2 Samuel 16:1-23
16 Nítʼééʼ David éí dziłghą́ą́ʼgóó hazʼánígíí bighá jooyáago tʼah nítʼééʼ Miifíbosheth bá naalʼaʼí Záíba hadááh níyá; télii naaki bikʼi dah aznilgo bááh naakidi neeznádiingo áádóó chʼil naʼatłʼoʼii bineestʼąʼ nááltseii neeznádiin shijool bíighahgo áádóó aneestʼąʼ shı̨́įgo nídantʼı̨́hígíí neeznádiingo índa tó abid biiʼ wáin hadeezbingo hadááh yiníyı̨́.
2 Aláahgo naatʼáanii éí Záíba áyidííniid, Díísh haʼátʼíí biniyé? Áádóó Záíba ádííniid, Díí télii éí aláahgo naatʼáanii baʼáłchíní nidabiyée doo biniyé áádóó bááh áádóó shı̨́įgo daneestʼánígíí éí tsíłkéí danilíinii deiyą́ą doo biniyé índa wáin éí díí honoojíidi chʼééh dadeeskaigo bąąh nidahazkaadígíí deidoodlı̨́ı̨́ł biniyé ádaatʼé.
3 Nítʼééʼ aláahgo naatʼáanii ábidííniid, Háájíshąʼ ninanitʼaʼí yę́ę biyeʼ? Áádóó Záíba éí aláahgo naatʼáanii áyidííniid, Shoo, Jerúsalem kin haalʼáadi sidá, háálá kóní, Díí jı̨́ Ízrel dineʼé shizhéʼé aláahgo yee bóhólnííh yę́ę shaa nídeididooʼááł nisin.
4 Áko aláahgo naatʼáanii éí Záíba áyidííniid, Shoo, Miifíbosheth bíhígíí tʼáá átʼé ni doo. Áádóó Záíba ádííniid, Aʼohgo ádííníszingo, nánooshkąąh, ajoobaʼ bee shichʼoninéego shąąh tsídíkees, bóhonishníihii aláahgo naatʼáanii nílíinii.
5 Áádóó aláahgo naatʼáanii David éí Bahúrim hazʼáníjįʼ níyáago, shoo, Saul yę́ę baʼáłchíní bikʼéí łaʼ chʼíníyá; éí Gííra biyeʼ Shímiyai wolyéii aadę́ę́ʼ yigáałgo hódziihgo yigááł.
6 Áko David índa aláahgo naatʼáanii David bá nidaalʼaʼí tʼáá ałtso tsé yee yółneʼ, áádóó diné tʼáá ałtso índa diné ayóó ádaatʼéii hanishʼnáájí áádóó hanishtłʼají deíkáahii tsé yee yółneʼ.
7 Nítʼééʼ Shímiyai hódziihgo ání, Akǫ́ǫ́ yówehjįʼ, yówehjįʼ, diné dił bitsʼádaazlı̨́įgo neiłtseedii nílíinii, diné doo yáʼáshóonii yeeʼ nílı̨́.
8 Bóhólníihii éí Saul yę́ę baʼáłchíní tʼáá ałtso bidił bitsʼádaazlı̨́įgo íinilaaígíí biniinaa kʼééndiidlaa; éí bitsáskʼehgi nanítʼáá nítʼééʼ, nidi Bóhólníihii éí aláahgo bee níhólníihgo nił hazʼánígíí niyeʼ Ábsalam yílákʼeidííʼą́; shoo, nidooyaʼ nítʼééʼ yę́ę kʼééndiidlaa, háálá diné dił bitsʼádaazlı̨́įgo neiłtseedii nílı̨́.
9 Áko Zerowáíyah biyáázh Abísheiyai éí aláahgo naatʼáanii áyidííniid, Haʼátʼéegoshąʼ nigháí łééchąąʼí daaztsáanii nahalinii bóhonishníihii aláahgo naatʼáanii niyéʼéʼįįh? Shíniʼdii ákǫ́ǫ́ dishááh, baa nánooshkąąh, shíniʼdii bitsiitsʼiin nahgóó aheshxan.
10 Áádóó aláahgo naatʼáanii ádííniid, Zerowáíyah biyáázhké nohłíinii, haʼátʼéegoshąʼ nihíínístsʼą́ąʼ doogo áshidohní? Bíniʼdii ódziih, háálá Bóhólníihii ábíłní, David yínídziih. Háishąʼ kódidooniił, Haʼátʼíí biniyé kwíínítʼįįd?
