Acts 23:1-35
23 Áko Paul éí diné ándahaʼáii yéego yiníłʼı̨́įgo ádííniid, [Shahastóí áádóó] shikʼisóó, Diyin God binááł yáʼátʼéhígi ááshníłígíí díí jı̨́įdi doo łaʼ shiʼdiiłʼáa da.
2 Áko aláahgo nááʼiiłniihii Ananáíyas éí Paul yíighahgóó naazínígíí, Paul bizadzołtsʼinéii, yidííniid.
3 Nítʼééʼ Paul éí Ananáíyas áyidííniid, Ináʼástłʼinii łigaigo yishdléezhii nílíinii, Diyin God atínidoolííł! Bee hazʼáanii bikʼehgo shaa nídíítʼįįłgo dah sínídáa nidi, daʼ ákoósh bee hazʼáanii doo bídéétʼiʼgóó shizazdooltsʼı̨́įłgo bee hwiiniłʼaʼ?
4 Nítʼééʼ ákǫ́ǫ́ naazínígíí ádadííniid, Daʼ Diyin God aláahgo yichʼįʼ nááʼiiłniihiísh yínídziih?
5 Áko Paul ání, Shikʼisóó, aláahgo nááʼiiłniihii jílínígíí doo shił bééhózin da lá, háálá kóníigo Diyin God bizaad bee akʼeʼashchı̨́, Nidineʼé binanitʼaʼí baaʼihgo doo bá hadíídzih da.
6 Nidi diné ándahaʼáii łaʼ Sádjusii danilı̨́įgo, łaʼ Férisii danilı̨́įgo Paul bił bééhoozingo, yéego yichʼįʼ haadzíiʼgo ání, Shikʼisóó, Férisii danilíinii nishłı̨́ áádóó Férisii biyázhí nishłı̨́; daʼneeznáádę́ę́ʼ nááʼdidoojahgo bee shił chohooʼíinii biniinaa shaa hwiinítʼı̨́.
7 Áko ákózhdííniidgo, Férisii danilíinii índa Sádjusii danilíinii ałghadaʼditʼáahgo yaa nídiikai, áko áłah nilínígíí ałtsʼáskai.
8 Háálá Sádjusii danilíinii, Daʼneeznáádę́ę́ʼ doo náádiʼyiijeeh da, áádóó diyingo naalʼaʼí ádin, índa níłchʼi danilínígíí ałdóʼ ádin, daaní, nidi Férisii danilíinii éí, Tʼáá aaníí éí dahólǫ́, daaní.
9 Áádóó ayóó átʼéego hahodíídláád, áko bee hazʼáanii yíndaʼniłtinii Férisii yichʼijí danilíinii łaʼ saał nídiijéeʼgo ádaaní, Diné doo bąąhági áátʼįįdgóó nihił béédahoozin. Níłchʼi nilíinii, éí doodaiiʼ diyingo naalʼaʼí łaʼ bichʼįʼ haadzíiʼgo [haaʼíshąʼ Diyin God tʼáadoo bichʼįʼ nideiildzilí doo].
10 Áko ayóó átʼéego hahodíídláadgo siláo aląąjįʼ binanitʼaʼí nilíinii Paul nideiyiyóníísh lágo nízingo yinásdzííd áádóó, Nílááh, ákóyaa dohkáahgo baghanołteehgo siláo bighandi bił yah oohkááh, níigo yee hoołʼaʼ.
11 Áko tʼáá éí bitłʼééʼ Paul éí Bóhólníihii hwíighahgi yiizįʼgo áháłní, Chánah nílı̨́, háálá tʼáá Jerúsalemgi shá hwíínílneʼígi átʼéego, Romedi ałdóʼ tsʼídá shá hodíílnihí.
Paul hodiyoolyéełgi honahatʼá
12 Hoosʼįįdgo Jew dineʼé łaʼ ahíikaigo, Tʼáadoo Paul dasiilyéhí doo náádaʼdiidı̨́įł da, doo nidi náádaʼdiidlı̨́įł da, daaníigo ádee hadadeesdzíiʼgo nináʼádadeestʼą́.
13 Dízdiindóó baʼaan yiltʼéego kótʼéego dahodeezʼą́.
14 Áko aláahgo náádaʼiiłniihii índa diné yá aląąjįʼ naazíinii yaa yíkaigo ádaaní, Paul tʼáadoo dasiilyéhí doo anáádaʼdiilnah da, dadiiʼníigo ádee hadadeedzíiʼgo nináʼádadeetʼą́.
15 Éí bąą kʼad nihí índa diné ándahaʼáii Paul hazhóʼó baa nínáádadóohtʼįįł ádahodołʼı̨́įgo, siláo aląąjįʼ binanitʼaʼí, Paul bił nihaa dííʼash, dabidohníigo bichʼįʼ haneʼ óhłééh. Áko tʼáadoo áadi jígháhí, dahodiyiilyééł biniyé hashtʼeʼádadíníilzin doo.
16 Nidi Paul bádí biyáázh Paul baa nidiʼyooldahígíí yiyííniiʼ, áko siláo bighan góneʼ yah ííyáago Paul yił hoolneʼ.
17 Áko Paul éí siláo binanitʼaʼí łaʼ hágo yidííniidgo ííłní, Díí dinééh siláo aląąjįʼ binanitʼaʼí bił baa dííʼash, háálá tʼáadoo leʼé yee yił hodoolnih.
