Acts 27:1-44
27 Áko Ítaligóó nihił adooʼoł bee nihootʼą́ągo, Paul índa náánáłaʼ awáalyaaí danilı̨́ı̨́ léiʼ, siláo neeznádiingo binanitʼaʼí Júliyas yolyéego yaa deiznil, éí Agástas dah yikahdóó nilı̨́.
2 Áko Adramítiyamdę́ę́ʼ tsinaaʼeeł léiʼ, Éízha kéyah biniiłtʼaagóó deezʼéél lágo biih yiikai, łaʼ Aristárkas joolyéé léiʼ, Masedóniya dineʼé Thesalonáíkadóó diné jílı̨́įgo éí nihił jookahgo dah daʼdiilʼéél.
3 Biiskání Sáídandi nihił aníʼéél, áko Júliyas éí Paul yá honíłdleeʼgo yichʼįʼ bá áhwiinítʼı̨́ʼígo, dahakʼisóó haa ádahalyą́ą doo biniyé yichʼįʼ hoʼníłniiʼ.
4 Áádóó dah náádaʼdiilʼéelgo nihidááhdę́ęʼgo níyolígíí biniinaa, Sáípras bíighahgóó náhookǫsjígo chʼídasiilʼéél.
5 Índa Silíshiya áádóó Pamfíliya bibąąhgóó tónteelígíí tséʼnaa nihił niʼníʼéelgo kéyah Líshiyagi, Máíra hoolyéego kin haalʼáá léiʼgi nihił aníʼéél.
6 Ákweʼé siláo neeznádiingo binanitʼaʼí Alezáandriyadę́ę́ʼ Ítaligóó tsinaaʼeeł deezʼéél léiʼ yikʼíníyáago, éí yiih nihíínil.
7 Tʼáá tąądee nihił ooʼołgo ląʼí yiską́ągo hojoobáʼígo Náídas tʼáá bichʼįʼíjįʼ nihił niʼníʼéél, áádóó níyol tʼą́ą́ʼ dah nihiniłígíí biniinaa, Kríit kéyah bíighahgóó shádiʼááhjígo, Salmónii bichʼįʼgo nihił aníʼéél.
8 Hojoobáʼígo Kríit bíighahgóó nihił ooʼołgo, Táłtsʼáʼiiʼeeł Yáʼáhootʼééh hoolyéé léiʼgi nihił aníʼéél, éí Lasíya kin haalʼáádóó tʼáá áyídígi.
9 Áko nízaadgóó nihitsʼá hooldoígíí biniinaa, índa hodílzingo doo adánígíí bighá hooshzhiizhgo biniinaa, ooʼołígíí bá nahodítʼé hazlı̨́įʼgo, Paul hachʼįʼ haadzíiʼgo
10 áhodííniid, Hastóí, ooʼołígíí bichʼįʼ nahodiyooʼnaał áádóó ląʼígóó yóóʼidiʼyoodił, tsinaaʼeeł índa biyélígíí doo tʼáá éí tʼéiyá ááhdishníi da, nidi nihí ałdóʼ nihá nahodítʼéego shił bééhózin.
11 Nidi siláo neeznádiingo binanitʼaʼí, Paul yee haadzíʼígíí doo yiyíistsʼą́ąʼ da, nidi tsinaaʼeeł neiloʼii índa bitsinaaʼeeł ílíiniijígo aláahgo yiyíistsʼą́ą́ʼ.
12 Áko táłtsʼáʼiiʼeełígi doo yáʼátʼéehgo hóhááh átʼéégóó biniinaa diné agháʼánéelą́ąʼgo, Fííniks hoolyéedi tʼáá jókááh átʼéé ládą́ą́ʼ nihił dah náádiʼdooʼołgo áadi danihidoohah, dadííniid. Éí Kríit bibąąhgi táłtsʼáʼiiʼeełgo shádiʼááh áádóó eʼeʼaah bitaʼgi ąą áhootʼé.
Táłkáaʼgi ayóó átʼéego deeyol
13 Áádóó shádiʼááhdę́ęʼgo hazhóóʼógo deeyolgo kʼad nihá ashja hoodzaa dazniizı̨́įʼgo, béésh nidaazii tsinaaʼeeł bee dah náhátłʼóhígíí iih nídadziisʼnilgo Kríit kéyah tʼáá bibąąhgóó nihił aníʼéél.
