Acts 10:1-48
10 Sesaríya hoolyéegi diné léiʼ Korníílyas yolyéego, neeznádiin siláo dah yikahii, Itáliyan bee wójíii, yinanitʼaʼí nilı̨́,
2 hodísinii nilı̨́ áádóó bighandóó danilíinii tʼáá ałtso Diyin God deidísingo diné badahojoobáʼíígíí ląʼígóó yee joobaʼii yee yíká análwoʼ, áádóó tʼáá áłahjįʼ Diyin God yichʼįʼ sodilzin.
3 Wózhǫ́ yaa adeezʼą́ągo Diyin God bidiyingo naalʼaʼí łaʼ hoł yah iigháahgo jiiłtsą́. Éí, Korníílyas, hałníigo tʼáadoo bahatʼaadí hoł ádzaa.
4 Áko jidiniilgęęzhgo nídzísdzíidgo ájíní, Bóhólníihii, haʼátʼíishąʼ biniyé yíníyá? Nítʼééʼ áháłní, Nisodizinígíí Diyin God ná yidiiztsʼą́ą́ʼ índa nee ajoobaʼ bee áká anánílwoʼígíí yee nénálniih.
5 Áko kʼad diné łaʼ Jápagóó díłʼáago Sáíman éí Peter ałdóʼ yolyéhígíí áádę́ę́ʼ yił nídookah;
6 éí łaʼ diné, ałdzéhí nilı̨́įgo, Sáíman ałdóʼ yolyéego tábąąhgi bighan, ákwii baʼałkʼee dzizdá. [Éí baa nidíínaałii bee nił hozhdoolnih.]
7 Áko diyingo naalʼaʼí hachʼįʼ haadzíʼígíí dah diiyáago, há naalʼaʼí naakigo áádóó siláo, tʼáá áłahjįʼ há naalʼaʼígíí łaʼ hodísinii nilı̨́įgo, hágo bizhdííniid,
8 áko áhoodzaaígíí tʼáá ałtso bee bił hojoolneʼgo Jápagóó ajííłʼaʼ.
9 Biiskání kin haalʼáhígíí tʼáá áyídídę́ę́ʼ bichʼįʼ jookahgo, kʼadę́ę ałnéʼéʼaahgo Peter sodidoolzįįł biniyé kin bighą́ąʼjįʼ haayá.
10 Áadi dichin dzizlı̨́įʼgo ajóyą́ą́ʼ laanaa jiniizı̨́ı̨́ʼ, nidi tʼahdii chʼiyáán ádeiléehgo hoł áhátʼı̨́įgo
11 yádiłhił ąą átʼéego, haʼátʼíí shı̨́ı̨́ níbaal ayóó áníłtélígíí nahalingo, tʼáá dı̨́ı̨́ʼdę́ę́ʼ beʼastłʼǫ́ǫgo niʼjįʼ nahííłtsoozgo jiiłtsą́.
12 Éí biyiʼgi nidaaldlooshii [áádóó nidaaldlooshii báádahadzidii] áádóó nidaaʼnaʼii índa nidaatʼaʼii tʼáá ałʼąą ádaatʼeełii jiiłtsą́.
13 Áko iinééʼ łaʼ jidiiztsʼą́ąʼgo áháłní, Nídiidááh, Peter; łaʼ naniłtseed áádóó ílghał.
14 Nidi Peter ání, Doodayéi, Bóhólníihii, háálá tʼáá bóhólníhígíí índa doo deidą́ą́góó bee nihá hazʼáanii éí łaʼ tsʼídá tʼah doo yishą́ą da.
15 Áko iinééʼ náázdiiztsʼą́ąʼgo ánááhodiʼní, Diyin God haʼátʼíhída hashtʼeyiilaii éí tʼáadoo tʼáá bóhólníhígíí átʼé bidiníní.
16 Díí táadi ákónádzaago índa yádiłhił biih nááldoh.
17 Ákohgo Peter hoł áhoodzaaígíí haʼátʼíí lá ááhyiłníí lá jiniizı̨́įʼgo tʼóó hoł haada, nítʼééʼ jóʼakon, Korníílyas bitsʼą́ą́dę́ę́ʼ diné dabiʼdeelʼaʼígíí, Sáíman bighan yíndaʼídíłkidgo chʼéʼétiingi naazı̨́ı̨́ lá,
18 áko nidaʼídíłkidgo ádaaní, Sáíman tʼáá éí ałdóʼ Peter yolyéhígíísh kweʼé sidá?
