Amos 8:1-14
8 Ákohgo Bóhólníihii Diyin God díí shił yitʼíní ánááyiidlaa: shı̨́įgo aneestʼąʼígíí tsʼaaʼ bee siką́, jóʼakon.
2 Áko áshidííniid, Éímas, haʼátʼíishąʼ yíníʼı̨́? Áádóó ádíshní, Shı̨́įgo aneestʼąʼígíí tsʼaaʼ bee siką́. Ákohgo Bóhólníihii áshidííniid, Ízrel shidineʼé danilíinii bił nihoníyáhígíí átʼé;* doo tʼóó haa náádideeshʼáał da.
3 Áko Bóhólníihii Diyin God ání, Éí bijı̨́ kin biiʼ sohodizin siʼánídóó sin éí cha nídoodleeł. Atsʼíís daneeznáanii tʼóó ahayóí tʼáá ałtsogóó nihidadílʼáago tʼáadoo íitsʼaʼí éí atsʼíís yóóʼadayiiłtłʼiid doo.
Ízrel dineʼé ábidiʼdooldįįł baa hoolzhiizh
4 Kéyahgi badahojoobáʼíii chʼééh ádaatʼı̨́į doo biniyé hojoobaʼ ádaatʼéii bikʼi naołdeehii, díí dayisínółtsʼą́ą́ʼ:
5 shą́ą́ʼ, kódadohní, Dah yiitą́ bihááʼáyı̨́ı̨́h jı̨́ hahgo bił ahodoolzhish, áko tłʼoh naadą́ą́ʼ nídaneeltʼánígíí nidahidiilnih? Hááʼáyı̨́ı̨́h jı̨́ hahgo bił ahodoolzhish, áko tłʼoh naadą́ą́ʼ ahidahididiijihgo nidahidiilnih? Bee haʼiikaahí áłtsʼíísígo ádadiilnííł áádóó béésh bikʼehgo dah adiidloohí nitsaago ádadiilnííł áádóó éí bee nihindaʼadloʼgo dah daʼdiyiidleehgo nihaa nidaʼiiniih doo.
6 Áko badahojoobáʼíii éí béésh łigaii bee nidahidiilnih áádóó hojoobaʼ nahasʼáanii éí ké bee nidahidiilnih índa tłʼoh naadą́ą́ʼ bizhool nihaa nidahidoonih.
7 Bóhólníihii éí Jéíkab baa dzólíii yee ádee hadoodzíiʼgo ání, Ádáátʼįįdii tʼáá aaníí tsʼídá doo beidiyeeshnah da.
8 Tʼáá aaníí, kéyahígíí díí yikʼee nahaʼnáa doo áádóó ákwii kéédahojitʼíinii tʼááłáʼí jinítínígo dajichxa doo índa Ííjip kéyahdi Náil tooh nílíní góyaa ayóó átʼéego tooh wóʼądadziiłhaał áádóó tó yaa náʼnoolʼąął nahalingo díí kéyahgi ákóhodoonííł.
9 Bóhólníihii Diyin God ání, Éí bijı̨́ ałníʼníʼą́ągo iʼdooʼááł, áko jı̨́ hazlı̨́įʼ nidi, chahałheełgo ádeeshłííł.
10 Nihihodiyingo áłah nídaʼadleehii baa yínííł danohłı̨́įgo áádóó nihiyiin tʼáá ałtso bee cha hahoołʼáago ánihideeshłííł. Tłʼoh yishbizh ééʼ bee áká dasoołzaazgo áádóó nihítááʼ adaʼiiztʼóodgo ánihideeshłííł. Baa hoolzhiizhgo ayeʼ tʼááłáʼí yę́ę baa atínídadinohdlehígi átʼéego áádóó tʼáá íiyisí yínííł bił iʼdooʼáłígi átʼéego ádeeshłííł.
11 Bóhólníihii Diyin God ání, Kéyahgi hodichingo ádeeshłíłígíí beidoołkááł, jóʼakon. Bááh doo bíká dazhdichin da doo; tó doo bíká dibááʼ dajílı̨́į da doo, nidi Bóhólníihii bizaad wóltsʼą́ąʼ dooígíí bíká hodidoochįįł.
12 Tónteel haʼnaadę́ę́ʼ tónteel haʼnaajįʼ áádóó náhookǫsdę́ę́ʼ haʼaʼaahjįʼ ałnáádajijahgo Bóhólníihii bizaad hadazhnitáago nidajikai, nidi doo bikʼí dazhdookah da.
13 Éí bijı̨́ chʼikéí bízháán nidaakaii baa dadzólníinii áádóó diné ániid nidaakaii dibááʼ bikʼee bíniʼ áńdaadįįh doo.
14 Samériya dineʼé éí biʼeʼelyaii yee bidahodiitʼiʼii yee ádee hadahididziihgo ádaaní, Dan dineʼé danohłíinii, nihidiyin nilíinii beʼiinaʼ binahjįʼ áádóó Bíyer-shííba bidiyin nilíinii beʼiinaʼ binahjįʼ ádee hadahidiidziihgo átʼé. Tʼáá aaníí éí bikʼeh hodidoodleełgo doo dineʼé nídadoodleeł da.
Footnotes
^ Hííbrew kʼehjí aneestʼąʼ jiníigo éí ninítʼiʼ jiní nahalingo diitsʼaʼ.
