2 Samuel 4:1-12
4 Áádóó Saul yę́ę biyeʼ Ish-bósheth éí Hííbran kin haalʼáadi Ábner daaztsą́ągo yiyííniiʼgo tʼóó bił áhásdįįd áádóó Ízrel dineʼé tʼáá ałtso niseekai.
2 Saul yę́ę biyeʼ éí diné naaki bá naalʼaʼgo siláo binanitʼaʼí nilı̨́: łaʼ Béíyanah wolyé, náánáłaʼígíí éí Rííkab wolyé, tʼáá áłah Ríman biyeʼ nilı̨́įgo Biyérath kin shijaaʼdóó Bénjamin dineʼé nilı̨́. (Jó, Biyérath kin shijaaʼígíí Bénjamin dineʼé bííʼ átʼé,
3 áádóó Biyérathdóó dineʼé éí Gíteiyimgóó adahineezhchą́ą́ʼ, áko áadi díí jı̨́ı̨́góó tʼóó átsééd kéédahatʼı̨́.)
4 Jánathan yę́ę biyeʼ éí Saul yę́ę binálí kótʼéego nazhniłhod dzizlı̨́ı̨́ʼ: ashdlaʼ honááhaigo Jézriyel kin haalʼáádę́ę́ʼ Saul áádóó Jánathan yę́ę baa hóóneʼgo asdzání haa áhályánígíí dah hodiiłtı̨́įgo hoł dínéezhchą́ą́ʼ; íídą́ą́ʼ tsı̨́įłgo noochéełgo nahóółtʼeʼgo bitsʼą́ą́dóó nazhniłhod dzizlı̨́ı̨́ʼ. Éí Miifíbosheth joolyé.
5 Áádóó Biyérath kin shijaaʼdóó Ríman biyeʼké Rííkab áádóó Béíyanah dah diiʼáazhgo hadoh dah nídínoʼgo Ish-bósheth bighangi jiníʼáázh; ałníʼníʼą́ągo bitsáskʼeh yikááʼ hanályı̨́ı̨́h lá.
6 Nítʼééʼ tłʼoh naadą́ą́ʼ bąąh hashtʼelyaaígíí nízhdidoołtsos áhozhdilʼı̨́įgo yah ajííʼáázh, áádóó hátsą́ą́ʼ biyei góneʼ diltłish hagháinísiʼgo Rííkab áádóó bitsilí Béíyanah dah ahidíníilchą́ą́ʼ.
7 Jó, íídą́ą́ʼ jinitéhí góneʼ hatsáskʼeh bikááʼ dziztı̨́įgo hoł yah ííʼáazhgo diltłish hagháinísiʼgo hwiisxı̨́, áko hazéidíígizhgo hatsiitsʼiin dah yidiiʼą́ áádóó halgaigóó tłʼééʼ bíighah yiʼashgo yiską́.
8 Áádóó Ish-bósheth yę́ę bitsiitsʼiin éí Hííbran kin haalʼáagi aláahgo naatʼáanii David yeiníʼą́ągo áyidííniid, Shoo, niʼanaʼí Saul yę́ę éí niʼniiłhı̨́ yę́ę biyeʼ Ish-bósheth kǫ́ǫ́ bitsiitsʼiin. Saul yę́ę áádóó baʼáłchíní éí Bóhólníihii díí jı̨́ aláahgo naatʼáanii bóhonishníihii yá kʼéidiidlaa.
9 Áádóó David éí Rííkab áádóó bitsilí Béíyanah Biyérathdóó Ríman biyeʼké yichʼįʼ haadzíiʼgo áyidííniid, Tsʼídá tʼáá aaníí Bóhólníihii hiná; bí éí achʼįʼ nahwiiʼná bitsʼą́ąjįʼ shiiʼ sizíinii nááyiisniiʼ.
10 Íídą́ą́ʼ łaʼ shił hojoolneʼgo ájíní, Shoo, Saul yę́ę dadziztsą́; éí haneʼ baa hoł hózhǫ́ǫ doo nízingo shił hojoolneʼ, nidi tsʼídá tʼáá aaníí hąąh dah níshjı̨́įdgo Zíklag kin haalʼáagi hoséłhı̨́. Éí hoł hweeshneʼgo bikʼé shichʼįʼ niʼdoolééł, shijóʼníí nítʼééʼ.
11 Tʼah nááyówehígi átʼéego diné doo yáʼáshóonii éí diné tʼáá ákogi átʼéii bighan góneʼ bitsáskʼeh bikáaʼgi yiyiisxı̨́įgo tsʼídá tʼáá aaníí diné soołhínígíí bidił biniinaa kʼéénihidideeshdlíiłgo nihokááʼdóó nahjįʼ kónihideeshłííł.
12 Nítʼééʼ David tsíłkéí bá nidaalʼaʼígíí hachʼįʼ yiyííłʼaadgo nidahastseedgo hálaʼ áádóó hakeeʼ dayiizhgizhgo Hííbran kin haalʼáagi tó siyínígíí bíighahgi dah deidiyiinil. Nidi Ish-bósheth bitsiitsʼiin dah deidiiʼą́ągo Hííbrangi tséníʼootséél góneʼ Ábner yóóʼábiʼdiilyaa yę́ę góneʼ adeizʼą́.