14 Nidi tʼáadoo hodinaʼí kéyah bichʼįʼdę́ęʼgo náhookǫs índa haʼaʼaah bitaʼdę́ęʼgo níyoltsoh yolyéii nihíswod,
15 áko tsinaaʼeeł tʼáá íiyisí binadéeyolgo doo bidáahjįʼ adóʼeeł áhoodzaa da, áko tʼóó baa ádasidiitʼą́ągo tʼáá bí nízingóó nihił nihiníʼéél.
16 Kéyah áłtsʼíísígo táyiʼdę́ę́ʼ hááʼáá léiʼ, Kláada hoolyéego, éí shádiʼááhjígo nihił ooʼołgo, tʼáá hazhóʼó nihichʼįʼ nidahwiisʼnáaʼgo tsinaaʼeeł yázhí áchʼįʼ nidadeedzı̨́ı̨́z,
17 áko yikáaʼjįʼ hadeizloʼ, ákohgo tsinaaʼeeł bił yiʼołii ałnííʼ gónaa yikʼídaʼdeezdizgo ałchʼįʼ yedaʼaztłʼǫ́, índa Sírtis hoolyéejįʼ níyolígíí tsinaaʼeeł nihił nahoditsʼǫʼ iidooʼááł dóʼóshłí daniizı̨́įʼgo tsinaaʼeeł bitʼaʼ nitsaaígíí nideiʼdiiłtsooz, kótʼéego nihił aníʼéél.
18 Nítʼééʼ níyol éí tsinaaʼeeł tʼáá íiyisí nihił nayiiłhango, biiskání tsinaaʼeeł biyéél taah dayiiníiłgo yaa nídiikai,
19 áádóó tágí jı̨́ı̨́ góneʼ tsinaaʼeeł bee binaʼanish nidi tʼáá bí hadadayiistłʼííd.
20 Áádóó jı̨́honaaʼéí índa sǫʼ doo deiiltsééhgóó ląʼí yiską́, áko doo hashtʼéʼégo nihee níyolígíí bąą yisdáhidiikah yę́ęgi doo nihił chodahoozʼįįd da.
21 Áko tʼáadoo daʼjiyání ląʼí yiską́ągo, Paul haníiʼgi yiizįʼgo ádííniid, Shoo hastóí, dashidisootsʼą́ąʼgo Kríitdóó doo nihił dah adiiʼéel da doo nítʼééʼ, áko doo kótʼéego nihichʼįʼ nahwiisʼnáaʼ da doo nítʼééʼ, áádóó doo yóóʼadaʼiyeeʼnil da doo nítʼééʼ.
22 Ákondi kʼad chánah danohłı̨́ nihidishní, háálá łaʼda nihitahdóó doo yóóʼadootłishí da, nidi tsinaaʼeeł tʼéiyá ałtso nihidooltǫǫł.
23 Háálá tłʼéédą́ą́ʼ Diyin God bííʼ nishłíinii áádóó dinisinii, bidiyingo naalʼaʼí shíighahgi yiizįʼ,
24 áádóó áshíłní, Paul, tʼáadoo nił yéʼí; Síízar tsʼídá tʼáá bidááhdóó yidíízįįłí; jóʼakon, bił nił ooʼołígíí Diyin God tʼáá ałtso neinínil.
25 Éí bąą chánah danohłı̨́, hastóí, háálá tʼáá bee shichʼįʼ haʼoodzííʼ yę́ęgi átʼéego ádooníiłgo, Diyin God wooshdlą́.
26 Nidi łaʼ kéyah táyiʼ siʼánígíí bikʼídaʼdiilʼoł, jidííniid.
27 Dı̨́ı̨́ʼtsʼáadah tłʼééʼ aleeh góneʼ, Éídriya tónteel biyiʼ nihił naanídíʼołgo, tłʼéʼííłníiʼgo shaʼshin, nidaʼałʼeełii kéyah léiʼ baa daʼniilʼéelgi átʼé daniizı̨́ı̨́ʼ.
28 Áko tó íídéetą́ąʼgi yídaʼnééłʼąądgo neeznádiindóó baʼaan naadiindi ké ahą́ą́h díʼáá lá, áádóó tʼáá áháníjįʼ ninááʼníʼéelgo, yínáádaʼnééłʼąąd, nítʼééʼ náhástʼédiindi ké ahą́ą́h díʼáá lá.
29 Áko tsétah góneʼ nihił iʼdooʼołígíí bééhóódzíidgo biniinaa, béésh nidaazii tsinaaʼeeł bee dah náhátłʼóhígíí dı̨́įʼgo tsinaaʼeeł bikéédę́ę́ʼ tah deiznilgo hwiidoolʼįįłígíí laanaa daniizı̨́ı̨́ʼ.
