2 Samuel 5:1-25
5 Nítʼééʼ Ízrel dineʼé tʼáá ałtso Hííbran kin haalʼáajįʼ David yaa haaskaigo yádaałtiʼgo kódeidííniid, Shoo, nitsʼin áádóó nitsʼíís daniidlı̨́įgo nikʼéí niidlı̨́.
2 Hoolzhiizhdę́ę́ʼ Saul aláahgo nihinanitʼaʼí nilı̨́ yę́ędą́ą́ʼ, ni lą́ą Ízrel dineʼé niidlíinii dah nihidiniʼeezh áádóó yah anánihííníʼeezh, áádóó Bóhólníihii ándííniid, Shidineʼé Ízrel baʼíłtsoʼ índa Ízrel dineʼé aláahgo binanitʼaʼí nílı̨́į doo.
3 Áko Ízrel dineʼé aląąjįʼ naazíinii tʼáá ałtso Hííbran kin haalʼáadi aláahgo naatʼáanii yaa haaskai, áádóó Hííbran hoolyéedi Bóhólníihii binááł aláahgo naatʼáanii David yił ahadaʼdeestʼą́, índa aláahgo naatʼáanii David éí Ízrel dineʼé binanitʼaʼí dooleeł biniyé akʼah yikʼi yadeiyiiziidgo dayíísı̨́ı̨́ʼ.
4 David tádiin honááhaigo aláahgo naatʼáanii dzizlı̨́ı̨́ʼ, áádóó dízdiin nááhaijįʼ aláahgo naatʼáanii jílı̨́ı̨́ nítʼééʼ.
5 Hííbran kin haalʼáagi tsostsʼid nááhaidóó hastą́ą́h nídeezidjįʼ Júdah dineʼé binanitʼaʼí jílı̨́ı̨́ʼ nítʼééʼ índa Jerúsalem kin haalʼáagi Ízrel dineʼé áádóó Júdah dineʼé tʼáá ałtso tádiindóó baʼaan tááʼ nááhaijįʼ binanitʼaʼí jílı̨́ı̨́ nítʼééʼ.
David éí bidziilgo hazʼą́ągi Záíyan hoolyéii yikʼeh deesdlı̨́ı̨́ʼ (1Chr. 11:4-9)
6 Áádóó aláahgo naatʼáanii bisiláo yił Jerúsalem kin haalʼáagi Jííbas dineʼé éí kéyah yiiʼ kéédahatʼínígíí baa jíkai; éí David yichʼįʼ yádaałtiʼgo ádeidííniid, Doo daʼ ooʼíinii áádóó nidaʼniłhodii doo nahjįʼ biʼííníłniiʼgóó doo kojįʼ yah adíínéeł da. Éí David yah azhdoonéłígíí doo bízhneelʼą́ą da, dahóʼní.
7 Azhą́ ákótʼée nidi David éí Záíyan yee ayóó ábóodziilii yisná, áko tʼáá éí David bikin haalʼá silı̨́ı̨́ʼ.
8 Áádóó íídą́ą́ʼ David ádííniid, Tʼáá háiida dził biiʼ hahodiidzą́ą́ góde hadzisʼnaʼgo Jííbas dineʼé áádóó nidaʼniłhodii índa doo daʼooʼíinii atízhdoolíiłgo éí David hakʼee diniihii ádajitʼı̨́. Éí bąągo łaʼ ádaaní, Doo daʼooʼíinii índa nidaʼniłhodii kin góneʼ doo yah adoogáał da.
9 Áko David éí bidziilgo hazʼánígi kééhojitʼı̨́, áádóó David bikin haalʼá hoolyée doo, dííniid. Áko David éí Míllo hazʼánídóó dah adiitłʼingo tʼáá kin haalʼáá nítʼééʼ yináʼáztłʼin.
10 Áádóó David bidziilgo bił hooʼaʼ, índa tʼáá ałtsoní bee Bóhólníihii Diyin God bił hólǫ́.
Háíram éí David yaʼólí (1Chr. 14:1,2)
11 Táirdóó aláahgo naatʼáanii Háíram éí David yichʼįʼ naalʼaʼí ayiisʼaʼgo kin ádeiłʼíinii áádóó tsé deitłʼinii éí dilkʼis tsin yił ayiisʼaʼgo David yá kin ádayiilaa.
