2 Samuel 21:1-22
21 Nítʼééʼ David bíyoołkááł yę́ędą́ą́ʼ tááʼ nááhaijįʼ hodííchįįd. David éí Bóhólníihii nayídééłkid, áádóó Bóhólníihii hachʼįʼ haadzíiʼgo áhodííniid, Saul yę́ę áádóó baʼáłchíní ahoolchíiłii bił dił nidaashchxiiʼgo ídaʼiilaa; jó, Gíbiyan dineʼé nideistseed; éí bąą áhátʼı̨́.
2 Áádóó aláahgo naatʼáanii éí Gíbiyan dineʼé hágo yidííniidgo ííłní; (áko Gíbiyan dineʼé éí doo Ízrel dineʼé danilı̨́į da, nidi Ámor dineʼé tʼáá ayáhígo yidziihígíí danilı̨́. Azhą́ Ízrel dineʼé éí Gíbiyan dineʼé bichʼįʼ ádee hadazdeesdzííʼ nidi Saul éí Ízrel áádóó Júdah dineʼé yá yínéésdlįįdgo Gíbiyan dineʼé ałtso nideestsił niizı̨́ı̨́ʼ:)
3 éí bąągo David éí Gíbiyan dineʼé ííłní, Haʼátʼíísh nihá baa nideeshaał? Áádóó haʼátʼíísh bee nihá kʼééhodeeshdǫǫłgo Bóhólníihii bííʼ nilíinii bikʼidajiinohdlíi doo?
4 Gíbiyan dineʼé ádahałní, Nihí éí Saul yę́ę, doodaiiʼ baʼáłchíní bibéésh łigaii, doodaiiʼ biʼóola doo daniidzin da, doodaiiʼ tʼááká nihí nihiniinaa Ízrel dineʼé łaʼ sóółhééł lágo. Áko David ání, Tʼáá dayínóokeedígíí nihichʼįʼ kódeeshłííł.
5 Nítʼééʼ aláahgo naatʼáanii ánáádeidooʼniid, Éí diné nanihistseedígíí áádóó nihinahazgizgo Ízrel dineʼé bikéyahgóó tʼáá átʼéé nítʼééʼ doo łaʼ diidzihgóó nihinahazʼą́ą́ nítʼééʼ yę́ę bikʼédígi,
6 bíniʼdii baʼáłchíní diné danilínígíí tsostsʼidgo nihaa nínííł, áko Bóhólníihii binááł dah dahodiyiidloh; éí Gíbiyahgi Saul yę́ę bikin haalʼáhígi ákódahodiilnííł. Bóhólníihii éí nibiníłtı̨́ı̨́ nítʼééʼ. Áko aláahgo naatʼáanii ání, Nihaa hodeeshnił lą́ą.
7 Nidi aláahgo naatʼáanii éí Jánathan yę́ę biyeʼ Miifíbosheth, éí Saul yę́ę binálí tʼáadoo ninéidiníʼą́ą da, háálá Saul yę́ę biyeʼ Jánathan yę́ę éí David bił Bóhólníihii biniitʼaa ałchʼįʼ ádee hazdoodzííʼ.
8 Aláahgo naatʼáanii éí Éíyah bitsiʼ Rízpah biyáázhké naaki, éí Saul yę́ę yá yishchínígíí, Armónai áádóó Miifíbosheth wolyéego néidiinil, áádóó Saul yę́ę bitsiʼ Máíkal biyáázhké ashdlaʼgo éí Miihólathdóó diné Barziléíyai biyeʼ Éídriyal yá niyiishchínígíí ałdóʼ néidiinil.
9 Áko Gíbiyan dineʼé yaa honínil áádóó wókʼą́ągi Bóhólníihii binááł dah dahodiyiiloʼ, índa tʼáá tsostsʼid yiltʼéego tʼáá łaʼ bizhiʼee nidahastseed. Tłʼoh naadą́ą́ʼ bideeʼí daagizh binih, daʼagizhígíí baa nídiildeeʼ binih nidahoʼdiztseed.
10 Áádóó bikʼijįʼ Éíyah bitsiʼ Rízpah éí tłʼoh yishbizh néidiiłtsoozgo tsé bikááʼ ádá niiníłkaad; daʼagizhígíí baa nídiildeeʼdóó yá biyiʼdę́ę́ʼ ahoʼniiłtą́ąjįʼ ákwii sidáago jı̨́įgo tsídii nidaatʼaʼígíí atsʼíís bikʼéézhníłkaʼ, doodaiiʼ tłʼéeʼgo naaldlooshii nidaaldeehii atsʼíís bikʼéézhníłkaʼ.
