Amos 6:1-14
6 Dził Záíyangi doo hodítéehee kéédahohtʼíinii índa Dził Samériya bighą́ąʼdi hasih danohsingo kéédahohtʼíinii doo hojoobaʼ ájíníi da! Ałʼąą dineʼé bitahdóó aláahdi dineʼé jílíinii, hwiʼaląąjįʼ naazíinii nohłíinii, Ízrel dineʼé nihaa hakáhígíí nihichʼįʼ doo hojoobaʼ ájíníi da!
2 Kálnehígóó* nídadohkahgo danółʼı̨́ áádóó Héímath* ayóó átʼéego bił hazʼą́ą́góó ałnáádaahkah áádóó Gathgi Filístiya dineʼé bił hazʼą́ą́ góyaa ałdóʼ nídadohkah. Daʼ díí bee óhólnííh bił hazʼáaniísh biláahgo ayóó ádaatʼé? Éí doodaiiʼ nihił hahoodzooígíísh biláahgo tsʼídá ayóó átʼéego bił hadahwiisdzo?
3 Doo yáʼáhootʼééhgóó yoołkáał doo haʼnínígíí átsʼá dabíínółnáa nidi, nihá nidahodootʼááł baa hodoolzhishígíí ahą́dí hadziihgo ídaʼdoołyaa.
4 Áívori wolyéii tsáskʼeh bee ádaalyaago bikááʼ nijizhjéeʼii áádóó bikʼi dah antéhí bikááʼ naanídajishjizhii áádóó dibé nanilkaadę́ę́ʼ dibé yázhí índa béégashii shijééʼdóó béégashii yáázh dajilghałii hachʼįʼ doo hojoobaʼ ájíníi da!
5 Tsin tłʼóół naakitsʼáadah bąąh daneelzheeʼgo bee nidaʼaʼnéii bikʼehgo tʼóó dzólníígóó dahataałii áádóó David áátʼįįd yę́ęgi átʼéego bibee naʼaʼnéhí sin yee nidaanéhígíí ádá ádeilneʼii hachʼįʼ doo hojoobaʼ ájíníi da!
6 Tʼóó bee adlání nitsxaii bee wáin dajidláanii áádóó akʼah łikání halchinii aláahgo ílíinii bee ádazhdiltłah, nidi Jóseph dineʼé yikʼee tiʼdahoozniiʼígíí doo bikʼédí dajílíinii hachʼįʼ doo hojoobaʼ ájíníi da!
7 Éí bąą kʼad hó tsʼídá átsé yisnááh dazhdooleeł áádóó naanídaashjizhgo ádaʼazįįdgi daʼayáanii hoł yóóʼahodoogááł.
8 Tʼáá ałtsoní bee Bóhólníihii Diyin God ání, Bóhólníihii Diyin God tʼáá bí ádee hadoodzíiʼgo ádííniid, Jéíkab bibee ádaa hodzódliʼ tʼóó shił baaʼih; bidziilgo bił nahazʼánígóó tʼóó hojooshłxá; kin haalʼáii áádóó biiʼ dahólóonii tʼáá bił ninádideeshʼááł.
9 Ákóhoodzaago diné neeznájíltʼéego kin tʼááłáʼígíí tʼáá biyiʼ nidzíiztą́ągo éí dazhdínóonééł.
10 Éí diné bikʼéí łaʼ, doodaiiʼ biyah adiiłkʼą́ąhii yóóʼábidoolíłígíí biniyé kindóó dabitsʼin chʼííjáahgo kin biyiʼ góneʼ yidzíʼígíí áyididooniił, Łaʼdaásh bił nidiníltʼé? Áko ádidooniił, Nidagaʼ. Naʼídééłkidii ánáádidooʼniił, Tʼáadoo yáníłtiʼí, háálá Bóhólníihii bízhiʼ doo bee yátiʼ da.
11 Shoo, Bóhólníihii yee hadoodzih, éí tʼáá bí kin ayóó áníłtsoii ahiih néidiyoołkał áádóó kin áłtsʼíísígíí yididooséí, jóʼakon.
12 Tséʼéłkáaʼgiísh łı̨́ı̨́ʼ tʼáá nídidoolwoł? Ákwiísh béégashii bee nihwiildlaad? Nidi doo haada yitʼéii báhádzidii nináhádleeh ádaahłeʼ índa tʼáá ákogi átʼéii bineestʼąʼ tʼóó báhádzidgo díchʼííʼ nináhádleeh ádaahłeʼ.
13 Tʼáadoo dabiniyéhígíí baa nihił nidahoozhǫǫh áádóó ádadohní, Tʼáá nihí ayóó adanihóodziilii bee danihidziil dasiidlı̨́ı̨́ʼ.
14 Nidi tʼáá ałtsoní bee Bóhólníihii Diyin God ání, Ízrel dineʼé danohłíinii, anaʼí nilíinii nihichʼįʼ nídahidiikáahgo ádeeshłííł; éí Héímathdóó* honoojíigi tooh nílíníjįʼ* atídanihiłʼı̨́įgo ádeeshłííł, jóʼakon.
Footnotes
^ Síriya dineʼé bikin haalʼá.
^ Síriya dineʼé bikin haalʼá.
^ Ízrel kéyah áádóó Síriya kéyah bitaʼgi yah ahóótʼiʼ.
^ Beʼekʼid Dókʼǫ́zhí shádiʼáahjigo nílı̨́.
