2 Samuel 23:1-39
23 Kʼad díidíígíí David tsʼídá akéeʼdi saad yee hahaasdzíʼígíí átʼé:
Jésii biyeʼ David ání,éí diné wódahgo ábiilaiiJéíkab biDiyin God akʼah yikʼi yayiiziidgo yiyíísı̨́įʼiiáádóó Ízrel dineʼé bitahdóó sin nizhónígo yee hataałii ání,
2 Bóhólníihii biNíłchʼi Diyinii shee yáłtiʼgo bizaad bee hahasdziih.
3 Ízrel dineʼé biDiyin God kóní,Ízrel dineʼé bitsé niłdzilii shichʼįʼ yáłtiʼgo ání,Tʼáá háiida dineʼé binazhnitʼáago tʼáá ákogi ájítʼée doo;Diyin God jidísingo hóhólníih doo.
4 Abínígo adididlaʼígi átʼéego abínígo kʼos ádingo jı̨́honaaʼéí haagháhígi átʼéegoáádóó ałtso ahałtı̨́ı̨́hdóó bikʼijįʼ tłʼoh ditʼódí bikʼi diidíingo haajah łeeígi átʼéego azhdiníłdíin doo.
5 Daʼ shaʼáłchíní náás ahoolchíiłiísh Diyin God doo bee bidahoníłdzil da doo?Jó, ahóyéelʼáágóó bibee ahaʼdeetʼáanii shił hashtʼeyiilaa;tʼáá ałtsoní ákótʼéego hashtʼeyiilaii tʼáá aaníinii átʼé.Díí tʼáá átʼé bee yisdáhásháahii átʼéáádóó tʼáá átʼé bídin nishłíinii átʼé.Daʼ bíísh éí doo yee nihidínóoséeł da?
6 Nidi diné doo yáʼádaashóonii biyeʼké tʼáá ałtso chʼil ahoshí nahgóó kólʼįįhígi ádabidiʼdoolnííł,háálá éí doo yílá bee naaljooł da.
7 Nidi tʼáá háiida bizhdidoolchiłgo éí bee náhwiidzídí yee ahaniidiyooziłáádóó ahaniyiiziidígi tsʼídá ałtso ahididoolkʼą́ą́ł.
David bidiné ayóó ádaatʼéii (1Chr. 11:10-47)
8 David bidiné ayóó ádaatʼéii dah yooʼishígíí éí kódaolyé: Tákmon dineʼé Jósheb-bashííbet wolyéii éí siláo binanitʼaʼí alą́ąjįʼ yinanitʼaʼí nilı̨́įgo Ézen dineʼé Adíno ałdóʼ yee dayózhí, áko éí bitsiidétáán yee tseebíidi neeznádiin diné tʼáá łahjįʼ neistseed.
9 Áádóó bikééʼdóó éí Dódo biyeʼ Eliyéízar éí Ahówa binálí; David bidiné táaʼgo ayóó ádaatʼéhígíí atah nilı̨́; éí Filístiya dineʼé anaaʼ dahodoohłeeł yiniyé ahíikaigo bee nidahozhdeeshzhǫʼ; jó, Ízrel dineʼé éí tʼáá íídą́ą́ʼ yóóʼadahineezhchą́ą́ʼ lá.
10 Nítʼééʼ bí éí naaldzilgo bílaʼ dínéesnaʼjįʼ Filístiya dineʼé neistseed, áko diltłish yidiniiltsood, áko éí bijı̨́ Bóhólníihii éí ayóó átʼéego hwee akʼeh deesdlı̨́ı̨́ʼ, áko naalyeʼé bąąh daʼoogą́ʼígíí tʼéiyá biniyé diné hakééʼ tʼą́ą́ʼ nákai.
11 Náábíkééʼ góneʼ sizínígíí éí Héíra dineʼé łaʼ Éígii biyeʼ Shámmah wolyé. Filístiya dineʼé áłah ádzaago naaʼołí nímazí tʼóó ahayóí háájééʼ léiʼgi ahíikai, áko Ízrel dineʼé éí Filístiya dineʼé yikʼee yóóʼadahineezhchą́ą́ʼ.
12 Nidi bí tʼéí dáʼákʼeh ałníiʼgi sizı̨́įgo yichʼą́ą́h naazbaaʼ, áko Filístiya dineʼé neistseed, áko Bóhólníihii éí ayóó átʼéego hwee akʼeh deesdlı̨́ı̨́ʼ.
13 Nítʼééʼ tádiingo aląąjįʼ naazíinii dajílínígíí tájíltʼéego dashdiikaigo daʼagizhjįʼ ahoolzhiizhgo tséʼáán Adálam hoolyéejįʼ David baa jíkai, áko Filístiya bisiláo dah deínéehii éí Réfeiyim honíteelgi dah yinééł.
14 Íídą́ą́ʼ David éí bidziilgo hazʼą́ągi dah yinééł, áko Filístiya bisiláo Béthlehem kin shijaaʼdi dah yinééł.
15 Áko nítʼééʼ David ání, Béthlehemdi dáńʼdítı̨́hígi tó hahadleehdóó łaʼda tó haa yókáałgo jódlą́ą́ʼ laanaa.
16 Áko díí diné táaʼgo ayóó ádabóodziilígíí Filístiya bisiláo dah yinééł góneʼ bił chʼízhníjéeʼgo Béthlehemgi yah aʼatiinígi tó hahadleehdóó tó hadeizloʼgo David yá nídeizką́, nidi tʼáadoo yoodlą́ą́ʼgóó tʼóó Bóhólníihii bichʼįʼgo yayiiziid.
