2 Samuel 18:1-33
18 Nítʼééʼ David éí diné hoł naakaígíí jííłtaʼ nítʼééʼ, áádóó míilgo daníjaaʼii binanitʼaʼí bikʼeh danízı̨́įgo índa neeznádiingo daníjaaʼii binanitʼaʼí bikʼeh danízı̨́įgo ájiilaa.
2 Áádóó David éí diné táidiʼéshígíí táaʼgo dah yinéełgo áyiilaa; éí łaʼ Jóʼab táidiʼéeshgo ájiilaa, áádóó Zerowáíyah biyáázh Jóʼab bikʼis Abísheiyai éí ałdóʼ łaʼ táidiʼéeshgo áyiilaa, índa Gath kin haalʼáádóó dineʼé Ítayai ałdóʼ łaʼ táidiʼéeshgo áyiilaa, áko aláahgo naatʼáanii éí diné áyidííniid, Tʼáá aaníí shí ałdóʼ ákǫ́ǫ́ nihił yishkah dooleeł.
3 Nidi diné áńdahodooʼniid, Doo ákǫ́ǫ́ nihił dííkah da, háálá yóóʼiijéeʼgo nihí éí doo íiyisí nihíniiká ádaatʼı̨́į da doo, doodaiiʼ ałnííʼdóó nidanihistseedgo nihí doo íiyisí nihiniyé ádaatʼı̨́į da doo. Nidi nihí neeznáadi mííl niiltʼéhígíí biláahgo anílı̨́; éí bąą kʼad kin haalʼáádóó nihíká adíílwołjí éí yáʼátʼééh.
4 Áádóó aláahgo naatʼáanii ádííniid, Tʼáá aláahgo nihił yáʼádaatʼéhígíí ádeeshłííł, áádóó aláahgo naatʼáanii éí yah aʼatiin bíighahgi sizı̨́, áko diné neeznádiin daníjaaʼgo áádóó míilgo daníjaaʼgo tʼáá ałtso chʼéheezná.
5 Nítʼééʼ aláahgo naatʼáanii éí Jóʼab áádóó Abísheiyai índa Ítayai yichʼįʼ haadzíiʼgo kóní, Shí shąą Ábsalam diné ániid naagháii tʼáá baa dajiinohbaʼ. Áko diné tʼáá ałtso binááł aláahgo naatʼáanii éí siláo binanitʼaʼí tʼáá ałtso Ábsalam doo haada dazhdoolííłgóó yee áhodííniid.
6 Áko siláo dah dadiináago Ízrel dineʼé yichʼįʼ anaaʼ dahasłı̨́ı̨́ʼ; Íífreiyim kéyah hodíłchʼil tahgi bił daʼahijoogą́ą́ʼ.
7 Áadi Ízrel dineʼé éí David bá nidaalʼaʼí dabíłtséedgo áadi íídą́ą́ʼ ayóó ánéelą́ąʼgo dabiʼdoogą́ʼígíí éí naadiindi mííl siláo ábiʼdisdįįd lá.
8 Áko anaaʼ hazlı̨́įʼgo kéyahgóó tʼáá átʼé daʼahijigą́; íídą́ą́ʼ diltłish bee nahózdįįdígíí bilááh ázhnéelą́ąʼgo hodíłchʼil biiʼgóó yóóʼadahizdineeskaigo áhásdįįd.
9 Áádóó Ábsalam éí David yá nidaalʼaʼí yił ałkʼą́ą́h yikai, áko Ábsalam éí dzaanééz bił yilwołgo chéchʼiltsoh bitsʼáozʼaʼ ałtaanáneezʼáá léiʼ hoł bikʼą́ą́h yilwodgo biishdinoolneʼgo yádiłhił índa nahasdzáán bitaʼgi tʼáá ákǫ́ǫ́ dah nijilchʼąął; dzaanééz éí hayaa haalwodgo eelwod.
10 Nítʼééʼ diné léiʼ biiłtsą́ągo kóníigo Jóʼab yił hoolneʼ, Shoo, Ábsalam gaʼ chéchʼil yiih dinoolneʼ léiʼ dah naalchʼąąłgo yiiłtsą́.
11 Áádóó Jóʼab éí diné bił hoolneʼígíí áyidííniid, Áko, jó, yiniłtsą́ą́ léiʼ doo haniih niʼjįʼ abídzíłxaał da, áko béésh łigaii neeznáá bíighahgo áádóó sis bił naadeeshnił nítʼééʼ.
