Acts 28:1-31
28 Yisdéiikaigo índa, éí kéyah táyiʼ siʼánígíí Málta hoolyéego nihił béédahoozin.
2 Nítʼééʼ ákwii kéédahatʼínígíí tʼáá íiyisí nihichʼįʼ kʼé danidzin, tʼáá áníiltso kʼé danihóʼníigo nihá dideideeshjééʼ, háálá nihihoníłtą́ągo deeskʼaaz.
3 Paul éí chizh náyiizláaʼgo deidíínil, nítʼééʼ hadoh biniinaa kǫʼ biyiʼdę́ę́ʼ tłʼiish hachʼįʼ dah diilwodgo hálaʼ yąąh dah neeshjı̨́ı̨́d.
4 Áko tłʼiish hálaʼ yidineeshghashgo dahoołtsą́ągo ałchʼįʼ hadaasdzíiʼgo ádaaní, Doo doodagóogaʼ díí hastiin diné yiyiisxíinii nilı̨́ı̨́ lá, azhą́ tónteel bitsʼą́ąjįʼ yisdájííyáa nidi tsʼídá tʼáá kʼééhodiʼdoolnííł lá.
5 Ákondi tsídziʼjįʼ hálaʼ jíígháadgo tłʼiish tʼáadoo haa dahoolaa da.
6 Jidínóolyoł, éí doodago tʼáadoo hooyání naaʼazhdootłishgo dazdootsaał shaʼshin danízingo chʼééh naháaztą́, nidi nízaadgóó bee dahodíínaʼ nidi tʼáadoo haa dadziidzaagóó bił béédahoozingo, łahgo átʼéego tsíńdadeezkééz, áko, Diyin jílı̨́ı̨́ lá, dadííniid.
7 Éí kéyah táyiʼ siʼánígíí bikáaʼgi kéédahatʼíinii binanitʼaʼí nilíinii, Pábliyas yolyéii doo nízaadi bikéyah da lá. Kʼé nihidííniidgo tááʼ yiską́ąjįʼ baʼałkʼee nahísíitą́ą́ nítʼééʼ.
8 Pábliyas bizhéʼé bitah honeezgaigo bitsą́ hodiniihgo sitı̨́ı̨́ lá, áko Paul hoł yah ííyáago há sodoolzin índa hakʼi dah deesniiʼgo náázdiidzá.
9 Ákódzaadóó bikʼijįʼ diné náádaałaʼ éí kéyah bikáaʼgi bąąh nidahałniihígíí nidahaaskaigo náádabidiʼyiiljééʼ.
10 Éí bił daniidlı̨́įgo tʼáadoo leʼé tʼóó ahayóí nihaa dayiiznil, áko kʼadę́ę nihił dah nááʼdiiʼeełgo tʼáá haʼátʼíhída tʼáá ákónéehee chodeidooʼįįłii nihá iih dayiiznil.
Romedi Paul níyá
11 Ákweʼé tááʼ nihee nídeezidóó bikʼijįʼ éí kéyah táyiʼ siʼánígi Alezáandriyadę́ę́ʼ tsinaaʼeeł łaʼ ákweʼé bééhai léiʼ Naakií* bidiʼnínígíí beʼelyaago bidáahjigo dah nootʼááł léiʼ nihił dah diiʼéél.
12 Sírakoosgi nihił aníʼéelgo ákweʼé tááʼ danihiiską́.
13 Áádóó naanáházhahgo, Rííjiyam hoolyéedi nihił aníʼéél, áádóó tʼááłáʼí yiską́ągo shádiʼááhdę́ę́ʼ deeyolgo náábiiskání Putíyoliigi nihił aníʼéél.
14 Ákweʼé ałkʼisóó danilíinii łaʼ bikʼíniikaigo baʼałkʼee tsostsʼid danihiidoołkáałgo yaa nídanihooskan. Áko índa Romedi niikai.
15 Áadi ałkʼisóó kéédahatʼínígíí, yiikahígíí dayííniiʼgo, Ápiyas hoolyéego nidaʼiiniih bá hazʼą́ągi áádóó Daʼnijahígíí Táaʼgo bá hazʼą́ą́ léiʼgi nihidááh heeskai. Éí Paul yiyiiłtsą́ągo, Diyin God yichʼįʼ ahééh niizı̨́įʼgo chánah násdlı̨́ı̨́ʼ.
16 Áádóó Romegi niikaigo, [siláo binanitʼaʼí éí awáalyaaí danilínígíí siláo aląąjįʼ binanitʼaʼí yeinínil,] nidi Paul éí tʼáá sahdii siláo baa áhályánígíí yił bighan doogo baa deetʼą́.
