Amos 9:1-15
9 Bikááʼ nááʼiiniihí bíighahgi Bóhólníihii sizı̨́įgo yiiłtsą́ áádóó áshíłní, Kin bíyah daniitłʼinígíí bílátahgi nídiiłhaałgo chʼéʼétiingi naa dah sitání ditsxizgo bąą áyah daniitłʼinii tʼáá ájítʼé hakʼijįʼ nidahałdaasgo ádíílííł, áko dadzidziihígíí diltłish bee nidahodeestsił. Bitahdę́ę́ʼ chʼíjílyeed nidi, doo yóóʼazhdoolwoł da áádóó bitahdę́ę́ʼ chʼíjígháah nidi, doo yisdázhdoogáał da.
2 Azhą́ hoolʼáágóó tiʼhooʼnííh góyaa adziiskai nidi, áádę́ę́ʼ hááhodiyeeshʼish; yótʼááhgóó adziiskai nidi, áádę́ę́ʼ adááhodeeshʼish.
3 Áádóó azhą́ Dził Kármel bighą́ąʼdi nidaʼádizhnilʼin nidi, há hodídéeshʼįįłgo nináhodiyeeshʼish, áádóó azhą́ tónteel bitłʼááh góyaa shitsʼąą nídazdeestʼı̨́įʼ nidi, áadi tłʼiish ahidahodiyoołhashgo há hadeesdzih.
4 Azhą́ hweʼanaʼí biyisnááh dadzizlı̨́įʼ nidi, áadi diltłish bee nahodiʼdootsxiłgo bee hadeesdzih; doo yáʼátʼéhígi áhodeeshłíłígíí biniyé háká yishʼáał doo, yáʼátʼééhjí éí dooda.
5 Tʼáá ałtsoní bee Bóhólníihii Diyin God éí nahasdzáán yideelchidgo ałtso diłhı̨́įhgo áádóó nihokáaʼgi kéédahatʼíinii tʼáá ałtso yínííł danilı̨́įgo ííłʼı̨́. Ííjip kéyahdi Náil tooh nílíní góyaa ayóó átʼéego tooh wóʼądadziiłhaał áádóó tó yaa náʼnoolʼąął nahalingo nihokááʼ ákóhodoonííł.
6 Yáʼąąsh aghánáhóóʼáadi bighango áyiilaa, áádóó nahasdzáán yikʼi dah asbaalgo áyiilaa. Tónteel bitsʼą́ą́dóó tóhígíí dah doołdóóh néidiʼniihgo nahasdzáán bikáaʼjįʼ naałtingo ííłʼı̨́. Díí tʼáá ałtso áyoolíiłii éí Bóhólníihii bee wójí.
7 Bóhólníihii ání, Ízrel dineʼé danohłíinii, daʼ shichʼįʼgoósh doo Iithiyópiya dineʼé nidahonohłin da? Shą́ą́ʼ, Ííjip kéyahdę́ę́ʼ éí Ízrel dineʼé chʼíníʼeezh niʼ áádóó Káftor kéyahdę́ę́ʼ éí Filístiya dineʼé ałdóʼ chʼíníʼeezh índa Kir hazʼą́ą́dę́ę́ʼ éí Síriya dineʼé ałdóʼ chʼíníʼeezh.
8 Ízrel dineʼé yee bóhólníihgo bił hazʼáanii éí bąąhági átʼéego bił hazʼą́ągo Bóhólníihii Diyin God biníłʼı̨́, jóʼakon, áko éí nahasdzáán bikáaʼjįʼ tʼóó áhodeeshdįįł, nidi Jéíkab dineʼé éí doo ałtso ádeeshdįįł da, ní Bóhólníihii.
9 Háálá bee hadeesdzihgo éí bee agháʼníldéhí bee tłʼoh naadą́ą́ʼ atsʼáníldéehgo tʼááłáʼí nidi doo łaʼ niʼjįʼ naaltsʼíi daígíí nahalingo ałʼąą dineʼé tʼáá átʼé bitahgóó Ízrel dineʼé atsʼáhodínéeshdah.
10 Shidineʼé bitahgóó ádił nidaʼiilzíihii éí doo yáʼátʼéehii doo nihidídóołniił da, doo nihaa nídóotʼįįł da, daanínígíí éí tʼáá átʼé diltłish bee nidahodiʼdootsił.
Náás hodeeshzhiizhdi Ízrel dineʼé yisdádooʼnił
11 Éí bijı̨́ David bighan nahasdázígíí áńdeeshdlííł; éí nídeeshtłʼı̨́įłgo ninádeeshʼááł; ałkʼidą́ą́ʼ ahééʼítłʼinígi átʼéego áńdeeshdlííł.
12 Íídam dineʼé áádóó ałʼąą dineʼé tʼáá ałtso chʼéékaígíí shízhiʼ bee dayídóojiiłii bííʼ dooleeł, ní Bóhólníihii, díí áyoolíiłii jílíinii.
13 Bóhólníihii ání, Jóʼakon, ayizhii éí tʼáá bikééʼ łaʼ nináhwiiłdlaad doo áádóó kʼéédídléehii éí tʼáá bikééʼ łaʼ wáin yąąh hayiiníihii éí bílástsiiʼ kʼinéididlée doo. Dził daníʼáii bąąhdę́ę́ʼ chʼil naʼatłʼoʼii bitooʼ łikanii nidahidilchʼą́ął doo, áádóó dah daaskʼidgóó bee nídahidiʼeeł doo.
14 Shidineʼé Ízrel yisnááh danilíinii nahjįʼ kódeeshłíiłgo daabííʼ nítʼééʼ yę́ę bííʼ nídadoodleełgo ádeeshłííł áádóó kin hadaasʼáii nidahaazhchxǫʼ yę́ę hashtʼéédeidoodlíiłgo yiiʼ kénáádahatʼı̨́į doo. Áádóó chʼil naʼatłʼoʼii kʼéédadilyéehgi kʼidadiʼdooléełgo wáin deidlą́ą doo índa dádaʼakʼehgi kʼidadiʼdooléełgo bitsʼą́ą́dóó aneestʼąʼ deiyą́ą doo.
15 Áko hakéyahgi kʼééhodideeshdlééł áádóó hakéyah haa diníʼáanii biyiʼdóó doo chʼínááhodiʼnólkaad átʼée da doo, ní Bóhólníihii nihiDiyin God.
