Acts 1:1-26
1 Thiyáfilas yinílyéii, tsʼídá áłtséedi Jesus yaa naayáhígíí áádóó yee naʼneeztą́ʼígíí naaltsoos áłtséhígíí bikááʼ íishłaa
2 áádóó wóshdę́ę́ʼ dadoolʼaałii bitadziizláʼígíí bee hodzisʼáanii Níłchʼi Diyinii bee baazhdiníʼą́ áádóó índa yáʼąąshgóó ahoʼdooltı̨́įjįʼ, éí tʼáá ałtso naaltsoos bikááʼ íishłaa.
3 Áko tiʼhodzoozniiʼdóó dízdiin yiską́ąjįʼ hódahoołʼaahii bichʼįʼ yitʼíní ánízhʼdiilʼįįhgo, tʼáá aaníí jiináago bee bééhózinii ląʼídi bee bichʼįʼ ízhʼdiilyaa, áádóó Diyin God bee bóhólníihgo bił hazʼáanii baa yájíłtiʼ.
4 Bił nidzíiztą́ągo hachʼįʼ haadzíiʼgo áhodííniid, Tʼááká Jerúsalem bitsʼą́ąjįʼ dah doohkááh yíilaʼ, nidi aTaaʼ eidiníʼánígíí bibaʼ ádanohtʼée dooleeł, éí bee nihił hweeshneʼgo dasidootsʼą́ą́ʼ.
5 Háálá John éí tʼáá aaníí tó yee ası̨́ı̨́h nítʼééʼ, nidi kodóó tʼáadoo ląʼí yiłkaahí Níłchʼi Diyinii bee nihidiʼdoolzįh.
Jesus yáʼąąshgóó anáádzá
6 Hódahoołʼaahii ahíikaigo, nidahódééłkidgo ádadííniid, Bóhólníihii, daʼ kʼadísh Ízrel bee bóhólníihgo bił hazʼáanii bá hashtʼéédíídlííł?
7 Áko ábizhdííniid, Ałkééʼ bee dahwéelzhíishii índa dayíłkaahii nihił béédahózin doogo doo nihaa deetʼą́ą da, éíyeeʼ aTaaʼ tʼáá bí bee bóhólníihgo yee nihoníʼą́.
8 Nidi nihí Níłchʼi Diyinii nihikʼi hooleʼgo bee adziilii nihee dahodooleeł, áko Jerúsalemgi, índa Judíyagi tʼáá átʼéé nítʼééʼ áádóó Samériyagi, índa nahasdzáán nidaneesʼą́ą́góó shá dahołneʼ dooleeł.
9 Áko díidí yee hahaasdzíiʼgo tʼáá dazhníłʼı̨́įgo, dego dah biʼdiiltı̨́ áádóó kʼos biyaa aaldohgo bee doo yitʼı̨́į da silı̨́ı̨́ʼ.
10 De hooleełgo yá biyiʼ góde hazhóʼó dazdéezʼı̨́ı̨́ʼ nítʼééʼ, jóʼakon, diné naaki algaigo hadítʼéego hwíighahgi yiizįʼ,
11 áko áhodííniid, Gáliliidóó hastóí danohłíinii, haʼátʼíísh biniyé yá biyiʼ góde dasídóoʼı̨́įʼgo nisoozı̨́? Díí Jesus nihitsʼą́ą́ʼ yáʼąąsh góde abiʼdooltínígíí, tʼáá yáʼąąsh góde hooleełgo daołtsánígi átʼéego nínáádoodááł.
Júdas yitsáskʼehjįʼ ííyáii
12 Áádóó Dził Álivet hoolyéhídóó Jerúsalemjįʼ níjíkai, éí Jerúsalemdóó áyídíyeeʼ hááʼáyı̨́ı̨́h jı̨́ naʼadáhígi ánízah.*
13 Ákwii níjíkaigo, náʼádeídi nidzíiztání góneʼ yah aníjookai, éí díí ádaatʼı̨́, Peter áádóó John áádóó James áádóó Andrew, Philip áádóó Thomas, Barthálemew áádóó Matthew, James éidí Alfíyas biyeʼ, áádóó Sáíman Zélat yolyéhígíí índa Júdas éí James yił hááʼáázh* nilínígíí.