12 Áádóó David díí baa ákozniizı̨́ı̨́ʼ: Bóhólníihii éí Ízrel dineʼé aláahgo binanitʼaʼí jílı̨́įgo chánah áhoolaa índa hadineʼé Ízrel bá bee hóhólníihgo bił hazʼáanii ayóó átʼéego áyiilaa.
David baʼáłchíní éí Jerúsalem kin haalʼáagi dabiʼdizhchı̨́ (1Chr. 3:5-9; 14:3-7)
13 David éí Hííbran kin haalʼáádę́ę́ʼ níjíʼnáádóó bikʼijįʼ Jérusalem kin haalʼáajįʼ jiníyáago hweʼasdzą́ą́ jíłʼíní índa hweʼasdzą́ą́ łaʼ nínáájiisdlááʼ; ákweʼé hayeʼké índa hatsiʼké há nidayiishchı̨́.
14 Áádóó díí éí Jerúsalemgi há neheezhchínígíí kódaolyé: Shamúwa, Shóbab, Néíthan, Sálaman,
15 Íbhar, Iilíshuwa, Níífeg, Jafáíya,
16 Iilíshama, Iiláíyada índa Iilífalet daolyé.
David éí Filístiya dineʼé yikʼeh deesdlı̨́ı̨́ʼ (1Chr. 14:8-17)
17 Áko Filístiya dineʼé éí Ízrel dineʼé yinanitʼaʼí nilı̨́į doo biniyé David akʼah bikʼi yaadziidgo bee biʼdoolzı̨́įʼgo yaa dahodiiztsʼą́ąʼgo Filístiya dineʼé tʼáá ałtso David hadeintáá góde aheeskai; éí David yiyííniiʼgo bidziilgo hazʼání góyaa ííyá.
18 Filístiya dineʼé neheeskaigo Réfeiyim honítsʼaaʼ góyaa tʼáá níłtéél nítʼééʼ nidahaazná.
19 Áádóó David éí Bóhólníihii áyidííniidgo ání, Daʼ Filístiya dineʼéésh bichʼįʼ deeshbah? Daʼ shílákʼee didííʼááłísh? Áko Bóhólníihii éí David áyidííniid, Ákóde bichʼįʼ díbááh, háálá doo naaki nilı̨́ı̨́góó Filístiya dineʼé nílákʼee dideeshʼááł.
20 Áko David éí Béíyal-piiréízim hazʼáníjįʼ jiníyáago ákwii David akʼeh deesdlı̨́ı̨́ʼ. David ání, Bóhólníihii shinááł shiʼanaʼí ałtso íísdįįd; tó hoł naʼneeshxaazhígi áhoolaa; éí bąą Béíyal-piiréízim hoolyée doo, jidííniid.*
21 Ákwii biʼedaʼalyaii yikʼi daneezhchą́ą́ʼ, áko David áádóó diné yił naakaígíí éí edaʼalyaii adeideeskʼą́ą́ʼ.
22 Áádóó Filístiya dineʼé nináádahaasnáago Réfeiyim honítsʼaaʼ góyaa tʼáá níłtéél nítʼééʼ nináádahaazná.
23 David éí Bóhólníihii ánááyidooʼniidgo ábidííniid, Doo tʼáá kʼéhézdon bichʼįʼ dííbah da, nidi bineʼjígo adíníítʼı̨́įłgo tsin múlberri wolyéii yílʼáhígíí binaashiijí yídííbah.
24 Áádóó siláo yinééł yistsʼą́ąʼgo tsin múlberri yílʼáhígíí bílátahgóó biiʼ hodiistsʼą́ąʼgo bikééʼ hidoohkah, áko Bóhólníihii nihilą́ąjįʼ hooleełgo Filístiya bisiláo yinéełii neidoołtsił.
25 Áádóó David éí tʼáá ákóʼjiilaa Bóhólníihii hachʼįʼ yee haadzíʼígi átʼéego éí Gííba kin shijaaʼdóó níléí Gíízer kin haalʼáajįʼ Filístiya siláo dazníłtseed.
Footnotes
^ Béíyal-piiréízim jiníigo éí Hííbrew kʼehjígo tó naʼneeshxaazhí yee bóhólníihii jiníigo óolyé.
