Acts 9:1-43
9 Nidi Bóhólníihii bídahoołʼaahii bichʼįʼ Saul tʼahdii ádééhooldzíidgo índa nidootsił nízingo, aláahgo nááʼiiłniihii yaa níyáago,
2 Damáskasgi Jew dineʼé áłah nídaadleehii bichʼįʼ naaltsoos há hadadidoolníiłgo bíjííkeed, Damáskasdę́ę́ʼ diné índa asdzánída Bóhólníihii bikʼehgo honítʼiʼgóó dayíkáhígíí łaʼ bikʼízhníyáá ládą́ą́ʼ bidazhdootłʼoołgo Jerúsalemjįʼ nízhdooʼish biniyé.
3 Ákǫ́ǫ́ joogááł, nítʼééʼ Damáskas tʼáá áhání hadziihgo tʼáadoo hooyání yáʼąąshdę́ę́ʼ hanaagóó łeʼdíídláád.
4 Áko niʼjįʼ ajíígoʼgo łaʼ hadzoodzíiʼgo jidiiztsʼą́ą́ʼ, Saul, Saul, haʼátʼíishąʼ biniyé atíshíłʼı̨́?
5 Áádóó ájíní, Bóhólníihii, háishąʼ ánítʼı̨́? Nítʼééʼ Bóhólníihii áhodííniid, Jesus atíníłʼínígíí áshtʼı̨́; [tʼáá íiyisí bikʼeʼashchʼíiʼgo deeníinii bikʼą́ą́h dziyítaałgo ánítʼı̨́.*
6 Áko hatah hoditłidgo áádóó tʼóó hoł ahayóigo ájíní, Bóhólníihii, haʼátʼíísh baa nizhdoogaał shííníʼní? Áko Bóhólníihii áhodííniid,] Nídiidáahgo kin haalʼáajįʼ dínááh, ákweʼé baa nidíínaałii bee nił hodoonih.
7 Diné bił jookahígíí tʼáadoo łaʼ dayiiłtsą́ą da nidi, iinééʼ tʼéí deidiiztsʼą́ąʼgo tʼáadoo yee hadaodziihígóó naazı̨́.
8 Saul nízhdiiʼnaʼgo jideezghal, nítʼééʼ doo ajooʼı̨́į da, áko hálaʼ dayiiłtsoodgo dah dahodiilóozgo Damáskasgi hoł daaskai.
9 Áko doo ajooʼı̨́į dago, tʼáadoo ajiyání índa tó nidi doo jidlą́ą́góó tágí jı̨́ azlı̨́ı̨́ʼ.
10 Áádóó Damáskasgi oodlání nilíinii, Ananáíyas yolyéego kééhatʼı̨́. Éí bił áhoodzaago Bóhólníihii ábíłní, Ananáíyas. Áko ájíní, Bóhólníihii, jó, kǫ́ǫ́ sédá.
11 Áádóó Bóhólníihii hachʼįʼ haadzíiʼgo ání, Nídiidáahgo kin bitaʼatiin Kʼéhézdon hoolyéejįʼ dínááh, ákweʼé Júdas bighangi łaʼ Saul joolyéego Társasdę́ę́ʼ nijighá, éí bínaʼídídííłkił, háálá ákweʼé sozdilzin.
12 Éí diné léiʼ Ananáíyas yolyéego yah iigháahgo, ajooʼı̨́ nízhdoodleeł biniyé hakʼi dah deesniiʼgo hoł ádzaa.
13 Nidi Ananáíyas haadzíiʼgo ání, Bóhólníihii, díí diné Jerúsalemgi nidiyı̨́ı̨́ʼ danilíinii ląʼígóó atíyííłʼįįd haʼníigo baa haneʼ, diné ląʼí yee shił dahoolneʼ;
14 kweʼé nízhiʼ dayózhíigo sodadilzinígíí tʼáá ałtso bidaʼdootłʼóół biniyé aláahgo náádaʼiiłniihii bee óhólníihii baa deideezʼą́ągo níyá.
15 Nidi Bóhólníihii áháłní, Ákǫ́ǫ́ dínááh, háálá atsʼáhoníłtı̨́įgo chohwiideeshʼįįłii jílı̨́, áko doo Jew dineʼé danilíinii índa naatʼáanii danilíinii, áádóó Ízrel dineʼé bichʼįʼ shízhiʼ bééhózingo ádajileʼ doo,
16 háálá ląʼígóó shízhiʼ biniinaa tiʼhwiizhdoonihgo hoł bééhodeesįįł.