12 Áko diné éí Jóʼab ííłní, Azhą́ míilgo béésh łigaii shílákʼeeʼnil nidi, aláahgo naatʼáanii biyeʼ doo tʼáá kʼad bił nizníłxaal da, háálá aláahgo naatʼáanii deísíiltsʼą́ąʼgo yee ánihidííniid, Jó, ni áádóó Abísheiyai índa Ítayai ánihidiʼní, Diné ániid naagháii Ábsalam haada daohłeʼ lágo.
13 Éí doodago ákwíishłaago sheʼiinaʼ bikʼijįʼ náníshdlı̨́į doo nítʼééʼ; jó, aláahgo naatʼáanii tʼáadoo bitsʼąą nanilʼiní da, áko ni nidi shíká yíʼáał dooleeł nítʼééʼ.
14 Nítʼééʼ Jóʼab ádííniid, Tʼáadoo biniyéhígóó yeeʼ tʼóó shiníníłtłʼahgo ádíní, áko tsiidétáán táaʼgo dah yidiijaaʼgo Ábsalam bijéí góneʼ yaa ayiisgeed; chéchʼil yiih dinoolneʼgo tʼahdii tʼáá hináago dah naalchʼąął nítʼééʼ lá.
15 Áko tsíłkéí neeználtʼéego éí Jóʼab yee naabaahii yá nideijaahígíí Ábsalam yináztʼiʼgo yighá daʼashxiishgo dayiisxı̨́.
16 Áko Jóʼab éí deenástsʼaaʼ bideeʼ bee íʼdílzoołí yee ádííniid, áádóó Ízrel dineʼé yikééʼ deíjeehígíí tʼą́ą́ʼ hahaazhjééʼ; jó, Jóʼab éí diné yééʼníłniiʼ.
17 Áádóó Ábsalam dah deidiiłtı̨́įgo tsintahgi tʼáá íiyisí hótsaago ahoodzą́ą́ léiʼ góyaa adayiisxango tʼáá íiyisí tsé yikʼi yáádayiitsih, áko Ízrel dineʼé tʼááłáʼí nítínígo dabiníbaalgóó anáhineezhchą́ą́ʼ.
18 Ábsalam tʼah hiná yę́ędą́ą́ʼ tsé níyizii łaʼ néidiiʼą́ągo tʼáá bí ádá ayíítsih; éí aláahgo naatʼáanii biyíldzis góyaa yaaʼá, háálá íídą́ą́ʼ ání, Shiyeʼ bee shééhániih dooígíí doo łaʼ naagháa da, áko tsé bízhiʼ yee yiyíízhiʼígíí díí jı̨́ı̨́góó Ábsalam bígo hazʼą́ hoolyé.
19 Nítʼééʼ Zéídak biyeʼ Ahímeiyaz ádííniid, Haaʼíyeeʼ kʼad yaashtaałgo aláahgo naatʼáanii ábidideeshniił, Bóhólníihii éí niʼanaʼí danilínígíí ná kʼéidiidlaa.
20 Áádóó Jóʼab áhodííniid, Díí jı̨́ doo ákǫ́ǫ́ haneʼ dííʼáał da, nidi tʼáá haaʼída índa haneʼ dííʼááł, nidi díí jı̨́ tʼááká ákǫ́ǫ́ haneʼ dóóʼaʼ lágo, háálá aláahgo naatʼáanii biyeʼ daaztsą́.
21 Nítʼééʼ Jóʼab éí Kúshai dineʼé nilínígíí áyidííniid, Nílááh, aláahgo naatʼáanii bichʼįʼ haneʼ díʼaahgo yiniłtsánígíí bee bił hodíílnih. Áádóó Kúshai dineʼé éí Jóʼab yichʼįʼ yaa ádzaa áádóó dah diilwod.
22 Áko Zéídak biyeʼ Ahímeiyaz éí Jóʼab ánéidooʼniid, Azhą́ ákótʼée nidi shíniʼdii, nánooshkąąh, Kúshai dineʼé nilíinii bikééʼ nídiishyeed bee shadiʼníʼaah. Áádóó Jóʼab ádííniid, Haʼátʼíí biniyé nídidíílwoł, shiyeʼ. Jó, bikʼé haneʼ dííʼáłígíí ádin.
23 Nidi Ahímeiyaz ání, Azhą́ ákótʼée nidi shíniʼdii ákǫ́ǫ́ nídiishyeed, áko Jóʼab, Nílááh yílwoł, hałní. Áko Ahímeiyaz tʼáá dzígaijí ahénálwodgo Kúshai dineʼé nilínígíí yaa diilwod.
