2 Samuel 8:1-18
8 Áádóó díí bikʼijįʼ David éí Filístiya dineʼé yikʼeh deesdlı̨́įʼgo yee ádíhoosʼnííʼ índa David éí Míítheg-ámah hoolyéego Filístiya dineʼé bikin haalʼáhígíí yighaideetʼą́.
2 Áádóó Móʼab dineʼé yikʼeh deesdlı̨́įʼgo tłʼóół yee yíʼnééłʼąądgo niʼgóó yineeshjééʼ, áko naaki hadiitʼiʼígíí neistseed; tʼááłáʼí hadiitʼiʼígíí ánéísįįdgo tʼáá dahináago áyiilaa. Áádóó Móʼab dineʼé éí David yá nidaalʼaʼí daazlı̨́ı̨́ʼ, áko yichʼįʼ nidaʼiilé.
3 Kótʼéego David éí Rííhob biyeʼ Hadadíízer bikʼeh jideesdlı̨́ı̨́ʼ; éí Zóbah kéyahgi aláahgo naatʼáanii nilı̨́ı̨́ nítʼééʼ; hasiláo bił joonéełgo Yufréítiiz tooh nílíníjįʼ chánahgo bee ádíhwííníshníih doo jinízin.
4 Áko David éí Hadadíízer bitsindaabąąs bijáád naakiígíí tʼááłáhídi mííl áádóó siláo łı̨́ı̨́ʼ yee nidaabaahígíí tsostsʼidi neeznádiin índa siláo tʼáá niʼ nidaanéhígíí naadiindi mííl yisná, áádóó łı̨́ı̨́ʼ éí tsindaabąąs bijáád naakiígíí nideiłbąąsígíí tʼáá átʼé bitsátsʼid jiizhgizh, nidi łı̨́ı̨́ʼ neeznádiingo oołbąs bíighahgo áá jísįįd.
5 Áádóó Damáskas kin haalʼáádóó Síriya dineʼé éí Zóbah kéyahgi aláahgo naatʼáanii Hadadíízer yíká iijeeh yiniyé yinéełgo David éí Síriya dineʼé bisiláo naadiin naakidi mííl yinéłígíí neistseed.
6 Áko Síriya kéyah hahoodzogi Damáskas kin haalʼáágóó David éí hasiláo hadaʼídéesʼı̨́įʼii nijiiznil áádóó Síriya dineʼé éí David yá nidaalʼaʼí daazlı̨́įʼgo yichʼįʼ nidaʼiilé. Áádóó Bóhólníihii éí David tʼáá hizhdighááhgóó akʼeh hizhdidleehgo áhósin.
7 Áádóó David éí óola naagé bineʼ naʼadziʼii éí Hadadíízer bá nidaalʼaʼí ałtso íísdįįdígíí yílákʼee hayiiznil, áádóó Jerúsalemgóó yiníjaaʼ.
8 Bíítah hoolyéego índa Biiróthai hoolyéego Hadadíízer bikin haalʼáá nítʼéʼédę́ę́ʼ aláahgo naatʼáanii David éí béésh łitsoii tʼóó ahayóí néiníjaaʼ.
9 Héímathdóó aláahgo naatʼáanii Tówii wolyéii éí Hadadíízer bisiláo dah deínéhígíí ałtso David áhásdįįdgo yaa hodiiztsʼą́ą́ʼ.
10 Ákohgo Tówii hayeʼ Jóram dashdiiłʼaʼ, áko aláahgo naatʼáanii David kʼé yididooniił áádóó nizhónígi íinidzaa yididooniił jinízin, háálá David éí Hadadíízer yił anaʼahishchı̨́įgo yikʼeh deesdlı̨́ı̨́ʼ. Jó, Hadadíízer éí Tówii yił anaaʼ ahilʼı̨́ı̨́ nítʼééʼ. Jóram éí béésh łigaii áádóó óola índa béésh łitsoii bee łeetsʼaaʼ ádaalyaii yiníjaaʼ.
11 Áko aláahgo naatʼáanii David éí Bóhólníihii yichʼįʼ diyingo niidiníʼáanii ałʼąą anaʼí yikʼeh deesdlı̨́ʼígíí bitsʼą́ą́dóó béésh łigaii índa óola tʼáá íídą́ą́ʼ diyingo niidiníʼánígíí éí yíjaaʼ yę́ę yíyiyiiłtsoodgo diyingo niidiníʼą́.
12 Síriya dineʼé, Moʼab dineʼé, Áman dineʼé, Filístiya dineʼé, Ámalek dineʼé índa Rííhob biyeʼ Hadadíízer éí Zóbah kéyahgi aláahgo naatʼáanii yikʼeh deesdlı̨́ı̨́ʼ yę́ę bindaalyeʼé diyingo niidiníʼą́.
13 Áádóó Áshįįh Bił Honítsʼaaʼ góyaa Síriya dineʼé bisiláo bikʼeh jideesdlı̨́ʼígíí bee David hoʼdójíigo chʼíhoʼditʼááh dzizlı̨́ı̨́ʼ éí tseebíítsʼáadahdi míilgo diné ádzísdįįd.
14 Íídam kéyahgi siláo hadaʼídéesʼı̨́įʼii nijiiznil; tʼáá éí Íídam kéyahgi tʼáá ałtsogóó siláo hadaʼídéesʼı̨́įʼgo ájiilaa, áko Íídamgi kéédahatʼíinii tʼáá ałtso David yá nidaalʼaʼí daazlı̨́ı̨́ʼ. Áádóó Bóhólníihii éí David tʼáá hizhdighááhgóó akʼeh hizhdidleehgo áhósin.
David bá nidantʼáii (2Sam. 20:23-26; 1Chr. 18:14-17)
15 Nítʼééʼ David éí Ízrel dineʼé tʼáá ałtso yinantʼá, áko David éí tsʼídá doo haada yitʼéégóó áádóó tʼáá ákogi átʼéego bidineʼé tʼáá ałtso yá hooʼááł nítʼééʼ.
16 Áádóó Zerowáíyah biyáázh Jóʼab éí siláo dah deínéehii yinantʼá, áádóó Aháílad biyeʼ Jiiháshafat éí naatʼáaniishchíín nilı̨́ı̨́ nítʼééʼ.
17 Áádóó Aháítab biyeʼ Zéídak índa Abáíyathar biyeʼ Ahímelek éí nááʼiiłniihii nilı̨́ı̨́ nítʼééʼ, Siiréíyah éí naaltsoos ííłʼíní nilı̨́ı̨́ nítʼééʼ.
18 Áádóó Jiihóíyada biyeʼ Biinéíyah éí Kéreth dineʼé índa Pííleth dineʼé tʼáá áłah yee bóhólnííh, áádóó David biyeʼké éí agháago bídahólnííh.
