2 Samuel 6:1-23
6 Nááʼáłdóʼ David éí Ízrel dineʼé bitah haasdláʼígíí tádiindi míilgo áłah ájiilaa.
2 Áko David nízhdiiʼnaʼgo Júdah kéyahgi Béíyal kin shijaaʼdóó diné hoł naakaígíí tʼáá ałtso bił dashdiikai; áádę́ę́ʼ Diyin God bitsitsʼaaʼ dílzinii nídazhdooʼááł biniyé ádajitʼı̨́; éí diyingo naalʼaʼí chérabim wolyéii ałchʼįʼ sizínígíí bidejí hólǫ́ǫgo éí tsitsʼaaʼ tʼáá ałtsoní bee Bóhólníihii bízhiʼ bee biʼdójí.
3 Áko Diyin God bitsitsʼaaʼ dílzinii éí tsinaabąąs naadlózígíí ániidígíí yikááʼ dah deizʼą́; éí Abínadab bikindóó chʼídeizʼą́; Gíbiyah kin haalʼáagi kééhatʼı̨́įgo Abínadab biyeʼké Ázah índa Aháíyo éí tsinaabąąs naadlózígíí ániidígíí dah yidiilóóz.
4 Gíbiyah kin haalʼáagi Abínadab bikindóó Diyin God bitsitsʼaaʼ dílzinii chʼídeizʼą́ągo nihideizʼą́, áádóó Aháíyo éí yilą́ąjįʼ yigááł.
5 Áádóó David índa Ízrel dineʼé tʼáá ałtso yił nidaanéego chʼó tsin bee sin yee nidaanéii ałʼąą átʼéego álʼíinii ádaalyaii, éí tsin tłʼóół naakitsʼáadah bąąh daneelzheeʼgo bee nidaʼaʼnéii, tsin tłʼóół neeznáá bąąh daneelzheeʼgo bee nidaʼaʼnéii, ásaaʼ yilghaałí, béésh yigádígíí índa béésh ahídíʼniłgo diitsʼaʼii bee Bóhólníihii binááł nidadzizneʼ.
6 Áádóó Néíkan bitłʼoh naadą́ą́ʼ habínáʼálʼisígi jíkaigo Ázah kʼídeeshchidgo Diyin God bitsitsʼaaʼ dílzinii yisił, háálá béégashii yee oołbąsii kʼasdą́ą́ʼ deezgoʼ.
7 Áko Bóhólníihii éí Ázah yichʼįʼ báhóóchįįdgo adzisiihígíí biniinaa Diyin God atíhoolaago Diyin God bitsitsʼaaʼ dílzinii bíighahgi dadziztsą́.
8 Áádóó David éí doo hoł yáʼátʼéeh da, háálá Bóhólníihii éí Ázah atíyiilaa, áádóó ákwii Píírez-ázah hoolyée doo, dííniidgo díí jı̨́ı̨́góó ákóhoolyé.
9 Nítʼééʼ éí bijı̨́ David éí Bóhólníihii béédzíldzid, áádóó ájíní, Haʼátʼéegoshąʼ Bóhólníihii bitsitsʼaaʼ dílzinii shaa dootʼááł?
10 Áko David éí Bóhólníihii bitsitsʼaaʼ dílzinii David bikin haalʼáajįʼ doo dootʼáał da nízin, nidi David bíniikʼehgo Gathdóó dineʼé Óbed-íídam bighanjįʼ yítʼą́.
11 Áádóó Bóhólníihii bitsitsʼaaʼ dílzinii Gathdóó dineʼé Óbed-íídam bighangi siʼą́ągo tááʼ nídeezid; Bóhólníihii éí Óbed-íídam áádóó bighandóó danilíinii yikʼijisdliʼ.
Tsitsʼaaʼ dílzinii Jerúsalemjįʼ nátʼą́ (1Chr. 15:1-16:6)
12 Áádóó aláahgo naatʼáanii David bił hóóneʼgo áhodooʼniid, Bóhólníihii éí Óbed-íídam bighandóó danilíinii áádóó bídadéétʼiʼii tʼáá ałtso yikʼijisdliʼ, háálá Diyin God bitsitsʼaaʼ dílzinii baʼałkʼee siʼą́ą́ nítʼééʼ, áko David ákǫ́ǫ́ jiníyáago hániikʼehgo Diyin God bitsitsʼaaʼ dílzinii Óbed-íídam bikindóó chʼídeizʼą́ągo David bikin haalʼáajįʼ nátʼą́ągo yaa bił nihoozhǫǫh.
