Acts 19:1-41
19 Kórinthgi Apálas sidáádą́ą́ʼ, Paul éí kéyah wódahjíígíí biiʼ ahéédzídzáago Éfesasgi jiníyá. Ákweʼé ídahoołʼaahii łaʼ bikʼízhníyá.
2 Éí ábizhdííniid, Daʼiisoohdląąd yę́ędą́ą́ʼásh Níłchʼi Diyinii nihiih dahwiizleʼ? Áko ádahałní, Dooda, Níłchʼi Diyinii hólónígíi nidi tʼah doo baa dahodiitsʼı̨́įh da.
3 Áko ájíní, Haʼátʼíishąʼ bikʼehgo tó bee danihiʼdoolzı̨́ı̨́ʼ? Áko ádadííniid, John bikʼehgo tó bee alzı̨́hígíí tʼéiyá.
4 Ákohgo Paul ádííniid, Łahgo átʼéego tsínáhodiikeesgo bąąhági átʼéii átsʼáhiditʼaahgo tó bee alzı̨́ı̨́hjí John tó yee ası̨́ı̨́h nítʼééʼ. Diné yił halneʼgo ádííniid, Shikéédę́ę́ʼ náánáádáłígíí deidoohdląąłgo baa dadzíídóohłiił. Éí Christ Jesus ááhyiłní.
5 Éí deidiiztsʼą́ąʼgo, Bóhólníihii Jesus bízhiʼ bee tó bee dabiʼdoolzı̨́ı̨́ʼ.
6 Áádóó Paul hakʼi dah dahideesniiʼgo, Níłchʼi Diyinii hakʼi dahooleʼ, áko saad ałʼąą átʼéii yee hadahaasdzíiʼgo, Diyin God yá dahoolneʼ.
7 Dinéhígíí tʼáá ałtsogo naakitsʼáadah daatsʼí yiltʼé.
8 Áádóó kin biiʼ áłah náʼádleeh góneʼ Paul yah aníjídáahgo tʼáadoo dzistiʼí yáńjíltihgo tááʼ nídeezid, Diyin God bee bóhólníihgo bił hazʼáanii bídadéétʼiʼii diné bił baa nídajitʼı̨́įgo bee bíniʼ bá ádahojiilaa.
9 Nidi łaʼ doo nibídaʼdidzil da índa doo daʼoodlą́ą́góó, diné áłah nilínígíí binááł Bóhólníihii bikʼehgo honítʼiʼii nichxǫ́ʼógo yá yádaałtiʼgo bąą, bitsʼą́ą́ʼ dashdiiyáago ídahoołʼaahii bił dashdiikai, áko tʼáá ákwíí jı̨́ Tairánas yolyéhígíí biʼóltaʼ góneʼ Diyin God bizaad bił baa nínádajitʼįįh.
10 Éí tʼáá ákótʼéego naaki nááhai, áko Jew dineʼé índa Gríik dineʼé Éízha kéyahgi kéédahatʼínígíí tʼáá ałtso Bóhólníihii bizaad deidiiztsʼą́ą́ʼ.
Sííva biyeʼké
11 Diyin God éí Paul choyoołʼı̨́įgo ádahooníiłii ayóó ádaatʼéii doo deiltséhígíí áyoolííł,
12 áko ádídaaljołí áádóó atéél naastsoozí Paul hatsʼíís bídahidiyeesnáaʼii ka nidaakaii bichʼįʼ adahaashjaaʼ, áko ka nidaakaígíí yáʼátʼééh nídaasdlı̨́ı̨́ʼ, áádóó níłchʼi biʼiiníziinii biiʼ dahólónígíí biiʼ hadahaaskai.
13 Áko Jew dineʼé łaʼ tádadikáahgo níłchʼi bidaʼiiníziinii hadeiniiłkaadii éí Jesus bízhiʼ dayózhíigo chʼééh hadeiniłkaadgo, Paul yaa halneʼii, Jesus, binahjįʼ ándishní, daaní.
14 Sííva joolyéé léiʼ Jew dineʼé aláahgo nááʼiiłniihii jílı̨́įgo, éí hayeʼké tsostsʼid yiltʼéego ákódaatʼı̨́.
15 Nidi níłchʼi biʼiiníziinii haadzíiʼgo ábidííniid, Jesus bééhasin, Paul ałdóʼ bééhasin, nidi nihíshąʼ éí háí ádaahtʼı̨́?
