2 Thessalonians 3:1-18
3 Áádóó nihikʼisóó, nihá sodadołzin, tʼáá nihitahgóó ádzaaígi átʼéego Bóhólníihii bizaad náás yitʼihgo baa haʼniih doo.
2 Áádóó diné doo yáʼádaashóonii índa bąąhági ádaatʼéii bitsʼąą nanihidiʼnil doogo nihá sodadołzin. Háálá diné doo tʼáá ałtso biʼoodląʼ hólǫ́ǫ da.
3 Nidi Bóhólníihii baʼahódlí. Áko nihidahoníłdzilgo ánihidoolííł, áádóó bąąhági átʼéii nilíinii yitsʼąą nihaa áhályą́ą doo.
4 Índa bee nihichʼįʼ hadahaadzíiʼii baa nidaahkai áádóó baa nidadoohkahgi Bóhólníihii bee nihaa dadzííníidlí.
5 Bóhólníihii nihá hooʼı̨́įgo Diyin God bibee ayóóʼóʼóʼniʼ índa Christ bibee haʼahóníinii nihijéí biiʼ baa ákodanohsingo ádanihóleʼ.
Nidajilnishgo yáʼátʼééh
6 Nihikʼisóó, nihiBóhólníihii Jesus Christ bízhiʼ bee ádanihidiiʼní, Nihikʼis tʼáá háiida ákʼeh dahalʼínígíí índa bee nidanihineetą́ąʼii doo yikʼehgo átʼéhígíí tʼáadoo bił naałdeehí.
7 Nihidaʼołʼı̨́į dooleełgi tʼáá nihí nihił béédahózin. Aají nihitahgi nideiikai yę́ędą́ą́ʼ doo ákʼeh dahoniilʼı̨́į da nítʼééʼ.
8 Diné łaʼ tʼáá jííkʼe tʼáadoo bitsʼą́ą́ʼ daʼiidą́ąʼ da, nidi doo nihaa naanish hasin da doo biniyé jı̨́įgo áádóó tłʼéeʼgo nidi yéego nidashiilnish.
9 Nihaa ádahołyą́ą doogo bee nihá hazʼą́ą nidi, tʼáadoo nihídadíʼníikeed da, nidi nihinááł ádeiitʼįįdígíí bidaʼołʼı̨́į doo biniyé ákódeiidzaa.
10 Háálá tʼahdii nihitahgi nideiikai yę́ędą́ą́ʼ, díí bee nihichʼįʼ hadahaadzííʼ: diné łaʼda doo tʼáá kʼad naashnishgóogo éí tʼáadoo ajiyání doo.
11 Háálá nihitahgi łaʼ ádadahodeeláago dahiná, tʼóó aseezı̨́ ádeiłʼı̨́įgo baa nidahontłʼago, doo nidi nidaalnishgóó baa dahodiitsʼaʼ.
12 Áko diné ákódaatʼéhígíí, Hazhóʼó nidaałnishgo ákʼinidadohkai, dabidiiʼníigo Bóhólníihii Jesus Christ bá yádeiiltiʼgo bichʼįʼ deiilʼáago baa nídeiikąąh.
13 Áádóó nihikʼisóó danohłíinii, yáʼátʼéehgo ádaahníiłii tʼáadoo ádadadoohłáhí.
14 Díí naaltsoos biyiʼdóó bee nihił dahwiilneʼígíí éí diné łaʼda doo yikʼeh hółʼı̨́ı̨́góogo éí baa ákodanohsin, áádóó éí dinéhígíí tʼáadoo bił ahéédadoohkahí doo, áko ádaa yádínóodzįįł.
15 Ákondi anaʼí nilı̨́įgo éí tʼáadoo baa nitsídaahkeesí, nidi akʼis nilı̨́įgo baa nitsídaahkeesgo hazhóʼó nidanohtin.
Kʼé haʼníigo bee naaltsoos niiltʼiʼii
16 Kʼad Bóhólníihii, bee achʼįʼ hózhǫ́ náhásdlı̨́įʼii, tʼáá áłahjįʼ áádóó tʼáá ałtsojįʼ bee achʼįʼ hózhóonii nihaididooʼááł. Tʼáá ánółtso Bóhólníihii nihił hólǫ́ǫ doo.
17 Shí Paul, kʼé nihidishníigo tʼáá shí akʼeʼashchí. Díí shí shinaaltsoosígíí tʼáá ałtso kótʼéego bikááʼ daasdzoh; éigi átʼéego éʼéshʼı̨́.
18 Tʼáá ánółtso nihiBóhólníihii Jesus Christ bibee ajoobaʼ nihił hólǫ́ǫ doo. [Tʼáá ákótʼée doo.]