17 Áádóó David ání, Bóhólníihii nílíinii, díí ádeeshníłígíí doo shitʼáahjįʼ bił nitséskees da doo. Daʼ díísh doo diné beʼiinaʼ ninádeizʼą́ągo dabidił átʼée da? Éí bąą tó tʼáadoo yoodlą́ąʼ da. Díí diné táaʼgo ayóó ádabóodziilígíí ákódáátʼįįd.
18 Zerowáíyah biyáázh Jóʼab bikʼis Abísheiyai éí akéédę́ę́ʼ táaʼgo nibideeʼnilígíí ajítahgo aláahgo hóhólnííh; éí bitsiidétáán néidiitą́ągo yee táadi neeznádiin diné neistseed, áko diné táltʼéhígíí atah jílı̨́ hoʼdiʼní.
19 Doósh éí diné táltʼéhígíí bitahdóó hó aláahgo diné bił jíílįįd da? Éí bąą hó alą́ąjįʼ hoʼdiilzįʼ; azhą́ táaʼgo aląąjįʼ nibideeʼnilígíí doo ajítah da nidi, tʼáá alą́ąjįʼ dzizı̨́.
20 Áádóó diné doo nánílyéesii Jiihóíyada biyeʼ Biinéíyah éí Kábziyel kin haalʼáádóó diné ayóó átʼeego naʼabaah yee nilíinii binálí jílı̨́. Éí Móʼab dineʼé naakigo naayééʼ nilíinii nidzistseed áádóó łah yidzaazgo aʼáán góyaa ajííyáago náshdóítsoh bitsiijįʼ ditłʼooígíí jiisxı̨́.
21 Áádóó Ííjip dineʼé jiisxı̨́; éí diné ayóó átʼéii nineezii nilı̨́ı̨́ nítʼééʼ áádóó Ííjip dineʼé nilı̨́įgo tsiidétáán neitin, nidi Biinéíyah éí gish tʼéí jootı̨́įłgo ákóyaa bichʼįʼ jiníyá áádóó Ííjip dineʼé bitsiidétáán bílákʼee hajiyííłhan, áko tʼáá bí bitsiidétáán bee jiisxı̨́.
22 Áko díigi átʼéego Jiihóíyada biyeʼ Biinéíyah kwáátʼįįd; kótʼéego diné táaʼgo ayóó ádaatʼéii atah jílı̨́ hoʼdiʼní.
23 Áko éí diné tádiinígíí bitahdóó aláahgo diné bił jíílįįd, nidi diné táaʼgo aląąjįʼ nibideeʼnilígíí doo ajítah da. Áko David hakʼi dadéezʼı̨́įʼii yee bóhólníihgo ájiilaa.
24 Jóʼab bikʼis Éísahel éí tádiinígíí ajítah, áádóó Béthlehem kin shijaaʼdóó Dódo biyeʼ Elhéínan ałdóʼ,
25 Héírad dineʼé Shámmah ałdóʼ, Héírad dineʼé Iiláíka ałdóʼ,
26 Páltai dineʼé Híílez ałdóʼ, Tekówa dineʼé Íkesh biyeʼ Áíra ałdóʼ,
27 Ánethathdóó dineʼé Éíbiyíízer ałdóʼ, Húshai dineʼé Miibónai ałdóʼ,
28 Ahówah dineʼé Zálmon ałdóʼ, Niitófahdóó dineʼé Maharéíyai ałdóʼ,
29 Niitófahdóó dineʼé Béíyanah biyeʼ Hííleb ałdóʼ, Bénjamin dineʼé bikin haalʼáhígíí Gíbiyahdóó dineʼé Ráíbai biyeʼ Ítayai ałdóʼ,
30 Pírathandóó dineʼé Biinéíyah ałdóʼ, Géíyash tó danílínídóó dineʼé Hídeiyai ałdóʼ,
31 Áraba hazʼą́ą́dóó dineʼé Ábai-álban ałdóʼ, Barhúmai dineʼé Azméíveth ałdóʼ,
32 Sheiyálbimdóó dineʼé Iiláíyaba ałdóʼ, Jéíshen biyeʼ łaʼ Jánathan ałdóʼ,
33 Héírad dineʼé Shámmah ałdóʼ, Héírad dineʼé Shéírer biyeʼ Aháíyam ałdóʼ,
34 Méíyakah dineʼé biyeʼ Ahásbai biyeʼ Iilífalet ałdóʼ, Gáílodóó dineʼé Ahíthofel biyeʼ Iiláíyim ałdóʼ,
35 Kármeldóó dineʼé Híízreiyai ałdóʼ, Árba dineʼé Péíyarai ałdóʼ,
36 Zóbahdóó Néíthan biyeʼ Áígal ałdóʼ, Géed dineʼé Béínai ałdóʼ,
37 Áman dineʼé Zíílek ałdóʼ, Biyérathdóó dineʼé Néíharai ałdóʼ, éí Zerowáíyah biyáázh Jóʼab bibee naʼabaahí yá neijaah nítʼééʼ,
38 Íthra dineʼé Áíra ałdóʼ, Íthra dineʼé Géíreb ałdóʼ,
39 Het dineʼé Yuráíyah ałdóʼ, éí tʼáá ałtsogo tádiindóó baʼaan tsostsʼid jiltʼé.
