2 Samuel 9:1-13
9 Áádóó David ádííniid, Saul yę́ę baʼáłchíníísh tʼah łaʼ yidziih; éí Jánathan binahjįʼ baa jiideeshbaał.
2 Nítʼééʼ Saul yę́ę baʼáłchíní bighandóó łaʼ naalʼaʼí nilı̨́ı̨́ léiʼ Záíba wolyéé lá, áádóó David aláahgo naatʼáanii bá hágo dahodííniidgo áhodííniid, Daʼ niísh Záíba yinílyé? Áádóó ábizhdííniid, Aooʼ, ná naalʼaʼí nishłı̨́įgo áshtʼı̨́.
3 Áko aláahgo naatʼáanii ádííniid, Saul yę́ę baʼáłchíní doósh łaʼ tʼah yidziih da? Éí Diyin God bibee ajoobaʼ bee baa jiideeshbaał. Nítʼééʼ Záíba éí aláahgo naatʼáanii áyidííniid, Jánathan yę́ę biyeʼ łaʼ tʼah yidziih; éí naʼniłhod.
4 Aláahgo naatʼáanii áhodííniid, Háadish naaghá? Áádóó Záíba éí aláahgo naatʼáanii áyidííniid, Shoo, Ló-dííbar kin shijaaʼdi Ámiyel biyeʼ Méíkir yighandi sidá.
5 Áko aláahgo naatʼáanii David éí dah adiiłʼaʼgo Ló-dííbar kin shijaaʼdi Ámiyel biyeʼ Méíkir bighandę́ę́ʼ hoł nídazhdookah biniyé iʼjííłʼaʼ.
6 Áádóó Jánathan yę́ę biyeʼ Saul yę́ę binálí Miifíbosheth wolyéii David yaa níyáago yichʼįʼ nitsideelgoʼgo niʼjįʼ tséʼyaa neeshjoolgo hodísin. Áádóó David áhodííniid, Miifíbosheth. Áko ájíní, Jó, ná naalʼaʼí nishłíinii áshtʼı̨́.
7 David áhodííniid, Tʼáadoo nił yéʼí. Jó, tsʼídá tʼáádóo nídí naa jiideeshbaałgo Jánathan nizhéʼé yę́ę bá ákóndeeshłííł, áádóó Saul ninálí yę́ę bikéyah nítʼéʼígíí tʼáá átʼé naa dideeshʼááł áádóó shibikááʼ adání bichʼįʼ dah nánídaahgo náʼídı̨́įhgo hoolzhish doo.
8 Áádóó yaa ádzaago ání, Ná naalʼaʼí nishłíinii, haʼátʼíísh nishłı̨́? Jó, łééchąąʼí daaztsáaniigi yeeʼ áníshtʼéego ayóogo shíninidlı̨́įgo shiníníłʼı̨́.
9 Nítʼééʼ aláahgo naatʼáanii éí Záíba hágo yidííniid, éí Saul yę́ę yá naalʼaʼí nilı̨́įgo ííłní, Bá nanilʼaʼ yę́ę biyeʼ baa diníʼáanii éí Saul yę́ę bííʼ nítʼééʼ yę́ę índa baʼáłchíní tʼáá ałtso daabííʼ nítʼééʼ yę́ę ałtso baa diníʼą́.
10 Éí bąą ni áádóó niyeʼké índa ná nidaalʼaʼí dáʼákʼeh bá nidahwiidiyoołdlałgo daneestʼáanii yah adahidoohééł, áko bá nanilʼaʼí yę́ę biyeʼ yidooyı̨́įłii hólǫ́ǫ doo. Nidi bá nanilʼaʼí yę́ę biyeʼ Miifíbosheth éí shibikááʼ adání yichʼįʼ dah náńdaahgo tʼáá áłahjįʼ náʼádı̨́įh doo. Jó, Záíba éí biyeʼ ashdlaʼáadah yiltʼé índa bá nidaalʼaʼí éí naadiin yiltʼé.
11 Áko Záíba éí aláahgo naatʼáanii áyidííniid, Bóhonishníihii aláahgo naatʼáanii bá naalʼaʼí nishłı̨́įgo shichʼįʼ yee hahaasdzíʼígíí tʼáá ałtso bikʼehgo ná naalʼaʼí nishłíinii éí bikʼeh ádeeshnííł. Jó, aláahgo naatʼáanii ájíní, Miifíbosheth éí shibikááʼ adání yichʼįʼ dah náńdaahgo aláahgo naatʼáanii biyeʼké atah jílı̨́įgo bił nídaʼjidı̨́įh doo.
12 Áádóó Miifíbosheth biyeʼ dinééh nilı̨́, éí Máíka wolyé. Záíba bighangi kéédahatʼínígíí tʼáá ałtso éí Miifíbosheth yá nidaalʼaʼ.
13 Áko Miifíbosheth éí Jerúsalem kin haalʼáagi kééhatʼı̨́, háálá tʼáá áłahjįʼ aláahgo naatʼáanii bibikááʼ adání yichʼįʼ dah náńdaahgo náʼádı̨́ı̨́h, áádóó éí bikeeʼ tʼáá ałchʼijí yee naʼniłhod.