11 Áko David éí Abísheiyai áádóó bá nidaalʼaʼí tʼáá ałtso áyidííniid, Shoo, shiyeʼ shitsʼą́ą́dóó hazlı̨́įʼii, sheʼiinaʼ niidoołtʼihgo yiniyé hátʼı̨́; tʼah biláhídi átʼéego díí Bénjamin dineʼé nilíinii kótʼéego yaa naaghá. Bíniʼdii tʼáadoo baa nídaotʼíní, bíniʼdii ódziih, háálá Bóhólníihii ákóbíłníigo átʼı̨́.
12 Díí jı̨́ Bóhólníihii éí shichʼįʼ nahwiiʼnáago shaa ákonízin dooleełgo daʼátʼé, áádóó Bóhólníihii éí shiʼdódziihii yáʼátʼéehii nídoodleełígíí shá íidoolíiłgo daʼátʼé.
13 Áádóó David índa diné bił nijikaígíí atiingóó jookahgo, Shímiyai éí hanaashii yílkʼid binániijí yigáałgo hódziihgo tsé yee hółneʼ índa łeezh hachʼįʼ yidighas.
14 Áko aláahgo naatʼáanii áádóó diné bił naakaígíí tʼáá ałtso nídínéeskaigo tʼáá ákǫ́ǫ́ háádaasyı̨́ı̨́ʼ.
15 Nítʼééʼ Ábsalam áádóó Ízrel dineʼé tʼáá ałtso yił Jerúsalem kin haalʼáajįʼ níná; Ahíthofel ałdóʼ yił níná.
16 Ákódzaadóó Árkadóó dineʼé Húshai éí David bikʼis nilíinii Ábsalam yaa níyáago, áko Húshai éí Ábsalam áyidííniid, Aláahgo naatʼáanii asʼahgóó hináa leʼ; aláahgo naatʼáanii nízaadgóó hináa leʼ.
17 Áko Ábsalam éí Húshai áyidííniid, Kótʼéegoósh nikʼis baa jiiníbaʼ? Haʼátʼéegoshąʼ nikʼis tʼáadoo bił dah diniʼáazh da?
18 Áádóó Húshai éí Ábsalam ábijiní, Dooda, Bóhólníihii áádóó díí dineʼé índa Ízrel dineʼé tʼáá ałtso nideideezʼáanii éí bííʼ nishłı̨́į doo, áádóó bił kééhashtʼı̨́į doo.
19 Áádóó nááʼáłdóʼ, háísh bá naashʼaʼ doo? Jó, biyeʼ tʼéiyá binááł naashʼaʼ dooleeł. Tʼáá nizhéʼé bá naashʼaʼ yę́ęgi átʼéego ná naashʼaʼ doo nisin.
20 Nítʼééʼ Ábsalam éí Ahíthofel ííłní, Kótʼéego diníigo baa nidiikahii bee handziih.
21 Áádóó Ahíthofel éí Ábsalam ííłní, Nílááh, nizhéʼé baʼákéí yíłʼíní hooghan yaa ádahalyą́ą dooleeł biniyé niinínilii bił yah aninááh, áko Ízrel dineʼé tʼáá ałtso nizhéʼé bichʼįʼ tʼóó naaʼihgo ádiʼnilyaaígíí deididootsʼı̨́ı̨́ł, áko diné nił naakaígíí tʼáá ałtso dabidziilgo chánah ádíílííł.
22 Áko kin bighą́ąʼdi Ábsalam bá níbaal dah deisbaal áádóó Ízrel dineʼé tʼáá ałtso binááł Ábsalam hazhéʼé baʼákéí yíłʼíní bił yah aníjídááh.*
23 Íídą́ą́ʼ Ahíthofel kótʼé níinii, éí, Kótʼée doo, ní yę́ę diné łaʼ Diyin God bizaad yínaʼídíłkidígi átʼéego Ahíthofel kótʼé nínígíí tʼáá ałtso David áádóó Ábsalam bił nilı̨́ı̨́ nítʼééʼ.
Footnotes
^ Ábsalam díí kódzaaígíí bee aláahgo naatʼáanii íʼdiilyaago diné bił béédahózin doogo átʼı̨́. 2Sam. 12:11,12.
