2 Samuel 20:1-26
20 Nítʼééʼ Bíkrai biyeʼ Bénjamin dineʼé Shííba wolyéii diné doo yáʼáshóonii nilı̨́įgo ákwii naaghá. Éí deenástsʼaaʼ bideeʼ bee íʼdílzoołí yee ádííniidgo, Nihí éí David doo bídadíníitʼiʼ da, índa Jésii biyeʼ bííʼ nilíinii ałdóʼ doo nihídadéétʼiʼ da; Ízrel dineʼé nohłíinii, tʼááłáʼí nootínígo nihiníbaalgóó nihééhóhkááh.
2 Áko Ízrel dineʼé tʼáá ałtso David yitsʼą́ąjįʼ dah diikaigo Bíkrai biyeʼ Shííba yikééʼ dah diikai, nidi Júdah dineʼé éí aláahgo binanitʼaʼí bił dáálįįd; Jórdan toohdóó Jerúsalem kin haalʼáajįʼ ákótʼéego bił hooʼaʼ.
3 Nítʼééʼ David éí Jerúsalem kin haalʼáadi bighangi nádzá, áádóó aláahgo naatʼáanii baʼákéí yíłʼíní neeználtʼéego, éí haghan yaa ádahalyánígíí náánáłaʼ kin góneʼ nizhnínilgo baa áháyą́ągo áádóó baʼaltsoʼgo ájiilaa, nidi hó éí doo bichʼįʼ nijigháa da. Áko daneeznáajįʼ bidáʼdeelkaal; asdzání bąąh ádahasdįįdii nahalingo naháaztą́ą́ nítʼééʼ.
4 Áko aláahgo naatʼáanii éí Améísa áyidííniid, Tʼáadoo tááʼ yiłkaahí Júdah dineʼé shaa áłah ádíílííł, áádóó ni ałdóʼ kweʼé nanináa doo.
5 Nítʼééʼ Améísa éí Júdah dineʼé áłah ábizhniilaa biniyé dashdiiyá, nidi tʼóó binánijigháago bee há nihootʼánígíí bilááhgóó ahoolzhiizh.
6 Nítʼééʼ David éí Abísheiyai áyidííniid, Kʼad Bíkrai biyeʼ Shííba éí Ábsalam atínihiilaa yę́ę tʼah bilááh átʼéego nihaa hideesdzáago átʼé. Bóhoníłníihii nishłíinii shá nidaalʼaʼí dah diiʼéeshgo bikééʼ hidohkááh; éí doodago kin hadaasʼá ditą́ągo binaa ahéédaʼatłʼinígíí ádá shóidoołtʼeełgo nihitsʼą́ą́ʼ áajįʼ yisdádínóochééł.
7 Áádóó Jóʼab éí diné yił naakaígíí éí Kéreth dineʼé áádóó Pííleth dineʼé índa diné dahayóii tʼáá ałtso bił Abísheiyai yikééʼ chʼíkaigo Bíkrai biyeʼ Shííba bikééʼ hizhdookah biniyé Jerúsalem kin haalʼáádóó chʼíníná.
8 Gíbiyan kin haalʼáagi tsé ayóó áníłtso siʼą́ągi jinínáago Améísa hadááh níyá. Jóʼab éí siláojí éʼígíí yiiʼ sitı̨́įgo bikáaʼgi diltłish bizis yił ákászaazgo diltłish biiʼ sitą́ągo béheestłʼǫ́ǫ́ nítʼééʼ, áko dashdiilwodgo háákę́ę́z.
9 Nítʼééʼ Jóʼab éí Améísa ííłní, Yáʼátʼéehgoósh naniná, shikʼis? Áádóó Jóʼab éí Améísa yidootsʼǫs biniyé nishʼnáájí yee bidághaaʼ yisił.
10 Nidi Améísa éí Jóʼab diltłish bílákʼee sitánígíí doo yaa ákonízin da, áko hátsą́ą́ʼ biyaa góneʼ yaa ayííłgeedgo áádę́ę́ʼ niʼjįʼ hachʼííʼ hááłhęęzh, índa tʼáadoo nínáhodiiłhaałí dadziztsą́.
Ákódzaago Jóʼab áádóó hakʼis Abísheiyai éí Bíkrai biyeʼ Shííba yikééʼ ahootʼáázh.
11 Nítʼééʼ Jóʼab éí dinééh yił naakaígíí łaʼ bíighah sizı̨́įgo ání, Tʼáá háiida Jóʼab áádóó David bichʼodajinínígíí bíniʼdii Jóʼab bikééʼ dashdiikááh.
12 Nidi atiin ałnííʼgóó Améísa bidił bikʼee chxiiʼgo sitı̨́. Áádóó éí dinééh diné tʼáá ałtso áajįʼ nehejeehgo yiyiiłtsą́ągo Améísa yę́ę atiindóó nahjįʼ hayííłtı̨́įgo yikʼéʼéstiʼ, háálá binááł diné tʼááłáʼí nítínígo atsʼíís sitíníjįʼ neheezhjééʼ.
