2 Samuel 22:1-51
22 Áko David éí Bóhólníihii bichʼįʼ hadzoodzíiʼgo, íídą́ą́ʼ díí saad bee sin ályaaígíí bee bichʼįʼ hojitaałgo hweʼanaʼí tʼáá ałtso bitsʼą́ąjįʼ índa Saul yę́ę bitsʼą́ąjįʼ Bóhólníihii yisdáhóółtı̨́.
2 Áádóó ázhdííniid,
Bóhólníihii éí tsé shá nilı̨́, índa bineʼ adziihii shá nilı̨́, áádóó yisdáshiiłteehii nilı̨́.
3 ShiDiyin God éí tsé bineʼ naasdziʼii nilı̨́įgo tʼáá bí tʼéí baa jííníshłíigo bineʼ ahinishchééh;shinaageʼ áádóó adziil bee yisdáhásháahii nilı̨́, nehesdzíihii áádóó bineʼ ahinishchéehii,shiyisdáʼiiníiłii nilı̨́. Ni tʼéí shiʼanaʼí nídahwéedǫ́ǫsii bitsʼą́ąjįʼ yisdáshiyíłteeh.
4 Bóhólníihii náoshkąąh doo; éí baa haʼniihgo yą́ą́h nilı̨́.Kótʼéego shiʼanaʼí danilíinii yitsʼą́ąjįʼ yisdáshiiłteeh.
5 Aniné tʼéí shináhaazláago shikʼi náhoodleeh.Tó nídaadląąhiigi átʼéego doo Diyin God kʼehgo ádaatʼéii shaa nahaakaigo shił yééʼ dahasłı̨́ı̨́ʼ.
6 Chʼı̨́įdiitah bikʼee yínííł naʼadáii shináhaazláá nítʼééʼ,aniné biloh shiyah náhodiłhis nítʼééʼ.
7 Shił nahodítʼé sélı̨́įʼgo Bóhólníihii bichʼįʼ sodeeszin;shiDiyin God, shíká adoolwoł biniyé néisiskan;bikin biiʼ sohodizin biiʼdę́ę́ʼ shidiiztsʼą́ą́ʼ,áko náoshkąąhígíí tʼáá aaníí yidiiztsʼą́ą́ʼ.
8 Ákohgo nahasdzáán ádoogáadgo ditłid;yá bee daniłdzilii nidahaasnáaʼgo daditłid nítʼééʼ,háálá Bóhólníihii báhóóchįįd.
9 Bínííʼdę́ę́ʼ łid haʼííjool, áádóó bizééʼdę́ę́ʼ kǫʼ óʼoołdįįłii hadíínóodgo bee tsííd dadiiltłah.
10 Yótʼááh hiníláii ałdóʼ ąą ádeileʼgo hadááyáagobikeeʼ biyaagi chahałheeł dah yildoh.
11 Áko diyingo naalʼaʼí chérab wolyéiiyikʼi dah sidáago éí bił yítʼaʼ;níłchʼi bąąh diitsʼaʼgo biʼdiiltsą́.
12 Áádóó chahałheeł bikʼi hííkaadgo íʼdiilyaa,índa tó diłhiłgo áádóó kʼos diłhił bił nihihidiiyı̨́.
13 Bitsʼádiʼnílídígíí bitsʼáhodiltłiʼgo bee tsííd dadiiltłah.
14 Yádiłhił biyiʼdę́ę́ʼ adiʼní nahalingo Bóhólníihii haadzííʼ,Aláahgo Ayóóʼátʼéii biinééʼ diistsʼą́ą́ʼ.
15 Áádóó kʼaaʼ yee adziiłtʼóohgo anaʼí tainooskaad;nídaʼiilgęshgo bee tʼóó bił dahóóląąd.
16 Tó dahidinéhígóó áádóó nahasdzáán bee daniłdzilígíí yitʼı̨́ daazlı̨́ı̨́ʼ,háálá Bóhólníihii adeeztehgo bínííʼ yéego yee deeyolgo ákótʼé silı̨́ı̨́ʼ.
