2 Thessalonians 1:1-12
1 Shí Paul áádóó Silvéínas índa Timothy, Thesalonáíkagi daʼoodlání áłah nádleehii Diyin God nihiTaaʼ índa Bóhólníihii Jesus Christ bííʼ danilíinii bichʼįʼ naaltsoos ádeiilnééh:
2 Diyin God nihiTaaʼ índa Bóhólníihii Jesus Christ bibee ajoobaʼ áádóó bibee achʼįʼ hózhǫ́ náhásdlı̨́įʼii yee nihikʼijidlíi doo.
Christ nádzáadi bąąhági ádaaníiłii baa náhódóotʼįįł
3 Nihikʼisóó, tsʼídá tʼáá áłahjįʼ Diyin God bichʼįʼ nihaa ahééh daniidzin dooleełgo yáʼátʼééh, áko ákódeiitʼı̨́. Háálá nihidaʼoodląʼ tʼáá íiyisí danéesééh, áádóó tʼááłáʼí nootínígo bee ayóóʼádaʼahíínóhʼnínígíí hózhǫ́ bidziil yileeł.
4 Azhą́ atídanihiʼdilʼı̨́ áádóó nihichʼįʼ nidahwiiʼnáa nidi hadaʼíínółníigo yéego nisoozı̨́įgo daʼiinohdlą́. Éí bąą Diyin God dayoodláanii áłah nídaadleehgóó nihaa dahwiiʼniih.
5 Diyin God bee bóhólníihgo bił hazʼáanii bą́ą́h daʼnohłı̨́įgo ánihidoolííł biniyé tiʼdahoohnííh. Éí Diyin God tsʼídá tʼáá ákogi átʼéego ánihwiiʼaahgo bee bééhózin.
6 Háálá Diyin God tsʼídá tʼáá ákogi átʼéego ádooníiłgo atídanihiłʼínígíí tiʼhooʼnííh yee kʼééhodidoodlííł.
7 Áádóó nihichʼįʼ nidahoʼdiilnáanii nihił háádadoołyįhgo nihaididooʼááł, Bóhólníihii Jesus bidiyingo nidaalʼaʼí ayóó ádabóodziilii yił yáʼąąshdę́ę́ʼ yitʼíní áyiilaago índa ákóhodoonííł.
8 Diyin God doo béédahodzísinii índa nihiBóhólníihii Jesus baa haneʼ yáʼátʼéehii doo bikʼeh dahojíłʼíinii kǫʼ bitsʼáhodinoʼii yee kʼééhodidoodlííł.
9 Áko hoolʼáágóó atídahoʼdiilyaa doo, Bóhólníihii áádóó bibee adziil ayóó átʼéii bitsʼáhoʼdeeʼnilgo tiʼdahojooníih doo,
10 Jesus nádzá bijı̨́įdi bidiyı̨́ı̨́ʼ ayóó átʼéego bee baa haʼniih doo, índa dahoosdląądii tʼáá ałtso hakʼee tʼóó bił adahayói doo. Nihí ałdóʼ anohtah dooleeł, háálá bee nihił dahwiilneʼii deisoohdląąd.
11 Áko díí biniyé tʼáá áłahjįʼ nihá sodadiilzin, éí nihiDiyin God yee nihá íinízinii yee nihíká ádííniidii bą́ą́h daʼnohłı̨́įgo ánihidoolííł. Áádóó tʼáá ałtsojįʼ yáʼátʼééh ádaahníił dooleełígíí biniyé, índa oodląʼ bee baa dadzíínóhłíigo baa nidaahkaígíí bibee adziilii yee nihá łaʼyidoolííł.
12 Áko nihiDiyin God áádóó Bóhólníihii Jesus Christ bibee ajoobaʼ bikʼehgo nihiBóhólníihii Jesus nihee baa haʼniih doo, áádóó nihí bił łáʼí danohłı̨́įgo nihaa haʼniih doo.