11 Nítʼééʼ Saul yę́ę baʼákéí yíłʼíní Éíyah bitsiʼ Rízpah áátʼįįdígíí baa yátiʼgo David bił hóóneʼ.
12 Nítʼééʼ David dah diiyáago Saul yę́ę bitsʼin áádóó biyeʼ Jánathan yę́ę bitsʼin éí Jéíbesh-gíliyadóó diné yitsʼą́ą́ʼ nídeidiinil; jó, éí Béthshan kin haalʼáagi atiindóó deineezʼı̨́ı̨́ʼ nítʼééʼ. Ákwii Filístiya dineʼé éí Gilbówa kin haalʼáagi Saul dayiisxı̨́ bijı̨́ı̨́ góneʼ bitsʼíís dah deidiiloʼ.
13 Áádę́ę́ʼ Saul yę́ę bitsʼin áádóó hayeʼ Jánathan yę́ę bitsʼin názhníjaaʼ, áádóó náádaałaʼ dah dabiʼdiidloʼ yę́ę dabitsʼin áłah áńjiidlaa.
14 Nítʼééʼ Saul yę́ę áádóó hayeʼ Jánathan yę́ę bitsʼin éí Bénjamin bikéyahdi Zíílah kin shijaaʼgi Saul bizhéʼé yę́ę Kish wolyéii bitséníʼootséél góneʼ yóóʼádajiilaa; aláahgo naatʼáanii yee haadzíʼígíí tʼáá ałtso bikʼeh ádadziidzaa. Áádóó bikʼijįʼ Diyin God bichʼįʼ kéyah bá sonídazdilzįįhgo há yikʼiníjídliih.
Abísheiyai éí yéʼiitsoh bitsʼą́ąjįʼ David yisdáyííłtı̨́
15 Áko nítʼééʼ Filístiya dineʼé éí Ízrel dineʼé yikʼi náánéijééʼ áádóó David bá nidaalʼaʼí yił ákóyaa níná; Filístiya dineʼé yikʼiijéeʼgo yił daʼahoogą́ą́ʼ, áko David dínéesnaʼgo nídínéesdzá.
16 Nítʼééʼ Íshbai-bíínab wolyéii yéʼiitsoh biyeʼké łaʼ nilı̨́įgo éí bitsiidétáán bílátahjįʼ deeníigo bighą́ą́h díʼáhígíí éí béésh łitsoii bee ályaii táadi neeznádiin shékel wolyéii dah hidídloʼ áádóó ákászaazígíí diltłish ániidíii bąąh dah sitą́ągo David diyeeshxééł nízin.
17 Nidi Zerowáíyah biyáázh Abísheiyai éí David yíká aalwodgo Filístiya dineʼé yigháʼníłgeedgo yiyiisxı̨́. Áko David hadiné hachʼįʼ ádee hadadeesdzíiʼgo ádahałní, Anaaʼ baa naʼaldeehgóó tʼáadoo nihił nanibaahí, áko Ízrel dineʼé bibee adinídíinii doo dínííłtsis da.
David bá nidaalʼaʼí éí yéʼiitsoh nideistseed (1Chr. 20:4-8)
18 Ákódaadzaadóó náábíkʼijįʼ Gab hazʼánígi Filístiya dineʼé bił ałkʼi náájiijééʼ, áko Húshath dineʼé Síbiikai wolyéii Saf yiyiisxı̨́; éí yéʼiitsoh biyeʼké łaʼ nilı̨́ı̨́ nítʼééʼ.
19 Nááʼáłdóʼ Gabgi Filístiya dineʼé bił ałkʼi náájiijééʼ; tʼáá ákweʼé Béthlehemdóó diné Jéíyarii-óriijim biyeʼ Elhéínan éí Gath kin haalʼáádóó diné łaʼ yiyiisxı̨́; éí Goláíyath yę́ę bikʼis nilı̨́ı̨́ nítʼééʼ; éí bitsiidétáán á sitą́ągi áníldííl.
20 Nááʼáłdóʼ Gath kin haalʼáagi ałkʼi náájiijééʼ; ákwii diné ayóó áníłnééz léiʼ naaghá. Éí bílaʼ tʼáá ałchʼijí bílázhoozh hastą́ą́h, áádóó bikédiníbiní tʼáá ałchʼijí ałdóʼ hastą́ą́h, áko tʼáá átʼégo naadiin dı̨́ı̨́ʼ; éí ałdóʼ yéʼiitsoh biyeʼ nilı̨́.
21 Áko éí Ízrel dineʼé nayéʼéʼįįhgo David bikʼis Shímiya biyeʼ Jánathan éí hwiisxı̨́.
22 Díí dı̨́ltʼéego yéʼiitsoh bá nidabiʼdiizhchı̨́įgo Gath kin haalʼáagi nidaakai nítʼééʼ; David áádóó bá nidaalʼaʼí dabííghą́ą́ʼ.
