Amos 3:1-15
3 Ízrel dineʼé danohłíinii, Ííjip kéyahdę́ę́ʼ chʼínihiníʼeezhii tʼáá ánółtso Bóhólníihii bizaad yee nihikʼijįʼ nilı̨́įgo yáłtiʼígíí dadoohtsʼı̨́ı̨́h.
2 Nihokááʼ dineʼé danilíinii bitahdóó nihí tʼéiyá nihééhasin; éí bąągo doo ákwii ádaotʼįįdii tʼáá átʼé biniinaa atínihideeshłííł.
3 Hazhóʼó ahazhdeetʼą́ągo lá tʼéiyá tʼáá łaʼ jooʼash doo ni.
4 Daʼ náshdóítsoh bitsiijįʼ ditłʼooígíí naalzheehgo tʼah doo shóyoołtʼeehgóósh áníi doo? Náshdóítsoh yáázh bitsiijįʼ ditłʼooígíí yidoolghałii tʼah doo shóyoołtʼeehgóósh biʼáándę́ę́ʼ yichxa doo?
5 Daʼ niʼ bikáaʼgi tsídii éí łoh bee doodlohii doo bá siʼą́ą́góósh tʼáá yiih doogááł? Daʼ tʼáá áhoodzaadę́ę́ʼésh łoh tʼáá azdooloh?
6 Kin haalʼáajįʼ deenástsʼaaʼ bideeʼ bee íʼdílzoołí ádííniidgo tʼáá aaníí diné nídadooldzííł. Kin haalʼáii bikʼijįʼ doo yáʼáshóonii ahóóleʼgo Bóhólníihii éí binaanish átʼé.
7 Tʼáá aaníí, Bóhólníihii Diyin God doo haada adoolíił da, nidi bá naalʼaʼí bá dahalneʼii tʼáá nahontʼinee ááníłígíí yił chʼíyiiʼaahgo índa áánííł.
8 Náshdóítsoh bitsiijįʼ ditłʼooígíí ayóó íitsʼaʼgo áníigo, háishąʼ tʼáadoo nídooldzíił da? Bóhólníihii Diyin God hahadziihgo, háishąʼ doo bá yáłtiʼgóó yíneelʼą́ą doo?
Samériya ábidiʼdooldįįł
9 Áshdad kin haalʼáagi índa Ííjip kéyahgi bidziilgo bił nahazʼáanii bikááʼ nidasoozı̨́įgo baa nidahodołdlaadgo ádadohní, Samériya dził naaznilígíí bighą́ąʼdi áłah nohłı̨́į doo, áko bitahdę́ę́ʼ ayóó átʼéego hahóóʼá índa bide ádahólzinii nihił béédahodoozįįł.
10 Áko bidziilgo bił nahazʼánígóó tʼáá naʼníleʼdii aghadayiisʼnilii hashtʼeʼ nidayiiznilígíí éí tsʼídá yáʼátʼéhígi ádadooníłígíí doo bił béédahózin da, ní Bóhólníihii.
11 Éí bąągo Bóhólníihii Diyin God kóní, Anaʼí doonéełgo nihikéyah yinídootʼihgo bee nihidziilii nihitsʼą́ą́ʼ yaa kódeidoolííł, índa bidziilgo nihił nahazʼánídóó ałtso nihighadaʼdoolyééł.
12 Áko Bóhólníihii kóní, Naʼniłkaadii éí dibé bijáád tʼáá naakihígo, doodaiiʼ bijaaʼ tʼáá ałníʼídóó náshdóítsoh bitsiijįʼ ditłʼooígíí bizééʼdóó hááyooʼnizhígi átʼéego Samériyadóó Ízrel dineʼé éí bikʼi dah asdáhí naanázʼáhígíí índa tsáskʼeh bijáád tʼéiyá yił dah dadínóochééł.
13 Bóhólníihii Diyin God éí tʼáá ałtsoní bee Bóhólníihii Diyin God nilíinii ání, Íísíníłtsʼą́ą́ʼ, Jéíkab baʼáłchíní danilíinii díí bee bił hólneʼ.
14 Ízrel dineʼé bee hazʼáanii dajiiztiʼii biniinaa atíhodeeshłíłígíí tʼáá éí bijı̨́ Béthelgi bikááʼ nááʼiiniihí ałdóʼ ałtso nihideeshchxǫǫł,* áádóó bikááʼ nááʼiiniihí bideeʼ yadaaʼáhígíí kʼíhidoolniiłgo niʼjįʼ adínóodah.
15 Kin biiʼ nídabeehahii índa kin biiʼ nídabeeshı̨́įhii nihideeshchxǫǫł áádóó áívorii wolyéii bee kin ádaalyaii ádin dooleeł, áko kin ayóó ádaatʼéii ałtso ádin dooleeł, ní Bóhólníihii.
Footnotes
^ Ízrel kéyah náhookǫsjigo nahadlá bá hazʼą́. 2Kgs. 23:15.
