2 Samuel 19:1-43
19 Jóʼab bił hóóneʼgo áhodooʼniid, Shoo, aláahgo naatʼáanii éí Ábsalam yaa yicha áádóó yaa yínííł naaghá.
2 Áko íídą́ą́ʼ akʼeh hodeesdlı̨́ʼígíí diné tʼáá ałtso atínídadindleehgo áyiilaa, háálá íídą́ą́ʼ kwáháʼníigo deidiiztsʼą́ą́ʼ, aláahgo naatʼáanii biyeʼ tʼáá íiyisí yaa chʼééná nilı̨́įgo naagháá nítʼééʼ.
3 Áádóó íídą́ą́ʼ diné éí kin haalʼáá góneʼ yah anídahineestʼı̨́ı̨́ʼ; éí anaaʼdę́ę́ʼ yóóʼanídahaazhjéʼígíí tʼóó ádaa yádandzingo ninádahineestʼı̨́ʼígíigi átʼéego ninádahineestʼı̨́ı̨́ʼ.
4 Azhą́ ákótʼée nidi aláahgo naatʼáanii biniiʼ yikʼéʼéstiʼ áádóó aláahgo naatʼáanii kóníigo ayóó íitsʼaʼgo yicha, Aháláaneʼ, shiyeʼ Ábsalam! Aháláaneʼ shiyeʼ, shiyeʼ Ábsalam!
5 Áko Jóʼab éí aláahgo naatʼáanii yighangi yił yah ííyáago áyidííniid, Ná nidaalʼaʼí tʼáá ałtso díí jı̨́ tʼóó baa yáhásinígi ádaadzaa nahalingo íinilaa; éíyeeʼ díí jı̨́ yisdádanistı̨́ áádóó niyeʼké áádóó nitsiʼké áádóó nidaʼasdzą́ą́ índa naʼákéí daníłʼíní yisdádeiznil;
6 éí niʼanaʼí danilíinii ayóóʼííníʼní índa nikʼis danilíinii éí jiiníłá; jó, díí jı̨́ díí bee ííshją́ą́ ádiʼnilyaa: naatʼáanii danilíinii áádóó nidaalʼaʼí danilíinii tʼáadoo danilínígóó baa nitsíníkees. Jó, díí jı̨́ kótʼéego naa ákoniizı̨́ı̨́ʼ: Ábsalam hináago áádóó nihí éí díí jı̨́ ałtso nanihiʼdiztseedgo ákótʼéego tʼéiyá nił bikʼeʼehwiih doo nítʼééʼ lá.
7 Éí bąą kʼad nídiidáahgo dah diináahgo ná nidaalʼaʼí yee hadaʼíídóolniiłii bee bichʼįʼ handziih, háálá Bóhólníihii bízhiʼ bee nichʼįʼ ádee hadideesdzih, tʼáadoo dah diniyáágóó díí tłʼééʼ diné doo łaʼ nił hólǫ́ǫ da doo, áko éí tʼóó tséʼédin nichʼįʼ áhodooníłígíí tsíłkéí nílı̨́ yę́ędóó doo yáʼáshóonii nikʼi deitʼiʼígíí biláahgo nichʼįʼ áhodoonííł.
8 Nítʼééʼ aláahgo naatʼáanii dah diiyáago yah aʼatiingi neezdá, áko diné tʼáá ałtso ahił dahalneʼgo ádaaní, Shoo, aláahgo naatʼáanii yah aʼatiingi sidá, áádóó diné tʼáá ałtso aláahgo naatʼáanii yaa haaskai; jó, Ízrel dineʼé tʼááłáʼí nítínígo biníbaal naaznilgóó anídahineezhchą́ą́ʼ nítʼééʼ.
David éí Jerúsalem kin haalʼáágóó náádááł
9 Nítʼééʼ diné tʼáá ałtso éí Ízrel dineʼé bitahgóó saad ahídeitʼááh kódaaníigo, Aláahgo naatʼáanii éí nihiʼanaʼí danilíinii áádóó Filístiya dineʼé bitsʼą́ąjįʼ yisdánihíínil, áko kʼad éí Ábsalam biniinaa kéyahdóó nihitsʼáníyá.
10 Áádóó Ábsalam éí nihinantʼáa doo biniyé akʼah bikʼi yadeidziidgo deilzı̨́ı̨́ʼ yę́ę anaaʼ hólǫ́ǫdi biʼdiisyı̨́; éí bąą kʼad haash yitʼéego aláahgo naatʼáanii bił níʼdooldahgi doo bee hadaahdziih da?
