Amos 7:1-17
7 Bóhólníihii Diyin God éí díí shił yitʼíní áyiilaa: aláahgo naatʼáanii tłʼoh bá yilzhéeʼgo áádóó bikʼijįʼ háánootʼą́ągo Bóhólníihii éí nahachagiitsoh yiniyé hashtʼeyiilaa, jóʼakon.
2 Kéyahgóó nahachagiitsoh ałtso daʼííyą́ąʼgo ádíshní, Bóhólníihii Diyin God nílíinii, nánooshkąąh, Jéíkab dineʼé ádił nidaʼiisíiʼii bá yóóʼanídíʼaah. Haash yitʼéego kééhatʼı̨́į doo? Jó, éí tʼáá díkwíltʼéhí yeeʼ.
3 Bóhólníihii díí łahgo átʼéego yąąh tsíńdeezkéezgo ání, Nichʼįʼ yitʼíní ályaii doo bikʼehgo ákóhodooníił da.
Kǫʼ ił ádzaa
4 Bóhólníihii Diyin God díí ałdóʼ shił yitʼíní ánááyiidlaa: Bóhólníihii Diyin God kǫʼ yee atídoolíiłgo yíká ádííniid, áko tónteel ałtso iididoołkʼą́ą́ł áádóó kéyah éí kǫʼ bidooyı̨́ı̨́ł, jóʼakon.
5 Áko ádíshní, Bóhólníihii Diyin God nílíinii, doo ákódííníił da, baa nánooshkąąh. Haash yitʼéego Jéíkab dineʼé kééhatʼı̨́į doo? Jó, éí tʼáá díkwíltʼéhí yeeʼ.
6 Bóhólníihii díí ałdóʼ łahgo átʼéego yąąh tsíńdeezkéezgo ání, Nichʼįʼ yitʼíní ályaii doo bikʼehgo ákóhodooníił da, ní Bóhólníihii Diyin God.
Kʼézdongo tłʼóół náátʼiʼii ił ádzaa
7 Díí ałdóʼ shił yitʼíní ánááyiidlaa: kʼézdongo tłʼóół náátʼiʼígíí bee haʼootłʼingo ítłʼinígíí bikáaʼgi Bóhólníihii sizı̨́, áádóó kʼézdongo tłʼóół náátʼiʼígíí bílákʼeedę́ę́ʼ náátʼiʼ, jóʼakon.
8 Ákohgo Bóhólníihii áshíłní, Éímas, haʼátʼíishąʼ yíníʼı̨́? áádóó ádíshní, Kʼézdongo tłʼóół náátʼiʼígíí lą́ą. Nítʼééʼ Bóhólníihii ánááshidooʼniid, Ízrel shidineʼé danilíinii bitahgi kʼézdongo tłʼóół náátʼiʼgo ádeeshłííł, jóʼakon. Doo tʼóó haa náádideeshʼáał da.
9 Áízak bá ninádahałaah doo biniyé wódah nahazʼą́ągo ádaalyaaígíí tʼáadoo nídadoodleełí da áádóó Ízrel bihodiyingo nahazʼáanii tʼáá ádzaaí nídadoodleeł índa Jerobówam baa ałkʼeedóó náás ahoolchíiłii bikʼijįʼ nishłı̨́įgo diltłish bee ádahodeeshdįįł.
Éímas áádóó Amazáíyah
10 Béthelgi nááʼiiłniihii Amazáíyah éí Ízrel dineʼé aláahgo binanitʼaʼí Jerobówam bichʼįʼ haneʼ ájiilaago ájíní, Éímas éí Ízrel dineʼé bitahgi niʼ hodeezʼą́. Kéyahgi dineʼé éí Éímas áníinii tʼáá ałtso doo bídazhneelʼą́ą da.
11 Jó, Éímas ájíní, Jerobówam éí diltłish bee hodiʼyoolyééł áádóó tʼáá aaníí, Ízrel dineʼé hakéyahdóó yisnááh dajílı̨́įgo chʼíhodiʼdootʼish.
12 Ákohgo Amazáíyah éí Éímas ábizhdííniid, Náasdi áhodoonííł yaa halneʼii nílíinii, nílááh, yówehjįʼ Júdah kéyahgóó nídílyeed; áadi bááh niyą́ą leʼ; áadi hólneʼ leʼ.
13 Nidi Béthelgi tsʼídá doo ninááhodíílnih da, háálá aláahgo naatʼáanii bihodiyingo hazʼáanii átʼé. Kweʼé hazʼą́ągi ałdóʼ aláahgo naatʼáanii bighan.
14 Áko Éímas éí Amazáíyah ábizhdííniid, Shí doo náasdi áhodoonííł yaa halneʼii nishłı̨́į da nítʼééʼ; Diyin God yá halneʼii biyeʼ nidi, doo nishłı̨́į da, nidi naʼniłkaadii áádóó tsin síkamor bineestʼąʼ áłah ííłʼíinii nishłı̨́ı̨́ nítʼééʼ.
15 Dibé bikééʼ naasháago Bóhólníihii náshidiiłtı̨́įgo áshidííniid, Nílááh, shidineʼé Ízrel shá bił hólneʼ.
16 Éí bąą kʼad Bóhólníihii bizaad yísíníłtsʼą́ą́ʼ. Shą́ą́ʼ, ádíní, Ízrel dineʼé tʼáadoo bikʼijįʼ yáníłtiʼgo hólneʼí, índa Áízak baʼáłchíní tʼáadoo bikʼijįʼ saad hidiiłtáahgo hólneʼí.
17 Éí bąą Bóhólníihii kóní, Kin haalʼáagi neʼasdzą́ą́ ałjiłnii nilı̨́į dooleeł, áádóó niyeʼké áádóó nitsiʼké éí diltłish bee nidabidiʼdootsił, índa nikéyah ahádahidoodzohgo kéyah tʼóó bahooʼihgi dadíítsaał áádóó tʼáá aaníí, Ízrel dineʼé bikéyahdóó yisnááh dajílı̨́įgo chʼíhodiʼdootʼish.
