2 Samuel 15:1-37
15 Áádóó bikʼijįʼ Ábsalam éí tsinaabąąs bijáád naakiígíí áádóó łı̨́ı̨́ʼ índa diné ashdladiin yiltʼéego halą́ąjįʼ naajeeh doo biniyé ádá nizhníʼnil.
2 Nítʼééʼ Ábsalam tʼah abíínídą́ą́ʼ náádiiʼnahgo kin haalʼá yah aʼatiinígi dáńʼdítı̨́hígíí bíighahgóó naazįʼ łeh, áko diné łaʼda ałghaʼditʼáahgo éí aláahgo naatʼáanii shá yaa nídóotʼįįł nízinígíí hágo yiłniihgo ííłniih, Háí kin haalʼáhídóoshąʼ naniná? Áádóó ábíłniih, Ná naalʼaʼí nishłı̨́įgo Ízrel dineʼé łaʼ áshtʼı̨́.
3 Áko Ábsalam ábíłniih, Shoo, biniyé nanináhígíí éí nizhónígi índa tʼáá ákǫ́ǫ́ ánítʼı̨́, nidi aláahgo naatʼáanii éí níídóołtsʼįįłii doo łaʼ niiníłtı̨́į da.
4 Áádóó Ábsalam ání, Kéyah tʼáá náhwiistʼą́ą́ nítʼééʼ bá ánihwiiʼaahii áshiʼdiilyaa laanaa. Áko diné tʼááłáʼí nítínígo tʼáadoo leʼé shá baa náhódóotʼįįł nízinii, doodaiiʼ yiniyé shaa hakáhígíí tʼáadoo haadayitʼéhí bá beiníshtʼı̨́į dooleeł.
5 Ákohgo diné łaʼda áhánídóó hachʼįʼ nehekáahgo nitsidahidigeehgo bichʼįʼ kʼíhizhdilnííh áádóó dadziiłtsoodgo dadziitsʼǫs.
6 Ábsalam kóhóółʼįįd: éí Ízrel dineʼé tʼáá ałtso aláahgo naatʼáanii tʼáadoo leʼé shá yaa nídóotʼįįł danízingo yichʼįʼ nehekáahii éí Ábsalam tʼáá bí Ízrel dineʼé ayóóʼádabóʼníi doogo niyiiłnééh.
7 Dı̨́ı̨́ʼ* nááhaidóó bikʼijįʼ Ábsalam éí aláahgo naatʼáanii áyidííniid, Nánooshkąąh, shíniʼdii shiʼníłníihgo ádee haasdzíʼígíí bikʼeh ádeeshnííł; éí Bóhólníihii bichʼįʼ ádee haasdzíʼígíí Hííbran kin haalʼáhígi biʼdeeshłííł.
8 Jó, ná naalʼaʼí nishłíinii ádee haasdzííʼ; éí Gíísher kin haalʼáadi Síriya kéyahgi naashá yę́ędą́ą́ʼ ádíshní, Bóhólníihii tʼáá aaníí Jerúsalem kin haalʼáajįʼ shił nátʼáazhgo índa Bóhólníihii bá naashʼaʼ doo.
9 Nítʼééʼ aláahgo naatʼáanii áháłní, Nílááh, nił hózhǫ́ǫgo yínááł. Áádóó dashdiiyáago Hííbran kin haalʼáágóó jiníyá.
10 Nidi Ábsalam éí Ízrel dineʼé tʼáá ałtso bitahgóó naalchiʼí tajoosʼaʼgo ájíní, Deenástsʼaaʼ bideeʼ bee íʼdílzoołí dasidootsʼą́ąʼgo díigi ádadidoohniił, Ábsalam éí Hííbran kin haalʼáagi nantʼá silı̨́ı̨́ʼ.
11 Ábsalam éí Jerúsalem kin haalʼáádóó diné naakidi neeznádiingo hágo yidííniidígíí ákǫ́ǫ́ yił dah diikai; tʼáadoo átʼéhígóó índa tʼáadoo baa ákodaznízinígóó yił yíkai.
12 Áádóó Ábsalam éí Gáílo dineʼé Ahíthofel yíká iʼííłʼaʼ; éí David yá bił ééhózinii nilı̨́įgo bikin haalʼáádę́ę́ʼ tʼáá éí Gáílo hoolyéédę́ę́ʼ shaazhdoogááł hóʼní; íídą́ą́ʼ nááhidoonihii náájiiłniihgo baa nijighá. Áko nahontʼingo ihodeestʼáanii tʼáá íiyisí bidziil silı̨́ı̨́ʼ índa diné éí Ábsalam yichʼijí danilíinii áłahjįʼ ląʼí kʼeeʼąą yilzhish.
