Acts 21:1-40
21 Áko áádóó bitsʼą́ą́ʼ dah daʼdiilʼéelgo, Kóʼas hoolyéejįʼ tʼóó kʼídahosiildǫǫdgo biiskání Róodzjįʼ niikai áádóó Pátara hoolyéedi nihił aníʼéél.
2 Áko tsinaaʼeeł łaʼ Finííshiyagóó haʼnaa deezʼéél léiʼ bikʼíniikai, áko biih yiikaigo nihił dah adiiʼéél.
3 Kéyah Sáípras yitʼı̨́ silı̨́įʼgo shádiʼááhjígo bíighah chʼídasiilʼéél, áko kéyah Síriya hoolyéejįʼ nihił aníʼéelgo tábąąhgi Táir kin haalʼáhígi hadeiikai, háálá ákweʼé tsinaaʼeeł biyiʼdóó hééł bidahidooʼnił lá.
4 Áadi ídahoołʼaahii łaʼ bikʼíniikaigo ákweʼé tsostsʼid danihiiską́. Éí Níłchʼi Diyinii bikʼehgo Paul ádeidííniid, Jerúsalemgóó doo díínáał da.
5 Ákweʼé tsostsʼid danihiiską́ągo dah náádiikai, áádóó ídahoołʼaahii tʼáá ałtso, beʼasdzą́ą́ áádóó badaʼáłchíní tʼáá bił éí kin haalʼáádóó nihił chʼékai, áko tábąąhgi nitsidadiniigoʼgo, sodadiilzin.
6 Áádóó, Diyin God nihił hólǫ́ǫ doo, daʼahidiiʼniidgo nihí tsinaaʼeeł biih yiikaigo, bí éí dabighangóó dah nídahidiikai.
7 Táirdę́ę́ʼ Talaméíyisjįʼ nihił niʼníʼéél, áko ałkʼisóó danilíinii bił kʼé daʼahidiiʼniidgo bił naháatą́ągo łaʼa jı̨́ azlı̨́ı̨́ʼ.
8 Biiskání Paul bił neikaígíí Sesaríyajįʼ niikai, áko Philip, haneʼ yáʼátʼéehii yaa halneʼii bighan góneʼ yah iikaigo baʼałkʼee naháatą́ą́ nítʼééʼ, Philip éí diné tsostsʼidgo nídadiiʼnilii łaʼ átʼı̨́.
9 Éí bitsiʼké dı̨́ltʼéego tʼah doo diné bee dahaleehii danilı̨́ı̨́ lá, éí Diyin God yá dahalneʼ lá.
10 Tʼáá ákweʼé naháatą́ągo ląʼí yiską́, áko Judíyadę́ę́ʼ Diyin God yá halneʼii léiʼ, Ágabas yolyéego ákweʼé níyá.
11 Áko nihaa níyáago, Paul biziiz néidiiláago tʼáá bí bikétsíín índa bílaʼ yee yeʼaztłʼǫ́ǫgo ání, Níłchʼi Diyinii kóní, Díí sis tʼáá nijiléhígíí Jerúsalemdi Jew dineʼé kótʼéego hodaʼdootłʼóołgo doo Jew dineʼé danilíinii yílákʼee dahodoołtééł.
12 Díidí dasidiitsʼą́ąʼgo, nihí lá índa ákweʼé kéédahatʼínígíí ałdóʼ, Jerúsalemgóó doo díínáał da, Paul chʼééh dabidiiʼníigo chʼééh nídeisiikan.
13 Nidi Paul haadzíiʼgo ání, Haʼátʼíísh biniyé daahchago shijéí tiʼdabiyołnííh? Háálá Jerúsalemdi doo tʼóó dashidiʼyootłʼółígíí tʼéiyá biniyé hashtʼeʼíʼdiishyaa da, nidi Bóhólníihii Jesus bízhiʼ bá dadeestsaałígíí ałdóʼ biniyé hashtʼeʼíʼdiishyaa.
14 Áko doo baghaʼdótʼááł átʼéégóó niilteeʼgo nihí tʼóó dadiilyeelgo ádadiiʼniid, Bóhólníihii yee íinízinii bohodoolnííł.
15 Áádóó bikʼijįʼ hashtʼeʼánáádadiilyaago Jerúsalemgóó niikai.
