2 Samuel 3:1-39
3 Saul yę́ę baʼáłchíní áádóó David baʼáłchíní ałchʼįʼ anaaʼ dahółǫ́ǫgo nízaad nihoolzhiizh, áko David éí bidziil yileełgo bidziil silı̨́ı̨́ʼ índa Saul yę́ę baʼáłchíní éí doo bidziil da yileełgo doo bidziil da silı̨́ı̨́ʼ.
2 Áádóó David éí Hííbrangi biyeʼké bá neheezhchı̨́; alą́ąjįʼ bá yizhchínígíí Ámnan wolyé; éí Jézriyel dineʼé asdzání Ahínowam wolyéii biyáázh jílı̨́.
3 Naaki góneʼ bá yizhchínígíí éí Kíliyab wolyé; éí Kármeldóó dineʼé Néíbal beʼasdzą́ą́ nítʼéʼígíí Ábigeil wolyéii biyáázh jílı̨́ áádóó tááʼ góneʼ bá yizhchínígíí éí Ábsalam wolyé; Gíísher kéyahgi aláahgo naatʼáanii Tálmai bitsiʼ Méíyakah wolyéii biyáázh jílı̨́.
4 Dı̨́ı̨́ʼ góneʼ bá yizhchínígíí Adonáíjah wolyé, éí Hágith biyáázh jílı̨́; áádóó ashdlaʼ góneʼ bá yizhchínígíí Shefatáíyah wolyé, éí Abáítal biyáázh jílı̨́;
5 áádóó hastą́ą́h góneʼ bá yizhchínígíí Íthriyam wolyé, éí David beʼasdzą́ą́ Églah wolyéii biyáázh jílı̨́. Díí David éí Hííbrangi bá neheezhchı̨́.
Ábner éí David yił ahadiʼdootʼááł yinahaʼá
6 Áádóó bikʼijįʼ Saul yę́ę baʼáłchíní índa David baʼáłchíní anaaʼ daʼahilʼı̨́įgo Ábner éí Saul yę́ę baʼáłchíní bitahgi bidziilgo dah ooʼish íʼdiilyaa.
7 Saul yę́ę beʼasdzą́ą́ yíłʼíní łaʼ éí Rízpah wolyéego Éíyah bitsiʼ nilı̨́, áádóó Ish-bósheth éí Ábner áyidííniid, Haʼátʼéegoshąʼ shizhéʼé yę́ę beʼasdzą́ą́ yíłʼíní nítʼéʼígíí baʼałkʼeejįʼ dah ninááh?*
8 Áko Ábner éí Ish-bósheth haadzíʼígíí yikʼee naastáalgo ádííniid, Daʼ łééchąąʼí bitsiitsʼiin hanii nishłı̨́? Júdah dineʼé bikʼijįʼ nishłı̨́įgo díí jı̨́ yeeʼ nizhéʼé yę́ę Saul baʼáłchíní áádóó bikʼisóó índa bikʼis danilíinii baa jiinishbaʼ, áádóó David tʼáadoo bílákʼee nidííʼą́ą da, ákondi díí jı̨́ tʼáá ádzaagóó díí asdzání bee shikʼi hodiníʼą́.
9 Diyin God yeeʼ Ábner nishłíinii atíshidoolííł, áádóó tʼah yówehígo átʼéego ákóshidoolííł, Bóhólníihii éí David yichʼįʼ yee ádee hadoodzíiʼii doo bá beʼeshłééhgóogo ákóshidoolííł.
10 Éí Saul yę́ę baʼáłchíní éí aláahgo yee bóhólníihii bibikááʼdóó nahatʼáii David baa didootʼáałgo, yikááʼdóó hooʼáałgo Ízrel índa Júdah dineʼé yinantʼáago Dan kin haalʼáádóó Bíyer-shííba kin shijaaʼjįʼ yee bóhólníih doo.
11 Áko tʼáadoo bichʼįʼ hanáádzoodzíiʼ da, háálá Ábner béédzísdzííd.
12 Áádóó Ábner éí tʼáá áko nidaalʼaʼí łaʼ David yichʼįʼ ayiisʼaʼ kóníigo, Kéyahshąʼ háí bí? Áádóó ałdóʼ ání, Nił ahadiʼdeeshtʼáałgo, shoo, níká anáshwoʼ doo, áko Ízrel dineʼé tʼáá ałtso naa áłah ádeeshłííł.
13 Áádóó ádííniid, Lą́ʼąą, nił ahadiʼdeeshtʼááł, nidi tʼááłáhígo hazʼą́, éí kóndideeshniił, Doo shichʼįʼ nanináágóó doo shííníʼı̨́į da doo; tʼáá hazhóʼó Saul yę́ę bitsiʼ Máíkal bił shaa yíníʼáazhgo tʼéiyá náshiiltséeh doo.
