2 Samuel 24:1-25
24 Nááʼáłdóʼ Bóhólníihii éí Ízrel dineʼé yichʼįʼ bánááhóóchįįdgo David hakʼijįʼ náádiildził áyiilaago ání, Nílááh, Ízrel dineʼé índa Júdah dineʼé deínółtaʼ.
2 Áko aláahgo naatʼáanii éí siláo dah deínéehii yinanitʼaʼí Jóʼab bił sikéego áyidííniid, Nílááh, Ízrel dadóoneʼé danilínígíí tʼáá ałtso bitahgóó dínáahgo Dan kin haalʼáádóó Bíyer-shííba kin shijaaʼjįʼ diné yídííłtah; éí dineʼé ánéelą́ʼígíí shił bééhodoozįįł.
3 Nítʼééʼ Jóʼab éí aláahgo naatʼáanii áyidííniid, Kʼad Bóhólníihii niDiyin God éí diné yilááh áyoolííł; ádanéeltʼeʼii tʼááłáhídi neeznádiindi ánánéelą́ąʼgo yilááh áyoolííł, áko bóhonishníihii aláahgo naatʼáanii yiníłʼı̨́įgo haa néelą́ʼígíí bił bééhodoozįįł. Nidi haʼátʼíí biniyé bóhonishníihii aláahgo naatʼáanii díí yaa bił hózhǫ́ǫgo íidoolííł?
4 Azhą́ kózhdííniid nidi, aláahgo naatʼáanii éí Jóʼab áádóó siláo dah deínéehii yinanitʼaʼí danilíinii yighaʼdeetʼą́. Áko Jóʼab áádóó siláo yinanitʼaʼí danilíinii aláahgo naatʼáanii dah sidáhídóó dashdiikaigo Ízrel dineʼé bidaʼízhníiłtaʼgóó dashdiikai.
5 Áádóó Jórdan tooh haʼnaa nijíkaigo Géed honítsʼaaʼgi Aróʼer kin haalʼáhígíí shádiʼááhjígo Jéízer kin haalʼáii bichʼįʼ honítʼiʼígi nizhníná.
6 Nítʼééʼ Gíliyad kéyahgi náájíkai áádóó Tátim-hádshai kin shijaaʼgóó tázhdookaigo Dan-jéíyangi náájíkai índa Sáídan kin haalʼáajįʼ nábikʼeeʼąądę́ęʼgo jíkai.
7 Áádóó Táir kin haalʼáagi bineʼ naʼadziʼii bił hazʼą́ąjįʼ índa Háíva dineʼé áádóó Kéínan dineʼé bikin hadaasʼáágóó tázhdookai, áko índa Júdah kéyah shádiʼáahjigo Bíyer-shííba kin shijaaʼgo áajįʼ jíkai.
8 Áko kéyah tʼáá átʼé biiʼ tázhdookaigo Jerúsalem kin haalʼáajįʼ níjíkaijįʼ náhástʼéí hwee nídadeezidóó naadiin jı̨́ hwee daʼazlı̨́ı̨́ʼ lá.
9 Ákohgo Jóʼab éí Ízrel dineʼé jííłtaʼgo diné ánéelą́ʼígíí naaltsoos bikááʼ ájiilaago aláahgo naatʼáanii baazhníłtsooz; nítʼééʼ Ízrel dineʼé doo nídanilyéesii tseebíidi neeznádiindi mííl ánéelą́ąʼgo diltłish bee naʼabaah dayiichįįh lá, áádóó Júdah dineʼé ashdladi neeznádiindi míilgo ánéelą́ą́ʼ lá.
10 David éí dineʼé yééltaʼdóó bikʼijįʼ náhozhdííłhaaliigi ádziidzaa áádóó David éí Bóhólníihii áyidííniid, Díigi íʼiishłaaígíí bee ayóó átʼéego ádił asésiih, áko, nánooshkąąh, Bóhólníihii nílíinii, ná naalʼaʼí nishłíinii doo ákwii áátʼįįdígíí shá yóóʼadíʼaah; jó, doo áhosisyąągóó ákwíítʼįįd.
11 Áko nítʼééʼ David hoosʼįįdgo nízhdiiʼnaʼgo, Bóhólníihii tʼáá bí bizaad yee haadzíiʼgo éí Géed halneʼii nilíinii, tʼáá éí David yá náásgóó halneʼii nilı̨́įgo áyidííniid,
12 Nílááh, David bichʼįʼ dínáahgo ábidiní, Bóhólníihiigaʼ kóní, Táaʼgo hazʼą́ nichʼįʼ nídíínil; éí ándeeshłíłígíí biniyé tʼááłáʼígo nididííʼááł.
13 Áko Géed éí David baazhníyáago bee bił hojoolneʼgo ábijiní, Tsostsʼid nááhaijįʼísh nikéyah bikááʼgóó dahodidoochįįł? Éí doodago, tááʼ nídeezidjįʼ daatsʼí niʼanaʼí nikʼeh dadidlı̨́įgo nidaniniłchée doo? Éí náádoodago, tááʼ yiską́ąjįʼ daatsʼí nikéyahgi naa hodoołnih? Kʼad haʼátʼíí diniih, áko tʼáá bee háínídzíʼígíí éí bee shiníłʼaʼii bił náhodeeshnih.
