé; éí asdzání ayóó ánóolninii nilı̨́.
28 Áko Ábsalam éí Jerúsalem kin haalʼáagi kééhatʼı̨́įgo naaki nááhai índa aláahgo naatʼáanii doo yił ahootʼı̨́į da.
29 Éí bąą Ábsalam éí Jóʼab bíká iʼjííłʼaʼ, éí aláahgo naatʼáanii bichʼįʼ hoł dooʼash biniyé, áko Jóʼab doo haa níyáa da; naakidi aleeh góneʼ anááʼjííłʼaʼ, nidi tʼáadoo haa náánádzáa da.
30 Áádóó bá nidaalʼaʼí áyidííniid, Shoo, shidáʼákʼeh bíighahgóó tʼáá áhą́dígi Jóʼab bidáʼákʼeh ákwii bitłʼoh naadą́ą́ʼ bideeʼí hólǫ́; nílááh, ákǫ́ǫ́ dohkáahgo biih dah hodohnííł, áko Ábsalam bá nidaalʼaʼí éí dáʼákʼehgi tłʼoh naadą́ą́ʼ bideeʼí yílʼáii yiih dah hodeeznil.
31 Nítʼééʼ Jóʼab dah diiyáago Ábsalam bighandi Ábsalam yaa níyáago ííłní, Haʼátʼéegoshąʼ ná nidaalʼaʼí éí shidáʼákʼehgi kʼidííláhígíí yiih dah hodeeznil?
32 Ábsalam éí Jóʼab ánááyidooʼniidgo ííłní, Shoo, nichʼįʼ iʼííłʼaʼgo ándííniid, Aláahgo naatʼáanii shá bichʼįʼ díínáałgo shá kóbididííniił nisingo hágo nidííniid nítʼééʼ, Haʼátʼéegoshąʼ Gíísher kin haalʼáádę́ę́ʼ nánísdzá? Tʼah tʼáá áadi naasháago shá yáʼátʼéeh doo nítʼééʼ. Éí bąą kʼad, bíniʼdii aláahgo naatʼáanii bił ahiideestsééł nisin, áko bee ádihodiishtʼiʼii hólǫ́ǫgo hániʼdii shijiiłhé.
33 Áádóó Jóʼab éí aláahgo naatʼáanii yaa níyáago yił hoolneʼ. Nítʼééʼ aláahgo naatʼáanii éí Ábsalam hágo yidííniid. Áko aláahgo naatʼáanii yaa níyáago yichʼįʼ niʼjįʼ nitsidinígoʼgo yaa ádzaa. Áádóó aláahgo naatʼáanii éí Ábsalam yiztsʼǫs.
Footnotes
^ Tádiindóó baʼaan naaki shékel wolyéii éí tʼááłáʼí dah hidiidloh.
