Acts 5:1-42
5 Nidi diné łaʼ Ananáíyas joolyéii hweʼasdzą́ą́ Safáíra yolyéego bił nizhdiltʼéego hakéyah łaʼ haa nahaazniiʼ,
2 áko éí bą́ą́h azlı̨́ʼígíí hweʼasdzą́ą́ tʼáá bił bééhózingo łaʼjįʼ ádá áádzísįįd, łaʼjįʼ éí jiníjaaʼgo daalʼaadii biyaajįʼ nizhnínil.
3 Nidi Peter áhodííniid, Ananáíyas, haʼátʼéegoshąʼ Níłchʼi Diyinii dínííʼah biniyé níłchʼi bidaʼiiníziinii binanitʼaʼí Séítan yolyéii níniʼ ná áhoolaago, kéyah bą́ą́h azlı̨́ʼígíí łaʼjįʼ ádá áásínísįįd?
4 Tʼah doo naa nahaniih yę́ędą́ą́ʼ, éí ni nítʼééʼ yaʼ? Naa nahaazniiʼdóó bikʼijįʼ béeso ałdóʼ bee níhólnííh nítʼééʼ yaʼ? Haʼátʼíí biniyé díí íinidzaaígíí bee nijéí biiʼ bąąh tsídíníkééz? Doo diné nííníʼaaʼ da, nidi Diyin God nííníʼaaʼ.
5 Ákohgo Ananáíyas díí jidiiztsʼą́ąʼgo, naaʼajíígoʼgo hajííyol. Áko tʼáá ájítʼé díí dajííniiʼgo tʼáá íiyisí bikʼee hoł yééʼ dahazlı̨́ı̨́ʼ.
6 Áádóó tsíłkéí łaʼ hoł daʼazdisgo chʼídahastı̨́įgo yóóʼádahoolaa.
7 Áádóó díí áhoodzaaígíí hweʼasdzą́ą́ doo bił bééhózingóó, táadi daatsʼí ahééʼílkidgo ákweʼé níyá.
8 Áko Peter hachʼįʼ haadzíiʼgo ání, Shił hólneʼ, daʼ nihikéyahásh kohgo bą́ą́h ílı̨́įgo nahoołniiʼ? Áko ájíní, Aooʼ, ákohgo lą́ą.
9 Nidi Peter áháłní, Haʼátʼéegoshąʼ Bóhólníihii biNíłchʼi bídínóohtahgo ahadiʼnoohtʼą́? Jóʼakon, nahastiin yę́ę yóóʼádayiilaaígíí tłʼóóʼdę́ę́ʼ bikédil dadiitsʼaʼ, áko ni ałdóʼ chʼídandoołtééł.
10 Nítʼééʼ tʼáá áko hayaajįʼ naaʼajíígoʼgo hajííyol. Áádóó tsíłkéí yah aakai, nítʼééʼ dadziztsą́ą́ lágo dahoołtsą́, áko chʼídahastı̨́, áádóó hahastiin yę́ę bíighahgóó łeeh dahastı̨́.
11 Áko daʼoodlání áłah nádleehii tʼáá ałtso índa náádaałaʼ tʼáá ałtso díidí deidiiztsʼą́ąʼgo, tʼáá íiyisí yikʼee bił dahóóyééʼ.
Diyin God bibee adziilii bee béédahózinii índa bikʼee tʼóó ił ahayóigo ádahooníiłii
12 Ákódzaago diné bitahgóó Diyin God bibee adziilii bee béédahózinii índa bikʼee tʼóó ił ahayóigo ádahooníiłii tʼóó ahayóí daalʼaadii yaa nidaaskai. Áádóó kin biiʼ sohodizin bił hazʼą́ągi Sálaman bichahaʼoh hoolyéhígi aheełtʼéego nitsídaakeesgo áłah nádleeh nítʼééʼ.
13 Náádaałaʼ doo tʼáá kʼad hohidiikai da, nidi ayóó átʼéego diné hachʼįʼ bił daʼílı̨́.
14 Áádóó diné índa asdzání tʼóó ahayóí Bóhólníihii dayoosdląądgo yaa dadzoozlíiʼgo hohidiikai.