14 Áádóó David éí bá nidaalʼaʼí Saul yę́ę biyeʼ Ish-bósheth yichʼįʼ ayiisʼaʼ kóníigo, Sheʼasdzą́ą́ Máíkal shichʼįʼ biʼníłnííh; éí Filístiya dineʼé bichoʼ bílátahgi bichoʼazis ahénálgizhígíí neeznádiingo bikʼé shaa hoʼdeeltı̨́į niʼ.
15 Áko Ish-bósheth dah adiiłʼaʼgo hahastiin bitsʼą́ą́ʼ dahodiilóóz; Léíyish biyeʼ Fáltiyel wolyéego hahastiin nítʼééʼ.
16 Áádóó hahastiin haichago hakééʼ yigáałgo Bahúrim hazʼáníjįʼ hakééʼ niníyá. Áko Ábner ábidííniid, Nílááh, nídídááh. Áádóó tʼą́ą́ʼ dah nídiidzá.
17 Ábner éí Ízrel dineʼé yá aląąjįʼ naazíinii yił yaa nídaastʼįįdgo ání, David éí aláahgo nihinanitʼaʼí nilı̨́į dooleeł danohsingo hodeeshzhiizh.
18 Kʼad ákódaohłééh, háálá Bóhólníihii éí David yee haadzíiʼgo ádííniid, Shá naalʼaʼí David binahjįʼ shidineʼé Ízrel éí Filístiya dineʼé bitsʼą́ąjįʼ áádóó anaʼí tʼáá ałtso bitsʼą́ąjįʼ yisdádeeshnił.
19 Áádóó Ábner éí Bénjamin dineʼé ałdóʼ yichʼįʼ yee hahaasdzííʼ, índa Ábner éí Hííbran kin haalʼáagi David ałdóʼ yaa níyáago yichʼįʼ yee hahaasdzííʼ; éí Ízrel dineʼé bił yáʼádaatʼéehii áádóó Bénjamin dineʼé bił yáʼádaatʼéehii tʼáá átʼé yee yił nahasneʼ.
20 Áko Ábner áádóó diné naadiingo bił Hííbran kin haalʼáagi David baa jíkai, áádóó David éí Ábner índa diné hoł yíkaígíí yá ádaʼíísįįd.
21 Áko Ábner éí David áyidííniid, Hashtʼeʼádideeshníiłgo ákǫ́ǫ́ deeshááł, áádóó Ízrel dineʼé tʼáá ałtso éí bóhonishníihii aláahgo naatʼáanii baa áłah ádeeshłííł, áko éí nił ahadadiʼdootʼááł áádóó ni éí tʼáá ałtsogóó nanítʼáa dooígíí ádaa didíítʼááł. Áádóó David éí Ábner yééʼníłniiʼgo hózhǫ́ǫgo anáádzá.
Jóʼab éí Ábner yiyiisxı̨́
22 Nítʼééʼ, shoo, David bá nidaalʼaʼí éí Jóʼab yił anaʼí yikééʼ ííjééʼ yę́ędę́ę́ʼ nákaigo anaʼí bindaalyeʼé tʼóó ahayóí nídeizhjaaʼ, nidi Ábner éí Hííbran kin haalʼáagi David doo yił naaʼaash da, háálá yééʼníłniiʼgo hózhǫ́ǫgo anáádzáa niʼ.
23 Jóʼab índa siláo yił naakaígíí tʼáá ałtso yił nákaigo Jóʼab bił hóóneʼgo áhoʼdooʼniid, Ner biyeʼ Ábner éí aláahgo naatʼáanii yaa níyá, áádóó anábiʼdoolʼaʼgo hózhǫ́ǫgo dah nídiidzá.
24 Áko Jóʼab éí aláahgo naatʼáanii yaa níyáago ání, Haʼátʼíí lá baa nisíníyá? Jó, Ábner naa níyáá lá. Haʼátʼíísh biniyé tʼóó bééʼííníłniiʼgo hózhǫ́ǫgo dah nídiidzá?
25 Ner biyeʼ Ábner bééhonísin; bí éí niniʼdooloh yiniyé naa níyá, áko dah hidiinááhgóó áádóó yah anáhídáahgi índa baa nanináhígíí tʼáá ałtso bił bééhodoozįįł yiniyé átʼı̨́.
26 Áádóó Jóʼab éí David yitsʼą́ą́ʼ dah nídiidzáago, tʼáá áko bá nidaalʼaʼí Ábner yikééʼ ayiisʼaʼgo Sáírah tó hahadleehdóó tʼą́ą́ʼ hoł nídaaskai, nidi ákódzaaígíí David tʼáadoo baa ákozniizı̨́įʼ da.
27 Nidi Ábner éí Hííbran kin haalʼáajįʼ nádzáago Jóʼab tʼáá sahdii atsʼáhonílóozgo yah aʼatiinígi hazhóʼó hachʼįʼ hadeesdzih nízin nítʼééʼ; tʼóó hátsą́ą́ʼ biyaa góneʼ diltłish hagháiníłgeedgo dadziztsą́, háálá Jóʼab bitsilí Éísahel jiisxı̨́įgo bidił bitsʼánílı̨́ ájiilaa.
