2 Samuel 17:1-29
17 Nááʼáłdóʼ Ahíthofel éí Ábsalam ánéidiʼ ní, Haaʼíyeeʼ kʼad naakitsʼáadahdi mííl diné bitsʼáníshníiłgo bił díí tłʼééʼ David bikééʼ hidiikah.
2 Tʼáá íiyisí niníyáago áádóó bąąh nahóókaadgo bikʼi dah deeshááł, áko tsídidoolyisgo nídooldzííł áádóó diné tʼáá ałtso bił naakaígíí yóóʼadínóodzoł, índa aláahgo naatʼáanii tʼéiyá bił nizhdeeshxał.
3 Áko diné tʼáá ałtso naa áłah áńdeeshłííł; diné há dííníʼı̨́ʼígíí seesyı̨́įgo diné tʼáá ałtso nídookah, áádóó diné tʼáá ałtso bił hodéezyéel doo.
4 Kóhodooʼniidígíí Ábsalam bił hóóshǫǫd áádóó Ízrel dineʼé aląąjįʼ naazíinii tʼáá ałtso tʼáá íiyisí bił yáʼádaatʼééh.
5 Nítʼééʼ Ábsalam ádííniid, Árkadóó dineʼé Húshai ałdóʼ kʼad hágo bidohní, Haaʼíshąʼ haʼátʼíí didooniiłígíí hazhóʼó deídíiltsʼįįł.
6 Húshai éí Ábsalam yaa níyáago Ábsalam hachʼįʼ haadzíiʼgo kóháłní, Ahíthofel kótʼéego ídaʼdiilnííł níigo haadzííʼ. Yee haadzíʼígíísh bikʼeh ádadiiʼnííł? Dooda, daatsʼí; nishąʼ, éí haʼátʼíí diní?
7 Áádóó Húshai éí Ábsalam áyidííniid, Ahíthofel kótʼé jiníinii doo yáʼátʼééhgóó kótʼé haʼníinii átʼé.
8 Jó, Húshai ádííniid, Nizhéʼé áádóó diné yił naakaígíí átʼéii nił bééhózin; diné dahayói danilı̨́įgo shashtsaʼii biyázhí bee neestʼı̨́įʼgo báhóóchįįdígi átʼéego anaʼdandzin. Áádóó nizhéʼé éí anaʼalʼı̨́ átʼé nízin índa diné bił naakaígíí doo yitahji biiłkáah da.
9 Shoo, kʼad nidi háadi shı̨́ı̨́ łeeh hoodzą́ą́ góyaa nantʼin, doodaiiʼ tʼáá haaʼída dah nootʼı̨́ı̨́ł shaʼshin. Áko díigida áhodooníiłgo daʼátʼé; bí áłtsé bisiláo nihikʼi dah hizhjéeʼgo nihaatįįh yikaigo tʼáá háiida yaa hodiiztsʼą́ąʼgo ádidooniił, Ábsalam éí diné bił nidaabaahii łaʼ naaztseed.
10 Áko diné doo nánílyéesii, éí náshdóítsoh bitsiijįʼ ditłʼoii biiʼ honítʼiʼígi átʼéego hayiʼ honítʼiʼígíí doo chohooʼı̨́ı̨́góó nízhdooldzííł. Jó, Ízrel dineʼé tʼáá ałtso díí bił béédahózin; éí nizhéʼé ayóó átʼéego anaʼalʼı̨́ átʼé nízinii nilı̨́ áádóó bił naakaígíí doo nídanilyéesii danilı̨́.
11 Éí bąą kótʼéego náhodishʼaah, éí Ízrel dineʼé tʼáá ałtso naa áłah ádoolnííł. Dan kin haalʼáádóó Bíyer-shííba kin shijaaʼgóó kéédahatʼíinii éí tónteel bibąąhgóó séigi ánéelą́ąʼgo átʼé, áko tʼáá ni bił dadííbah.
12 Áko haaʼída hakʼídadiikahgo shódahwiidiiltʼeełgo daʼátʼé, áádóó dahtooʼ haleehgo niʼjįʼ kótʼįįhígi átʼéego haatįįh diikah, áko tʼáá hó áádóó diné hoł naakai yę́ę tʼáá ałtso tʼááłáʼí nidi doo łaʼ doodzih da.
13 Nááʼáłdóʼ kin haalʼáajįʼ yah ííyáago Ízrel dineʼé tʼáá ałtso tłʼóół nideidiyoojihgo kin haalʼáhídóó tsé hadeidiyooshołgo yíldzis góyaa ádeidiyooshoł; tsé yázhí nidi ałtso ákóyaa adeidiyoojih.
14 Áádóó Ábsalam índa Ízrel dineʼé tʼáá ałtso ádadííniid, Árkadóó dineʼé Húshai kótʼé nínígíí éí Ahíthofel kótʼé dííniidígíí biláahgo yáʼátʼééh, háálá Bóhólníihii éí yee haadzíiʼgo Ahíthofel yáʼátʼéehgo kótʼé dííniidígíí nahjįʼ kólyaa; Bóhólníihii éí doo yáʼáshóonii Ábsalam yikʼijįʼ kwíidoolííł biniyé.
15 Nítʼééʼ Húshai éí nááʼiiłniihii Zéídak áádóó Abáíyathar áyidííniid, Kóníigo Ahíthofel éí Ábsalam áádóó Ízrel dineʼé aląąjįʼ naazíinii kódadoohłííł, yidííniid, áádóó shí ałdóʼ kódíshníigo kódadoohłííł, bidííniid.