16 Áko diné níłchʼi biʼiiníziinii biiʼ hólónígíí hachʼįʼ dah diilwodgo bił daʼahijoogą́ąʼgo hakʼeh deesdlı̨́ı̨́ʼ, áko tʼáá dajilchíʼígo áádóó tídazhdiilyaago kin biyiʼdóó chʼízhníjééʼ.
17 Jew dineʼé índa Gríik dineʼé Éfesasgi kéédahatʼínígíí tʼáá ałtso éí dayííniiʼ, áádóó tʼáá ałtso éí bikʼee bił yééʼ dahazlı̨́ı̨́ʼ, áko Bóhólníihii Jesus bízhiʼ ayóó átʼéego baa haʼniih silı̨́ı̨́ʼ.
18 Ląʼí daʼoosdląądígíí ałdóʼ ákweʼé neheeskaigo ádaa chʼídahwiistʼą́ągo ádáátʼįįdii yaa dahoolneʼ.
19 Áko diné naʼadloʼ bee nidahojiłáii ląʼí handaaltsoos áłah ádajiilaago diné tʼáá ałtso dabinááł dazhdííłid, áko bą́ą́h ílı̨́ı̨́ nítʼééʼ yę́ę dajííłtaʼ, nítʼééʼ béésh łigaii ashdladiindi mííl bą́ą́h ílı̨́ı̨́ nítʼééʼ lá.
20 Áko Bóhólníihii bizaad bilááh yileełgo aláahdi átʼéii silı̨́ı̨́ʼ.
Éfesasgi nahozhneeshghaazh
21 Ákódaadzaadóó bikʼijįʼ Paul éí Masedóniya índa Akéya hoolyéégóó chʼídeesháałgo Jerúsalemgóó deeshááł jiniizı̨́ı̨́ʼ, áko ájíní, Ákwii níyáádóó bikʼijįʼ Rome hoolyéégóó ałdóʼ hwiideestsééł.
22 Áko Timothy índa Iirástas éí háká anáʼahinilchéehii nilı̨́įgo Masedóniyagóó ajííłʼaʼ, hó tʼéiyá tʼáá Éízhagi dzizdáago nááhodooʼnaʼ.
23 Tʼáá daatsʼí ákwii hoolzhishgo Bóhólníihii bikʼehgo honítʼiʼii biniinaa doo tʼáá hashtʼeʼígo hahonííchaad da.
24 Háálá diné łaʼ Demíítriyas yolyéego béésh łigaii yitsid lá, béésh łigaii bee Daiyána,* kin bił beʼelyaago bichʼįʼ nahadláii ííłʼı̨́, áko daʼatsidii tʼáá íiyisí bikʼé badaʼiideeł,
25 éí diné ákótʼéego daʼatsidgo yindaalnishígíí áłah áyiilaago yee yichʼįʼ haadzííʼ, Hastóí, díí naanishígíí bee yéego daʼiitʼı̨́įgo nihił béédahózin.
26 Jó, doo Éfesasgi tʼéiyá da, nidi Éízhagi kʼasdą́ą́ʼ tʼáá átʼéé nítʼééʼ, éí díí Paul yolyéhígíí yílá bee ádaalyaii doo diyin ádaatʼée da níigo, diné ląʼí yíniʼ yá ádahoolaago nihitsʼádahaaskaigo daahʼı̨́ áádóó dadoohtsʼaʼ.
27 Áko doo tʼáá nihí nihindaanishígíí tʼéiyá yidoołchǫǫł dagi átʼé, nidi ayóó átʼé asdzą́ą́ diyinii Daiyána wolyéii kin biiʼ bichʼįʼ nahadláhígíí ałdóʼ doo ílı̨́į da dooleeł, áko doo bił ádaa hólníi da dooleełgi átʼé, jó, éí Éízhagi índa nihokááʼ dineʼé tʼáá átʼé kʼad deidísin.
28 Éí deidiiztsʼą́ąʼgo tʼáá íiyisí yikʼee bádahóóchįįd, áko hadadeeshghaazhgo ádaaní, Éfesas dineʼé bidiyin Daiyána éí ayóó átʼé!