28 Ákóhóótʼįįdóó bikʼijįʼ David haa hodiiztsʼą́ąʼgo ádííniid, Shí índa aláahgo bee shóhólníihgo bił hazʼą́ągi éí Bóhólníihii binááł doo bee nihidahodiitʼiʼgóó Ner biyeʼ Ábner seesyı̨́įgo bidił deeznaʼígíí doo nihikʼehdii áhóótʼįįdgóó ahoolʼáa doo.
29 Bíniʼdii éí Jóʼab áádóó bizhéʼé baʼáłchíní tʼáá ałtso bikʼijįʼ nídoodleeł, áádóó bíniʼdii Jóʼab baʼáłchíní bitahdóó łaʼ tʼáá áłahjįʼ bilóód bitsʼą́ą́dóó his háálı̨́į doo, doodaiiʼ łóód atsʼíís yiyáanii naałdzidii bee bąąh dahazʼą́ą doo, doodaiiʼ bigish áyah yiniilʼáa doo, doodaiiʼ diltłish bee bidiʼyoolyééł, éí doodaiiʼ dichin yikʼee naagháa doo.
30 Kótʼéego Jóʼab áádóó bitsilí Abísheiyai bił Ábner jiisxı̨́, háálá Gíbiyan kin haalʼáagi anaaʼ baa naʼaldeehdi bitsilí Éísahel wolyéii bitsʼą́ą́ʼ jiisxı̨́.
31 Nítʼééʼ David éí Jóʼab áádóó diné tʼáá ałtso yił naakaígíí ábizhdííniid, Nihiʼééʼ ákʼindahidoołdlałgo tłʼoh azis bee áká dadoołzis, áádóó Ábner yę́ę baa daahcha doo. Áko aláahgo naatʼáanii David tʼáá bí atsʼíís bee naaltéhí yikééʼ yigááł.
32 Áádóó Hííbran kin haalʼáagi Ábner yóóʼádayiilaa, áko aláahgo naatʼáanii biinééʼ ayóó íitsʼaʼgo Ábner yóóʼályaa yę́ęgi yícha áádóó diné tʼáá ałtso dáácha.
33 Aláahgo naatʼáanii éí Ábner yaa atínídindleehgo ání,
Daʼ Ábner joolyéiísh diné doo áhályáanii daaztsánígi átʼéego dadziztsą́?
34 Nílaʼ doo ahéheestłʼǫ́ǫ́góó,doodaiiʼ nikeeʼ doo ahéheestłʼǫ́ǫ́góódiné doo yáʼádaashóonii dahwiisxı̨́ nahalingo niʼdiisyı̨́.
Áádóó diné tʼáá ałtso haa náádáácha.
35 Áádóó diné tʼáá ałtso éí David adooyı̨́ı̨́ł danízingo tʼah nízaad azʼą́ągo yaa yíkai; nítʼééʼ David ádee hadoodzíiʼgo ádííniid, Diyin God yeeʼ átíshidoolííł áádóó tʼah yówehígi átʼéego ákóshidoolííł; tʼáadoo eʼeʼaahí bááh, doodaiiʼ tʼáadoo leʼé łaʼ yíyą́ąʼgo ákóshidoolííł.
36 Áko diné tʼáá ałtso yaa ákodaniizı̨́įʼgo bił yáʼádaatʼééh. Ákótʼéego aláahgo naatʼáanii áátʼįįdígíí tʼáá átʼé diné tʼáá ałtso bił yáʼádaatʼééh.
37 Áko diné tʼáá ałtso áádóó Ízrel dineʼé tʼáá ałtso akʼidadiʼyiitįįhgo éí Ner biyeʼ Ábner biʼdiisyı̨́ yę́ędą́ą́ʼ aláahgo naatʼáanii doo bíniikʼehgo áhoodzaa da lá.
38 Áádóó aláahgo naatʼáanii bá nidaalʼaʼí áyidííniid, Daʼ díísh tʼáadoo baa ákodanoozı̨́įʼ da? Naatʼáanii ayóó átʼéii índa diné aláahgo átʼéii Ízrel dineʼé bitahgi daaztsą́.
39 Áádóó díí jı̨́ yeeʼ doo shidziil da. Azhą́ aláahgo naatʼáanii nishłı̨́į doo biniyé akʼah bee alzı̨́įhii shikʼi yaadziid nidi ákóníshtʼé. Díí diné éí Zerowáíyah biyáázhké danilı̨́įgo nantłʼaígi shitsʼą́ą́ʼ ádaatʼı̨́. Éí doo yáʼáshǫ́ǫ́góó ájíítʼįįdígíí hadoo yáʼáshǫʼ bikʼehgo Bóhólníihii kʼééhodidoodlííł.
Footnotes
^ Ish-bósheth éí Ábner yikʼi hodiiʼą́ągo ání, Aláahgo naatʼáanii íʼdiinilyaa.