11 Nítʼééʼ aláahgo naatʼáanii David éí nááʼiiłniihii Zéídak áádóó Abáíyathar yichʼįʼ iʼííłʼaʼgo kóní, Júdah dineʼé aląąjįʼ naazíinii bichʼįʼ haohdziihgo kódóhní, Haash yitʼéego nihí éí aláahgo naatʼáanii bighan yę́ęjįʼ nídoodáłígíí akéeʼdi bainóhtʼı̨́? Jó, ákótʼéego Ízrel dineʼé tʼáá ałtso yaa yádaałtiʼgo aláahgo naatʼáanii bighanjįʼ haneʼ ádeiłʼı̨́.
12 Nihíyeeʼ shikʼisóó danohłı̨́, nihíyeeʼ shitsʼin áádóó shitsįʼ danohłı̨́; ákoshąʼ haʼátʼéego nihí akéeʼdi índída aláahgo naatʼáanii bił nídadoohkahgo nidahohʼá?
13 Áko Améísa shá kóbidohní, Doósh shitsʼin áádóó shitsįʼ nílı̨́į da? Bíniʼdii Diyin God atíshidoolííł áádóó tʼah nááyówehgo atíshidoolííł; éí shinááł náás hoolzhishgóó Jóʼab bitsʼáskʼehgi doo siláo binanitʼaʼí nileehgóogo ákóshidoolííł.
14 Áádóó Júdah dineʼé tʼáá ałtso hachʼįʼ bił daʼílı̨́įgo diné tʼááłáʼí yee nitsídaakeesígi átʼéego ájiilaa. Áko aláahgo naatʼáanii yichʼįʼ díí haneʼ ádayiilaa; ni áádóó ná nidaalʼaʼí tʼáá bił náníʼnééh.
15 Áko aláahgo naatʼáanii náádáałgo Jórdan toohjįʼ níyá. Nítʼééʼ Júdah dineʼé éí Gílgal hazʼánígi jíkai; aláahgo naatʼáanii bidááshdookah áádóó aláahgo naatʼáanii éí Jórdan tooh haʼnaa bił nizhdookah biniyé jíkai.
16 Nítʼééʼ Gííra biyeʼ Shímiyai éí Bénjamin dineʼé łaʼ Bahúrim hazʼánídóó naagháhígíí tʼáá tsı̨́łígo níyá; éí aláahgo naatʼáanii David bidááhgóó Júdah dineʼé bił deeshkah nízin.
17 Áko Bénjamin dineʼé tʼááłáhídi mííl yiltʼéego hoł yíkai, áádóó Saul yę́ę baʼáłchíní yá naalʼaʼí Záíba áádóó biyeʼké ashdlaʼáadahgo índa bá nidaalʼaʼí naadiingo bił aláahgo naatʼáanii yidááh dookah biniyé Jórdan tooh haʼnaa niikai.
18 Áádóó aláahgo naatʼáanii baʼáłchíní índa bindaalyeʼé éí tsinaaʼeeł bee bá haʼnaa nidajiizhjaaʼ áádóó haʼátʼíhída bá yáʼátʼéehgo yaa nitsíkeesígíí bá ádajiilaa; nítʼééʼ Gííra biyeʼ Shímiyai éí aláahgo naatʼáanii Jórdan tooh haʼnaa niníyáago yidáahjįʼ yaa ádzaago tséʼyaa neeshjool.
19 Áko aláahgo naatʼáanii áyidííniid, Bóhonishníihii haaʼíyeeʼ doo ákwii átʼéii tʼáadoo shikʼijįʼ síníłʼání doo, doodaiiʼ bóhonishníihii aláahgo naatʼáanii Jerúsalem kin haalʼáádóó dah diiyá yę́ędą́ą́ʼ ná naalʼaʼí nishłíinii doo yáʼáshónígi ániishłaa yę́ę tʼááká béénílniih yíilaʼ, áko éí aláahgo naatʼáanii tʼáadoo biʼdiiłʼáhí da leʼ.
20 Jó, ná naalʼaʼí nishłíinii shił bééhózingo ádił asisziih; éí bąą, shoo, Jóseph baʼáłchíní ahoolchíiłii tʼáá ałtso bitahdóó diné nishłı̨́įgo, bóhonishníihii aláahgo naatʼáanii nílíinii, shí átsé wóyahdi nidááh níyá.
21 Nidi Zerowáíyah biyáázh Abísheiyai hanáánáádzíiʼgo ádííniid, Daʼ doósh díí biniinaa Shímiyai bidiʼyoolyéeł da? Háálá Bóhólníihii akʼah yikʼi yayiiziidgo yiyíísı̨́įʼii jódziih nítʼééʼ.