19 Áko Peter hoł áhoodzaaígíí baa nitsídzíkees, nítʼééʼ Níłchʼi Diyinii áháłní, Jóʼakon, diné táltʼéego hádanidéezʼı̨́ı̨́ʼ.
20 Nídiidáahgo hadaninááh, áko tʼáadoo sínítiʼí bił dah diikááh, háálá shí dahoníłʼaʼ.
21 Áko [Korníílyas bitsʼą́ą́dę́ę́ʼ diné dabiʼdeelʼaʼígíí] bichʼįʼ Peter hadajííyáago ájíní, Hádadóhʼı̨́ʼígíí éí shí áshtʼı̨́; haʼátʼíishąʼ biniyé noohkai?
22 Áko diné yíkaígíí ádaaní, Korníílyas, siláo neeznádiingo binanitʼaʼí jílíinii, diné tʼáá ákogi ááníiłii índa Diyin God yidísinii jílı̨́įgo, Jew dineʼé tʼáá ałtso yáʼátʼéehgo haa chʼídahwiiʼaahii jílı̨́, tʼáá éí diyingo naalʼaʼí yee hoołʼaʼii bikʼehgo haghandi díínáałgo saad nitsʼą́ą́dóó jididootsʼı̨́ı̨́ł biniyé níká dah nihizhdiiłʼaʼ.
23 Áko Peter yah oohkááh jidííniidgo tʼáá ákǫ́ǫ́ haʼałkʼee dabiiską́.
Biiskání nízhdiiʼnaʼgo bił dashdiikai, Jápadóó ałkʼisóó danilíinii ałdóʼ łaʼ hoł yíkai.
24 Náábiiskání Sesaríyadi jíkai. Korníílyas naʼólíigo bikʼéí danilíinii áádóó dabichʼooní danilínígíí áłah áyiilaa lá.
25 Áko Peter yah ajííyáago, Korníílyas hadááh yílwodgo hachʼįʼ nitsidinígoʼgo tséʼyaa neeshjool.
26 Nidi Peter náhodiidzı̨́įzgo áháłní, Yiizįįh; shí ałdóʼ tʼáá diné nishłı̨́.
27 Áko bił ałchʼįʼ yájíłtiʼgo bił yah ajííʼáázh, nítʼééʼ ląʼí áłah azlı̨́ı̨́ʼ lá.
28 Áko Peter hachʼįʼ haadzíiʼgo ání, Tʼáá nihí nihił béédahózin, Jew dineʼé náánáłaʼ dineʼé bił nijildeeh dooleełgo, éí doodaiiʼ dabighangóó hootaa dajikai dooleełgo doo bee há hazʼą́ą da, ákondi Diyin God, diné łaʼ tʼáá bóhólníhígíí índa danchxǫ́ʼí doo bidideeshniiłgóó shił ííshjání áyiilaa.
29 Éí bąą shaa ílʼaʼgo tʼáadoo dooda nisiní nihaa níyá. Áko nanihídíshkid, Haʼátʼíísh biniyé shíká nidaʼsoołʼaʼ?
30 Áko Korníílyas ání, Dı̨́ı̨́ʼ yiskánídą́ą́ʼ, [hodínísingo doo ashą́ą́góó] kojįʼ daatsʼí oʼoolkidgo, wózhǫ́ yaa adeezʼą́ągo sodizin biniyé hooʼaʼgo shighan góneʼ sodiszin nítʼééʼ; jóʼakon, diné léiʼ shidááhdóó biʼééʼ bitsʼádiʼnílíidgo sizı̨́.*
31 Nítʼééʼ ání, Korníílyas, Diyin God nisodizin yidiiztsʼą́ą́ʼ, áádóó badahojoobáʼíii bíká anánílwoʼígíí ná yénáálniiʼ.
32 Éí bąą Jápagóó adíłʼáago Sáíman éí Peter ałdóʼ joolyéhígíí, hágo hodiní; éí diné ałdzéhí nilı̨́įgo Sáíman ałdóʼ yolyéego tábąąhgi bighan, ákwii baʼałkʼee dzizdá. [Éí níyáago nichʼįʼ hadoodzih.]
33 Éí bąą tʼáá áko níká iʼííłʼaʼ, áko yíníyáhígíí yáʼátʼéhígi íinidzaa. Áko kʼad kóneʼ tʼáá áníiltso Bóhólníihii yee ná haadzíʼígíí tʼáá ałtso dadidiitsʼı̨́ı̨́ł biniyé Diyin God binááł áłah niidlı̨́.
