Acts 22:1-30
22 Shikʼisóó, shahastóí danohłíinii, nihichʼįʼ bee ákʼi hadideesdzihígíí shá dadoohtsʼı̨́ı̨́h!
2 Hííbrew kʼehjí bichʼįʼ ayázhʼniiłtiʼgo deidiiztsʼą́ąʼgo, tʼáá íiyisí dadiiłheel. Áko ájíní:
3 Silíshiya kéyahdi Társas kin haalʼáagi shiʼdizhchı̨́įgo Jew dineʼé nishłı̨́, nidi kweʼé Jerúsalem kin haalʼáagi shidiʼneeszą́, danihizhéʼé yę́ę bibee hazʼáanii tʼáá yíní átʼéegi Gaméíliyel bidááhdóó nibéhéstsaadgo yínashineestą́ą́ʼ, áko tʼáá ánółtso díí jı̨́ ádanohtʼéhígi átʼéego Diyin God tʼáá íiyisí bídin nishłı̨́įgo bá hinishná.
4 Diné índa asdzání díí honítʼiʼgóó dayíkáhígíí* bidaʼashtłʼoʼgo awáalyaa góneʼ yah ahishnííł, áádóó atídaashʼı̨́įgo naastseed nítʼééʼ.
5 Díí aláahgo nááʼiiłniihii áádóó diné yá aląąjįʼ naazíinii tʼáá ałtso shá bił béédahózin. Éí Jew dineʼé Damáskasdi áłah nídaadleehii bichʼįʼ naaltsoos ádayiilaago shaa deiznil, áko áadi daʼoodlánígíí bidaʼastłʼǫ́ǫgo Jerúsalemjįʼ nídeeshʼishgo atídadoolnííł biniyé Damáskasgóó dah diiyá.
Paul oosdląądígíí yaa halneʼ (Acts 9:1-19; 26:12-18)
6 Ákótʼéego yishááł nítʼééʼ Damáskas tʼáá áhání hadziihgo, tsʼídá hanii shı̨́ı̨́ ałníʼníʼą́ągo, tʼáadoo hooyání yáʼąąshdę́ę́ʼ tʼáá íiyisí ayóó átʼéego shinaagóó łeʼdíídláád.
7 Áko niʼjįʼ íígoʼgo łaʼ shichʼįʼ hadzoodzíiʼgo disétsʼą́ą́ʼ, Saul, Saul, haʼátʼíishąʼ biniyé atíshíłʼı̨́?
8 Áko haasdzíiʼgo ádíshní, Bóhólníihii, háishąʼ ánítʼı̨́? Áko shichʼįʼ hanáánáádzíiʼgo ání, Shí Názarethdóó Jesus atíníłʼínígíí áshtʼı̨́.
9 Áko shił yikahígíí ałdóʼ łeʼdíídládígíí dayiiłtsą́ągo [nídaasdzííd], nidi shichʼįʼ haadzíʼígíí bizaad tʼáadoo deidiiztsʼą́ąʼ da.
10 Áko ádíshní, Bóhólníihii, haʼátʼíishąʼ baa nideeshaał? Áko Bóhólníihii shichʼįʼ haadzííʼ, Nídiidáahgo, Damáskasjįʼ dínááh, baa nidíínaałii biniyé niniʼdeeltínígíí tʼáá ałtso áadi bee nił hodoonih.
11 Áko ayóó átʼéego iʼdíídládígíí biniinaa chʼééh dishhaałgo, bił yishkah nítʼéʼígíí shílaʼ dayiiłtsoodgo dashílóosgo, Damáskasgi níyá.
12 Áadi łaʼ Ananáíyas yolyéé léiʼ, diné hodísinii, bee hazʼáanii Mózes baa deetʼáanii yikʼeh hółʼíinii nilı̨́, Jew dineʼé ákweʼé kéédahatʼínígíí tʼáá átʼé yáʼátʼéehgo baa chʼídahwiiʼaah.
13 Éí shaa níyáago shíighahgi yiizįʼgo shichʼįʼ haadzííʼ, Paul shitsilí, ííníʼı̨́ nánídleeh. Áko tʼáá áko eeshʼı̨́ nísísdlı̨́įʼgo hakʼi níghalgo hoołtsą́.
14 Áko shichʼįʼ hadzoodzíiʼgo áshijiní, Danihizhéʼé yę́ę biDiyin God yee íinízinii nił bééhodoozįįł, áko Tsʼídá Tʼáá Ákogi Ájítʼéii hwiidííłtsééł, áádóó saad bee hadziidziihii diidíítsʼı̨́ı̨́ł biniyé Diyin God nándiiłtı̨́,
15 háálá yiniłtsáanii áádóó disínítsʼą́ąʼii, éí Diyin God bá baa nahólneʼgo diné tʼáá ałtso bił bééhodíísįįł.