22 Nítʼééʼ David ádííniid, Zerowáíyah biyáázh nohłíinii, haʼátʼéegoshąʼ nihíínístsʼą́ą doogo áshidohní? Jó, shiʼanaʼí ídółʼı̨́. Ízrel dineʼé bitahgiísh díí jı̨́ diné łaʼ bidiʼyoolyééł? Jó, díí jı̨́ Ízrel dineʼé aláahgo binanitʼaʼí yeeʼ nishłı̨́įgo shił bééhózin.
23 Éí bąą aláahgo naatʼáanii Shímiyai áyidííniid, Doo nidiʼyoolyéeł da. Áko aláahgo naatʼáanii Shímiyai yichʼįʼ ádee hadoodzííʼ.
24 Nítʼééʼ Saul yę́ę binálí Miifíbosheth éí aláahgo naatʼáanii bidááshníyá; éí hakeeʼ tʼáadoo baa áhojilyání áádóó hadághaaʼ tʼáadoo níjíshéhí índa haʼééʼ tʼáadoo nídziigisí aláahgo naatʼáanii dah diiyá yę́ędóó hózhǫ́ǫgo nádzáajįʼ ákójítʼéé nítʼééʼ.
25 Ákódzaadóó aláahgo naatʼáanii bidáásh doogááł biniyé Jerúsalem kin haalʼáajįʼ jiníyáago aláahgo naatʼáanii áhodííniid, Haʼátʼéegoshąʼ tʼáadoo haʼnaagóó shił yíníʼáazh da, Miifíbosheth?
26 Áádóó hanáánáádzíiʼgo ádííniid, Bóhonishníihii aláahgo naatʼáanii nílíinii, shá naalʼaʼí shinííʼaaʼ; jó, ná naalʼaʼí nishłíinii ádíshní, Télii shá bikʼi dah asínííł, áko aláahgo naatʼáanii bił díʼáázhgóó shił dooldlosh, bidííniid, háálá ná naalʼaʼí nishłíinii naʼniłhodii nishłı̨́.
27 Áádóó ná naalʼaʼí nishłíinii, bóhonishníihii aláahgo naatʼáanii nílíinii, nichʼįʼgo náshiiłbaʼ. Nidi bóhonishníihii aláahgo naatʼáanii éí Diyin God bidiyingo naalʼaʼígi átʼé; éí bąągo yáʼátʼéehgo baa nitsíníkeesii ánílééh.
28 Jó, shizhéʼé yę́ę baʼáłchíní ahoolchíiłii tʼáá ałtso bóhonishníihii aláahgo naatʼáanii binááł diné daneeznáanii nidahoniidlin nítʼééʼ. Azhą́ ákótʼée nidi ná naalʼaʼí nishłíinii nibikááʼ adání yichʼįʼ dah nídinibįįhgo nídaʼadı̨́įhii bitahgi náʼáshdı̨́įh doogo nishííníłtı̨́. Éí bąą haʼátʼíí tʼáá ákóneʼ átʼéii shı̨́įshąʼ náánáłaʼ aláahgo naatʼáanii baa nínáánáoshkąąh dooleeł?
29 Áádóó aláahgo naatʼáanii áhodííniid, Tʼáadoo haʼátʼéegoda baa niyánááhíłtéhí. Shą́ą́ʼ, Záíba bił kéyah aháʼdízóóh nidííniid niʼ.
30 Nítʼééʼ Miifíbosheth éí aláahgo naatʼáanii áyidííniid, Tʼáá aaníí hániʼdii tʼáá átʼé náhodiiʼaah, háálá bóhonishníihii aláahgo naatʼáanii hózhǫ́ǫgo tʼáá bí bighangi nádzá.
31 Nítʼééʼ Gíliyad kéyahdóó diné Barziléíyai wolyéii Rógiilim kin shijaaʼdę́ę́ʼ níyá, áádóó Jórdan tooh haʼnaa aláahgo naatʼáanii yił nidooʼash yiniyé níyá.
32 Barziléíyai tʼáá íiyisí hadzistih; tseebídiin honááhai éí aláahgo naatʼáanii banídzíltsoʼgo Meihanéíyimdi naagháá nítʼééʼ, háálá hastiin atʼíinii jílı̨́.
33 Áádóó aláahgo naatʼáanii éí Barziléíyai áyidííniid, Wónaanígóó shił dííʼash, áko Jerúsalem kin haalʼáadi shitsʼą́ą́ʼ ííyą́ą doo.
