Acts 4:1-37
4 Diné tʼah bichʼįʼ yájíłtiʼgo, náádaʼiiłniihii índa kin biiʼ sohodizin bił hazʼą́ągi siláo binanitʼaʼí áádóó Sádjusii danilíinii hachʼįʼ niikai,
2 háálá, Daneeznáanii Jesus yee náádidoojah, jiníigo diné nazneeztą́ʼígíí tʼóó yá dadoosnih.
3 Tʼáá áko iʼííʼą́ągo biniinaa, tʼóó dahoołtsoodgo hoosʼįįdjįʼ awáalyaa góneʼ yah adahaznil.
4 Nidi ląʼí saad deidiiztsʼą́ʼígíí daʼoosdląąd, áko daʼoosdląądígíí ashdladi mííl daatsʼí yiltʼé silı̨́ı̨́ʼ.
5 Biiskání diné yinanitʼaʼí danilíinii áádóó diné yá aląąjįʼ naazíinii índa bee hazʼáanii yíndaʼniłtinii Jerúsalemgi áłah silı̨́ı̨́ʼ.
6 Aláahgo nááʼiiłniihii Ánas áádóó Kéíyafas índa John áádóó Alezáander, índa aláahgo nááʼiiłniihii bikʼéí danilíinii tʼáá ałtso ałdóʼ yił áłah silı̨́ı̨́ʼ.
7 Áko áłah silı̨́ʼígíí biníiʼgi nidahazhʼeezhgo, Haʼátʼíí bee adziilii shı̨́įshąʼ, índa háishąʼ bízhiʼ binahjįʼ díí baa nishooʼáázh? daaníigo nidahódééłkid.
8 Áko Peter, Níłchʼi Diyinii biiʼ hadeezbingo, hachʼįʼ haadzíiʼgo ání, Diné binanitʼaʼí danohłíinii áádóó Ízrel dineʼé bá aląąjįʼ nisoozíinii,
9 diné naaljı̨́ı̨́d nilı̨́ı̨́ nítʼééʼ yę́ę díí jı̨́ yáʼátʼéhígi ábiʼdiilyaago áádóó hadaałtʼé ánábiʼdiilyaago éí bíńdanihídółkidgo,
10 áko tʼáá ánółtso nihił béédahodoozįįł, áádóó Ízrel dineʼé tʼáá ałtso bił béédahodoozįįł, jó, Názarethdóó Jesus Christ bízhiʼ bee, tʼáá éí tsin ałnáoszid bikáaʼjįʼ bił adaʼsoołkaal yę́ę, nidi daaztsą́ą́dę́ę́ʼ Diyin God náábidiisáhígíí bibee adziilii bee díí diné kǫ́ǫ́ nihidááhgóó doo átʼéhígóó sizı̨́.
11 Díí tséhígíí* lą́ą, éí nihí kin ádaałʼíní doo danoozı̨́įʼ da yę́ę átʼé, nidi tʼáá éí tsé bee naanáʼástłʼinii silı̨́ı̨́ʼ.
12 Náánáłaʼ bee yisdáʼdoodáałii doo nááhódlǫ́ǫ da, háálá yádiłhił biyaagi yízhí náánáłaʼ bee yisdáhiikáah dooleełii tsʼídá doo łaʼ nihokááʼ dineʼé baa náádeetʼą́ą da.
13 Ákohgo Peter índa John doo hazhóʼó íhoołʼą́ąʼii índa tʼáá bóhólníhígíí nilı̨́į nidi, doo yistiʼgóó yáłtiʼígíí yaa ákodaniizı̨́įʼgo, yikʼee tʼóó bił adahóóyóí, áko Jesus bił nijikai nítʼéeʼgo bił béédahoozin.
14 Áko diné náábiʼdiilzáhígíí bił nidzizı̨́įgo deiníłʼı̨́įgo, tʼáadoo yee yaa nídaotʼįįhí da.
15 Nidi tʼáá bí tʼéiyá haa nídadóotʼįįł biniyé diné ándahaʼáii naháaztánídóó áłtsé chʼínóhʼaash daaníigo yee dahoołʼaʼ,
16 áko ádaaní, Díí dinéshąʼ haa dadiilnííł? Háálá tʼáadoo bahatʼaadí bee ééhózinii yaa naazhʼázhígíí Jerúsalemgi kéédahatʼíinii tʼáá ałtso bił béédahoozin, áko doo ákótʼée da doo dadóneʼ átʼée da.
17 Nidi diné bitahgóó doo nihididootʼih da biniyé, Kodóó yízhíhígíí doo łaʼ bee bichʼįʼ hanáádoohdzih da, dadiiʼníigo bił yééʼ ádahodiilnííł, dadííniid.
18 Áádóó hágo dahodííniidgo, Jesus bízhiʼ tsʼídá doo bee hanáádoohdzih da índa doo bee nináádíʼnóohtįįł da, dahałníigo yee dahoołʼaʼ.
19 Nidi Peter índa John ázhdííniid, Tʼáá nihí baa nitsídaahkees, Diyin God yiníłʼı̨́įgo nihíjí nihikʼeh dahoniilʼı̨́įgo daatsʼí yáʼátʼééh, doodaiiʼ Diyin God bikʼeh honiilʼı̨́įgo daatsʼí yáʼátʼééh.