14 Díí tʼáá ádzíłtso aheełtʼéego nitsídadzikeesgo, Jesus bimá Mary áádóó sáanii náádaałaʼ, índa Jesus bitsilíké éí bił tʼáadoo ádahozdiilzéhí sodazdilzingo hoolzhish.
15 Áko ákwii neiłkaʼ yę́ędą́ą́ʼ ałkʼisóó danilíinii (tʼááłáhídi neeznádiindóó baʼaan naadiin daatsʼí yiltʼé áłah silı̨́įʼgo), biníiʼgi Peter yiizįʼgo ání,
16 Shikʼisóó, Júdas éí Jesus dayiiłtsoodii bá hojooʼı̨́įgo jiníʼeezhígíí, éí Níłchʼi Diyinii tʼáá átséedi David binahjįʼ Diyin God bizaad bee akʼeʼashchíinii yee yaa chʼíhoníʼáanii tsʼídá bohodoolnííł biniyé ádzaa.
17 Háálá Júdas éí hoł nihiʼdééltaʼ, díidí Jesus bá nideiilʼaʼígíí łahjįʼ ałdóʼ haa deetʼą́ą́ nítʼééʼ.
18 Éí Júdas doo ákǫ́ǫ́ áátʼįįdii bikʼé bichʼįʼ naalyáii yee kéyah nayiisniiʼ; ákwii bitsiiʼ haʼyaago, hadáágoʼgo binííʼ gónaa yisdoh, áádóó bichʼííʼ tʼáá átʼé hááłhęęzh.
19 Áko Jerúsalemgi kéédahatʼíinii tʼáá ałtso bił béédahoozingo biniinaa tʼáá bí dabizaadígíí bikʼehgo éí kéyah Akéldama hoosyeʼ, éí kéyah diłii jiníigo óolyé.
20 Háálá naaltsoos Sin yolyéhígíí biyiʼ bee bikʼeʼashchı̨́,
Bíniʼdii bighangi doo naagháhí da doo,índa doo łaʼ yiiʼ kééhatʼíní da doo.
Áádóó,
Bee bóhólnííh nítʼéʼígi náánáłaʼ hatsáskʼehjįʼ anáádoodááł.
21 Éí biniinaa diné łaʼ náhoʼdidooltééł. Bóhólníihii Jesus nihitah naaghá yę́ędą́ą́ʼ tʼáá nihił tázhdookaígíí éí
22 John tó yee ası̨́ı̨́h yę́ędóó wóshdę́ę́ʼ nihitsʼą́ą́ʼ Jesus dego abiʼdooltı̨́ bijı̨́įjįʼ nihił tázhdidookah biniyé łaʼ náhoʼdidooltééł, áko Jesus daaztsą́ą́dę́ę́ʼ náábiʼdiilzáhígíí nihitahdóó atah baa hojilneʼ doo.
23 Áko naaki nídazhdiinil, Jóseph éí Barsábas yolyéego akéédę́ę́ʼ bízhiʼígíí éí Jústas yolyé, áádóó Matháíyas ałdóʼ.
24 Áádóó sodazdilzingo ádazhdííniid, Bóhólníihii nílíinii, diné tʼáá ałtso bijéí ádaatʼéegi nił bééhózin, áko díí diné nidiltʼéego, háidíígíí nídiniłtı̨́ nihił bééhonísįįh,
25 áko éí Júdas tʼáá bí bá hazʼą́ąjįʼ dah didoogáałgo díí naanish bichʼįʼ danihiʼdoolʼaadígíí yitsʼąą ádił asiihii bitsáskʼehjįʼ azhdoogááł.
26 Áko nídidooltéełii biniyé yááʼiiltʼeʼ ádajiilaa, nítʼééʼ Matháíyas nídiiltı̨́, áko éí daalʼaadii łaʼtsʼáadahígíí bił hoʼdééltaʼ.
Footnotes
^ Hááʼáyı̨́ı̨́h jı̨́ naʼadáhígi ánízah, nínígíí éí táadi mííl daatsʼí ké silá bíighahgo ánízah.
^ Éí doodago kótʼé, biyeʼ.