16 Ídahoołʼaahii łaʼ Sesaríyadę́ę́ʼ ałdóʼ bił niikai, Sáíprasdóó tʼáá ałkʼidą́ą́ʼ íhoołʼaahii jílíinii, Néísan joolyéii, haʼałkʼee naháatą́ą doo biniyé hoł yah iikai.
Paul éí James yaa níyá
17 Jerúsalemdi niikaigo, ałkʼisóó danilíinii tʼáá íiyisí nihaa bił dahóózhǫǫdgo kʼé danihidííniid.
18 Biiskání Paul bił, James baa niikai; ákwii daʼoodlání yá aląąjįʼ naazíinii tʼáá ałtso nidaháaztą́ą́ lá.
19 Áłah nilínígíí Paul kʼé yidííniidgo, doo Jew dineʼé danilíinii bitahgóó nijisʼaʼgo Diyin God hanahjįʼ yaa naayáhígíí tʼááłáʼí níʼánígo baa nahojisneʼ.
20 Éidíígíí deidiiztsʼą́ąʼgo Diyin God yaa dahaznih. Áádóó ádahodííniid, Jóʼakon, nihikʼis nílíinii, haa shı̨́ı̨́ néelą́ąʼdi míilgo Jew dineʼé bitahdę́ę́ʼ daʼoosdląąd; éí tʼáá ałtso bee hazʼáanii tʼáá íiyisí yídaneedlı̨́,
21 áko éí doo Jew dineʼé danilíinii bitahgóó Jew dineʼé kéédahatʼínígíí tʼáá ałtso, Mózes binaʼnitin bitsʼáhóhkáahgo, nihaʼáłchíní tʼáadoo bąąh nídahinilgishí, índa Ízrel dineʼé biʼéʼélʼįʼ tʼáadoo bikʼeh dayínóhkáhí, bidiní, haʼníigo bee naa hóóneʼ.
22 Ákoshąʼ haʼátʼéego dooleeł? Kweʼé yíníyáhígíí deidoonihgo [áłah dooleeł].
23 Éí bąą nichʼįʼ hadahidiidzihígíí bikʼeh ánítʼée doo. Kweʼé nihitahgi diné dı̨́ltʼéego dahodísingo ádee hadadeesdzííʼ.
24 Díí diné doo ąąh chin dooleełjí nahaghá bee bizhdidookah, áádóó bitsiiʼ dadoolzhihgo bá bikʼé niʼdíílééł. Áko naa haneʼgo bee bił dahóóneʼígíí éí doo tʼáá aaníi da dooleeł, nidi tʼáá ni ałdóʼ bee hazʼáanii Mózes baa deetʼáanii bikʼehgo hazhóʼó yínáałgo bił béédahodoozįįł.
25 Nidi doo Jew dineʼé danilíinii daʼoosdląądígíí kódabidiiʼníigo bichʼįʼ naaltsoos ádeiilyaa, [Jew dineʼé binahaghaʼ bikʼehgo bee nahazʼánígíí doo tʼáá ałtso bikʼeh dahonołʼı̨́į da, nidi] edaʼalyaii bichʼįʼ náádahaazniiʼii áádóó dił áádóó bizákʼídadiiʼniiʼii tʼáadoo daohsání, índa naʼageh bee tsiʼnaʼadá bitsʼą́ąjįʼ ádanohtʼéego yáʼátʼééh.
26 Áko Paul éí diné yił dah diikaigo, biiskání doo ąąh chin dooleełjí nahaghá há ádaalyaa. Áádóó doo hąąh chinígóó íʼdazhdilnéehgo bíighah adooleełgi, tʼááłáʼí jinítínígo há náádahidoonihígíí hazhóʼó baa hozhdoolnih biniyé kin biiʼ sohodizin bił hazʼą́ą́ góneʼ yah ajííyá.
Kin biiʼ sohodizin bił hazʼą́ą́ góneʼ Paul deisił
27 Áádóó tsostsʼid jı̨́ kʼadę́ę bíighah aleehgo, Éízhadę́ę́ʼ Jew dineʼé nidaakaígíí, ákweʼé kin biiʼ sohodizin bił hazʼą́ą́ góneʼ dahoołtsą́ągo, áłah nilínígíí yá dahóółchįįd áádóó dahasiłgo,
28 hadadeeshghaazhgo ádaaní, Ízrel dineʼé nohłíinii, nihíká oohjeeh! Díí hastiin tʼáá ałtsogóó diné kéédahatʼíinii éí nihidineʼé áádóó bee hazʼáanii* índa kweʼé hazʼánígíí yikʼijįʼ yáłtiʼgo naʼnitin. Tʼah nááyówehgo, Gríik dineʼé kin biiʼ sohodizin bił hazʼą́ą́ góneʼ yah ayííʼeezhgo, díí hodiyingo hazʼáanii yiyííłchxǫʼ.