17 Aghánáhóóʼáádę́ę́ʼ shíká adoolniiʼgo sisił;tó tʼóó ahayóí siyı̨́ biyiʼdę́ę́ʼ yisdáshííłtı̨́.
18 Shiʼanaʼí bidziilii índa shikʼee dadiniihii yitsʼą́ąjįʼ yisdáshííłtı̨́,háálá éí shiláahgo ádabóodziil nítʼééʼ.
19 Shichʼįʼ nahwiiʼnáago yoołkááł yę́ędą́ą́ʼ shaatįįh yínáa nidiBóhólníihii bee nisdzil nítʼééʼ.
20 Áádóó ałdóʼ honíteelgo hazʼą́ąjįʼ shił ííʼáazhgo yisdáshííłtı̨́,háálá shaa bił hózhǫ́.
21 Tʼáá ákogi áníshtʼéii bikʼehgo Bóhólníihii shichʼįʼ naʼnílá;aʼátʼeʼ shąąh ádinígíí bikʼehgo shichʼįʼ naʼnílá.
22 Háálá Bóhólníihii áníinii bikʼeh honishʼı̨́įgo yishááł nítʼééʼáádóó doo yáʼádaashóonii doo baa naasháágóó tʼáadoo shiDiyin God bitsʼáníyáa da.
23 Háálá yee nihodiizʼáanii shidáahgi hólǫ́ǫ́ nítʼééʼínda yee nihwiizʼáanii tʼáadoo bitsʼáníyáa da.
24 Binááł tʼáá ákóneʼ áníshtʼéé nítʼééʼ;doo ákwii áníshtʼée dooleełígíí bitsʼąąádaa áháshyą́ą́ nítʼééʼ.
25 Éí bąą Bóhólníihii éí tʼáá ákogi áníshtʼéii bikʼehgo shichʼįʼ naʼnílá,índa binááł aʼátʼeʼ shąąh ádinígíí bikʼehgo Bóhólníihii shichʼįʼ naʼnílá.
26 Aa aʼááh danízinii bichʼįʼ aa aʼááh nínízingo íʼdíínílzin;tʼáá ákóneʼ ádaatʼı̨́įgo deíkáahii bichʼįʼ tʼáá ákóneʼ ánítʼı̨́įgo íʼdíínílzin.
27 Baʼátʼeʼ ádaadinii bichʼįʼ naʼátʼeʼ ádingo íʼdííʼnílzin;ákʼeh dahalʼíinii bikʼijįʼ nílı̨́įgo íʼdííʼnílzin.
28 Diné bichʼįʼ nidahwiiʼnáanii yisdáhínííł,nidi diné ádaa dahaʼniihii níníłʼı̨́; éí aʼohgo ádaatʼéego ádíílííł.
29 Shibee hoolʼiní nílı̨́, Bóhólníihii;shił tłʼéeʼgo Bóhólníihii shił chʼídiʼdoołdlał.
30 Jó, ni neego siláo yinéełii bikʼeh dideeshdleeł;shiDiyin God bee kin haalʼá ahéénítłʼinii báhátis dah dínéeshjı̨́ı̨́ł.
31 Diyin God tʼáá bí átʼéii tsʼídá tʼáá ákogi átʼé;Bóhólníihii bizaad bóhoneestą́ąʼgo bee baa hodzoosdlííʼ;baa deidzólíii tʼáá ałtso yá naagé nilı̨́.
