2 Thessalonians 2:1-17
2 Kʼad nihikʼisóó danohłíinii, nihiBóhólníihii Jesus Christ náánádáhígíí áádóó bidááhdóó áłah diidleełígíí beiníitʼı̨́įgo díí baa nídanihiikąąh:
2 Bóhólníihii beidoołkáłígíí tʼáá íídą́ą́ʼ nádzá, daaníigo tʼáá ádzaagóó nihił dahalneʼígíí tʼáadoo bikʼee chʼı̨́ı̨́góó nitsídanohkeesí, tʼáadoo bikʼee ádił nídahodoołchiłí. Jó, diné łaʼ, Shichʼįʼ yitʼíní ályaa, doodaiiʼ, Kótʼéego shił hóóneʼ, doodaiiʼ, Paul áádóó yił naakaígíí naaltsoos ádayiilaii kóní, nínígíí éí tʼáadoo tʼáá aaníí ání danohsiní.
3 Diné łaʼ tsʼídá tʼááká haʼátʼéegoda nihiʼdóleeh lágo. Háálá diné biʼoodląʼ yitsʼą́ąjįʼ dínóojahígíí átsé ádoonííł, áádóó diné bąąhági átʼéii yee sizíinii, íʼdoodįįłjįʼ bá nihootʼáanii yitʼíní ádoolnííł, áadi índa Bóhólníihii nídoodáłígíí beidoołkááł.
4 Diné bąąhági átʼéii yee sizíinii, éí diyin dabidiʼníinii áádóó bichʼįʼ nidahadláii tʼáá ałtso yikʼijįʼ nilı̨́įgo yiláahgo naʼádiiltée doo. Áko, Diyin God nishłı̨́, níigo, ádaa halneʼgo Diyin God bikin biiʼ sohodizin yiiʼ dah dínóodaał!
5 Shą́ą́ʼ, tʼah nihitah naashá yę́ędą́ą́ʼ díí bee nihił dahweeshneʼ niʼ, tʼáásh béédaałniih?
6 Bąąhági átʼéii yee sizíinii yitʼíní ádoolníiłgo baa hodoolzhishígíí biná kʼad tʼą́ą́ʼ ábósinii nihił béédahózin.
7 Bee nahazʼáanii doo yikʼehgo átʼéii doo bééhózin da yę́ę tʼáá íídą́ą́ʼ naalnish, kʼad tʼą́ą́ʼ ábósinii* tʼáá nahjįʼ kóbiʼdiilyaaíjįʼ yilnish doo.
8 Áko índa bąąhági átʼéii yee sizíinii yitʼíní ádoolnííł, áádóó Bóhólníihii Jesus nádzáago bitsʼádiʼnílíidii yee yitʼíní ályaago, bizééʼdę́ę́ʼ biyol yee bąąhági átʼéii yee sizíinii yidiyoołhéełgo íidoołdįįł.
9 Bąąhági átʼéii yee sizíinii éí níłchʼi bidaʼiiníziinii binanitʼaʼí Séítan wolyéii bibee adziilii yee ááníiłgo doogáałgo, woochʼíidgo bee éédahózinii índa bikʼee tʼóó ił adahayóigo ádahooníiłii tʼáá ałtso áyoolíił doo.
10 Áádóó ádabidiʼdooldįįłígíí doo tʼáá ákogi átʼéii ałtah ádaatʼéii yee yinaʼaloʼgo doogááł. Háálá tʼáá aaníinii ayóóʼádayóʼníi dooleeł yę́ę doo deiniizı̨́ı̨́ʼgóó biniinaa doo yisdáhidookah da.
11 Éí biniinaa Diyin God éí woochʼííd dajoodlą́ą doo biniyé naʼnitin yóóʼahodooʼishii hachʼįʼ yiʼiiłnííh.
12 Áko tʼáá aaníinii tʼáadoo dadzoosdląądii, nidi doo ákwii ádaatʼéii bąą hoł dahózhóonii hoolʼáágóó há nidahodiyootʼááł.
Yisdánihidiʼdooʼnił biniyé nídanihiʼdiisdlááʼ
13 Nidi nihikʼisóó danohłíinii, Bóhólníihii ayóóʼánihóʼníinii, tʼáá áłahjįʼ Diyin God bichʼįʼ nihaa ahééh daniidzin dooleełgo yáʼátʼééh. Háálá Níłchʼi Diyinii bee diyingo ádanihidiʼdoolnííł índa tʼáá aaníinii deidoohdląąłgo bee yisdáhidoohkah biniyé hodeeyáádę́ę́ʼ Diyin God nánihiizlááʼ.
14 Éidí biniyé haneʼ yáʼátʼéehii bee nihił dahwiilneʼígíí yee nihíká ádííniid, áko nihiBóhólníihii Jesus Christ yee ayóó átʼéii ałtsʼą́ą́ʼ daʼnołkʼiiz doo.
15 Áko nihikʼisóó danohłíinii, bee nihichʼįʼ hadahaadzíʼígíí índa nihichʼįʼ naaltsoos ádeiilyaaígíí bee nidanihineetą́ʼígíí yéego deínóhtąʼgo bee nisoozı̨́.
16 NihiBóhólníihii Jesus Christ tʼáá bí, índa Diyin God nihiTaaʼ ayóóʼánihóʼníigo nihaa joobaʼgo bee haʼahóní doo nídínéeshii índa ił chohooʼı̨́ niłdzilii nihaidiníʼáanii,
17 éí nihijéí hadaʼólníigo áyóleʼ, áádóó yáʼátʼééh ádaahníiłgo índa saad yáʼádaatʼéehii bee yádaałtiʼgo nihidahoníłdzilgo ádanihóleʼ.
Footnotes
^ Diyin God bizaad nideiłkaahii łaʼ éí Níłchʼi Diyinii ááhyiłní, daaní; náánáłaʼ Séítan ááhyiłní, daaní; áádóó łaʼ éí íídą́ą́ʼ Rome bibee adziilii ááhyiłní, daaní.