20 Háálá nihí tʼéiyá níilʼı̨́įʼii áádóó disiitsʼą́ąʼii doo baa hodiilnihgóó tsʼídá doo bohónéedzą́ą da.
21 Áádóó haʼátʼíí lá bee atídoolnííł lá daniizı̨́įʼgo chʼééh yaa nitsínáádaazkééz, áko tʼóó yówehda hoł yééʼ áhodoolíiłii yee hachʼįʼ hanáádahaasdzíiʼgo tʼóó hwéédeideezhchid, háálá áhoodzaaígíí biniinaa diné tʼáá átʼé Diyin God yaa dahaniih.
22 Diyin God bibee adziilii bee bééhózinii bee éí diné hadaałtʼé ánábiʼdiilyaaígíí dízdiindóó baʼaan binááhai.
Daʼoodlání tʼáadoo náhoniyésí yátiʼ yiniyé sodadilzin
23 Peter áádóó John hwéédoochidgo, diné bił dah jookahígíí baa níjítʼáázh, áko aláahgo náádaʼiiłniihii índa diné yá aląąjįʼ naazíinii ádahodííniidii baa hojoolneʼ.
24 Áko deidiiztsʼą́ąʼgo tʼáá łaʼ bizhiʼee Diyin God yichʼįʼ hadaasdzííʼ, Ni tʼéí Bóhólníihii [Diyin God] nílíinii, yádiłhił índa nahasdzáán áádóó tónteel índa biyiʼdi dahólóonii tʼáá ałtso íinilaa,
25 nihizhéʼé David ná naalʼaʼí yę́ę bizééʼdóó Níłchʼi Diyinii bee háínídzíiʼgo ádíní:
Haʼátʼíí lá biniyé ałʼąą dineʼé ádá nídahojilchįįhínda dadineʼé éí tʼáadoo dabiniyéhígóó nidahojiʼá?
26 Nihokááʼgóó aláahgo naatʼáanii hashtʼeʼádadiilyaa,áádóó Bóhólníihii Diyin God jílíinii, haChrist* tʼáá biłnaatʼáanii danilíinii hachʼįʼ nídahididookah biniyé ahidahidiikai.
27 Tʼáá aaníí ákódzaa, diyingo ná naalʼaʼí Jesus, atsʼéiníłtíinii, yichʼįʼ nídahididookah biniyé Hérad áádóó Pántiyas Páílat éí doo Jew dineʼé danilíinii índa Ízrel dineʼé danilíinii yił áłah daazlı̨́ı̨́ʼ,
28 nílaʼ* índa ninahatʼaʼ binahjįʼ ádadooníiłii tʼáá bítséedi bee hwiiniłʼaʼígíí, tʼáá éí yidaʼdoolííł biniyé ádáátʼįįd.
29 Áko Bóhólníihii nílíinii, kʼad nihił dahółyéeʼii baa ákonínízingo, ná nidaalʼaʼí daniidlíinii tsʼídá tʼáadoo náhoniyésí nizaad bee yádeiiltiʼgo ádanihíleʼ,
30 hadaałtʼé níʼdoodleeł biniyé kʼíhidílnííh, áádóó nibee adziilii bee béédahózinii índa bikʼee tʼóó ił ahayóigo ádahooníiłii diyingo ná naalʼaʼí Jesus bízhiʼ bee ádanileʼ.
31 Kótʼéego sodazdoolzin, nítʼééʼ áłah jílínígi nahwiisʼnááʼ, áádóó tʼáá ádzíłtso Níłchʼi Diyinii hwiiʼ hadadéébįįd, áko Diyin God bizaad tʼáadoo náhoniyésí bee dahojilneʼ.
Tʼáá ałtsoní aheełtʼéego chooʼı̨́
32 Áko daʼoosdląądii éí tʼááłáʼí iiná áádóó tʼááłáʼí nitsáhákees yee dah ahoojih daazlı̨́ı̨́ʼ, áko tʼáadoo leʼé bee dahólóonii tʼáadoo, Tʼáá sáhí shí dooleeł, dadííniid da, nidi tʼáá ałtso aheełtʼéego chodayoosʼįįd.
33 Áádóó daalʼaadii éí ooʼíinii kʼehgo bidziilgo Bóhólníihii Jesus daaztsą́ą́dę́ę́ʼ náábiʼdiilzáhígíí baa dahojoolneʼ, áko tʼáá ádzíłtso Diyin God bibee ajoobaʼ yee hakʼijisdliʼ.
34 Hatahgi łaʼda doo haʼátʼíhída yídin nilíní da, háálá bikédaayah índa dabikin baa nidahaazniiʼgo bą́ą́h daʼazlı̨́ʼígíí nidayiizhjaaʼ,
35 áádóó daalʼaadii biyaajįʼ nidayiiznil índa tʼááłáʼí jinítínígo chodeizhdoołʼįįłii hwee ádaadinii hataadaasʼniiʼ.
36 Kótʼéego Jóseph éí Líívai dineʼé nilíinii Sáípras hoolyéédóó naagháii, éí daalʼaadii Bárnabas ałdóʼ yee dabíízhiʼ (éí haʼahóní biyeʼ jiníigo óolyé),
37 éí bikéyah hólǫ́ǫgo baa nahaazniiʼ, áádóó béeso yiníjaaʼgo daalʼaadii biyaajįʼ niinínil.
Footnotes
^ Tsé, nínígíí éí, Jesus Christ, níigo ání.
^ Christ jiníigo éí Jíísı̨́įʼii, jiníigo óolyé.
^ Nílaʼ, nínígíí éí, Nibee adziilii, níigo ání.