13 Nítʼééʼ David haneʼ baa yítʼą́ągo kóhodooʼniid, Ízrel dineʼé éí Ábsalam yikééʼ nidookahgo ádiih tsídaazkééz.
14 Áádóó David bá nidaalʼaʼí tʼáá ałtso Jerúsalem kin haalʼáagi bił dah yikahígíí áyidííniid, Nídoohjeehgo yóóʼadiiʼnééł, ákódeiidzaago tʼéí Ábsalam doo nihidoołnéeł da; doo hodíínaʼ tsxı̨́įłgo dah didiiʼnééł; tʼáadoo hooyání nihikʼiidoojahgoda, doo yáʼátʼéhígi ádanihidoolííł índa kin haalʼáagi diltłish yee nidanihidoołtsiłgo daʼátʼé.
15 Nítʼééʼ aláahgo naatʼáanii bá nidaalʼaʼí aláahgo naatʼáanii ádeidííniid, Shoo, ná naalʼaʼí daniidlíinii, bídahwííníilníihii aláahgo naatʼáanii nílíinii, tʼáá ánihidiníígóó ádeiitʼı̨́į doogo hashtʼeʼádadíníilzin.
16 Áko aláahgo naatʼáanii dah diiyá áádóó bighandóó danilíinii tʼáá ałtso bikééʼ deínééh, nidi aláahgo naatʼáanii éí asdzání neeználtʼéego baʼákéí yíłʼínígíí tʼáá ákǫ́ǫ́ hooghan yaa ádahalyą́ągo áyiilaa.
17 Áko aláahgo naatʼáanii dah diiyá áádóó diné tʼáá ałtso bikééʼ deínééh índa nízaadgóó adadziizná.
18 Áko bá nidaalʼaʼí tʼáá ałtso bíighah chʼídahaazná. Áádóó Kéreth dineʼé tʼáá ałtso, Pííleth dineʼé tʼáá ałtso índa Gathdóó dineʼé tʼáá ałtso éí diné hastą́ądi neeznádiingo Gath kin haalʼáádóó hakééʼ naakaígíí aláahgo naatʼáanii yilą́ąjįʼ niníná.
19 Nítʼééʼ aláahgo naatʼáanii éí Gathdóó dineʼé éí Ítayai wolyéii áyidííniid, Haʼátʼíísh biniyé ni ałdóʼ nihił yíkah? Nighangóó nídídáahgo áadi aláahgo naatʼáanii bił síníké, háálá déʼéyóní nílı̨́ áádóó yóóʼadabiʼdiisʼaʼígíí nílı̨́.
20 Adą́ą́dą́ą́ʼ índa yíníyáago daʼ ákoósh díí jı̨́ nihitah tádínáahgo áníshłéeh doo? Dííyeeʼ doo bééhózingóó tádíshááh, nílááh, nikʼisóó bił nídíkááh; aa aʼááh hasin índa tʼáá aaníinii nił hólǫ́ǫ doo.
21 Áádóó Ítayai éí aláahgo naatʼáanii ánéidooʼniidgo ání, Tsʼídá tʼáá aaníí Bóhólníihii hiná áádóó bóhonishníihii aláahgo naatʼáanii hiná; ákótʼéego tsʼídá tʼáá aaníí bóhonishníihii aláahgo naatʼáanii tʼáá tádígháahgi, dadootsaałgi, doodaiiʼ hináagi, ákwii ałdóʼ ná naalʼaʼí nishłíinii honishłǫ́ǫ doo.
22 Nítʼééʼ David éí Ítayai áyidííniid, Áko lą́ą, tįʼ yiikah. Áko Gathdóó dineʼé Ítayai dah diináago diné bił naakaígíí tʼáá ałtso áádóó baʼáłchíní bił naakaígíí tʼáá ałtso yił nihiníná.
23 Áádóó kéyahgi kéédahojitʼínígíí tʼáá ádzíłtso ayóó íitsʼaʼgo dajíícha, áko diné tʼáá ádzíłtso haʼnaagóó dah diiná, áádóó aláahgo naatʼáanii tʼáá bí ałdóʼ Kídran tó nílínígíí haʼnaa niníná índa diné tʼáá ałtso hoł yinéłígíí haʼnaa bił nizhnínáago honoojíijigo bił dashdiiná.
24 Ákohgo Zéídak ałdóʼ índa Líívai dineʼé bił naakaígíí éí Diyin God bitsitsʼaaʼ bee ahaʼdeetʼáanii deíʼaah, áádóó Diyin God bitsitsʼaaʼ dílzinii niʼ nideizʼą́, áko Abáíyathar áajįʼ níyá; diné tʼáá ałtso kin haalʼáádóó ałtso chʼídahaaznáajįʼ.