17 Áko Ananáíyas dah diiyáago hooghangi yah ííyáago hakʼi dah deesniiʼgo ání, Shitsilí Saul, ííníʼı̨́ nídíídleeł áádóó Níłchʼi Diyinii niiʼ hadidoobı̨́ı̨́ł biniyé níláhdę́ę́ʼ yínáałgo Bóhólníihii Jesus nichʼįʼ yitʼíní íʼdiilyaaígíí naa shiníłʼaʼ.
18 Tʼáá áko hanááʼ bikʼi niʼníkę́zígíí azhool nahalingo bąąh niʼdiiłdáazgo ajooʼı̨́ nídzísdlı̨́ı̨́ʼ. Áko nízhdiiʼnaʼgo tó bee hoʼdoolzı̨́ı̨́ʼ,
19 áádóó ajííyą́ąʼgo bee hatah náhóółdził.
Saul éí Damáskasdi haneʼ yáʼátʼéehii yaa halneʼ
Saul éí Damáskasgi ídahoołʼaahii yił naháaztą́ągo díkwíí shı̨́ı̨́ biiską́.
20 Tʼáá áko kin biiʼ áłah nídaʼadleehgóó, Christ éí Diyin God biYeʼ nilı̨́, jiníigo Jew dineʼé bił hojilneʼgo baa nízdiidzá.
21 Tʼáá ałtso hazaad deidiiztsʼą́ąʼgo tʼóó bił adahayóigo ádadííniid, Jerúsalemdi díí yízhí dayózhíigo sodadilzinígíí ádooldįįł nízingo atííłʼı̨́ı̨́ nítʼéʼígíí daʼ doósh éí átʼı̨́į da? Índa łaʼ bidazhʼdootłʼóołgo aláahgo náádaʼiiłniihii baazhdooʼishísh doo biniyé jiníyáa da?
22 Nidi tʼah aláhídi átʼéego Saul bidziil yileełgo Damáskasgi Jew dineʼé kéédahatʼínígíí, Díí tʼáá aaníí Christ* nilı̨́, yiłníigo tʼáadoo yee hadaodziihígóó áyiilaa.
Saul éí Jew dineʼé bitsʼą́ąjįʼ yisdájííyá
23 Áko ląʼí yiską́ą́dóó bikʼijįʼ Jew dineʼé dahodiyoołhéełgo hodahodeezʼą́,
24 nidi Saul hohodeestʼánígíí hoł bééhoozin. Áko dahodiyoołhééł biniyé jı̨́įgo áádóó tłʼéeʼgo béésh dáńʼdadilkałgóó háká dadéezʼı̨́ı̨́ʼ,
25 nidi tłʼéeʼgo kin haalʼá ditą́ągo binaa ahééʼítłʼin góyaa tsʼiizis biiʼ dzizdáago ídahoołʼaahii hadah adahazloʼ.
Jerúsalemdi Saul naaghá
26 Áko Jerúsalemgi jiníyáago ídahoołʼaahii bidideeshááł chʼééh jinízin, háálá íhoołʼaahii dzizlı̨́ʼígíí doo dayoodlą́ą́góó tʼóó hwéédaaldzid.
27 Nidi Bárnabas hodiiyáago daalʼaadii yichʼįʼ hoł níʼáázh, áko daalʼaadii yił hoolneʼgo ání, Saul joogááł nítʼééʼ Bóhólníihii jiiłtsą́ągo hachʼįʼ haadzííʼ, áko tʼáadoo náhoniyésí Damáskasgi Jesus bízhiʼ bee nahodzisneʼ lá.
28 Áádóó Jerúsalemgi bił nidzíiztą́ągo bił tázhdíkááh,
29 tʼáadoo náhoniyésí Bóhólníihii [Jesus] bízhiʼ bee hojilneʼgo, índa Jew dineʼé danilíinii Gríik bizaad yee yádaałtiʼígíí bichʼįʼ yájíłtiʼgo bił ałghadazhʼditʼááh, nidi dahodiyoołhéełgo haa nidahaakai.
