2 Samuel 7:1-29
7 Ákódaadzaadóó aláahgo naatʼáanii bighan góneʼ sidáago, áádóó Bóhólníihii éí háájílyı̨́ı̨́h áhoolaago hweʼanaʼí tʼáá ałtso yitsʼąą haa jéʼólná.
2 Áko aláahgo naatʼáanii éí Diyin God yá halneʼii Néíthan áyidííniid, Shoo, kʼad dilkʼis bee kin ályaii biiʼ kééhashtʼı̨́, nidi Diyin God bitsitsʼaaʼ dílzinii éí dáádiníbaal bineʼjí siʼą́.
3 Áádóó Néíthan éí aláahgo naatʼáanii áyidííniid, Nílááh, baa nitsíníkeesígíí tʼáá átʼé ánílééh; jó, Bóhólníihii nił hólǫ́.
4 Ákódzaago éí bitłʼééʼ Bóhólníihii tʼáá bí bizaad yee Néíthan kwíidííniid,
5 Nílááh, shá naalʼaʼí David kóbidiní, Bóhólníihii kóníłní, Kin biiʼ shighan dooleełígíísh tʼáá shá ádíílííł?
6 Jó, Ízrel dineʼé Ííjip kéyahdę́ę́ʼ háíʼeezhdóó wóshdę́ę́ʼ díí jı̨́įjįʼ doo kin biiʼ kééhashtʼı̨́į da; tʼáá hazhóʼó níbaal tʼéiyá biiʼ honishłǫ́.
7 Tʼáá ałtsogóó Ízrel dineʼé tʼáá ałtso bił honishłǫ́ǫgo Ízrel dineʼé łaʼ saad bee bichʼįʼ yáshtiʼgo, Shidineʼé badaʼołtsoʼ, tʼáásh bidííniid, Haitʼéegoshąʼ dilkʼis bee kin ályaii doo łaʼ shá ádaohłéeh da?
8 Éí bąą kʼad shá naalʼaʼí David kóbididííniił, Tʼáá ałtsoní bee Bóhólníihii kóníłní, Dibé bighandóó índa dibé bikééʼ nanináádóó nándiiłtı̨́įgo shidineʼé Ízrel binanitʼaʼí nílı̨́į doo.
9 Áádóó nił honishłǫ́ǫgo tʼáá ałtsogóó tádííníyá, áádóó niʼanaʼí danilíinii ninááł ásíłdįįd. Índa yízhí ayóó átʼéii ná ádeeshłííł; éí nahasdzáán bikáaʼgi diné ayóó ádaatʼéii yízhí bee dabiʼdójíhígíí nahalin.
10 Áádóó ałdóʼ shidineʼé Ízrel bá náhodideeshʼáałgo ákwii kʼihodideeshłééł, áko tʼáá bí bikéyahgi kéédahatʼı̨́į doo, índa doo nahjįʼ kónáádabidiʼdoolníił da, áádóó ałkʼidą́ą́ʼ doo yáʼáshóonii baʼáłchíní atídahałʼı̨́ı̨́ nítʼééʼ yę́ę doo ákónáádahodoodlíił da.
11 Ándahodiyiiʼaahii, Shidineʼé bindanohtʼáa doo, bidííniid yę́ędóó ákódaatʼı̨́ı̨́ nítʼééʼ. Nidi háánílyı̨́ı̨́h ániishłaago niʼanaʼí tʼáá ałtso bitsʼąą naa jéʼóshnáá nítʼééʼ. Áádóó ałdóʼ Bóhólníihii áníłní, Naʼáłchíní náás ahoolchíiłii ádeeshłííł.
12 Áko níyoołkáłígíí bíighah azlı̨́įʼgo danizhéʼé yę́ę bił daʼíłhoshgo, nikééʼdóó náás oołchíił dooígíí yizhchı̨́įgo nantʼáago ádeeshłííł, áádóó aláahgo bee bóhólníihgo bił hazʼą́ą dooleełii chánah ádeeshłííł.
13 Éí kin íidoolíiłgo biiʼ shízhiʼ baa haʼniih doo áádóó bibikááʼdóó nahatʼáii chánah áshłaago ahoolʼáa doo.
14 Bizhéʼé nishłı̨́į doo, áádóó bí shiyeʼ nilı̨́į doo. Doo ákwii áátʼįįdgóó diné bitsihał bee nídínéeshxał áádóó dineʼé bibee atsxis bee nídínéestsxis.
15 Nidi bee aa aʼááh nisinii doo tʼáá kʼad bitsʼą́ąjįʼ kwíishłaa da; Saul yę́ę éí bitsʼą́ąjįʼ kwíishłaago ninááł nahjįʼ kóhooshłaa yę́ęgi átʼéego bí doo ákódeeshłíił da.
16 Áádóó naʼáłchíní náás ahoolchíłígíí índa bee níhólníihgo bił hazʼáanii ninááł chánah áshłaago ahoolʼáa doo, índa bikááʼdóó hóóʼáałii chánah áshłaago ahoolʼáa doo.