16 Éí bąą kʼad tsxı̨́įłgo David bee bił dahołneʼgo kódabidohní, Díí tłʼééʼ éí honoojíidi dah nídzílgaigi doo danihiidoołkáał da; tsxı̨́įłgo haʼnaa ninohkááh; éí doodago aláahgo naatʼáanii índa diné yił naakaígíí tʼáá ałtso nabidiʼdootsił.
17 Jánathan áádóó Ahímeiyaz éí Enrógel hazʼánígi dzizké; doo hodiʼdooltséłígíí biniyé doo tʼáá kʼad kin haalʼáajįʼ jideezhʼáazh da, áko chʼikę́ę́h naalʼaʼí łaʼ haa níyáago hoł hoolneʼ, áádóó dashdiiʼáazhgo yee hoł hoolneʼígíí aláahgo naatʼáanii bee bił hojoolneʼ.
18 Azhą́ ákótʼée nidi ashkii łaʼ hoołtsą́ągo Ábsalam yił hoolneʼ, áko tsxı̨́įłgo dah ahizhdíníilchą́ąʼgo Bahúrim hazʼánídi diné léiʼ bighandi jiníʼáázh; éí bighan binaa ahééʼítłʼinígíí biyiʼ tó hahadleeh lá; ákóyaa ajííʼáázh.
19 Áádóó asdzání éí tó hahadleeh hahasdzánígíí yikʼéʼéstiʼgo naadą́ą́ʼ haaltseedgo yikʼi neisas, áko doo bééhózin da.
20 Ábsalam bá nidaalʼaʼí éí asdzání yichʼįʼ daaskaigo bighangi ádeidííniid, Háadishąʼ Ahímeiyaz áádóó Jánathan? Nítʼééʼ asdzání ábíłní, Níléí tooh haʼnaa yiʼash niʼ. Áádóó dah diikaigo ákǫ́ǫ́ chʼééh hadazneeztą́ą́ʼ índa tʼóó Jerúsalem kin haalʼáágóó tʼą́ą́ʼ níjíkai.
21 Ákódzaago anáhaaskaidóó bikʼijįʼ tó hahadleehdę́ę́ʼ háájíshtʼáázh áádóó dashdiiʼáazhgo aláahgo naatʼáanii David haneʼ baazhníʼą́. Áádóó David ííłní, Nídiidáahgo tsxı̨́įłgo tooh haʼnaa ninínááh, háálá Ahíthofel nikʼijįʼ nilı̨́įgo, Kótʼée doo, dííniid.
22 Áko David dah diiyá áádóó diné hoł naakaígíí bił dashdiikaigo Jórdan tooh haʼnaa nijíkai; abínígo adideezdláadgo ałtso Jórdan haʼnaa nijíkai, áko doo łaʼ tʼáá áadi naagháhí da.
23 Ákohgo Ahíthofel éí kótʼé dííniidígíí doo bikʼehgo dah adiildeeʼgóó yaa ákoniizı̨́įʼgo bitélii yikʼi dah aznil, áádóó bił dah diildloozhgo bighangóó bikin haalʼáajįʼ nábígı̨́. Áádóó bighandi nádzáago bidaʼdiiłʼáhígóó ałtso hashtʼeyiilaa índa dah ádiidloʼgo daaztsą́ áádóó bizhéʼé yę́ę bitséníʼootséél góneʼ yóóʼábiʼdiilyaa.
David éí Meihanéíyim kin shijaaʼdi naaghá
24 Nítʼééʼ David éí Meihanéíyim kin shijaaʼgi níyá. Áko Ábsalam éí Jórdan tooh haʼnaa niʼníʼeezh; bí áádóó Ízrel dineʼé tʼáá ałtso hoł yinééł.
25 Áko Ábsalam éí Jóʼab bitsáskʼehgi Améísa siláo dah deínéehii binanitʼaʼí ájiilaa; Améísa éí Jííther wolyéii Ízrel dineʼé nilı̨́įgo biyeʼ jílı̨́; Jííther éí Néíhash bitsiʼ Ábigeil hweʼasdzą́ą́ nilı̨́įgo Jóʼab bimá Zerowáíyah yideezhí nilı̨́.
26 Áko Ízrel dineʼé áádóó Ábsalam éí Gíliyad kéyah biyiʼgi niníná.
27 Ákódaadzaadóó David éí Meihanéíyim kin shijaaʼjįʼ jiníyáago Néíhash biyeʼ Shóbai éí Áman dineʼé bikin haalʼáii Rábahdę́ę́ʼ naagháii, áádóó Ámiyel biyeʼ Méíkir éí Ló-dííbar kin shijaaʼdę́ę́ʼ naagháii índa Gíliyad dineʼé Barziléíyai, éí Rógiilim kin shijaaʼdę́ę́ʼ naagháii
28 díí deizyı̨́: éí tsáskʼeh áádóó tłʼoh naadą́ą́ʼ bideeʼí áádóó akʼáán áádóó naaʼołí áádóó naaʼołí nímazí áádóó neeshjı̨́zhii
29 áádóó tsésʼná bitłʼizh áádóó mandagíya áádóó dibé índa béégashii bibeʼ bee géeso ályaii; éí David áádóó diné bił naakaígíí deiyą́ą doo biniyé hachʼįʼ kódayiilaa, háálá ádaaní, Diné dichin biʼniighą́ą́ʼ áádóó chʼééh dadeeskai índa dibááʼ danilı̨́įgo honoojíidi tádínééh.
