Amos 1:1-15
1 Azáíyah éí Júdah dineʼé aláahgo binanitʼaʼí nilı̨́įgo yoołkááłdą́ą́ʼ áádóó Jóʼash biyeʼ Jerobówam éí Ízrel dineʼé aláahgo binanitʼaʼí nilı̨́ı̨́dą́ą́ʼ tʼah doo niʼ hidiʼnááhgóó kóhootʼéego naaki nááhai Tekówa kin haalʼáagi* Éímas éí nidaʼniłkaadii atah jílı̨́įgo Ízrel dineʼé baa níjítʼı̨́įgo díí saad bee hadziisdzííʼ:
2 Dził Záíyandóó Bóhólníihii ayóó íitsʼaʼgo ádidooniił, áádóó Jerúsalem kin haalʼáádę́ę́ʼ biinééʼ didootsʼı̨́ı̨́ł, índa nidaʼniłkaadii bidahootsogóó hojoobáʼígo nahazʼą́ą doo áádóó Dził Kármel* aghádahazʼáágóó dahodoogą́ą́ł.
3 Bóhólníihii kóní, Damáskas kin haalʼáádóó* dajílíinii táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá béésh bee haʼaltsééd nahalingo Gíliyad dineʼé ádajííłʼįįd.
4 Ákohgo Házeiyel* baʼáłchíní danilíinii bikʼijįʼ kǫʼ ádeeshłíiłgo Ben-héídad* bidziilgo bił nahazʼáanii ałtso adidookʼą́ą́ł.
5 Damáskas kin haalʼáhígi dáńʼdítı̨́hí bił dah nídaatı̨́hígíí ałdóʼ nahjįʼ kódeeshłííł áádóó Éíven yíldzis góyaa kéédahojitʼínígíí índa Beth-ííden kin haalʼáádóó naatʼá gish jótąʼii áhodeeshdįįł, áko Síriya dineʼé danilíinii Kir hoolyéii bichʼįʼ yisnááh dazhdooleeł, ní Bóhólníihii.
6 Bóhólníihii kóní, Jó, Géízadóó* dajílíinii táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá diné tʼáá ałtso tʼóó ninádeideezʼą́ągo yisnááh biniyé Íídam dineʼé yaa deideezʼą́.
7 Áko Géíza binaa ahééʼítłʼinii bikʼijįʼ kǫʼ ádeeshłííł, áko bidziilgo bił nahazʼáanii ałtso adidookʼą́ą́ł.
8 Áshdadgi* kéédahojitʼíinii índa Áshkelangi* naatʼá gish jótąʼii éí kin haalʼá ałdóʼ áhodeeshdįįł; shidziil bee Ékran* bikʼijįʼ nishłı̨́į doo áádóó Filístiya dineʼé daadziihígíí ádadoodįįł, ní Bóhólníihii Diyin God.
9 Bóhólníihii kóní, Jó, Táirdóó dajílíinii táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá yisnááh tʼáá átʼé Íídam dineʼé yaa deideezʼą́ągo bikʼisóó yił ahaʼdeetʼáanii doo yéédaalniihgóó ádáátʼįįd.
10 Áko Táir binaa ahééʼítłʼinii bikʼijįʼ kǫʼ ádeeshłíiłgo bidziilgo bił nahazʼáanii ałtso adidookʼą́ą́ł.
11 Bóhólníihii kóní, Íídamdóó dajílíinii táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá diltłish bee hakʼis* bikééʼ jiyeedzá; tʼáadoo nidi hoł baa hojííshbáʼígóó tʼóó bichʼįʼ há hodinoochįįdgo hashkéznídzingo ahoolzhiizh.
12 Áko Tííman* bikʼijįʼ kǫʼ ádeeshłíiłgo Bázra* bidziilgo bił nahazʼáanii ałtso adidookʼą́ą́ł.
13 Bóhólníihii kóní, Áman dineʼé* táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá éí hoł hadahwiisdzooígíí dahótsaa dooleeł biniyé Gíliyad kéyahgi sáanii daaltsáanii nidadzistseed.
14 Áko Rábah* binaa ahééʼítłʼinii bikʼijįʼ kǫʼ ádeeshłíiłgo bidziilgo bił nahazʼáanii ałtso adidookʼą́ą́ł. Éí anaaʼ hazlı̨́ı̨́ʼ bijı̨́ hahodidoodlał índa yéego deeyolgo náátsʼóʼoołdísii ayóó ábóodziilgo ádeeshłííł.
15 Áko aláahgo binanitʼaʼí nilíinii éí naatʼáanii danilíinii tʼáá yił yisnááh dadooleeł, ní Bóhólníihii.
Footnotes
^ Jerúsalem kin haalʼáádóó shádiʼááhjígo naakitsʼáadah tsin sitą́ ánízah.
^ Ízrel kéyahgi náhookǫsjigo siʼą́.
^ Díí kin haalʼáagi Síriya dineʼé binahatʼá bá hooghan siʼą́. Is. 17:1-3; Jer. 49:23-27; Zech. 9:1.
^ Síriya dineʼé aláahgo binanitʼaʼí.
^ Síriya dineʼé aláahgo binanitʼaʼí.
^ Filístiya dineʼé bikin hadaasʼá łaʼ.
^ Filístiya dineʼé bikin hadaasʼá łaʼ.
^ Filístiya dineʼé bikin hadaasʼá łaʼ.
^ Filístiya dineʼé bikin hadaasʼá łaʼ.
^ Ízrel dineʼé bitaaʼ yę́ę Jéíkab wolyé; éí bikʼis Íísa baʼáłchíní ahoolchíiłii Íídam dineʼé danilı̨́.
^ Íídam kéyahgi kin haalʼá.
^ Íídam kéyahgi kin haalʼá.
^ Jórdan tooh haʼaʼaahjígo bikéyah. Jer. 49:1-6; Ezek. 21:28-32; 25:1-7; Zeph. 2:8-11.
^ Díí kin haalʼáagi Áman dineʼé binahatʼá bá hooghan siʼą́.