17 Áko díí saadígíí tʼáá ałtso bikʼehgo, áádóó ił áhoodzaaígíí tʼáá ałtso bikʼehgo Néíthan éí David yichʼįʼ yee hahasdzííʼ.
18 Áádóó aláahgo naatʼáanii David yah ííyáago Bóhólníihii hólónígi neezdáago ádííniid, Haʼátʼíísh nishłı̨́, Bóhólníihii Diyin God nílíinii? Shighandóó danilíinii haʼátʼíísh danilı̨́įgo bąą kónízahjįʼ shił nííníʼáázh?
19 Bóhólníihii Diyin God nílíinii, dííyeeʼ nináałgo tʼįįhdígoígíí átʼé, nidi ná naalʼaʼí bighandóó danilíinii náás ahididoolchíłígíí náás hodeeshzhiizhgóó bá bee háínídzííʼ, Daʼ díísh diné bibee éʼélʼįʼ bikʼehgo átʼé, Bóhólníihii Diyin God nílíinii?
20 David haʼátʼíísh ałdóʼ nándidooʼniił? Jó, Bóhólníihii Diyin God nílíinii, ná naalʼaʼí bééhonísin.
21 Nizaadígíí binahjįʼ áádóó nijéí bee íinínízinígíí bikʼehgo díí ayóó átʼéego ídaʼiinilaaígíí bee ná naalʼaʼí bił ííshją́ą́ áhwiinilaa.
22 Éí bąą ayóó átʼéii nílı̨́, Bóhólníihii Diyin God nílíinii; jó, doo łaʼ nigi átʼée da, doodaiiʼ tʼáá ni tʼéiyá Diyin God nílı̨́; tʼáá átʼé deísíníiltsʼą́ʼígíí bikʼehgo ni tʼéiyá ayóó átʼéii nílı̨́.
23 Nahasdzáán bikáaʼgi háí dineʼé nilíinii tʼáá nidineʼé Ízrel nilíinii nahalin? Éí Diyin God bidineʼé dooleeł biniyé ádá tʼą́ą́ʼ nááyiisniiʼ, áko yízhí bee bééhoʼdílzinii íidoolííł, áádóó ayóó átʼéego índa tʼóó báhádzidgo ídaʼiinilaaígíí nikéyahgi nidineʼé binááł ádíílííł biniyé Ííjip dineʼé áádóó ałʼąą dineʼé índa bidiyin dabidiʼníinii bitsʼą́ąjįʼ tʼą́ą́ʼ nááhíníłniiʼ.
24 Jó, tʼáá ni nidineʼé Ízrel chánah ádá íinilaago tʼáá ni nidineʼé danilı̨́įgo ahóyéelʼáa doo, áádóó ni Bóhólníihii nílíinii, bí biDiyin God sínílı̨́ı̨́ʼ.
25 Áádóó kʼad, Bóhólníihii Diyin God nílíinii, saad bee háínídzíiʼii ná naalʼaʼí bídéétʼiʼgo índa bighandóó danilíinii bídéétʼiʼgo ádííníniid yę́ę chánah íínísingo ahóyéelʼáa doo; ádííníniidígi átʼéego ánílééh.
26 Áko hániʼdii nízhiʼ baa haʼniihgo ahóyéelʼáa doo, daaníigo tʼáá ałtsoní bee Bóhólníihii éí Ízrel dineʼé biDiyin God nilı̨́, áádóó bíniʼdii ná naalʼaʼí David baʼáłchíní náás ahoolchíiłii chánahgo nantʼáago níníłʼı̨́į doo.
27 Jó, ni tʼáá ałtsoní bee Bóhólníihii, Ízrel dineʼé biDiyin God nílíinii, ná naalʼaʼí nishłíinii díí shichʼįʼ yitʼíní íinilaago áshidiní, Naʼáłchíní náás ahoolchíiłgo ádeeshłíiłgo nantʼáa doo. Éí bąą ná naalʼaʼí nishłíinii éí baa ákoniizı̨́įʼgo díí sodizin bee nichʼįʼ sodeeszin.
28 Áádóó kʼad, Bóhólníihii Diyin God, ni tʼéí Diyin God nílı̨́, áádóó nizaad éí tʼáá aaníí índa ná naalʼaʼí nishłíinii díí tsʼídá yáʼátʼéehii shá ádíílíiłgo shichʼįʼ háínídzííʼ.
29 Éí bąą kʼad bíniʼdii ná naalʼaʼí nił hóshǫ́ǫgo baʼáłchíní náás ahoolchíiłii bikʼijiinídliih, áko ninááł naaldeehgo ahóyéelʼáa doo; jó, ni Bóhólníihii Diyin God nílíinii, díí baa yáníłtiʼ, áádóó nibee akʼihojidlíii ná naalʼaʼí baʼáłchíní náás ahoolchíiłii bee bikʼihojidlíigo ahóyéelʼáa doo.
