Amos 4:1-13
4 Béíshan* kéyahdóó béégashii danohłíinii, Dził Samériya bikáaʼdi nidaahkaii, badahojoobáʼíii bide áhootʼé ádahwíínóhsinii, hojoobaʼ nahasʼáanii tʼóó bikʼi nidaohkaii, nihadahastiin, Doodlı̨́įłii łaʼ nihaa dahohkaahgo haaʼíshąʼ daʼdiidlı̨́ı̨́ł, dabidohníinii, díí saad dadoohtsʼı̨́ı̨́h.
2 Bóhólníihii Diyin God bihodiyinii yee ádee hadoodzííʼ; jó, béésh názhahí áchı̨́ı̨́h bąąh siʼání bee yóóʼanihidiʼyootʼishii beidoołkááł; tʼáá daohdzíʼígíí łóóʼ bee hahadleehí názhahígíí bee yóóʼanihidiʼyootʼish.
3 Áko ahééʼítłʼinii nidahaasdááz góneʼ tʼáá kʼéhézdon chʼíhidoohjah áádóó bidziilgo nahazʼą́ą́dóó chʼínihidiʼyooltłʼił, ní Bóhólníihii.
Ízrel dineʼé éí Diyin God atíbiilaii tʼáadoo yitsʼą́ą́dóó ídahoołʼą́ąʼ da
4 Nílááh, bąąhági átʼéii biniyé Béthel kin shijaaʼjįʼ dadohkááh; Gílgal kin shijaaʼgi bąąhági átʼéii bee tsiʼhaohkááh; tʼáá ákwíí abíní náádahidoołnihii nidahohjááh, tʼáá tááʼ yoołkááł bikʼeh nihee dahólóonii neeznáá daníjaaʼígíí éí tʼááłáʼígo shijaaʼ nidahohjááh.
5 Dííkʼǫsh bááh bił ályaago nááhániihii baa ahééh hasingo náádahołniih, áko tʼáá nííkʼeh náádahaniihii baa dahołneʼ, háálá, Ízrel dineʼé danohłíinii, ákódaahtʼı̨́į dooleełígíí nihił yáʼádaatʼééh, ní Bóhólníihii Diyin God.
6 Nihikin hadaasʼáagi tʼáá ałtsogóó awooʼ doo bąąh chinii nihaa diníʼą́ áádóó kéédahohtʼı̨́ı̨́góó tʼáá átʼé bááh bídin danohłı̨́ı̨́ nítʼééʼ, nidi tʼáadoo shichʼįʼ nináhisoohkai da, ní Bóhólníihii.
7 Daʼagizhígíí tʼah tááʼ nídeezid hadziihgo doo nahałtingóó ádeeshłííł, áko tʼááłáhígo kin haalʼáhígíí bikʼi nahałtingo náánáłahgo kin haalʼáhígíí éí doo bikʼijįʼ nahałtingóó ádeeshłííł. Kéyah tʼááłáhígo bikʼi nahodoołtı̨́ı̨́ł; náánáłahgoígíí éí doo bikʼijįʼ nahałtingóó biniinaa hodoogą́ą́ł.
8 Áko naakigo kin haalʼáádóó, doodaiiʼ táaʼgo kin haalʼáádóó éí tʼááłáhígo kin haalʼáhígóó tó doodlı̨́įłii yiniyé yah dadikai nítʼééʼ, nidi tʼáadoo tó yee hwiih daazlı̨́įʼ da, ákondi tʼáadoo shichʼįʼ nináhisoohkai da, ní Bóhólníihii.
9 Nihidádaʼakʼeh áádóó nihichʼil naʼatłʼoʼii kʼéédadilyéehjįʼ hadoh bił níchʼigo áádóó dáʼáchaan bikʼijįʼ áshłaa índa nahachagiitsoh éí nihitsin fig naazkaadii deílʼáá nítʼééʼ yę́ę índa áliv naazkaadii deílʼáá nítʼééʼ yę́ę ałtso nihitsʼą́ą́ʼ yaa nahodeeskai, ákondi tʼáadoo shichʼįʼ nináhisoohkai da, ní Bóhólníihii.
10 Ííjip kéyahdi naałniih bitaasniiʼígi átʼéego naałniih bee atínihiishłaa; nihiʼashiiké ániid nidaakaii diltłish bee ásíłdįįd; nihilı̨́ı̨́ʼ ałtso nahjįʼ kóshłaa, índa dah wohnééł yę́ęgi tʼóó baaʼih dahalchinii daałchingo áshłaa, nidi tʼáadoo shichʼįʼ nináhisoohkai da, ní Bóhólníihii.
11 Diyin God nishłı̨́įgo Sádam índa Gomárah kin haalʼá yiiʼ kéédahatʼíinii ásíłdįįdígi átʼéego shí atínihiishłaa, áko nihikʼi nidaʼdeezkʼą́ąʼgo tsídziʼdę́ę́ʼ háánihiʼdiisʼnil, ákondi tʼáadoo shichʼįʼ nináhisoohkai da, ní Bóhólníihii.
12 Éí bąą Ízrel dineʼé nohłíinii, kónihideeshłííł. Ízrel dineʼé nohłíinii, nihiDiyin God bidááh doohkahígíí biniyé hashtʼeʼádadołnééh, háálá ádeeshníłígíí bee nihiʼnishʼnííh.
13 Háálá dził naaznilgo índa nídadiyołgo ííłʼíinii, jóʼakon, áádóó diné bintsíkees bił bééhózingo yee yił halneʼii índa abíní éí chááháłhiłgo ánáyiilʼįįhii áádóó nihokááʼ aghádahazʼáágóó yikʼi naagháii éí tʼáá ałtsoní bee Bóhólníihii Diyin God wolyé.
Footnotes
^ Beʼekʼid Gálilii náhookǫsjí áádóó haʼaʼaahjígo nahósʼaʼ. Is. 2:13; 33:9.