25 Áko aláahgo naatʼáanii éí Zéídak áyidííniid, Nílááh, Diyin God bitsitsʼaaʼ dílzinii kin haalʼáágóó nídóhʼaah. Shichʼohaʼnéego Bóhólníihii shąąh tsídeezkéezgo shił nihéédootʼash, áko bitsitsʼaaʼ dílzinii índa bí hólǫ́ǫgi shił ííshjání íidoolííł.
26 Nidi, Doo naa shił hózhǫ́ǫ da, shiłníigo, shoo, kǫ́ǫ́ naashá, bíniʼdii tʼáá bił yáʼátʼéhígi áshílééh.
27 Nítʼééʼ aláahgo naatʼáanii éí nááʼiiłniihii Zéídak ałdóʼ ííłní, Náasdi áhodoonííł yaa halneʼiísh nílı̨́? Nílááh, kin haalʼáagi hózhǫ́ǫgo hazʼą́ą́góó nídídááh; niyeʼ nidiltʼéego éí Ahímeiyaz niyeʼ nilíinii áádóó Abáíyathar biyeʼ Jánathan bił nídíkááh.
28 Shoo, honoojíidi dah nídzílgaígi ádeeshníłígíí bee shił hodíílnihígíí bibaʼ áníshtʼée doo.
29 Éí bąą Zéídak áádóó Abáíyathar éí Diyin God bitsitsʼaaʼ dílzinii Jerúsalem kin haalʼáágóó tʼą́ą́ʼ názhníʼą́ągo áadi dzizkéé nítʼééʼ.
30 Nítʼééʼ David éí Dził Álivz wolyéii bíjiiyá áádóó jichago ákóde joogáałgo hatsiiʼ bikʼéʼéstiʼgo áádóó hakeeʼ tʼáágééd, áádóó tʼáá ałtso diné hoł naakaígíí bitsiiʼ bikʼídaʼastiʼgo daachago hoł híikai.
31 Áko łaʼ David bił hojoolneʼgo ájíní, Ahíthofel éí tʼáá nahontʼinee indahaʼáii yitaagháago Ábsalam yił nindahaʼá. Áádóó David ázhdííniid, Bóhólníihii nílíinii, nánooshkąąh, Ahíthofel kótʼé níinii doo áháyąʼ nídoodleeł.
32 Ákódzaadóó David éí dziłghą́ąʼjįʼ hajiyáago Diyin God bichʼįʼ nináhádlaahídi nahojiłáá nítʼééʼ, shoo, Árkadóó dineʼé Húshai biʼééʼ neheesdǫ́ǫzgo áádóó bitsiiʼjįʼ łeezh bąąhgo haa níyá.
33 Áko David ábíłní, Shił dah diniʼáazhgo nahontłʼaaígi shitsʼą́ą́ʼ ánítʼée doo.
34 Nidi kin haalʼáágóó tʼą́ą́ʼ nídínídzáago Ábsalam ábididííniił, Aláahgo naatʼáanii nílíinii, ná naalʼaʼí nishłı̨́į doo; tʼáá nizhéʼé yá naalʼaʼí nishłı̨́ yę́ęgi átʼéego kʼad ni ałdóʼ ná naalʼaʼí nishłı̨́į doo. Ákohgo Ahíthofel kótʼé nínígíí doo idééłníi da shá ádíílííł.
35 Daʼ doósh Zéídak áádóó Abáíyathar nááʼiiłniihii nilíinii áadi nił hólǫ́ǫ da doo? Éí bąą tʼáá haʼátʼíhída aláahgo naatʼáanii bighandóó nídiitsʼı̨́hígíí éí nááʼiiłniihii Zéídak áádóó Abáiyathar bił chʼíhíʼaah doo.
36 Shoo, áadi biyeʼké bił naakai; Zéídak biyeʼ Ahímeiyaz áádóó Abáíyathar biyeʼ Jánathan áadi naaʼaash; éí tʼáá haʼátʼíhída nídiitsʼı̨́hígíí shichʼįʼ bił bééʼíłnih doo.
37 Áko Húshai éí David bikʼis nilíinii kin haalʼáajįʼ yah ííyá, áádóó Ábsalam éí Jerúsalem kin haalʼáajįʼ yah ííyá.
Footnotes
^ Łaʼ Diyin God bizaad Hííbrew kʼehjígo dízdiin níigo dabikááʼ. 2Sam. 5:4,5.