24 Nítʼééʼ naakigo yah aʼatiinígíí bitaʼgi David dah dzizdá, áádóó diné haʼasídígíí éí kin haalʼá binaa ahééʼítłʼinígíí tʼáá ałchʼishdę́ę́ʼ yah aʼatiinígíí bikáaʼdi tsé haʼnaa niníʼáhígíí bikáaʼdi dah náhástʼáníjįʼ haayá, áádóó jidééʼı̨́ı̨́ʼ, nítʼééʼ diné léiʼ tʼáá sáhí yilwołgo jiiłtsą́.
25 Áádóó haʼasídí hahoyííníiʼgo aláahgo naatʼáanii yíká hadoolghaazh. Áko aláahgo naatʼáanii ání, Tʼáá sáhí yilwołgo éí baa haneʼ hólǫ́ǫ doo. Áko tʼáá ahánídę́ę́ʼ yilwoł áádóó hatʼáahjįʼ eelwod.
26 Nítʼééʼ haʼasídí diné łaʼ náánáálwołgo yiyiiłtsą́ągo chʼéʼétiin yaa áhályánígíí yił hoolneʼgo ííłní, Shoo, diné łaʼ náánáálwoł. Áádóó aláahgo naatʼáanii ání, Éí ałdóʼ baa haneʼ hólǫ́ shaʼshin.
27 Áko haʼasídí ání, Baa nitsískeesgo alą́ąjįʼ yilwołígíí éí Zéídak biyeʼ Ahímeiyaz nidzitʼiʼígi átʼéego yilwoł. Áádóó aláahgo naatʼáanii ání, Éí lá éí diné yáʼátʼéehii átʼı̨́ ni. Áko haneʼ yáʼátʼéehii yooʼáałgo átʼı̨́.
28 Nítʼééʼ Ahímeiyaz hahoyííníiʼgo aláahgo naatʼáanii ííłní, Tʼáá ałtso yáʼátʼééh. Áádóó niʼjįʼ aláahgo naatʼáanii biyaajįʼ tséʼyaa jineeshjoolgo ábijiní, Bóhólníihii nihiDiyin God baa haʼniih leʼ; éí diné danilíinii bóhonishníihii aláahgo naatʼáanii yichʼįʼ anaaʼ danízin yę́ę ałtso doo łaʼ yidziihgóó áyiilaa.
29 Áko aláahgo naatʼáanii ádííniid, Daʼ diné ániid naagháii Ábsalam tʼáadoósh ádzaaí da? Nítʼééʼ Ahímeiyaz bichʼįʼ haadzíiʼgo Jóʼab éí aláahgo naatʼáanii yá naalʼaʼí nilíinii dah yidiiłʼaʼ áádóó shí ałdóʼ ná naalʼaʼí nishłíinii dah shidiiłʼaʼ yę́ędą́ą́ʼ tʼóó báhádzidígi átʼéego hahóóʼáago łeezh dah oojołgo yiiłtsą́, nidi haa dahóótʼįįd shaʼshin éí doo shił bééhózin da.
30 Áádóó aláahgo naatʼáanii ábíłní, Nahjigo hidínáahgo nahjí yiizįįh. Áko nahjįʼ hizhdeeyáago áájí jiizįʼ.
31 Nítʼééʼ shoo, Kúshai dineʼé nilíinii níyá áádóó Kúshai dineʼé ání, Bóhonishníihii aláahgo naatʼáanii haneʼ hólǫ́; jó, Bóhólníihii éí diné nikʼijįʼ nidaabaah nítʼééʼ yę́ę tʼáá ałtso díí jı̨́ ná kʼéidiidlaa.
32 Áádóó aláahgo naatʼáanii éí Kúshai dineʼé nilíinii áyidííniid, Daʼ diné ániid naagháii Ábsalam tʼáadoósh ádzaaí da? Áko Kúshai dineʼé hanáánáádzíiʼgo ádííniid, Bóhonishníihii aláahgo naatʼáanii biʼanaʼí danilíinii áádóó diné tʼáá ałtso adadidoonih biniyé bikʼijįʼ danilínígíí éí diné ániid naagháii ábiʼdiilyaa yę́ęgi ádabiʼdólneʼ.
33 Nítʼééʼ aláahgo naatʼáanii tʼáá íiyisí bidiisnáaʼgo yah aʼatiin bighą́ąʼdi hazʼą́ą́ góneʼ yah ííyáago yicha, áko ákóde yigáałgo ání, Aháláaneʼ, shiyeʼ Ábsalam nílíinii, shiyeʼ, shiyeʼ Ábsalam nílíinii, shígoyeeʼ ná dadeestsaał nítʼééʼ; aháláaneʼ, Ábsalam shiyeʼ nílíinii, shiyeʼ nílíinii.