13 Ákódzaago Bóhólníihii bitsitsʼaaʼ dílzinii hastą́ą́h adéesʼeezjįʼ nideizʼą́ągo hániikʼehgo ákwii béégashii índa béégashii yáázh daneeskʼahii náádahaazniiʼ.
14 Nítʼééʼ David éí dziilí bee Bóhólníihii bidááhdóó ajoolzhiizh; naʼatʼą́hí łigaii ditsʼidígíí bee ályaaígíí íífad wolyéii biiʼ dziztı̨́.
15 Áko David áádóó Ízrel dineʼé tʼáá ałtso éí Bóhólníihii bitsitsʼaaʼ dílzinii nídeiyíʼaahgo dadilwosh áádóó deenástsʼaaʼ bideeʼ bee íʼdílzoołí yee nidaané.
16 Áádóó Bóhólníihii bitsitsʼaaʼ dílzinii éí David bikin haalʼáajįʼ dajíʼaahgo, Saul yę́ę bitsiʼ Máíkal tsésǫʼdóó déezʼı̨́įʼgo aláahgo naatʼáanii David éí Bóhólníihii binááł yááhiichahgo índa alzhishgo yiyiiłtsą́ągo yiʼı̨́įgo tsídeezkééz.
17 Áádóó Bóhólníihii bitsitsʼaaʼ dílzinii nídeizʼą́ągo David éí níbaal biiʼ hodílzinii niiníʼání góneʼ ninátʼáhígi nideizʼą́, áko David éí didlidgo nááhániihii índa hózhǫ́ǫ́jí nááhániihii Bóhólníihii yichʼįʼ nááyiisniiʼ.
18 Áádóó David éí didlidgo nááhániihii índa hózhǫ́ǫ́jí nááhániihii ałtso náájiisniiʼgo tʼáá ałtsoní bee Bóhólníihii bízhiʼ binahjįʼ diné yikʼijisdliʼ.
19 Áádóó diné tʼáá ałtso bitahgóó éí Ízrel dineʼé tʼáá yílʼáá nítʼééʼ asdzání índa hastóí tʼáá bił bitaa jigháago tʼááłáʼí nítínígo łeesʼáán áádóó déit wolyéii bineestʼąʼ ahídiiłjéeʼii índa chʼil naʼatłʼoʼii bineestʼąʼ ahídiiłjéeʼii bitaa dzizniiʼ, áko diné tʼáá ałtso tʼááłáʼí nítínígo dabighangóó anídahaaskai.
20 Nítʼééʼ David haʼáłchíní bikʼiizhdoodliił biniyé dah nízdiidzá. Áko Saul yę́ę bitsiʼ Máíkal éí David yidááh yílwodgo ííłní, Dooládóʼ ayói da, Ízrel dineʼé aláahgo binanitʼaʼí díí jı̨́ tʼáadoo yą́ą́h nilíinii yaa naagháago bá nidaalʼaʼí bichʼikéí nidaalʼaʼí díísh jı̨́ dabinééłʼı̨́ı̨́ʼ; diné doo ílíinii łaʼ tʼáadoo bił baa yáhásinígóó tʼáadoo yą́ą́h nilíinii yaa naayáiigi áhoodzaa.
21 Áádóó David éí Máíkal ábizhdííniid, Éíyeeʼ Bóhólníihii binááł eeshzhiizhgo éí nizhéʼé yę́ę áádóó baʼáłchíní bítséedi Bóhólníihii bidineʼé Ízrel wolyéii binanitʼaʼí nishłı̨́į doo biniyé yá siisįʼ; éí bąą Bóhólníihii binááł naashnée doo.
22 Áádóó díí tʼah biláhígo doo bą́ą́h anishłíinii baa naasháa doo, áádóó tʼáá shí hózhǫ́ aʼohgo ádííʼníszin ádiʼdeeshnííł, índa chʼikéí nidaalʼaʼí baa yáníłtiʼ yę́ę áníshtʼéii bił danilı̨́į doo.
23 Éí bąą Saul yę́ę bitsiʼ Máíkal tʼáadoo haʼáłchíní haleehí dadziztsą́.