32 Háí lá Diyin God nilı̨́? Bóhólníihii lą́ą;háísh tsé niłdzilii nilı̨́? NihiDiyin God lą́ą.
33 Diyin God bee shidziilgo bineʼ naasdziʼii nilı̨́,tʼáá ákogi áníshtʼéego áshósin.
34 Bįįhtsaʼii dilwoʼígi átʼéego shikeeʼ bee doo shił nahontłʼagóó áshósin,áádóó shiʼaghádahazʼáagi dah náshiisįįh.
35 Shílaʼ bee anaaʼ yiishchįįh dooleełgo yínashiniłtin,áko béésh łitsoii ałtı̨́ı̨́ʼ éí shigaan bee néístas.
36 Nibee yisdáʼiildééh naagé ałdóʼ shaa dííníʼą́;náʼáhwiinítʼı̨́ʼíii bee ayóó áníshtʼéego áshiinilaa.
37 Doo nantłʼagóó nihidishtaałgo áshiinilaa;éí bąą tʼáadoo ałtádiighaz da.
38 Shidaʼanaʼí bikééʼ náhidiishyeedgo ádaséłdįįdínda tʼáadoo ánáhooshtʼįįhí ałtso nahódaséłdįįdjįʼ hakééʼ hinisdzá.
39 Áko ałtso ádahoséłdįįd; tídahodiishłaago tʼáadoo náádahizhdiiʼnaʼ da;tʼáá aaníí shiyaajįʼ naaʼahizhneezdeeʼ.
40 Háálá anaʼalʼı̨́į doogi adziil bee ákásíszaazgo áshiinilaa,shikʼi néijah yę́ę shiyaajįʼ bikʼeh dadínídlı̨́ı̨́ʼ.
41 Shidaʼanaʼí ałdóʼ shílákʼee dadííníʼą́,áko dashijijoołá yę́ę ádahodeeshdįįł.
42 Bíká adoolwołii yíká dadéezʼı̨́ı̨́ʼ nítʼééʼ, nidi tʼáadoo yisdábóníłí da;Bóhólníihii yichʼįʼ dadééʼı̨́ı̨́ʼ, nidi tʼáadoo bichʼįʼ ééhoosįįd da.
43 Áko niʼgóó łeezhgi átʼée doogo bikʼídaʼiiséłhaal;kintah atiingóó hashtłʼishígi átʼéego bikʼi niséyáago nídííʼeez.
44 Shidineʼé saad dahółóonii ałdóʼ bitsʼąą yisdáshííníłtı̨́;ałʼąą dineʼé aláahgo binanishtʼáago áshíínísingo diné doo béédahasin yę́ę shá nidaalʼaʼ.
45 Déʼéyóní danilíinii tʼáá bí shiyaajįʼ niʼídiiʼnííł;tʼáá dashidiitsʼı̨́hí shikʼeh dahółʼı̨́.
46 Déʼéyóní bichooʼı̨́ ádaasdįįd,áádóó bidziilgo bił nahazʼą́ą́dóó nídaaldzidgo chʼéhékááh.
47 Bóhólníihii hiná; shitsé niłdzilii nilı̨́įgo baa haʼniih leʼ,áko Diyin God éí tsé bee yisdéíyáii ayóó átʼéii nilı̨́į leʼ.
48 Diyin God éí shá kʼéédidooʼnííł,áádóó tʼáá bí dadineʼé shá yikʼeh doodleełgo shiyaa ayiinííł.
49 Áádóó shidaʼanaʼí bitsʼąą yisdáshíłtééh áádóó shikʼijįʼ nídahidiikáahii bilááh áníshtʼéego áshíínísin;diné doo daatsʼíidii bitsʼąą yisdáshíłtééh.
50 Éí bąą shí nichʼįʼ ahééh nisin doo, Bóhólníihii nílíinii,ałʼąą dineʼé bitahgóó nízhiʼ baa hashniihgo hashtaał doo.
51 Bóhólníihii éí biʼaláahgo naatʼáanii bá bee yisdáhóótʼiʼii ayóó átʼéii nilı̨́;akʼah bikʼi yaadziidgo yiyíísı̨́įʼii David áádóó baʼáłchíní ahoolchíiłii yaa aʼááh nízingo ahóyéelʼáa doo.