14 Áádóó David éí Géed ííłní, Tsʼídá tʼáadoo ádóshneʼgi da; hániʼdii kʼad Bóhólníihii bílákʼeejįʼ nidaʼádidiitʼááł, háálá ayóó átʼéego aa aʼááh nízin. Diné éí doo łaʼ bílákʼeejįʼ niʼádideeshtʼáał da.
15 Ákohgo Bóhólníihii éí naałniih Ízrel dineʼé yikʼijįʼ yiníłniiʼígíí abínídóó níléí bee nihootʼáníjįʼ yiníłniiʼ, áko Dan kin haalʼáádóó Bíyer-shííba kin shijaaʼjįʼ diné daneeznánígíí tsostsʼidiindi mííl nítʼééʼ lá.
16 Áádóó diyingo naalʼaʼí éí Jerúsalem kin haalʼáagi diné íidoołdįįł biniyé yikʼijįʼ dah didiilniiʼgo Bóhólníihii díí doo yáʼátʼéhígi áhoodzaaígíí yąąh bíniʼ áádóó diyingo naalʼaʼí naʼałtseedígíí ííłní, Kʼadí tʼą́ą́ʼ háádílnííh. Nítʼééʼ Bóhólníihii bidiyingo naalʼaʼí Jííbas dineʼé Arónah bitłʼoh naadą́ą́ʼ habínínáʼálʼisí bíighahgi yiizįʼ.
17 Áko David éí diyingo naalʼaʼí diné neiłtseedgo yiyiiłtsą́ągo Bóhólníihii yichʼįʼ haadzíiʼgo ání, Dooládóʼ ádił asésiih da áádóó tsʼídá doo yáʼáshónígi íítʼįįd da lá! Nidi díí dibéshąʼ haa daadzaa? Baa nánooshkąąh, hániʼdii nílaʼ bee atíshílééh; shizhéʼé yę́ę baʼáłchíní ahoolchíiłii tʼáá bił atíshílééh.
18 Áádóó tʼáá éí bijı̨́ Géed éí David yaa níyáago ííłní, Nílááh, Jííbas dineʼé Arónah bitłʼoh naadą́ą́ʼ habínínáʼálʼisí góde dínáahgo áadi Bóhólníihii bichʼįʼ bikááʼ nááʼiiniihí nidííʼááł.
19 Áádóó Géed ádííniidígíí bikʼehgo David éí Bóhólníihii áhodííniidígíí bikʼehgo ádziidzaa.
20 Áádóó Arónah jidééʼı̨́įʼgo aláahgo naatʼáanii índa bá nidaalʼaʼí yił hachʼįʼ yikahgo jiiłtsą́, áádóó Arónah chʼízhníyáago aláahgo naatʼáanii biyaajįʼ nitsizhdinígoʼgo niʼjįʼ tséʼyaa jineeshjool.
21 Áko Arónah ání, Haʼátʼíí lá biniyé bóhonishníihii aláahgo naatʼáanii bá naalʼaʼí nishłíinii shaa níyá? David ádííniid, Tłʼoh naadą́ą́ʼ habínínáʼálʼisígi naa nahodiyeeshnihgo ákwii bikááʼ nááʼiiniihí nideeshʼáałgo Bóhólníihii bichʼįʼ nááʼiiniihgo, áko naałniih éí diné bitsʼą́ąjįʼ kódoonííł biniyé náádiʼyeeshnih.
22 Áádóó Arónah éí David ííłní, Bíniʼdii bóhonishníihii aláahgo naatʼáanii náhodiiʼaahgo tʼáá haʼátʼíhída bił yáʼátʼéhígíí ákwii néidiyoołnih. Jó, kǫ́ǫ́ didlidgo nááhániihii biniyé béégashii hólǫ́ áádóó haʼínínáʼálʼisígi tsin chodaoʼínígíí índa béégashii ałdóʼ éí tsin bizénínádéetı̨́įhgo yee tsin akʼi neishoodii didlidgo bee náádiʼyoonihii hólǫ́.
23 Arónah éí díí tʼáá ałtso yee aláahgo naatʼáanii yichʼįʼ yílnáago aláahgo naatʼáanii yeidiníʼą́. Áko Arónah éí aláahgo naatʼáanii áyidííniid, Bóhólníihii niDiyin God éí nááhíníłniiʼígíí ná yidínóozįįł.
24 Áko aláahgo naatʼáanii Arónah ííłní, Dooda, nidi tʼáá bą́ą́h ílínígíí bíighahgo tʼáá aaníí naa nahideeshnih, áádóó tʼáadoo bikʼé niʼníláii doo bą́ą́h ílíinii éí doo Bóhólníihii shiDiyin God bichʼįʼ nááhideeshnih da. Ákohgo David éí haʼínínáʼálʼisígi índa béégashii tʼáá bóóltąʼgo béésh łigaii shékel* ashdladiin bíighahgo yee nayiisniiʼ.
25 Áádóó ákweʼé David éí Bóhólníihii bichʼįʼ náájiiłniih doo biniyé bikááʼ nááʼiiniihí nizhníʼą́ągo didlidgo nááhániihii áádóó hózhǫ́ǫ́jí nááhániihii náájiisniiʼ. Ákohgo Bóhólníihii éí kéyah bá níjooskango hodiiztsʼą́ą́ʼ áádóó naałniihígíí Ízrel dineʼé bitsʼą́ąjįʼ kónáyiidlaa.
Footnotes
^ Tádiindóó baʼaan naaki shékel éí tʼááłáʼí dah hidiidloh.