13 Atiindóó nahjįʼ hayííłtı̨́įgo diné tʼáá ałtso Jóʼab yikééʼ dah diikaigo Bíkrai biyeʼ Shííba yikééʼ ííná.
14 Nítʼééʼ Shííba éí Ízrel dineʼé tʼáá ałtso bitah hazhdiiyáago kéyah Beth-méíyakahgi Éíbel kin haalʼáhíjįʼ jiníyá, áádóó Biiráíyah baʼáłchíní tʼáá ałtso ahíikaigo áłah silı̨́įʼgo ałdóʼ hakééʼ dah diiná.
15 Áko Jóʼab éí diné yił naakaígíí Beth-méíyakahgi Éíbel kin haalʼáhígi yíkaigo yináshzhiizh áádóó binaa ahééʼítłʼinígíí tłʼóóʼdę́ę́ʼ bitsı̨́ı̨́góó ahééʼígeedígíí góneʼ łeezh háádeidééłbįįdgo ítłʼinígíí łeezh bíilkʼidgo ádayiilaa índa diné tʼáá ałtso yił naakaígíí éí ítłʼinígíí nideidoołkał yiniyé nídeiniłgoh.
16 Nítʼééʼ asdzání hóyáanii léiʼ kin haalʼáhídę́ę́ʼ yéego haadzíiʼgo ání, Daʼíísółtsʼą́ą́ʼ, daʼíísółtsʼą́ą́ʼ, nánihooshkąąh, Jóʼab áháníjįʼ shichʼįʼ nidoogáałgo bichʼįʼ hadeesdzih.
17 Áádóó áháníjįʼ bichʼįʼ nizhníyáago asdzání ání, Niísh Jóʼab ánítʼı̨́? Áko ábijiní, Shí éí áshtʼı̨́. Áádóó asdzání áháłní, Asdzání ná naalʼaʼí bizaad diitsʼı̨́ı̨́h. Áádóó ájíní, Níínístsʼą́ą́ʼ.
18 Ákohgo asdzání haadzíiʼgo ání, Ałkʼidą́ą́ʼ ádajiníí nítʼééʼ, Éíbel kin haalʼáagi kótʼé haʼnínígíí bíndaʼízhdídóołkił. Ákótʼéego hodaʼdiiłʼáhígíí nidahatʼééh nítʼééʼ.
19 Ízrel dineʼé bitahgi kʼé dandzinii áádóó badaʼahódlíii łaʼ nishłı̨́; Ízrel dineʼé bitahgi kin haalʼáhígíí áádóó amá nilíinii atídadíílííł bíká ánítʼı̨́ nisin. Haʼátʼíísh biniyé Bóhólníihii bíiʼii áníłdįįh doo?
20 Nítʼééʼ Jóʼab hanáánáádzíiʼgo ání, Doodahéi, doodahéi, dooyeeʼ tʼáá kʼad ánihisíłdįįd da, doodaiiʼ tínihidiishłaa da.
21 Éí doo ákótʼée da, nidi diné léiʼ Dził Íífreiyim daniʼáhídę́ę́ʼ naagháhígíí Bíkrai biyeʼ Shííba wolyéii éí aláahgo naatʼáanii yichʼįʼ nídiildzil. Tʼáá bí tʼéí nihaa nołteeh, áko kin haalʼáhígíí bitsʼą́ąjįʼ dah nídadidiiʼnééł. Áádóó asdzání éí Jóʼab ííłní, Shoo, bitsiitsʼiin éí kin haalʼá binaa ahééʼítłʼinígíí báhátis nichʼįʼ ahidoolghą́ą́ł.
22 Áko asdzání éí bidineʼé tʼáá ałtso áłah áyiilaii hóyą́ągo yichʼįʼ yáłtiʼ. Áádóó Bíkrai biyeʼ Shííba bikʼos kʼídeisneʼgo bitsiitsʼiin éí Jóʼab bichʼįʼ chʼídayiisxan. Nítʼééʼ Jóʼab éí deenástsʼaaʼ bideeʼ bee íʼdílzoołí yee ádííniidgo kin haalʼáhígíí bikʼizdeeskaigo diné tʼááłáʼí jinítínígo tʼáá hó dahaníbaal naaznilgóó anídziiskai, índa Jóʼab éí Jerúsalem kin haalʼáágóó aláahgo naatʼáanii yichʼįʼ anáádzá.
David yił bídahólníihii (2Sam. 8:15-18; 1Chr. 18:14-17)
23 Nítʼééʼ Jóʼab éí Ízrel dineʼé bisiláo dah deínéehii yinanitʼaʼí nilı̨́ı̨́ nítʼééʼ áádóó Jiihóíyada biyeʼ Biinéíyah éí Kéreth dineʼé índa Pííleth dineʼé yinanitʼaʼí nilı̨́ı̨́ nítʼééʼ.
24 Áádóó Adóram éí naalteʼ binaanishii yinantʼáago ábiʼdiilyaa; Aháílad biyeʼ Jiiháshafat éí naatʼáaniishchíín nilı̨́ı̨́ nítʼééʼ.
25 Shííva éí naaltsoos ííłʼíní nilı̨́ı̨́ nítʼééʼ áádóó Zéídak índa Abáíyathar éí nááʼiiłniihii nilı̨́ı̨́ nítʼééʼ.
26 Áádóó ałdóʼ Jéíyer baʼáłchíní ahoolchíiłii łaʼ Áíra wolyéii éí David bá aláahgo nááʼiiłniihii nilı̨́ı̨́ nítʼééʼ.