15 Áko kintah naʼaztiinjįʼ nidi, bąąh dah nidahazʼánígíí chʼídayiizhjaaʼgo bikʼi antéhí índa beeldléida yikááʼ nidayiizhjaaʼ, áko Peter ákǫ́ǫ́ deeyáago bichahaʼohda tʼéiyá łaʼda bikʼiidooldoh danízingo ádaatʼı̨́.
16 Jerúsalem binaagi kin dah naazhjaaʼdę́ę́ʼ ałdóʼ diné tʼóó ahayóí áłah nádleehgo, bąąh dah nidahazʼánígíí índa níłchʼi danchxǫ́ʼígíí baa deinítʼíinii nidayiijááh, áko tʼááłáʼí nítínígo náádabidiʼyiilzá.
Daalʼaadii atídabiʼdiilyaa
17 Nidi aláahgo nááʼiiłniihii índa bichʼijí danilínígíí tʼáá ałtso, éí Sádjusii dah yikahii, dahoołchʼı̨́įdgo tʼáá íiyisí bádahazhchįįdgo
18 daalʼaadii dayiiłtsoodgo awáalyaa góneʼ yah adeiznil.
19 Nidi tłʼéeʼgo Bóhólníihii bidiyingo naalʼaʼí awáalyaa bidáádílkał há ąą ádeileʼgo áádóó chʼíhoníʼeezhgo áháłní,
20 Nihílááh, kin biiʼ sohodizin bił hazʼą́ą́ góneʼ yah oohkáahgo, díí iiná saad nilíinii baa haneʼii tʼáá átʼé bee diné bił dahołneʼ.
21 Áko díí dazdiiztsʼą́ąʼgo, hayííłką́ągo kin biiʼ sohodizin bił hazʼą́ą́ góneʼ yah ajookaigo nidazʼneeztą́ą́ʼ.
Aláahgo nááʼiiłniihii índa bichʼijí danilínígíí yił yíkaigo diné ándahaʼáii índa Ízrel dineʼé badahastóí tʼáá ałtso áłah ádayiilaago, awáalyaadę́ę́ʼ nídahodooʼish biniyé ákǫ́ǫ́ adaʼasʼaʼ.
22 Nidi siláo ákwii yíkai, nítʼééʼ awáalyaa góneʼ daalʼaadii tʼáadoo yikʼíkai da, áko nákaigo yaa dahoolneʼgo,
23 ádaaní, Awáalyaa tʼáá íiyisí yéego dáʼdeelkaal áádóó awáalyaaí yaa ádahalyáanii dáádílkał bichʼéédą́ąʼgi naazı̨́, nidi ąą dadiniitą́, nítʼééʼ ákóneʼ doo naagháhí da.
24 Áko [aláahgo nááʼiiłniihii áádóó] kin biiʼ sohodizin bił hazʼą́ągi siláo binanitʼaʼí índa aláahgo náádaʼiiłniihii díí deidiiztsʼą́ąʼgo, Haʼátʼíí lá ahayóí lá, haa lá hanééh lá, danízingo tʼóó bił daahaada.
25 Nítʼééʼ łaʼ baa níyáago bił hoolneʼgo ání, Jó, diné yah adasoonilígíí kin biiʼ sohodizin bił hazʼą́ą́ góneʼ naazı̨́įgo diné nideinitin.
26 Áko kin biiʼ sohodizin yaa ádahalyáanii áádóó binanitʼaʼí ákǫ́ǫ́ yił yíkai, áádóó diné dahwíídínóołniiłgi baa jédaʼjólnáago, daalʼaadii áádę́ę́ʼ hazhóʼó nídajizhʼeezh.
27 Áko bił níjíkaigo, diné ándahaʼáii bidááhdę́ę́ʼ nidajizhʼeezh. Áádóó aláahgo nááʼiiłniihii nabídééłkidgo,
28 ábíłní, Daʼ doósh díí yízhíhígíí tsʼídá doo bee nináádadíʼnóohtįįłgóó bee nihá dahwiilʼaʼ da? Ákondi bee nidaʼnohtinígíí Jerúsalemgi tʼáá átʼéé nítʼééʼ daaʼniihgo ádaahłaa, áko éí diné dasiilyı̨́įgo bidił bee nihikʼi hodidootʼááł biniyé ádaahtʼı̨́.