29 Háálá tʼáá bítséédą́ą́ʼ Éfesas dineʼé łaʼ Trófimas yolyéii, kintahdi yił dahoołtsą́, áko éí kin biiʼ sohodizin bił hazʼą́ą́ góneʼ Paul hoł yah ííʼáázh shaʼshin daniizı̨́ı̨́ʼ.
30 Áko kin haalʼáhígi hahodíídláadgo diné ahaneheezhjééʼ, áko Paul deisiłgo kin biiʼ sohodizin bił hazʼą́ą́dóó chʼídeizdzı̨́įzgo tʼáá áko dádaʼdeeskaal.
31 Áko dahodiyiilyééł chʼééh danízingo, Jerúsalemgi tʼáá átʼé nítáhozdíníilzaaz haʼníigo, siláo aląąjįʼ binanitʼaʼí haneʼ beítʼą́.
32 Tʼáá áko tsxı̨́įłgo siláo índa siláo neeznádiingo bindanitʼaʼí ákóyaa yił dah diijééʼ, áko éí siláo aląąjįʼ binanitʼaʼí índa siláo ałdóʼ dayiiłtsą́ągo, Paul nídeiniłhałígíí yę́ę yikʼi deeskai.
33 Áko siláo aląąjįʼ binanitʼaʼí haa níyáago hoołtsoodgo béésh daʼahólzhaʼí naakigo bee hoʼdootlʼóół níigo yee hoołʼaʼ. Áko, Háísh átʼı̨́, índa, Haʼátʼíishąʼ yaa naayá, níigo naʼídééłkid.
34 Áko áłah nilínígíí hadadeeshghaazhgo, łaʼ, Ko lá ájíítʼįįd ni, daaní áádóó łaʼ, Díigi lá ájíítʼįįd, daaní. Áko tsʼídá biniinaa hahodíídládígíí tʼáadoo bił bééhoozingóó, siláo bighan góneʼ yah adoodlóós níigo yee hoołʼaʼ.
35 Áko ałkʼi dah nídahastʼą́ągo bikááʼ góde háádaʼaldahíjįʼ nizhníyáago, diné ádéédahooldzídígíí biniinaa siláo nihidahastı̨́,
36 háálá diné tʼóó ahayóí áłah nilínígíí éí, Sołhé héii, daaníigo dadilwoshgo hakééʼ náázééł.
Paul áchʼą́ą́h haadzííʼ
37 Áádóó siláo bighan góneʼ kʼadę́ę Paul yah iidlóosgo, siláo aląąjįʼ binanitʼaʼí ííłní, Tʼáadoo leʼé bee nichʼįʼ haasdziihgoósh tʼáá áko? Áko siláo binanitʼaʼí ádííniid, Gríik bizaadísh bee yáníłtiʼ lá?
38 Ííjip dineʼé léiʼ hádą́ą́léiyá Diné Nideiłtseedii wolyéii dı̨́įdi mííl yiltʼéego honoojíijįʼ chʼíiníʼeezhgo hahonííłchaad nítʼééʼ yę́ę doósh éí ánítʼı̨́į da?
39 Nidi Paul ádííniid, Shí Jew dineʼé nishłı̨́, Silíshiyagi Társas, ayóó átʼé kin haalʼáádóó naashá. Diné bichʼįʼ hadeesdzihgi shadiʼdííʼáałgo nánooshkąąh.
40 Áko éí bee haʼdeetʼą́ągo, ałkʼi hooʼnilgo haʼazʼáii háádaʼaldáhígíí bikááʼ Paul dah dziizįʼgo diné bichʼįʼ dashdidiilniiʼ, áko tʼáá íiyisí hodiiyeelgo, Hííbrew kʼehjí bichʼįʼ ayázhʼniiłtiʼgo ájíní:
Footnotes
^ Jew dineʼé tʼáá háiida doo Jew dineʼé nilíinii sohodizin bá hooghan góneʼ bił yah ajííʼáazhgo hoʼdiʼyoolyéełgo bą́ą́h jílı̨́.