30 Nítʼééʼ nidaʼałʼeełii, tʼáá nanitʼinee, táłtsʼádadiilʼoł daniizı̨́ı̨́ʼ, áko tsinaaʼeeł bidááhdę́ę́ʼ béésh nidaazii bee tsinaaʼeeł dah dayiitłʼó ádahodilʼı̨́įgo tsinaaʼeeł yázhí hadadeizloʼ.
31 Paul éí siláo neeznádiingo binanitʼaʼí áádóó siláo danilíinii áyidííniid, Díí diné doo tsinaaʼeeł tʼáá yiiʼ naháaztą́ą́góogo, tsʼídá doo yisdádoohkah da.
32 Áko siláo tłʼóół kʼídayiizhgizhgo tsinaaʼeeł yázhí bidah aaltsʼid.
33 Kʼadę́ę haiłkaahgo tʼáá ádzíłtso chʼiyáán łaʼ dazhdooyı̨́įłgo Paul yaa náhooskan kóníigo, Kʼad dı̨́ı̨́ʼtsʼáadah yiiłkaah; tʼóó átʼah danohsingo tʼáadoo daʼohsání.
34 Éí bąą daʼdoohsı̨́įłgo baa nídanihooshkąąh; éí bee danihidziilgo yisdádoohkah, háálá tʼáá ánółtso nihitsiiʼ tʼááłáʼí nidi doo łaʼ yóóʼadoodił da.
35 Kótʼéego haadzíiʼgo, bááh néidiiʼą́, áko tʼáá ałtso dabinááł Diyin God yichʼįʼ ahééh niizı̨́ı̨́ʼ índa niyiiztiʼgo, yiʼniiyą́ą́ʼ.
36 Áko índa tʼáá ałtso chánahgo tsíńdadeezkéezgo bí ałdóʼ daʼííyą́ą́ʼ.
37 Tʼáá áníiltsogo naakidi neeznádiindóó baʼaan tsostsʼidiindóó baʼaan hastą́ą́h niiltʼéego tsinaaʼeeł nihił yiʼoł nítʼééʼ lá.
38 Áko tʼáá ałtso hwiih daazlı̨́įʼgo, tłʼoh naadą́ą́ʼ taah dayiistłʼíidgo tsinaaʼeeł tʼáá ászólí silı̨́ı̨́ʼ.
Tsinaaʼeeł neheestǫʼ
39 Nítʼééʼ hoosʼįįdgo, éí kéyahígíí doo yéédahósin da, nidi tó tʼáá bikʼi hooteelgo táłtsʼá hiníyı̨́ léiʼgi dayiiłtsą́, áko tʼáá bohónéedzą́ą́ ládą́ą́ʼ ákóneʼ adaʼdiilʼoł daaníigo yaa nídaastʼįįd.
40 Áko béésh nidaazii tsinaaʼeeł bee dah nídahatłʼóhígíí bitłʼóól dayiizhgizhgo tʼáá ákǫ́ǫ́ táyiʼ naaznilgo ádayiilaa, áádóó bee naʼadloʼí bitłʼóól kʼedaʼizʼah, índa alą́ąjįʼ tsinaaʼeeł bitʼaʼ níyol bá deesbaalgo, tábąąhjįʼ dah daʼdiiłʼéél.
41 Nidi tó naakidę́ę́ʼ ahidiilı̨́įgo séí ahanihiʼeeł góneʼ nahoditsʼǫʼ adaʼasʼéél, áko tsinaaʼeeł bidááhjígo łeehíjilgo doo nahaʼnáa da silı̨́ı̨́ʼ, nidi éí tó yéego yilkʼoołígíí biniinaa tsinaaʼeeł bikéeʼjigo neheestǫʼ.
42 Awáalyaaí łaʼ táłtsʼádoołkǫ́ǫłgo yóóʼadoolwoł dóʼóshłí danízingo, siláo éí awáalyaaí nidootsiłgo yindahazʼą́,
43 nidi siláo neeznádiingo binanitʼaʼí Paul yisdádeeshtééł nízingo, dahodeezʼánígíí yitsʼą́ą́ʼ yineestłʼah. Áádóó kóníigo yee hoołʼaʼ, Nidaʼołkǫʼígíí áłtsé hadah dahidołyeedgo táłtsʼádaʼiyołkǫ́ǫ́h,
44 índa łaʼ tʼéí tsin neheeshjííʼ bee áádóó tsinaaʼeeł bitsʼádahaastǫʼígíí bee táłtsʼáhóhkááh. Ákódadziidzaago tʼáá ádzíłtso tábąąhjįʼ yisdájookai.