Romegi Paul halneʼ
17 Ákódzaadóó tááʼ yiską́ągo Paul éí Jew dineʼé ákweʼé kéédahatʼínígíí yá aląąjįʼ naazíinii hágo yidííniid, áko baa áłah silı̨́įʼgo áyidííniid, Shikʼisóó, azhą́ diné bichʼįʼ doo bąąhági ásdzaa da nidi, áádóó danihizhéʼé yę́ę biʼéʼélʼįʼ doo bikʼijįʼ nishłı̨́į da nidi, Jerúsalemdę́ę́ʼ awáalyaaí nishłı̨́įgo Rome dineʼé bílákʼee shiʼdooltı̨́.
18 Áko íídą́ą́ʼ áadi nidashídééłkidgo, biniinaa shidiʼyoolyéełii tʼáá ádingo, tʼóó hwéédadidiichił daniizı̨́ı̨́ʼ.
19 Nidi Jew dineʼé dooda daaníigo hadaasdzíʼígíí biniinaa, Síízar shaa nídóotʼįįł, dishníigo yichʼįʼ ashídeizyil, azhą́ shidineʼé haʼátʼíhígíida bee bikʼi hodideeshʼáałii ádin nidi.
20 Éí bąą danihiideestséełgo ałchʼįʼ hadadiidzih biniyé hágo danihidííniid, háálá Ízrel dineʼé nidayólíii biniinaa díí béésh daʼahólzhaʼí bee dashiʼdiistłʼǫ́.
21 Áko ádahodííniid, Judíyadę́ę́ʼ naaltsoos naa halneʼgo doo łaʼ nihaa nínaʼ da, áádóó nihidineʼé áádę́ę́ʼ neheeskaígíí nidi łaʼ doo ákwii ánítʼéégóó doo naa chʼídahazʼą́ą da.
22 Nidi bee nitsíníkeesii ná dadidiitsʼı̨́ı̨́ł daniidzin, háálá díí nahadlá bee ałtsʼáʼáldah haʼnínígíí tʼáá ałtsogóó dooda dahaʼníigo bee yádaatiʼgo nihił béédahózin.
23 Áko há nidahazʼą́ bijı̨́ı̨́ góneʼ, dzizdáagi tʼóó ahayóí haa áłah silı̨́ı̨́ʼ. Abínídóó iʼííʼą́ąjįʼ tʼáá bééhózínígo Diyin God bee bóhólníihgo bił hazʼáanii bee bił hojilneʼgo, Jesus éí Christ nilı̨́įgo bee bíniʼ bá ádahozhdoolííł biniyé bee hazʼáanii Mózes baa deetʼáanii índa Diyin God yá dahalneʼii yę́ę bindaaltsoos binahjįʼ tʼáá íiyisí nazneeztą́ą́ʼ.
24 Áko łaʼ bee hadziisdzíʼígíí dayoosdląąd, łaʼ éí tʼáadoo dayoosdląąd da.
25 Áko tʼáá bí ałtsʼákahgo Paul díí yee hanááhaasdzííʼdóó bikʼijįʼ tʼóó dah nídahidiikai, Tʼáá aaníí Níłchʼi Diyinii kóníigo, Aizéíyah Diyin God yá halneʼii danihizhéʼé yę́ę yichʼįʼ yee haadzííʼ!
26 Díí diné baa nínáahgo kóbidiní:
Tʼáá aaníí dadidoohtsʼı̨́įł nidi, tsʼídá doo bikʼidadiʼdoohtı̨́įł da,áádóó tʼáá aaníí daahʼı̨́į dooleeł nidi, tsʼídá doo deidoołtséeł da.
27 Háálá díí dineʼé bijéí daneelkʼah,áádóó jééʼádahodeeskał, índa daniilchʼiil;doodago éí dabinááʼ yee daʼiidoołtsééł,áádóó dabijaaʼ yee dadiʼdootsʼı̨́ı̨́ł,índa bijéí yee akʼidadiʼdootı̨́ı̨́ł,áko shichʼįʼ ninádookahgo náádabidideeshłááł.
28 Áko díí Diyin God bitsʼą́ą́dę́ę́ʼ bee yisdáʼiildéehii éí doo Jew dineʼé danilíinii bichʼįʼ ályaaígíí nihił béédahózin leʼ; éí dayíistsʼą́ąʼ doo.
29 [Nítʼééʼ díí saad bee hadzoodzíiʼgo, Jew dineʼé tʼáá íiyisí ałghadaʼditʼáahgo anáhaaskai.]
30 Áko Paul ákwii naaki nááhaijįʼ tʼáá bí yikʼé asłáago bighan nítʼééʼ, áko baa dahakáhígíí tʼáá ałtso bił yáʼátʼééh.
31 Diyin God bee bóhólníihgo bił hazʼáanii yaa halneʼ áádóó tʼáadoo bahatʼaadí Bóhólníihii Jesus Christ yaa halneʼ índa tʼáadoo niitłʼahí yee naʼnitin nítʼééʼ.
Footnotes
^ Naakií éí Kástar áádóó Pálaks bee wójí. Táłkááʼ siláago bidiyin átʼéé nítʼééʼ.