18 Áko éí yił dah diiʼáázh áádóó siláo aląąjįʼ binanitʼaʼí yił yaa níʼáazhgo áyidííniid, Paul awáalyaaí nilíinii hágo shidííniid, nítʼééʼ díí dinééh tʼáadoo leʼé yee nił hodoolnih, niłníigo nichʼįʼ yił shideesʼaʼ.
19 Áko siláo aląąjįʼ binanitʼaʼí hálaʼ yiyiiłtsoodgo tʼáá sahdii hoł niníʼáazhgo áháłní, Haʼátʼíishąʼ bee shił ahoniʼnilneʼ?
20 Áko ání, Jew dineʼé łaʼ nidahaʼáago ádaaní, Paul hazhóʼó ninááhódídóokiłígíí tʼóó bikʼijįʼ siʼą́ągo yiską́ągo diné ándahaʼáii bichʼįʼ Paul bił dííʼash daniłní.
21 Nidi tʼááká bee baʼdóóʼááł lágo, háálá dízdiindóó baʼaan yiltʼéego, Paul tʼáadoo dasiilyéhí tsʼídá doo náádaʼdiidı̨́įł da, doo nidi náádaʼdiidlı̨́įł da daaníigo, ádee hadadeesdzíiʼgo hondahazʼą́, áko kʼad lą́ didííniiłígíí yibaʼ hashtʼeʼádadólzin.
22 Áko siláo aląąjįʼ binanitʼaʼí, Díidí bee shił hwíínílneʼígíí tʼááká diné łaʼda bee bił hóólneʼ yíilaʼ, yiłníigo éí dinééh yééʼníłniiʼ.
Fííliks naatʼáanii nilíinii bichʼįʼ Paul biʼdeelʼaʼ
23 Áádóó siláo neeznádiingo binanitʼaʼí naaki hágo yidííniidgo ííłní, Siláo naakidi neeznádiin, áádóó siláo łı̨́ı̨́ʼ nidabiyéhígíí tsostsʼidiingo, índa tsiidétáán nideijaahii naakidi neeznádiingo, hózhǫ́ hiłiijı̨́įʼgo Sesaríyajįʼ doonééł biniyé hashtʼeohłééh.
24 Índa łı̨́ı̨́ʼ ałdóʼ łaʼ bikʼi dah adoohnił, éí Paul booyéeł doo, áko baa ádahołyą́ągo yáʼátʼéehgo Fííliks naatʼáanii nilíinii bił baa doohkah.
25 Áádóó kótʼéego naaltsoos áyiilaa:
26 Shí Kládiyas Lísiyas nishłíinii, Fííliks naatʼáanii ił nílíinii kʼé nidishní.
27 Díí hastiin éí Jew dineʼé łaʼ dahoołtsoodgo hodaʼniiłhı̨́, nítʼééʼ Rome dineʼé jílı̨́įgo shił bééhoozingo siláo bił haa niikaigo bighadahosiiltı̨́.
28 Áádóó biniinaa hakʼi dahodiiʼánígíí shił bééhodoozįįł biniyé diné ándahaʼáii bichʼįʼ hoł níʼáázh.
29 Nítʼééʼ tʼáá bí yee nahasʼáanii łaʼ yinahjįʼ hakʼi dahodiiʼą́ą́ lágo shił bééhoozin, nidi biniinaa hodiyoolyéełgi, éí doodago biniinaa yah ahodiʼdooltʼeełgi tʼáadoo łaʼ bee há haʼoodzíiʼ da.
30 Áko hodiʼyoolyéełgo bee honahastʼánígíí bee shił hóóneʼgo, tʼáá áko akǫ́ǫ́ nichʼįʼ ahóółʼaʼ, áko hakʼi dahodiiʼaahii yee hakʼi dahodiiʼáanii tʼáá ninááł yee hadahidoodzih dishníigo bee haasdzííʼ. [Kʼadí, tʼáá ákótʼéhí dooleeł.]
31 Ákohgo siláo tʼáá bee bichʼįʼ haʼoodzííʼ yę́ęgi átʼéego, tłʼéeʼgo Paul yił dah diikaigo Antípatris hoolyéegi yił níná.
32 Áádóó biiskání siláo bighangóó anídahaasʼnáago łı̨́ı̨́ʼ nidabiyéhígíí tʼéiyá hoł dah náádiiʼná.
33 Éí Sesaríyagi nínáago éí naaltsoos naatʼáanii yaa deistsoozgo, Paul ałdóʼ yichʼįʼ yił nidaaskai.
34 Áádóó naatʼáanii éí naaltsoos yiyííłtaʼgo, Háí kéyahdę́ęʼshąʼ ánítʼı̨́? hodííniid. Áko Silíshiyadę́ę́ʼ ájítʼı̨́įgo bił bééhoozingo
35 áhodííniid, Nikʼídahaʼáahii ałdóʼ yíkaigo índa, níídéestsʼįįł. Áko, Hérad nantʼá bił hazʼą́ągi haa áháyą́ą doo, níigo yee hoołʼaʼ.