29 Áko kin haalʼáagi tʼáá átʼé diné tʼóó hahóółʼá, áko Paul yił naakaígíí łaʼ, Géíyas índa Aristárkas, éí Masedóniyadę́ę́ʼ diné jílı̨́įgo, dahasiłgo, ayóó átʼé áłah náʼádleeh bá hazʼą́ą́ góneʼ tʼáá łahjįʼ hoł yah anoodaaʼgo yah adahazdzı̨́ı̨́z.
30 Paul ákóneʼ diné bitah yah adeeshááł jiniizı̨́ı̨́ʼ, nidi ídahoołʼaahii dooda dahodííniid.
31 Éízhadę́ę́ʼ naatʼáanii danilı̨́ı̨́ léiʼ łaʼ, hachʼooní danilı̨́įgo, Áłah azlı̨́ı̨́ʼ góneʼ doo yah adíínáał da, daaníigo ałdóʼ nídahookąąhgo haa daʼasʼaʼ.
32 Ákohgo áłah silı̨́ʼígíí tʼóó hahóółʼá, łaʼ, Díí lą́ą, daaníigo, náádaałaʼ, Nagháí lą́ą, daaníigo dadilwosh, tʼóó ahayóí yiniyé yah adahaaskaígíí nidi doo bił béédahózin da.
33 Áko Jew dineʼé éí Alezáander kódidííniił deidííniidgo diné áłah nilínígíí bitahdóó yił chʼékai. Áko dah didiilniiʼgo áchʼą́ą́h yátiʼ yee diné yichʼįʼ haadziih nítʼééʼ.
34 Nidi Jew dineʼé jílínígíí bił béédahoozingo, tsʼídá tʼáá łaʼ bizhiʼee hadadeeshghaazhgo tʼáá dadilwoshgo, Éfesas dineʼé bidiyin Daiyána ayóó átʼé! daaníigo naakidi daatsʼí ahééʼílkid.
35 Áko kintahdóó naaltsoos ííłʼíní diné áłah nilínígíí bichʼįʼ nizhníyáago dabizhdiiłheel, áko ájíní, Éfesas dineʼé danohłíinii, díí Éfesas kin haalʼáii, éí Daiyána ayóó átʼéii kin biiʼ bichʼįʼ nahadláii áádóó eʼelyaii Júpiterdę́ę́ʼ hadaaltsʼidii yaa áhályáanii nilínígíí, háishąʼ diné shı̨́ı̨́ doo bił bééhózin da?
36 Áko díidíígíí bitsʼą́ą́jí doo haʼátʼéegoda ádaoʼneʼ átʼéégóó bąą tʼóó dadoołheeł, áádóó tʼáadoo tsíhodeeskézí ádadoohníłígíí tsʼídá dooda.
37 Háálá díí diné kweʼé nidashooʼeezhígíí, tʼáadoo leʼé dadiyinii doo nidayiiłchxǫǫh da, índa asdzą́ą́ diyinii doo ílı̨́ı̨́góó doo yaa yádaałtiʼ da.
38 Éí bąą Demíítriyas áádóó daʼatsidii hoł nidaalnishígíí éí diné łaʼda baa saad dahojíłǫ́ǫgo, aa hwiinítʼı̨́ há ąą átʼé, áádóó áájí ándahwiiʼaahii hólǫ́, hániʼdii áájí ahaa nídajitʼįįh.
39 Nidi náánáłaʼ baa saad dahólóonii éí tʼáá baa náhátʼı̨́ biniyé náhootʼaah góneʼ nihá hashtʼéédooʼnííł.
40 Háálá jı̨́ı̨́dą́ą́ʼ biniinaa hahóóʼáá nítʼééʼ yę́ę bee nihikʼihodidootʼáłígíí éí baa jédaʼííníilná, áłah azlı̨́įʼgo biniinaa hahóóʼáago baa nidahodiilnihígíí éí tʼáá ádin.
41 Áádóó naaltsoos ííłʼíní kótʼéego haadzíiʼgo áłah azlı̨́ʼígíí, Kʼad nídahínóhkááh, yidííniid.
Footnotes
^ Daiyána éí Ártemas ałdóʼ yolyé.