29 Nidi Peter áádóó daalʼaadii hadaasdzíiʼgo ádaaní, Diné biláahgo Diyin God tsʼídá bikʼeh dahoniilʼı̨́į dooleeł.
30 Tsin bąąjįʼ Jesus dah dahidoołtʼeʼgo dasoołhínígíí, danihizhéʼé yę́ę biDiyin God náábidiisá.
31 Ízrel dineʼé łahgo átʼéego Diyin God yichʼįʼ tsíńdahidookosgo áádóó bibąąhági ádaatʼéii bá yóóʼiididooʼáałgo bá ashjaʼósin dooleeł biniyé Jesus, Aląąjįʼ Sizíinii índa Yisdáʼiiníiłii nilı̨́į dooleełgo Diyin God binishʼnáájí dah yineesdá.
32 Áko nihí díí ádahóótʼįįdígíí daníilʼı̨́įʼgo baa dahwiilneʼ, Níłchʼi Diyinii ałdóʼ yaa halneʼ, éí Diyin God yikʼeh dahółʼíinii yeidiníʼą́.
33 Áko díí deidiiztsʼą́ąʼgo, tʼáá íiyisí yikʼee bádahazhchįįdgo nidahodiiltsxił daniizı̨́ı̨́ʼ.
34 Nidi diné ándahaʼáii łaʼ, Férisii nilíinii, Gaméíliyel yolyé, éí bee hazʼáanii yínaʼniłtinii índa diné tʼáá átʼé yił nilíinii nilı̨́, éí yiizįʼgo tʼóó kónígháníjįʼ ídahoołʼaahii chʼídootʼishgo yee hoołʼaʼ.
35 Áko áhodííniid, Ízrel dineʼé nohłíinii, díí diné tídadidoohłíłígíí tʼáá íiyisí bitsʼąą ádaa ádahołyą́.
36 Háálá díí yoołkáłígíí tʼah bítséedi Thúdas, ayóó átʼéii nilı̨́įgo ádá yáltiʼgo á yiizįʼ, áko diné łą́ bidiikai, dı̨́įdi neeznádiin yiltʼéego daatsʼí, nidi biʼdiisyı̨́, áádóó tʼáá ałtso bikééʼ dah diikai yę́ę tabidiʼnooskaadgo tʼáadoo nídaasdlı̨́ʼí da.
37 Áádóó bikʼijįʼ, dahoʼdóltaʼgi yoołkááł yę́ędą́ą́ʼ, Gáliliidóó Júdas hanííʼdóó nídiiʼnaʼgo, diné łaʼ ádííyiiʼnil; éí ałdóʼ ájídin, áko hódahółníihgo hakééʼ dah diikai yę́ę tʼáá ałtso tabidiʼnooskaad.
38 Áko kʼad áhootʼéhígíí binahjįʼ ánihidishní, Díí hastóí tʼáadoo baa nídaahtʼíní, bíniʼdii naakai, háálá díí nahatʼá índa díí naanish diné tʼéiyá bitsʼą́ą́dóogo, tsʼídá bikʼeh hodidoodleeł,
39 nidi Diyin God bitsʼą́ą́dóogo, tsʼídá doo bikʼeh dadoohdleʼ átʼée da. Diyin God bitsʼą́ą́jí danohłı̨́įgo nihéédahodoozįįłgo daʼátʼé!
40 Áko tʼáá ákótʼée dooleeł dahodííniid, áko daalʼaadii hágo deidííniidgo nídeineesxaal áádóó Jesus bízhiʼ bee doo hanáádazdoodzihgóó há yee dahoołʼaʼgo hwéédeideezhchid.
41 Áko diné ándahaʼáii áłah nilínígíí bitsʼą́ą́ʼ dashdiikaigo, Jesus bízhiʼ biniinaa doo ił ídlı̨́ bikʼee tiʼdahodzoozniiʼígi bą́ą́h daʼjílı̨́įgo hąąh tsíhodeeskézígíí baa hoł dahóózhǫǫd.
42 Áádóó tʼáá ákwíí jı̨́ kin biiʼ sohodizin bił hazʼą́ą́ góneʼ índa dahooghangóó tʼáadoo ádahozdiilzéhí nidazhʼnitin áádóó Jesus Christ baa nidahojilneʼ.