30 Áko ałkʼisóó danilínígíí bił béédahoozingo Sesaríya góyaa hoł daaskai, áádóó Társasgóó adahasʼaʼ.
31 Áko Judíyagóó áádóó Gáliliigóó índa Samériyagóó daʼoodlání áłah nídaadleehii tʼáá ałtso hashtʼedadíítʼeʼgo dabidziilgo ádaalyaa, índa Bóhólníihii deidísingo dahináago Níłchʼi Diyinii yee hadaʼólníigo kʼeeʼąą deeshzhiizh.
Iiníyas náábiʼdiilzá
32 Áko Peter tʼáá ałtsogóó tázhdííyáago Lídagi Diyin God bidiyı̨́ı̨́ʼ kéédahatʼínígíí ałdóʼ baazhníyá.
33 Ákweʼé diné łaʼ Iiníyas yolyéé léiʼ bikʼízhníyá, bitah doo nahwiiʼnáágóó tʼóó sitı̨́įgo tseebíí nááhai lá.
34 Áko Peter áhodííniid, Iiníyas, Jesus Christ náánidiisá; nídiidáahgo nitsáskʼeh hashtʼéénídlééh. Tʼáá áko náhizhdiitah.
35 Áko Lídagi índa Shérangi kéédahatʼínígíí tʼáá ałtso dahoołtsą́ągo Bóhólníihii yichʼįʼ dah dahidiikai.
Dórkas éí hinááh násdlı̨́ı̨́ʼ
36 Íídą́ą́ʼ Jápagi íhoołʼaahii léiʼ Tábitha yolyéego naaghá, Tábitha éí Gríik kʼehjí Dórkas jiníigo óolyé, (éí Bįįh Yázhí óolyé). Díí asdzání ląʼí naanish yáʼátʼéehii yaa naaghá, índa badahojoobáʼíígíí ląʼígóó yíká análwoʼgo hiná.
37 Ákweʼé yoołkááł yę́ędą́ą́ʼ hatah honiigaiigo dadziztsą́, áko táádeizgizgo náʼádeídi nideistı̨́.
38 Lídadóó Jápajįʼ áhánígo, Peter áadi nijigháago ídahoołʼaahii haa dahodiiztsʼą́ąʼgo, Tʼáadoo naʼáhozdilziidí nihaazhdoogááł, daaníigo nídahookąąhgo diné naaki hachʼįʼ adeisʼaʼ.
39 Áko Peter nídiiʼnaʼgo hoł dah diikai. Áadi jiníyáago náʼádeídi hoł yah aakai. Asdzání bąąh ádahasdįįdii tʼáá ałtso daachago hwíighahgóó naazı̨́, Dórkas tʼahdii bitah naaghá yę́ędą́ą́ʼ éétsoh índa ééʼ ádayiilaaígíí hachʼįʼ nídeidéénil.
40 Nidi Peter, Tʼáá ánółtso chʼínóhkááh, hałníigo nitsidinígoʼgo sodoolzin, áko atsʼíís yichʼįʼ niníyáago ání, Tábitha, nídiidááh. Áko deezghalgo Peter yiyiiłtsą́ągo neezdá.
41 Peter hálaʼ yiyiiłtsoodgo náhodiidzı̨́ı̨́z. Áko Diyin God bidiyı̨́ı̨́ʼ índa asdzání bąąh ádahasdįįdii hágo yidííniid, áko Tábitha hiná násdlı̨́įʼgo dayiiłtsą́.
42 Áko Jápagóó tʼáá átʼéé nítʼééʼ daaʼniiʼgo ląʼí Bóhólníihii dayoosdląądgo yaa dadzoozlííʼ.
43 Ákódzaago Peter tʼáá Jápagi ałdzéhí léiʼ, Sáíman yolyéego, baʼałkʼee dzizdáago ląʼí yiską́.
Footnotes
^ Díí binahjįʼ bikʼidiʼdootı̨́įłii éí béégashii chʼééh yah azhniłkaadgo doo naabídaʼdidzilgóó, tsin deeníinii bee náázhníshishgo náátʼą́ą́ʼ anídziitaał łeh.
^ Yízhí Christ yiłnínígíí éí diyin kʼehgo atsʼáltíinii, jiníigo óolyé.