Peter éí Korníílyas bighandi yáłtiʼ
34 Áko Peter ayáʼniiłtiʼgo ání: Kʼad tʼáá aaníí shił bééhoozin, Diyin God doo ałʼohgo diné yaa nitsíkees da.
35 Nidi ałʼąą dineʼé bitahdę́ę́ʼ tʼáá háiida hodísin áádóó tʼáá ákogi ááníłígíí tʼéiyá ádeidiitʼaah.
36 Ízrel dineʼé bichʼįʼ haneʼ ájiilaaígíí, éí Jesus Christ binahjįʼ haneʼ yáʼátʼéehii bee achʼįʼ hózhóonii baa hojoolneʼgo (Jesus éí diné tʼáá ałtso yee bóhólníihii nilı̨́ı̨́ lá),
37 éí haneʼígíí tʼáá íídą́ą́ʼ nihił béédahózinii ááhdishní, John tó bee alzı̨́ı̨́h baa nahodzisneʼdóó bikʼijįʼ Gáliliidóó háátʼiʼii éí Judíya kéyahgóó tʼáá átʼéé nítʼééʼ baa nahazneʼ:
38 Diyin God éí Jesus Názarethdóóígíí Níłchʼi Diyinii yee índa bee adziilii yee atsʼéiníłtı̨́, áádóó yáʼátʼéehii yaa naagháago níłchʼi bidaʼiiníziinii binanitʼaʼí atídabiłʼíinii tʼáá ałtso hadaałtʼé áńdeidleʼgo Diyin God bił hólǫ́ǫgo, tádííyáhígíí baa nahazneʼ.
39 Áko Jew dineʼé bikéyahgi índa Jerúsalemgi baa nijiyáhígíí tʼáá ałtso nihí dabíínáałii daniidlı̨́. Tsin yąąh dah dahodiiłtʼeʼgo dahwiisxı̨́,
40 nidi tágí jı̨́ aleeh góneʼ Diyin God nááhodiisáago hoʼdootʼı̨́įgo áhoolaa,
41 doo diné tʼáá ałtso dahoołtsą́ą da, nihí Diyin God nánihiizláaʼii tʼéiyá dabíínáałii daniidlı̨́įgo, dadziztsą́ą́dę́ę́ʼ náázdiidzáádóó bikʼijįʼ doodı̨́įłii índa doodlı̨́įłii hoł deiidą́ą́ʼ.
42 Áko tʼáá hó ánihijiníigo bichʼįʼ nihijííłʼaad, haneʼ yáʼátʼéehii bee diné bił dahołneʼ, dahináanii índa daneeznáanii bá nihozhdooʼááł biniyé Diyin God nihoníłtı̨́ dadohníigo, tʼáá aaníí nihił béédahózingo baa dahołneʼ.
43 Tʼáá nááná hó, Diyin God yá dahalneʼii tʼáá ałtso haa dahalneʼgo ádaaní, Diné tʼááłáʼí nítínígo dahoodlą́ągo haa dadzólíii, házhiʼ binahjįʼ bibąąhági ádaatʼéii bá yóóʼahididootʼááł.
Doo Jew dineʼé danilíinii Níłchʼi Diyinii biiʼ dahazlı̨́ı̨́ʼ
44 Peter díí tʼahdii yee yáłtiʼgo, saad deidiiztsʼą́ʼígíí tʼáá ałtso Níłchʼi Diyinii bikʼi dahooleʼ.
45 Áko bąąh nídahineeshgizhii bitahdóó daʼoodlání Peter yił yíkaígíí tʼóó bił adahóóyóí, háálá doo Jew dineʼé danilíinii nidi Níłchʼi Diyinii biiʼ dahazlı̨́ı̨́ʼ.
46 Háálá saad ałʼąą ádaatʼéii yee yádaałtiʼgo índa Diyin God yaa dahaniihgo deidiiztsʼą́ą́ʼ. Áko Peter haadzíiʼgo ání,
47 Díí diné, tʼáá nihígi átʼéego Níłchʼi Diyinii biih dahwiizleʼígíí tó bee dabidiʼdoolzįhgi łaʼdaásh dooda dohní?
48 Áko Jesus Christ bízhiʼ binahjįʼ tó bee dabidiʼdoolzįh jiníigo bá hadzoodzííʼ. Nítʼééʼ ádahodííniid, Tʼáá kǫ́ǫ́ sínídáago díkwíida yidoołkááł.
Footnotes
^ Diné léiʼ biʼééʼ bitsʼádiʼnílíidgo, nínígíí éí diyingo naalʼaʼí ááhyiłníi łeh.