34 Nítʼééʼ Barziléíyai éí aláahgo naatʼáanii áyidííniid, Haa danízahgóósh nááhinishná; tʼáadoo biniyéhígóó aláahgo naatʼáanii Jerúsalem kin haalʼáágóó bił yishʼash doo?
35 Díí jı̨́ yeeʼ shí tseebídiin shinááhai. Daʼ ákoósh yáʼátʼéehii índa doo yáʼátʼéehii baa ákonisin? Daʼ ná naalʼaʼí nishłı̨́įgo yishánígíí, doodaiiʼ yishdlánígíísh tʼáá yishłįh? Daʼ diné dahataałígíí índa asdzání dahataałígíí biinééʼésh tʼáá diistsʼaʼ? Haʼátʼíishąʼ biniyé ná naalʼaʼí nishłı̨́įgo bóhonishníihii aláahgo naatʼáanii bichʼįʼ naanishtsoh nishłı̨́į doo?
36 Ná naalʼaʼí nishłíinii Jórdan tooh haʼnaagóó tʼáá áháníjįʼ aláahgo naatʼáanii bił nideeshʼash nisin. Aláahgo naatʼáanii nílı̨́įgo haʼátʼíísh biniyé díí aa doolyéełii shichʼįʼ ninánídlée doo?
37 Hániʼdii ná naalʼaʼí nishłíinii, nánooshkąąh, nihéédeeshdáałgo tʼáá shí shikin haalʼáadi są́ shiiłhé áádóó shizhéʼé yę́ę índa shimá yę́ę bijishchááʼ bíighahjįʼ yóóʼáshiʼdilnééh. Nidi shoo, ná naalʼaʼí Kímham kǫ́ǫ́ sizı̨́; bíniʼdii, bóhonishníihii aláahgo naatʼáanii nílíinii, nił haʼnaa niiʼaashgo tʼáá nił yáʼátʼéhígi áníłʼı̨́į doo.
38 Áádóó aláahgo naatʼáanii hanáánáádzíiʼgo ání, Kímham shił haʼnaa nidooʼashgo tʼáá nił yáʼátʼéhígi átʼéego bichʼįʼ áníshtʼée doo, índa tʼáá shííníkeedígíí ná biʼíínísin dooleeł.
39 Nítʼééʼ diné tʼáá ałtso Jórdan tooh haʼnaa niníná, áádóó aláahgo naatʼáanii haʼnaa nizhníyáago Barziléíyai dziztsʼǫs áádóó bikʼijiidzisdliʼgo bighangóó tʼą́ą́ʼ dah nídiidzá.
40 Áko aláahgo naatʼáanii Gílgal hazʼánígóó dah diiyá áádóó Kímham bił yiʼash, áádóó Júdah dineʼé tʼáá ałtso índa Ízrel dineʼé ałnííʼdóó aláahgo naatʼáanii náás yił yinééł.
41 Áádóó, shoo, Ízrel dineʼé tʼáá ałtso aláahgo naatʼáanii yidááh yíkaigo aláahgo naatʼáanii ádeidííniid, Haʼátʼíísh biniyé nihikʼisóó Júdah dineʼé danineezʼı̨́įʼgo aláahgo naatʼáanii áádóó baʼáłchíní índa David bidiné danilíinii tʼáá ałtso Jórdan tooh haʼnaa yił náʼná?
42 Áko Júdah dineʼé tʼáá ałtso éí Ízrel dineʼé yichʼįʼ hadaasdzíiʼgo ádeidííniid, Háálá aláahgo naatʼáanii áhánígo nihikʼéí nilı̨́. Ákoshąʼ haʼátʼíísh biniinaa díí bikʼee nihá dahazhchįįd? Daʼ łahdaásh aláahgo naatʼáanii yikʼé niʼníláii deidą́ą́ʼ? Éí doodago, daʼ łahdaásh nihaʼnílá?
43 Áádóó Ízrel dineʼé éí Júdah dineʼé ánáádeidooʼniid, Aláahgo naatʼáanii bídéétʼiʼgi nihíyeeʼ neeznáá bíighahgo bił ałtsʼą́ą́ʼ daʼniilkʼiiz áádóó David éiyá nihí nihiláahgo nihídéétʼiʼ. Haʼátʼíísh bąą danihisooʼįįd? Daʼ doósh nihí átsé hadasiidzíiʼgo aláahgo nihinanitʼaʼí bił nídasiikai da? Áko Júdah dineʼé hadaasdzíʼígíí éí Ízrel dineʼé hadaasdzíʼígíí biláahgo tʼóó bééhóódzííd.