16 Áko kʼad haʼátʼíí biniyé naʼáhodílziid? Nídiidáahgo tó bee niʼdólzı̨́įhgo Bóhólníihii bízhiʼ yínízhíigo Diyin God bichʼįʼ ádił niʼiyínílzíʼígíí ałtso nąąh táídoogis, shizhdííniid.
Paul éí doo Jew dineʼé danilíinii bichʼįʼ yilʼaad
17 Ákódzaago Jerúsalemdi nánísdzáago kin biiʼ sohodizin bił hazʼą́ą́ góneʼ sodiszin, nítʼééʼ shił áhoodzaago
18 Bóhólníihii kóshíłníigo yiiłtsą́, Doo hodíínaʼ ánítʼı̨́, Jerúsalemdóó tsı̨́įłgo chʼínínááh, háálá shá hodíílnihígíí kweʼé doo deidínóozįįł da.
19 Áko ádíshní, Bóhólníihii, tʼáá kin biiʼ áłah nídaʼadleeh bił nahazʼą́ą́góó danoodlánígíí yah ahénil áádóó nídaníłhaalígíí tʼáá bí bił béédahózin.
20 Áádóó Stephen naa halneʼii, bidił deeznaʼ yę́ędą́ą́ʼ, shí ałdóʼ shił tʼáá ákogo shíínááł, índa dahwiisxíinii biʼééʼ bá dah yishjih nítʼééʼ.
21 Áko shichʼįʼ haadzíiʼgo ání, Dah diinááh, háálá nízaadgóó doo Jew dineʼé danilíinii bitahgóó nideeshʼaał.
Paul índa Romedóó siláo binanitʼaʼí
22 Tʼóó kónízahíjįʼ dahółtsʼą́ą́ʼ, nítʼééʼ hadadeeshghaazhgo ádaaní, Sołhé héii, diné ákótʼéhígíí nahasdzáán bikáaʼgi doo bá hazʼą́ą da! Haʼátʼíísh biniyé nijigháa doo?
23 Kótʼéego dadilwoshgo dabiʼééʼ ádaa deidiyiiltłʼíidgo dah nideiiʼadgo łeezh yáádayiighas,
24 áko siláo aląąjįʼ binanitʼaʼí nilínígíí ání, Siláo bighan góneʼ yah oohłóosgo náhodíʼnóoltsxisgo nahódídóokił, áko haniinaa dadilwoshígíí éí binahjįʼ bééhodoozįįł, níigo yee hoołʼaʼ.
25 Nidi akał tłʼóół yee hodaʼaztłʼǫ́ǫgo siláo neeznádiingo binanitʼaʼí nilı̨́įgo ákwii sizínígíí Paul ábidííniid, Daʼ Rome dineʼé nilı̨́įgo doo bá nihootʼą́ą́góósh nídínííłtsxisgo tʼáá bee ná hazʼą́?
26 Siláo neeznádiingo binanitʼaʼí éidíígíí yidiiztsʼą́ąʼgo, siláo aląąjįʼ binanitʼaʼí yaa níyáago yił hoolneʼgo ání, Haʼátʼíishąʼ baa nídinidzá? Éí diné yeeʼ Rome dineʼé nilı̨́ı̨́ lá.
27 Áko siláo aląąjįʼ binanitʼaʼí tʼáá bí haa níyáago áháłní, Bee shił hólneʼ, daʼ Rome dineʼésh nílı̨́? Áko, Aooʼ, bizhdííniid.
28 Áádóó siláo aląąjįʼ binanitʼaʼí haadzíiʼgo ání, Rome dineʼé bitahjí naaltsoos bee ádił ídlíinii tʼóó ahayóí bą́ą́h ílı̨́įgo naháłniiʼ. Nítʼééʼ Paul ádííniid, Nidi shí tʼéí tʼáá Rome dineʼé nishłı̨́įgo shiʼdizhchı̨́.
29 Tʼáá áko nidahodíʼnííłkid yę́ę hatsʼákai, áádóó siláo aląąjįʼ binanitʼaʼí nilíinii éí Rome dineʼé łaʼ jílı̨́ı̨́ lágo hweʼaztłʼónígíí yaa ákoniizı̨́įʼgo yiniinaa násdzííd.
Jew dineʼé yá naazíinii bidááhdę́ę́ʼ Paul nihodeidlóóz
30 Nidi tsʼídá biniinaa Jew dineʼé hakʼi dahodiiʼánígíí shił bééhodoozįįł nízingo, biiskání kʼééʼhóóʼahgo, aláahgo náádaʼiiłniihii índa diné ándahaʼáii, Tʼáá ánółtso áłah hohłeeh, yiłníigo yee hoołʼaʼ, áko ákóyaa Paul yił níʼáazhgo áadi hadááhdóó niinílóóz.
Footnotes
^ Jesus dayoodlánígíí ááhyiłní.
